مسابقة التحدي الثقافية السياسية - إوعى وشك

[se_ Elsyed]

تعلن إدارة منتدى محاورات المصريين عن مسابقتها الثقافية السياسية الهلامية الكُبرى .. جوايزنا بالملايين ومن حظ الفايزين ... قرب وجرب يمكن تكون من المحظوظين ..

الأسئلة في مستوى المواطن المتوسط وهي أشبة بإستطلاع الرأي .. شاركنا بإجاباتك ومش هاتخسر حاجة بالعكس هاتكسب كثير .. وجوايزنا كالتالي ( بدون ترتيب )

1- 100 بطاقة إنتخاب ( مزورة ) مُقدمة من أمين عام الحزب الوطني لإستخدامها في الإنتخابات الرياسية القادمة وعشان هي بطاقات ملتي فانكشن ممكن تستخدمها في إنتخابات مجلس الشعب .. بس خلي بالك دي بطاقات ذكية يعني بتقول نعم وحاضر وبس .

2- رحلة مجانية لمعتقل وادي النطرون ( إحتمال تكون ون واي .. إنت وبختك بقى )

3- الحصول على شرف التصوير معكرش كمال بيه الشاذلي ( إوعدنا يارب ) .. يالله شد حيلكم لازم كلنا نتصور مع كرش البطل .

4- بطاقة دعوة مجانية للإشتراك في مظاهرة حب ستكون بدون ترتيب وبدون إستعدادات وبصراحة بقى هي سرية وذلك تأييداً للريس حسني مبارك في رحاب الجامع الأزهر الجمعة الجاية ( يعني مظاهرة شرعية وحلال والله أعلم )

يُتبع

[se_ Elsyed]

إذا علمت بإنه يوجد في مصر 19 حزب سياسي فنرجو منك إنك تبص بصه على أسماء الأحزاب التالية وتحلف بينك وبينك نفسك تعرف كام حزب منهم وتقولنا بصراحة وخلي بالك من الجوايز الهايلة اللي فوق ؟

... تعالى معانا :

1- الحزب الوطني الديمقراطي الحاكم ( طبعاً عارفينه لصاحبة ورئيسة محمد حسني مبارك وولده وولي عهده الأمين جمال بيه إن مبارك حفظه الله )

2 – حزب العمل ( ربنا يفُك سجنه )

3– الحزب الناصري ( أعتقد ده بتاع ضياء الدين داوود )

4- حزب التجمع ( ده أعتقد بتاع خالد محي الدين ذو التسعين خريفاً وتابعه رفعت السعيد )

5– حزب الوفد ( الله يرحمه ويحسن إليه ... إذكروا محاسن موتاكم )

6– حزب الجيل ( إنت مين ياه ؟- وش اللمبي )

7– حزب مصر الخضر ( بيتهيألي دول لسه ماستووش وأنظر التعليق اللي فوق )

8– حزب العدالة الاجتماعية ( وكتاب الله ما أعرفوا يا باشا )

9– حزب التكافل الاجتماعي ( أعتقد والله أعلم إن ده يا باشا ممكن يكون تبع دار أيتام إس أو إس بتوع كفالة اليتيم وكده )

10– حزب الغد ( ما كناش هانسمع عنه لولاش أيمن نور أتقفش .. ورئيسه طبعاً أيمن نور الراجل ذو الثقل السياسي ، اللي من تقله ما بيكلمش حد إلا من وراء حجاب أو من خلال مساعديه )

11– الحزب الدستوري ( أعتقد الحزب ده له علاقة بالمادة 76 من الدستور المُعدلة بالمادة 193 تقسيم ع ك )

12 – حزب الأمة ( وحياة أُمي ماعرفهم )

13– حزب مصر الفتاة ( إيوه ده معروف ده الحزب اللي هارينا إعلانات في التليفزيون لا لختان النساء يعني من الأخر بيهتم بمشاكل الفتيات وكده يعني )

14– حزب الوفاق القومي ( يا بخت من وفق راسين في الحلال مع تحيات رابطة مأذوني مصر الجديدة )

15 – حزب مصر 2000 ( طب ما تسهلها شوية وتقول كان في شهر إيه )

16– حزب الشعب الديمقراطي ( الشعب بريء منه ومن أمثاله .. ولا نسمع عنه هو في أنهي محافظة حتى )

17– حزب مصر العربي الاشتراكي ( نكره ومالوش صحاب )

18– حزب الأحرار ( طعباً ما نعرفوش لإنهم لو احرار بحق وحقيق ما كانوش قعدوا في الطراوة وسابونا في جحيم العبودية )

19 – الحزب الاتحادي الديمقراطي ( إن هي أسماء سميتموها أنتم وأباءكم ما أنزل الله بها من سلطان )

يالله كل واحد يبص في ورقة اللي جنبه ويجاوب بضمير ...

[yasser6666]

ابو السيد...انا جاوبت وسلمت ورقة الأجابة كمان وطلعت من اللجنة أول واحد لأني كنت مذاكر صم (بصراحة الأمتحان كان متسرب وكنت عامل تذكرة علي كُمي)

واسمحلي أغشش باقي الأعضاء...

الأجابة هي

-طبعا اعرفهم كلهم وبالأمارة 19 حزب كمان

أمال الحوار الوطني لتعديل الدستور اللي كانوا فالقينا بيه كان مع مين؟؟؟؟

مش برضوا مع الناس دول !!!!

بس انا نفسي أسألك سؤال ده علي جنب ومكسوف قوي اني اخلص الأمتحان وأخد الشهادة الكبيرة وأنا لسه مش عارف له أجابة

يعني أيه حزب ؟؟؟؟؟

[ابو حلاوه]

- 100 بطاقة إنتخاب ( مزورة ) مُقدمة من أمين عام الحزب الوطني لإستخدامها في الإنتخابات الرياسية القادمة وعشان هي بطاقات ملتي فانكشن ممكن تستخدمها في إنتخابات مجلس الشعب .. بس خلي بالك دي بطاقات ذكية يعني بتقول نعم وحاضر وبس .

معلهش يا سي السيد بس يعني لو كملت جميلك و نورتنا هي عليها رمز الجردل و خمسه و خميسة و لا لا اصل انا عمال و فلاحين

2- رحلة مجانية لمعتقل وادي النطرون ( إحتمال تكون ون واي .. إنت وبختك بقى )

معلهش و لا مؤاخذة رايح بس و لا رايح و يمكن يجوز احتمال جاي

3- الحصول على شرف التصوير معكرش كمال بيه الشاذلي ( إوعدنا يارب ) .. يالله شد حيلكم لازم كلنا نتصور مع كرش البطل .

دي صعبة شوية ....انت فاكرنا ايه يا سي السيد الكرش ده بالع البلد كلها يطلع ازاي في صورة واحدة

4- بطاقة دعوة مجانية للإشتراك في مظاهرة حب ستكون بدون ترتيب وبدون إستعدادات وبصراحة بقى هي سرية وذلك تأييداً للريس حسني مبارك في رحاب الجامع الأزهر الجمعة الجاية ( يعني مظاهرة شرعية وحلال والله أعلم )

انت كده سقط من نظري.... مجانية كمان..... انت عايز تاكل عرقنا .... ان ما كانش تلت حتت بعشرة و سنجة نوفي و اجرة الميكروباس الموضوع ما يجبش همه الا يعني لو تعرف محمد باشا بتاع مباحث امبابة لو خليته يخف علينا شويه اخدمك بعيوني لله و حياتك

[ابو حلاوه]

بالمناسبة الحق يقال حزب الامة اضاف للحياة السياسية في مصر فرئيسة اول سياسي مصري يحترف تطليع العفاريت ( مش تهريج ) اللي ركبها الحزب الوطني للشعب اهي دي خدمة المعارضة للشعب و لا بلاش

حزب العدالة الاجتماعية من كتر حب رئيسه للعدالة و قف امام المحكمة و اتلب له حكم في قضية ابتزاز و رشوة ده غير قضايا سرقة اموال عامة حاجة تشرف زحيح

[شاعرالرومانسية]

كدة برضة ،،، اخص عليك ياصاحبى .. بقى دة امتحان سهل وبسيط دة

وانا داخل وبقلب جامد وقلت اللجنة حتبقى شوربة ونحل كل السؤلات..

لقيت كل واحد حاطط ايدة على ورقته مخبيها من اللى جنبه :excl:

بسطها ياعم شوية ،،،، خلى الغلابة تعيش وتدعيلك :D

بس ليا سؤال اخير احيات والدك :)

.

.

.

.

.

الا هو يعنى اية ديموقراطية :D