أنا الحصان

[حسـام المصـري]

"حاسس اني حصان بيجري في سبق. و مطلوب منه يجري بأقصى سرعة. من غير ما يعرف بيجري ليه او هيوصل لفين" دا اقتباس من مسلسل رافت الهجان- صالح مرسي. و في الحقيقة السياق اللي وردت فيه العبارة مش بعيد اوي عن اللي عاوز اتكلم فيه. المفروض ان الجاسوس تعب من غربيه و من حياة التخفي اللي عايشها. كان بيقول لضابط الاستخبارات انه معدش عارف هدف واضح او خط نهاية لشغله معاهم. انا بأه حاسس زي صاحبنا بالزبط. و برغم اني عارف ان مش دا المكان اللي ابعت فيه مشاركتي. لكن الحقيقه انا ارتحت لقراية مشاركاتكم. و شايف انكم يمكن تكونو افضل ناس اسالهم السؤال دا، لانكم فنانين. او يعني عندكم حته خيال صغيرة اد كدهه. و دا لأني راجل خيالي، او يعني "مش واقعي" زي مراتي مابتقول. يا ترى انا بس اللي حاسس كدا؟ يعني الاحساس دا نتيجه ضعف مثلا؟ ولا هي حاله عامة؟ مش هوجع دماغكم اكتر من كدا. لكن على الله حد يديني اجابه شافيه. تم تعديل 7 يونيو 2005 بواسطة حسـام المصـري

[عادل أبوزيد]

الفاضل حسام المصرى

أولا مرحبا بك و شكرا لإطرائك محاورات المصريين و أنا نفسى أشعر بسعادة طاغية عندما أجد نفسى مجموعة من خيرة مثقفى مصر.

مشاركتك يا سيدى الفاضل يمكن أن نضعها فى أماكن كثيرة فى محاورات المصريين و لكن إسمح لى أن أعقب على مشاركتك بما أظنه فصل الخطاب و ليتك تتصفح موضوع بعيدا عن السياسة فى باب السياسة الداخلية و كانت قد بدأته الفاضلة شعنونة (و هى طبيبة و أنصح بالبحث عن موضوعاتها و مشاركاتها)

رأى ياسيدى الفاضل أن ما تشعر به و نشعر به هى أعراض الحياة فىظل الإستبداد حتى من صغار الموظفين.

تصفح الموضوع الذى ذكرته لك و دعنا نستكمل الحوار

و مرحبا بك مرة أخرى

[حسـام المصـري]

الأخ الفاضل عادل ابو زيد.. اشكرك في البداية على اهتمامك بالرد. لقد قرأت الموضوع الذي اشرت اليه. و في الواقع [آآآه من هذا الواقع] فإن الفكرة قد راودتني من قبل. و لكن بصراحة شديدة فإنني اراها مثل افكار اخونا عمرو خالد. فيها الكثير من الحماس و الأمل، لكن لا مستقبل لها. إن هذه الأفكار "الثورية" ان صح التعبير لا يمكن بأي حال أن تجد متنفساً او مجالا للتطبيق في بلد مثل بلدنا. مع شديد الأسف فقد أصبحنا كمصريين نعاني حالة من البلادة و السلبية و اللامبالاة، نتيجة العجز امام النظام الحاكم و الظروف الاقتصادية، و ربما الصهيونية العالمية و الامبريالية الغربية، و غيرها الكثير من مصطلحات تتردد كثيرا دون أن نفهم المقصود منها، لكن الاكيد انها تشير إلى عقبات جديدة حقيقيه في الطريق. المهم أن الأمر في النهاية يوصلك دائما لنفس السؤال و نفس الجواب. انا مثلا اعمل الان خارج مصر في احدى الدول ""الشقيقه"" [آآآآه اخرى من الاشقاء] و يراودني حلم العودة الى بلدي كل صباح و مساء. و اتساءل باستمرار عن جدوى اقامتي هنا. و عن فرص عودتي الى مصر. و الاجابه واحدة دائما.. لا جدوى من الاقامة هنا، و لا امل في العودة الى مصر في ظل الظروف الحالية. على الاقل وجودي هنا يوفر حياة كريمة لي و لزوجتي رغم بعدي عنها و حرماني من رؤيتها.

لا أريد أن ازيد فالجرح عميق لا شفاء منه. كما لم انس انني بين ادباء، و أن ليس هذا المكان المناسب لمثل هذه المواضيع.

جزيل الشكر لاهتمامك بالرد. و اتمنى لك كل التوفيق.

[هشام الجنيدى]

اخى حسام المصرى (وااااااااااااااه من المصرى )عمال يلف فى دوامه والله اعلم امتى يفوق ويعيش شويه والموضوع حاجه من اتنين .......

يا اما هيغرق فى الدوامه .........

يا اما هيعيش طول عمره فى الدوامه دى .............

وربنا يستر .............

والامل موجود غصب عن التخين ...........وقول يا رب

وشكرااااااااااااا

[حسـام المصـري]

عزيزي هشام.. انا مش ادك. مفهمتش تقصد ايه. او في الحقيقة اللي فهمته مريحنيش خالص. يا ترى دي تريقه ولا المعنى في بطن الشاعر؟ يا سيدي انا راجل غلبان كلمني على ادي.

تحياتي

[هشام الجنيدى]

لا والله مش تريقه والعياذ بالله

انا بس قصدت اقول ان حال المصرين ميسرش عدو ولا حبيب

وان كل مصرى لو سالته السوال عن اماله فى المستقبل هيقولك مش عارف الكل متحير بين الوعد بالديمقراطيه اللى نفسه يصدقه والتجربه القاسيه مع تلك الوعود التى تتناثر من افواه المسؤلين وتطلع كلها كلام فارغ ملوش اى اساس من الصحه

المواطن المصرى تايه ومش عارف هيوصل لفين .............

وربنا يستر علينا .............. :angry:

[حسـام المصـري]

انت ليه ربطت الموضوع بالسياسة يا هشام؟ السياسة جزء من الحياة، لكن مش كلها. التيه اللي بنحس بيه مش سببه سوء الوضع السياسي او حتى الاقتصادي و بس. انا شايف انه اولا.. لازم نعترف ببعدنا عن ربنا. ثانيا و ما تلاها.. مستنيها منكم :rolleyes:

تحياتي. و السلام عليكم

تم تعديل 12 يونيو 2005 بواسطة حسـام المصـري