رسـالة تحريض !

[harkahelm]

رسـالة تحريض !

ـ عمرك سألت نفسك أحنا بيتعمل فينا كدة ليه؟.

ـ عمرك سألت نفسك أحنا ليه لما دخلنا المدرسة او الجامعة عمرنا ما فهمنا حاجة غير شوية كلام نحشى بيه دماغنا ونفرغه على ورقة الأمتحان او حتى منفرغوش أهو كله كلام عمرنا مافهمناه ولا ناقشناه.

ـ عمرك سألت نفسك أحنا ليه لما أتخرجنا من الجامعة كان المستقبل مجهول وأن أحنا اتعلمنا حاجة و واشتغلنا حاجة ثانية خالص ده لو لاقينا شغل أصلاً .

ـ عمرك سألت نفسك أحنا ليه لما نيجى نحب عمرنا ما نقدر نتجوز البنت اللى أحنا بنحبها .

ـ عمرك سألت نفسك هو ليه لما بنشتغل المرتب عمره ما يكفى لأخر الأسبوع مش حتى لأخر الشهر.

ـ عمرك سألت نفسك هو ليه لما بتقضى مصلحة فى الحكومة عمرك ماتقضيها بسهولة وليه دايماً حتى لو قضيتها يبقى الموظف مكشر فى وشك وخايف يضحك وشه يشقق .

ـ عمرك سألت نفسك هو ليه الأتوبيس دايماً زحمة .

ـ عمرك سألت نفسك هو ليه انت بتخاف تقرب من قسم الشرطة وظابط الشرطة وكمين الشرطة و "مخبر "الشرطة ؟

ـ عمرك سألت نفسك هو انت ليه بتخاف من السياسة والكلام فى السياسة.

ـ عمرك سألت نفسك ليه بتخاف تعمل مشروعك الصغير او عملك الخاص وليه مافيش حاجة صغيرة بتكبر فى مصر .

ـ عمرك سألت نفسك هوليه عسكرى المرور فى مصر بيكتب مخالفات كثير على الناس الغلابة اما الناس اللى همامش غلابة ما بيعملوش مخالفات.

ـ عمرك سألت نفسك هوليه فى ناس ولاد ناس وناس ولاد البطة السوداء .

ـ عمرك سألت نفسك هو ليه الناس اللى معاهم كارت توصية بيشتغلوا وانت لا , هما يعنى ولاد مين فى مصر.

ـ عمرك سألت نفسك هو ليه فى مصر نتسأل هو انت ابن مين فى مصر ؟

ـ عمرك سألت نفسك ليه الوظيفة فى مصر باقت بالوراثة .

ـ عمرك سألت نفسك لو حصلا مشكلة بنك وبين حد كبير ومهم "مخبر يعنى " تفتر هتاخد حقك فى قسم الشرطة.

ـ عمرك سألت نفسك هو ليه كل حاجة لازمها واسطة حتى انك تجيب خمسة ترغفة عيش لازم تكون عارف البش مهندس الفران.

ـ عمرك سألت نفسك هى الحكومة بتضرب المتظاهرين ومش عايزاهم يتكلموا ؟ هى الحكومة خايفة من الكلام ليه .

ـ عمرك سألت نفسك هو انت ليه مش بتقدر تجيب شقة تسكن فيها وتبداء فيها حياتك ؟

ـ عمرك سألت نفسك هى مصاريف التعليم زادت قوى كدة ليه ؟ مادام التعليم مجانى !!!!!

ـ عمرك سألت نفسك هى الشوارع بقت عشوائية كدة ليه ؟

ـ عمرك سألت نفسك هو احناتل بقينا مخنوقين كدة ليه .

ـ عمرك سألت نفسك هو الفساد والأهمال انتشروا كدة ليه.

ـ عمرك سألت نفسك هو ليه الواحد بيدخل يشيل الزيدة فى مستشفى يطلع من غير الكلى وبدلها فوطة .

ـ عمرك سألت نفسك هو انت واخد حقك فى البلد دى ولاايه ؟

ـ عمرك سألت نفسك هو احنا مش عايشين زى الناس ليه ؟

ـ عمرك سألت نفسك هو انت ساكت على العيشة دى ليه ؟

ـ وفى الأخر ممكن تسأل نفسك هو احنا بنحرضك ولا ايه ؟

"لا لاسمح الله هو احنا نقدر ..... ولا احنا يعنى لو حرضنا أنت ممكن تتحرض ..... ربنا يخلى الحكومة {الحكومة حلوةةةةةةة}.

الحركة الليبرالية المصرية

حلم

يهمنا الأنسان ولو ملوش عنوان

harkahelm@hotmail.com

harkahelm@yahoo.com

egyptnew.blogspot.com