الإستمرار من أجل الإندحار ، الجزء الأول -

[se_ Elsyed]

منكم لله يا بُعده قلبتوا الموضوع وبقى إسود غطيس .. وليكن سوف أستمر .. سوف أستمر من أجل الإزدهار والوراور والزنهره .. سوف أستمر من أجلكم ( إن من جيبتكم الأرض )

والآن مع الإرهاصة الرابعة والعشرون بعد المئة من مسلسل " الإزدهار اللي هايجيبلنا إنهيار "

- المهم بعد الكابوس الأولاني إكتشفت إني كنت واكل أكله دسمه قبل مانام عشان كده طيف جرمون الوطني زارني في المنام .. قولت إمبارح أنام خفيف وبالفعل عملت شاندوشت جبنة نيستون مع كوباية حليب المراعي .. ولكن لم تفلح ووجدت شبح الآشكيف جايلي من بعيد ( أُستر يارب ) ودار هذا الحوار وراء الكواليس :

س س : ما ترحم أهلي بقى يا عم الشبح هو أنت سايب السبعين مليون مصري ومستلمني أنا .. هو أنا هاحارب لواحدي ولا إيه ؟.

جرمون : لقد جئت لك بالبُشرة يا أخ سين سين .

س س : مش باين .. ما فيش أي خير بييجي من الحزب الوطني .. إيه خير ؟.. مبارك قرر الإعتزال والخروج إلى على المعاش المُبكر ؟

جرمون : هأ هأ هأ ... كلا البته لن يحدث ..... لقد وقع عليك الإختيار لتكون كدر من كوادر الحزب ..

س س : نعم ياخويا .. على جُثتي .. تجوع الحُرة ولا تأكل بإسمو إيه ده ... إلعب غيرها ولا هاتحصل لما حتى أموت من الجوع ..

جرمون : وإذا قلت لك بإن العملية طرية وبها سبوبة مُحترمة .

س س : هو مش على جُثتي أوي يعني .. وإذا جت على الثدي فأنا ممكن ألعب شويه كمال أجسام ونشوف النتيجة .. يالله قولي على السبوبة بسرعه يمكن أغير رأيي لو السبوبة تستاهل .

جرمون : أيوه كد الآن قد دخلت اللُعبه ، مرحباً بك كدراً من كوادرنا الوطنية وكما قال الشاعر ونشرب إن وردنا الماء صفواً .. ويشرب غيرنا كدراً وطيناً ..

س س : يا عم مش وقت أشعار ... ناقص ساعتين على الفجر قصر وهات اللي عندك قبل ما أصحى من النوم ..

جرمون : أولاً لابد أن ترتدي تلك الخوذة التي تُميزنا عن غيرنا ولكي تكون شخص سبيشيل .

س س : ما تحترم نفسك يا جرمون .. أنا قولت مش هاييجي من وراكوا خير يا بتوع الوطني إنتوا ... بقى مدييني قرنين وتقولي إلبسهم عشان تبقى ممُيز .. الله يخرب بيت ده تمييز ... إنت فاكرني إيه يا جدع إنت ؟ وبعدين تعالى هنا .. إنتوا مين ؟

جرمون : ما سبب تلك الثورة يا أخي الكريم .. قرنين إيه وإيريال إيه ؟.. إنها علامة النصر يا أخي ولا تُسيء فهمها ..

س س : يا عم لا نصر ولا هلال .. وبعدين هو أنا اللي هاسيء فهمها ؟!! يا ريت ياخويا .. ده أنا لو لبست البتاعة دي ونزلت الشارع .. مش هاقولك .. مش بعيد أبقى ميكروباص ... لا يا عم يفتح الله ... دعبس على أي حاجة محترمة وبلاش قلة قيمة .

جرمون : طب ما رأيك تُقدم برنامج تليفزيوني ؟..

س س : قشطه .. أهو هو ده الكلام .. يا سلام يا سليم يا سلام .. ده أنا هاعمل لكم شغل عالي قوي .. قولي بقى على طبيعة البرنامج .. ويا ترى محتاجين إني أتخن شويه وأصلع زي عماد أديب ولا أطلع زي ما أنا كده على أساس إني بأمثل جيل الشباب الضايع في عصر النهضة المباركه ؟

جرمون : ستقوم يا س س بتقديم برنامج سنطلق عليه " من الاعماق " وسيختص بإستطلاع رأي الشباب ويجعلهم يعبرون بكل صراحة ومن أعماقهم عن رأيهم في عهد مبارك .

س س : يا لعب يا لعب .. بس مش شايف يا جرمون ياخويا إني لو نزلت الشارع وأستطلعت رأي الشباب ممكن يجيبوا اللي في أعماقهم .. قصدي يرجعوا لما أكلمهم عن عصر مبارك .. ومش بعيد يقلوا أدبهم عليه بإعتباري بأمثل السُلطة وإنت عارف الشباب في اسن ده بيبقوا طايشين وممكن يبهدلوني بهدلة ما أتبهدلهاش كمال الشاذلي لو نزل منشية ناصر وشافوا خلقته ؟

جرمون : إحنا عاملين حسابنا .. لا تخف يا أخي .. هل تعرف الأخ " فتحي سكريبت " ؟

س س : آه عارفوا ده أكبر ريجسير فيكي يا مصر وده المورد الأول للكومبارس الصامت والناس اللي بتطلع علشان تنضرب على قفاها في الأفلام المصرية .

جرمون : احسنت .. هذا هو .. وهو أيضاً المورد الأول لجماهير الحزب الوطني .. هذا الفتحي سيقوم بتدبير 100 شاب متكلم لبرنامجك وسنقوم بتوزيعهم على الشوارع الرئيسية بمدينة القاهرة لتستضيفهم وتستطلع آراءهم .

س س : إديها يا ريس وقول يا سيدي ... هو ده الشغل مش تقولي كفاية وإخوان وأخوات .... طب بالصلاتو عالنبي سببوبتنا في العملية دي كام تقريباً ؟ .

جرمون : 1000 ج عن الحلقة الواحده .

س س : نعم نعم .. بقى أنا عمال أقولك تجوع الحره ولا تأكل ببيت الكلاوي .. وعلى جثتي . ومن الأعماق وتقوم تقولي 1000 ج .. يفتح الله يا أستاذ .

جرمون : على فكره .. العمل الوطني يحتاج بُعد نظر وطولة بال .. وإنت مستعجل دائماً .. يا اخي الوطني 1000 ج ده مبلغ نقدي .. وهناك العديد من البدلات والجوايز.

س س : أيوه كده .. خش على البدلات والذي منه.

جرمون : 100أولاً 100 تأشيرة حج مجانية ...

س س : لبيك اللهم لبيك ... اللهم صلي عالنبي .. قول يا شيخ وأفض لا فوض فوك

جرمون : 150 فدان أرض مستصلحة في توشكى ..

س س : يعيش قائد الضربة الجوية وباني نهضتنا .... عظيمة يا مصر يا أرض اللوا .. عن إذنك خمسة يا مجمج

جرمون : إلى أين يا أخي ؟

س س : رايح أتحزب وجاي بسرعه ... أنا طول عمري بأقول إن العمل الحزبي ده هو سبب نهضة أي مجتمع .. ها في بينيفيتس تانيه ولا بح ؟

جرمون : بل هناك المزيد ، فسوف نقوم بطباعة كروت شخصية لك ككادر من كوارد الحزب الوطني تفتح لك جميع الأبواب المغلقة والحواري السد وهذه في حد ذاتها كنز لا يفنى ..

س س : طب ما تقول للجماعة أنا ممكن اعمل لهم جزء تاني من البرنامج ده وأسميه " من النخاشيش " وده لإستطلاع رأي الفلاحين في الأرياف والمزارعين أمام المدافيء في الشتاء القارص .. وكده يعني ، كمان ممكن أعمل جزء ثالث وأسمية " من التلافيف " وده هاستطلع فيه رأي الحريم ومشاكل المرأة وختان الإناث والخُلع والحاجات دي ... ..

جرمون : حسناً حسناً سأقنعهم بذك .. ولكن نريد مجهود مُضاعف يا أخ س س الليلة الكبيرة قربت وسبتمبر المبارك على الأبواب .

س س : لأ من الناحية دي ما تشيلش هم .. ده أنت هاتشوف شغل عفاريت .. ومش بعيد أخليلك مواطني البلاد المجاورة كمان ييجيوا ينتخبوا السيد الرئيس القائد الدكتور محمد حسنس مبارك ... ولكن ...

وقبل أن أستكمل الحديث الشيق مع الكادر السياسي الاخ جرمون .. أختفى طيفه الجميل كعادته .. وصحوت من نومي في غاية النشاط ومقبلاً مدبراً على الحياه كجلمود صخر حطه السيل من تالت دور ..

[Guest Mohd Gramoun]

wefr

تم تعديل 12 يونيو 2005 بواسطة Mohd Gramoun

[Guest Mohd Gramoun]

[rgergfeg

تم تعديل 12 يونيو 2005 بواسطة Mohd Gramoun

[Scorpion]

فين يا سي السيد بقية الأرهاصات ... بدال ما الواحد عمال يبص علي ارهاصات تانية خلت نفسه كرفت ...

ياللا وحياة ابوك احسن الجو بقي تقيل كده و كله سمنة ....

[Guest Mohd Gramoun]

sfdvvdfvgdfv

تم تعديل 12 يونيو 2005 بواسطة Mohd Gramoun

[Scorpion]

يا عزيزي جرامون .. المثل بيقول اللي بيزيد عن حده بيتقلب ضده... و انت كده دخلت بجد في رابع صفيحة سمنة ....

صدقني .. وحياة ابني .. انا كنت بفضل جرامون اللي كنت بتخانق معاه علشان مسائل دينية .. قبل ما يسيب مكانه لمندوب الحزب السياسي ..

علي الأقل زمان ( زمان ايه!!! الكلام ده مافتش عليه شهور معدودة ) كنت مقتنع بيك أكتر .. انا ... فما بالك التانيين ... كنت مقتنع انك بتدافع عن مبدأ صحيح حتي ولو بطريقة مبالغة و ساعات خاطئة ..

لكن دلوقتي أعتقد .. و أنا بقولها بضمير مستريح .. انك بتدافع عن وضع (مش مبدأ ) غلط بطريقة غلط .. و ما فتكرش ان فيه واحد بس .. واحد يوحد ربنا موافقك علي الكلام اللي كله "سمنة" اللي بتكرره دلوقتي ...

و أنا متأكد انك عارف و فاهم ده كويس .. يبقي ليه ؟ و ايه السبب الحقيقي بجد اللي خلاك تتغير مرة واحدة كده و تنزل كل المواضيع اللي زي بعض دي ... أكيد مش علشان تقنعنا ... ده موضوع غير قابل للأعراب ...

أنت بتدور علي شغل ؟ و الا لقيته خلاص ؟

لأن تواجدك اليوم كله علي النت تقضيه في الكتابة من صباحية ربنا لغاية دلوقتي ليها معني من اتنين .. يا اما فاضي و مش لا قي شغل .. يا أما الكتابة نفسها بقت شغلتك دلوقتي ...

آسف بجد علي اسلوبي الفج ده... لكن خلاص مش قادر استحمل ...

سيبك بقي من السياسة و ارجع زي زمان .. صدقني كنت احسن ميت مره ...

تحياتي

[Guest Mohd Gramoun]

[quote=Scorpion,Jun 9 2005, 08:06 PM

تم تعديل 12 يونيو 2005 بواسطة Mohd Gramoun

[New]

جرامون خلااااص.......... عدى مرحلة الفراخ بتاعة الحزب وبقى قاعد فى ستاربكس وبيقول ريلاكس وسسبنس وبايك. :D

فينك يا جرامون يا قديم (قبل التعديل على رأى الاخ فيولين كينج) كان زمانه قال تتحدث بلسان الفرنجة وتعيش حياتهم لقد صبأت يا جرامون.... :D

:)

[Guest Mohd Gramoun]

وfv cv cvة

تم تعديل 12 يونيو 2005 بواسطة Mohd Gramoun

[New]

ياعم .......ربنا يهديك....... شكل عينيك زغللت من كتر الكلام اللى بتقراه. :)

انا بقول جرامون بتاع زمان كان حيقول كده بس هو انا استجرى اكفرك وبتوع الامن المركزى حولك وحواليك؟؟؟ لا ياعم انا مش عايز انضرب :D

بس فيه ملاحظة عايز اقولها لك شكلك مش مدى على فرنجة خالص.......

شكلك ...

بتاع حزب وطنى. :D

مش حتعزم على العشا .... ايه البخل ده؟؟ :D

تم تعديل 9 يونيو 2005 بواسطة New

[K_FASSI]

الاخ جرمون انا ملاحظ انك نسيت الكلام الذى كنت تكتبه وتهاجم فيه الهم الوطني الكابس على انفاسنا كما انه لا يعجني تهكمك على بعض الا تجاهات السياسيه و انتي الذي تحزن عندما يتكلم احد عن رئيسك يا اخى فوق لنفسك في الدوله التى اعيش بها يتهاكمون علي رجال الدوله كلهم ولم يحدث ابد ا ان منع البرنامج او اعتقلوا مقدميه و رمهم في غياهب السجون و لم يخرج واحد مثلك و عمل فيها المدافع عن شرف العائلهالمقدسه و عمال يقول عيب و اخرسوا باقولك ايه ياخ لاتكن ملكيا اكثر من الملك و كل واحد حر في رائيه انااقول ما اؤمن به و اصدقه و الناس ده كلها لا تزيد عني شيئ بل انا اري اغلبهم غبي و غير امين على البلد ومنهم النصابين و اصحاب المصالحكاناس نعرفهم يقولون شئ في اليل و اذا طلع النهار غيروه و كفي علشان انا اقرفت من النفلق الى بسمعوه وشكرا

[wagdi]

اليويو

يا واد يا يويو

يا مبرراتي

يا جبنة حادقة على فول حراتي

آستك لسانك

فارد ولامم

حسب الأبيح يا مهلباتي

يا واد يا يويو يا مهلبية

فوق الصواني

سايحة و طرية

في كل جلسة تلبس قضية

و تخيل عليها يا مشخصاتي

حسب الوظيفة وانت و شطارتك

تظهر حلاوتك

تظهر مرارتك

لو خفضوك ترفع حرارتك

لو صعدوك تقلب جيلاتي

و بالمناسبة

و انت اللي أدرى

كان لك تحفظ على المبادرة

ليه النهاردة

بترش بودرة

يا ابن الأبالسة

يا ملطفاتي

و في النهاية

لك عندي كلمة

آخر طريقك زحل و ضلمة

حيث ان آخر القرع ضُلمة

يا اما كفتة

عند العجاتي

أحمد فؤاد نجم... الله يمسيه بالخير

معتقل القناطر- 1970

ملحوظة:

هذه القصيدة هنا بطريق الخطأ وأي تشابه في الأشخاص أو الأحداث هو صدفة بحتة....

[Scorpion]

الفاضل وجدي ...

بما انها هنا بطريق الخطأ ... فبرجاء حذفها تمامآ .. فليس لها سوي معني واحد ...و مكانه ليس فوق صفحات محاورات المصريين...

قد نختلف .. قد نغضب من بعض الأراء و لكن أبدآ لن نتخذ من الطعن و الأهانات الأسلوب الذي نعبر به عن رأينا ....

أشكرك مقدمآ لتفهمك .. و سوف أحذف هذه المداخلة عندما تقوم بما يجب عليك أن تفعله ...

تحياتي ....

[optimistic]

مش عارف ليه عندي احساس اني مش عاوزها تتحذف

[Arabisc]

الفاضل وجدي ...

بما انها هنا بطريق الخطأ ... فبرجاء حذفها تمامآ .. فليس لها سوي معني واحد ...و مكانه ليس فوق صفحات محاورات المصريين...

قد نختلف .. قد نغضب من بعض الأراء و لكن أبدآ لن نتخذ من الطعن و الأهانات الأسلوب الذي نعبر به عن رأينا ....

أشكرك مقدمآ لتفهمك .. و سوف أحذف هذه المداخلة عندما تقوم بما يجب عليك أن تفعله ...

تحياتي ....

<{POST_SNAPBACK}>

اضم صوتي للفاضل سكوربيون. يا جماعة مهما اختلفنا في الاراء لايجب ابدا ان ننزلق الى مستنقع الاتهامات و السباب حتى و لو قابلنا الطرف الاخر بها - وهو ما لم يحدث

اعيد و اكرر ان المعارضة التي تسعى لاخراس و استبعاد الاخر - مهما اختلفنا مع الاخر - ليست افضل حالا من النظام الذي تعارضه. المبادئ لا تتجزء و لا تطوع حسب الظروف

اتمنى مسح او حذف القصيدة لما فيها من تطاول و تجريح في زميل لنا اختلف معه كليا و اؤيد حقه في عرض رأيه. بس يا ريت يرد على اسئلتي :wub:

[wagdi]

لا حول ولا قوة إلا بالله....

شفتوا بقة...ده الي انا كنت خايف منه...

ليه تظنوا ظن وحش وتفتكروا إني بتكلم عن حد بعينه...

على فكرة... انا كتبت القصيدة دي لنفسي وليكو علشان تفوقوا من غفلتكم وتعرفوا إن إحنا في ضلال مبين...

أصل أنا كنت زي معظم الناس هنا شايف إن النظام هو الي وحش وإن لازم يبقى فيه تغيير وتعديل وكلام من الي بالكوا منه ده.... ثم إيه- خير اللهم ما أجعله خير- جالي في المنام واحد لابس أبيض فابيض وقالي كام بيت الشعر دول وصحيت لقيت الفجر بيأدن والسرير غرقان عرق ( أيوة متأكد إنه عرق)...

ساعتها فقت لنفسي وعرفت قد إيه انا كنت صايع وضايع وبدات أبص للدنيا بمنظور تاني خالص....

أدركت إن إحنا منسواش حاجة من غيرالريس...وإن هوا الي عارف العقريت مخبي ابنه فين...وإن المعارضين دول يا إما ملاحدة وماكفيلييين يا إما طماعين نصابين متسلقين متطلعين وعليهم جميعاً اللعنة إلى يوم الدين...

ولأني عرفت الحق...والساكت عن الحق شيطان اخرس...فقررت إني أوظف كل وقتي ومجهودي للدفاع عن جنابة قداسة النظام وتعريف الناس طريق الصلاح وإنذارهم من الخطر الداهم الأتي من أمريكا وأعوانها وأصرخ بأعلى حسي "التتار جايييييين"""

وعلشان أنا عارف إن بعض ضعاف النفوس مش حيفهموا التحول التاريخي الي حصللي وحينتقدوني ويثيروا الغبار حول دوافعي فقد اّثرت أن أخذ زمام المبادرة وأقطع الطريق على المزايدين وأنتقد نفسي بنفسي وأكشف أوراقي حتى أستطيع التفرغ للدعوة والجهاد في سبيل النظام بدون تشويش....

وياريت تحذفوا القصيدة دي لأنها بتفكرني بضياعي وجاهليتي قبل أن أعرف طريق الصواب...

وياريت ماتحذفوش القصيدة دي علشان تفكرني بضياعي وجاهليتي قبل أن أعرف طريق الصواب....

وكفاية كفاية...وموش كفاية كفاية...وكفاية موش كفاية....

:wub:

[مصرى]

طالما جتلك فى المنام يبقى على بركة الله .. هاتف ولازم يتحقق :o

اسقاط قصيدة الفاجومى على شخص بعينه تذكرنى بنكتة : واحد سأل واحدة .. عارفة أنا بفكر فى أيه .. قالت له أيوه عارفة .. قالها : آآآه يا قليلة الأدب !!

:wub: