يا ترى كنت بتذاكر إزاي ؟

[se_ Elsyed]

أنا عارف إن الموضوع ده هايقلب كثير من المواجع على السادة الزملاء اللي مخلصين دراسة أو لسه تلاميذ زي فايولين كنج أو ناصر الملك والملكية والخلافة العثمانلية ..

أعتقد إن المذاكرة بتكون لها طقوس خاصة عند كل شخص .. أو زي ما بنقول " كل شيخ وله طريقة "

وأعتقد إن الواحد في الإبتدائي والإعدادي بيبقى لسه في مرحلة العبط الطفولي .. يعني بيذاكر بالبركة وما تفرقش معاه إمتحان مش إمتحان وأهي ماشية .

نيجي للثانوي وبالذات الثانوية العامة والجامعة طبعاً ونلاقي الخطط والإستراتيجيات سواء الدفاعية أو الهجومية في المذاكرة .

- فمثلاً في نوع ما يحلالوش المذاكرة إلا وهو بيسمع الست ويا سلام لو كان ده في هجيع الليل المُظلم ( يعني إيه هجيع دي ؟ ) أو بيسمع سلو ميوزيك ويا سلام لو بعد الهجيع الأول من الليل قلب على البرنامج العام لقى بثينه كامل بتاعت " إعترافات ليلية " وسمع له قصة حب عنيفة بين تامر و سوسو وإزاي قطعوا بعض حب وبعدين في الاخر تامر إكتشف إنه لسه عيل وما طعش بطاقة ومش هايقدر يتجوز سوسو فأعمل إيه يا أبه بثينة ؟ طبعاً بتقوله روح ولع في أبو سوسو وإتجوزها غصبٍ عنه وخلي ماما تعملكوا إنتوا الأتنين ساندوتشات جبنه بالقوطة وإبقوا إقسموا المصروف سوا .

- وناس تانية ما تعرفش تذاكر إلا في جو صامت ساكن كئيب ( أنا منهم وما كنتش اطيق أسمع دبة نملة جنبي ) .

- وناس تاني تلاقيها عامله أتوميسفير حواليها يوحي لك إنهم في غرفة عمليات القيادة المركزية للقوات المُسلحة ، فتلاقي لامبة مدلدلة من السقف وصاحبنا مقربها فوق دماغه وطافي النور الرئيسي في الغرفة ، ولو بيدخن تلاقي خرطوشة سجاير جنبه ومعاها فنطاس قهوة ساده وأعقاب السجاير ماليه الدنيا والدخان الأزرق معبأ المكان وممكن كمان يكون قافل الأوضه ( حتى لا يطير الدُخان ) .

- وناس تلاقيها ماشية بمبدأ ما قل ودل ( كنت لا أستطيع أن أجلس ساعة على بعضها أذاكر ولازم أعمل تايم أوت وأروح أضرب ماتش في التليفزيون أو مسلسل شيق زي أوشين أو ذا بولد أند ذا بيوتيفول اللي بدأ وأنا في أولى ثانوي وخلص لما خلفت الواد عمر بعد 10 سنين أو أقف في البلكونة أتفرج على الشعب ، لكن والحمد لله كنت أتبع أسلوب الكيف واليس الكم ( الكيف يعني الجودة والتركيز مش الكيف بتاع المزاج والهبو :) )

- وناس تلاقيها تصل الليل بالنهار في الدح ويقولك أنا باعمل حوالي 14 ساعة مذاكرة في اليوم وتلاقيه يا كبد أمه دبل وظهرت الهالات السودا تحت عينه ونحف وبقى ولا بتوع الصومال وممكن تلاقي الواحد منهم يروح الصيدلية يسأل على حاجة تخليه مصهلل وما ينامش وطول ما هو قاعد على الكتاب عمال يديها قهوة سادة من بتاع المعازي .. وكإنها حرب أو كإنه في صراع مع نفسه ضد نفسة .. وطبعاً حالات كثيرة جداً بتلاقي الـ 14 ساعة دول صفصفوا على ساعتين تركيز والباقي في الكالتشة وكان صاحبنا فيهم بيصبي وعمال ينام على نفسه .. وإسمه عمل رقم قياسي ومش مهم هو ذاكر إزاي أو إيه .. أهم حاجة يحقق عدد ساعات أكثر من بنت خالته اللي معاه في نفس العام الدراسي ...

- وناس تاني تلاقيها بتذاكر في بتريتات .. يعني يلموا بعض وتلاقي 5 أو 6 عامين قعده عرب وبيدوها مذاكرة ولا مانع في كلمة من هنا ونكته من هناك .. وبتتقضى ..

- ولو جينا في الأرياف نلاقي ناس مزجانجية والواحد يصلي الفجر ويطلع على الزراعية يديها مُذاكرة تحت قطرات الندي حيث الصمت الرهيب والتركيز العالي .

يُتبع

[se_ Elsyed]

- والناس المستبيعه بقى تلاقيه عارف مستقبله ومقضيها صرمحه طول السنة وييجي قبل الإمتحانات بشهر ويشمع الفتلة وشوية ملخصات على شوية براشيم على التوقعات المرئية وأدخل يا جدع الإمتحان وإنت وحظك ويا صابت يا أتنين عور ( وغالباً بيبقوا عور )

- نيجي بقى للبرشامجية ورأيت منهم ناس في الثانوية العامة والجامعة في منتهى الذكاء ، بس ذكاء شرير يعني موجه لأغراض دنيئة .. فتلاقيه طول السنة عمال يفكر في طرق للبرشام ورأيت بعيني بعض الناس ينفعوا مخترعين أو مبتكرين بجد وكنت أسألهم بكل آسى ، طب يابني إنت وهو ما توجه ذكاءك الخارق ده في الإتجاه الصحيح والساعات الطويلة اللي بتقضيها تبتكر وتخترع وتحط ثاني أكسيد الكربون على بتنجنات البوتاسيوم عشان تعمل برشامه ما تخرش الميه في موضوع ما ، ما تستغل نفس الوقت في مذاكرة هذا الموضوع ؟ لكن لا حياة لمن تنادي ... وشعارهم هو " ذاكر تنجح ... غش جيب مجموع " وطبعاً نهايتهم بتبقى معروفة بيجيبوا تقديرات ومجاميع مبهرة لا تتعدى ض ج في الجامعة او 51 ونص % في الثانوية العامة ...

[New]

المذاكرة كانت بالنسبة لى عبارة عن:

اوضه هادية... شاى او قهوة.... ورق فاضى وقلم و الة حاسبة ..... واطنان من الكتب والمراجع... والدى الله يديله الصحة وطولة العمر كان يقول لى انت يابنى ممكن تفتح محل عطارة من اكوام الكتب.

ومرت سنين بعد الكلية وما اظنش ان فية ثلاث ايام يعدوا علي من غير الواحد ما يفتح كتاب او يقرأ بحث على الانترنت ...

[عصام]

متفائل انت أوى يا س س فى موضوع آخر شهر دا .. :D

آه والله ..

أصل أنا أتذكر فيما أتذكر .. إنى مرة كلمت واحد صاحبى من اللى كانوا بيذاكروا وبيخلصوا المواد بدرى .. أيام امتحانات الليسانس ..

وكان عندنا تانى يوم الصبح امتحان فى مادة مش فاكر إسمها كلمته فى التليفون ليلتها الساعة 11 بالليل وسألته إن كان خلص مذاكرة المادة .. فرد بالإيجاب ..

فطلبت منه الملازم والكتاب بتاع الدكتور عشان عمرى ما شوفتهم .. :angry:

وطلبت واحد صاحبى بايظ زى حالاتى ولعبنا عشرتين طاولة وروحنا عنده الساعة 2 بالليل .. وفضلنا سهرانييييييييييييييييييييييييييييييين .. لحاااااااااااااااد الساعة 4 :blink:

وبعدين روحنا الامتحان الصبح .. وجبنا فى المادة جيد :D

طبعا من خلال دا كله المفروض تكون فهمت أنا كنت باذاكر ازاى mfb:

[mnman]

شوف ياسيدي!!!

في الابتدائي والاعدادي مش فاكر كويس بس اعتقد اني كنت موس لاني كنت من الاوائل دايما!!! بس المذكرة مش فاكر!!!

في الثانوية العامة: ابتدعت طريقة مذاكرة مبتكرة مفتكسة!!! كان عندنا طبلية من بتوع زمان دول!! وكانت متخزنة ومحدش بيستعملها!! قمت انا بهمة ونشاط مطلعها من مخبأها و نزلت اشتريت علبة بوية و فرشة وسنفرة!!! واشتغلت نجار لمدة يوم!! و قررت اني أذاكر عليها مش علي المكتب!! طبعا الاهل كانوا فاكرين ان دي لعبة للهروب من المذاكرة!! وبابا قالي خالينا ورا الكداب!!!

المهم خلصت الطبلية و نشفت البوية!! و قمت رايح علي الصالون واحتليتة!!! امي كانت حتصاب بصدمة عصبية!! لكن الحمد لله انا والوالد اقنعناها ان مفيش ضيوف حتيجي في فترة الامتحانات!!! طبعا كنت اضلم الغرفة (تقولش بحضر عفاريت) واذاكر علي ضوء الاباجورة!!! ومكنتش احب اسمع صوت نهائي!! يعني الدوشة كانت متخلينيش اعرف اذاكر!!!

وفي الجامعة استمر الحال علي ماهو علية!!! بس كنت بذاكر اخر شهر فقط مع حضور جميع المحاضرات!! بس كنت موس مذاكرة يعني ممكن أذاكر 20 ساعة في اليوم ( أة والله)!!! وكان لازم اذاكر بورقة وقلم مش شفوي!! وكنت عامل لكل مادة كشكول اكتب فية في المحاضرة وخلاص!!! يعني لا ابيض ولا غيرة!!! وبجد مكنتش ابخل علي حد بكشاكيلي ابدا او حتي شرح!! وسعات كنت ازوغ من بعض المحاضرات لدكاترة مكنتش افهم منهم حاجة خالص!! الحفظ كان عدوا كبير!! مبعرفش احفظ نهائي!! لو مفهمتش اموت!!! والحمد لله واتخرجت بتقدير معقول مع مرتبة الشرف ... بجد بجد تقدير التخرج كان جيد جدا مع مرتبة الشرف!!! بس الي الان مدونيش المرتبة!!!

منمان!!

تم تعديل 8 يونيو 2005 بواسطة mnman

[omtmam]

فعلا المذاكر ة دى من الحاجات اللى يتقال عليها كل شيخ و له طريقة

انا عن نفسى لما اذاكر لازم اكون على الارض و فاردة كل الورق والكتب حواليا لو دخلت الحجرة تحس انك فى سوق الكانتو ولازم التليفزيون او الراديو يكون والع على كلام بس مش اغانى غير كده يبقى حانام ايام الكلية كنت باكتب المحاضرة و ارجع ابيضها و اقراها مرة كمان و احل الشيتات وكده تمام مع مراجعة كل اخر شهر على ماتم دراسته خلال هذا الشهر و المذاكرة بالورق و القلم و قبل الامتحانات يتم مراجعة كل شئ مرتين و الحمد لله كنت من الاوائل خلال المرحلة الثانوية و الجامعية و اخدت المرتبة زى منمان و بعدها الماجستير و الدكتوراه

نفسى ابطل مذاكرة بقى الظاهر بقت ادمان او تضييع وقت

[se_ Elsyed]

.. :angry:

وطلبت واحد صاحبى بايظ زى حالاتى ولعبنا عشرتين طاولة وروحنا عنده الساعة 2 بالليل .. وفضلنا سهرانييييييييييييييييييييييييييييييين .. لحاااااااااااااااد الساعة 4 :blink:

وبعدين روحنا الامتحان الصبح .. وجبنا فى المادة جيد  :D

  mfb:

<{POST_SNAPBACK}>

عشان كده كانت أخرتك إنك بقيت مُشرف ..

إوعى حد يسمع كلام الناس دول ..

إمشي يا عفريت ...

[وليد صفوت]

ليـــــــــــــــــــــه كده يا س س ؟؟؟

قلبت عليا المواجع الله يجازيك ! :blink:

شوف بقى ,............

أنا السنة دى اتبعت أسلوب فى المذاكرة و منتظر أعرف نتيجته ( أوعى تسألنى عن نتيجته لما النتيجة تطلع :D ) ,........

قبل كده كنت عامل زى صاحبك اللى قلت عليه ده ,.. اللى يحب يعمل أتموسفير حواليه ,.... يعنى كنت بضلم الحجرة و أولع لمبة المكتب , و أقربها أوى من راسى ( مرة لسعت شعرى :D ) و أشغل الكاسيت جنبى على مزيكا يانى yanni ( مش بتاع الخمارة ) و أديها مذاكرة من الساعة 12 بليل لحاد الساعة 5 الصبح , ماطلعش منهم غير بساعتين مذاكرة :angry:

و كنت أذاكر من أول السنة لحاد الإمتحانات ,.......

دلوقتى ( السنة دى تحديداً ) غيرت النظام ,...

بقيت ألعب طووووووووووول السنة , و أجى قبل الإمتحانات بشهر بالضبط , ..و انتقل لمعتقل الغازولى للمذاكرة , و الغازولى ده يبقى واحد صاحبى معايا فى السكشن عنده شقة خاصة بيه فى الهرم , بنقعد فيها أنا وهو و أتنين صحابنا تانيين ,..... نديها مذاكرة إحنا الأربعة لحاد الصباح الباكر ,.....

بنطلعلنا ماشاء الله بخمس ست ساعات مذاكرة فى عين العدو mfb: ,.....و ده عدد ساعات قياسى بالنسبة للى كنت انا بعمله ,.... B)

و طبعاً عن طريق نفوذنا الفظيع فى الكلية بنقدر نعرف الإمتحان بيدور حوالين أيه بالضبط و نركز على أبواب معينة فى الكتاب ,..... و نضرب الودع و نتكل عالله :D

ايييييييييييييييييييييييييييه ! كت اياااااااااااااااااااام :)

الله لا يرجعها :blink:

تم تعديل 8 يونيو 2005 بواسطة Violinking

[se_ Elsyed]

أقدر أقول بشكل شخصي إن أفضل طريقتين متجربين وفيهم الشفا هما اللي قالا عليهما بتمان وأختنا أم تمان قصدي أم تمام ..

فالمذاكرة البؤيئي اللي عامله زي قراية الجرانين دي بأسميها " easy come easy go " يعني اللي يتقري ممكن يتبخر بمنتهى السهولة ..

لكن تصوروا معايا المذاكرة لما تبقى بالعين وفي نفس الوقت الواحد ماسك ورقة وقلم وبعد ما يقرأ ويفهم يلخص اللي كل ده في الورق ... طبعاً هايبقى من الصعب ينسى الكلام ده .

- وفي ناس بقى تشوف الكتب بتاعتها تحس إنك قدام مخطوطات أثرية من كثر الشخبطة والتخطيط ... حقيقة مثل تلك الكُتب تُثير أعصابي .. طب فرضاً الواحد عايز يرجع للكتاب في أي وقت تاني يبقى يستخلص المعلومة من تحت الأنقاض دي إزاي ؟

- نصيحة بقى لكل اللي بيذاكروا وإنت منهم يا فيولين ياللي سايب المذاكرة وعمال تتنطط ما بين المواقع الإلكترونية .. دايماً خليك قريب من ربنا ..مش بس أيام الإمتحانات حتى إذا انقضت لا صوم ولا صلاة .. ولكن تخليك قريب منه في كل وقت

- كان عندي عادة ملازماني أيام الثانوي والجامعة وهو إني أقرأ ما تيسر من القرآن قبل الذهاب إلى الإمتحان ويا حبذا لو كانت سورة يس أو الرحمن .

[وليد صفوت]

- نصيحة بقى لكل اللي بيذاكروا وإنت منهم يا فيولين ياللي سايب المذاكرة وعمال تتنططما بين المواقع الإلكترونية .. دايماً خليك قريب من ربنا ..مش بس أيام الإمتحانات حتى إذا انقضت لا صوم ولا صلاة .. ولكن تخليك قريب منه في كل وقت

- كان عندي عادة ملازماني أيام الثانوي والجامعة وهو إني أقرأ ما تيسر من القرآن قبل الذهاب إلى الإمتحان ويا حبذا لو كانت سورة يس أو الرحمن .

<{POST_SNAPBACK}>

و الله مش بتنطت و لا حاجة ,.... كل الموضوع انى أصلاً مُعتمد على الكومبيوتر فى مذاكرتى فمن فترة لتانية باخد راحة ( كل دقيقتين كده يعنى :angry: ) و أفتح النت dsl ,...... يعنى مافى مشكل

و نصيحتك فعلاً بحاول أمشى عليها على قد ما أقدر ,..و الحمد لله ماشى بنسبة 90% :blink:

[Cleo]

أنا طول عمرى من حزب أخر 10 أيام قبل الامتحان..

طول السنة ما أفتحش كتاب... و اجى أخر 10 أيام أعمل معسكر مكثف...

أبدأ اليوم الساعة 5 الفجر.. دش سخن و كباية قهوة سكر زيادة و مذاكرة متواصل لحد الساعة 3.

من 3 ل 5 نوم...

من 5 كباية قهوة و مذاكرة متواصل لحد 11:30

11:30 نوم..

[Cleo]

فى ليسانس كان عندى اكتئاب من المذاكرة أولا لأن الكم كان كبير ثانيا لأنى كنت شايلة مادتين من سنة التلة ضيعوا عليا تقدير السنة...

كل ما أجى أذاكر... يستلمنى شيطان يزينلى كل حاجة غير المذاكرة.. تليفزيون، جرانين، مكالمات تليفون، كتب بابا... إلا المذاكرة..

عتعمل كييييف يا عب روحييييم عتعمل كيييييف يا عب روحيييييم...

توصلت أخيرا لخطة عشان أقنع نفسى إن المذاكرة على وحاشتها هى أحسن حاجة فى الدنيا...

عارفين كنت أعمل ايه؟؟

أصحى كل يوم الصبح أشرب ماج نسكافيه بهدوووووووء فى مدة ساعة كاملة وأنا أستمع بمنتهى التركيز والمعايشة لأغنية....

قارئة الفنجان

:)

[محمد شلبى]

والله العظيم حرام عليكم :)

يعنى انا هربان من المذاكرة وقلت اروق شوية وادخل المحاورات اقوم الاقيكم بتتكلموا عن المذاكرة :blush:

طبعا ليكم حق ما انتوا خلاص عديتوا(شوية نق).

بالنسبة لى انا زمان فى اعدادى وثانوى كنت ياذاكر طول السنة بس ساعة او اتنين فى اليوم واى كلام بس المهم اخلص المنهج بدرى واراجعه بتاع 20 مرة على الاقل ودى طريقة كانت ناجحة معايا تماما فى ظل الحجم القليل للمناهج.

اما فى الجامعة فالامور اختلفت وبدات المناهج تكبر وتغير اسلوبى تماما ففى بعض الاوقات لا استطيع انهاء المادة ولو مرة لانى بدات فى التركيز على المذاكرة فىالشهور الاخيرة.

اما اسوأ ما فى الموضوع هو مذاكرة الصيف ,حيث انى من اول سنة فى كلية الطب وانا باذاكر فى الصيف,كل سنة فى اول 3 سنين كنت اقوم بتاجيل مادة وامتحنها فى شهر 9 ومن اول سنة 4 بنمتحن فى شهر 8 والسنة دى امتحانات البكالوريوس فى 1/11 لغاية 17/1 ,تخيلوا الامتحانات لمدة 77 يوم ,وطول الصيف بحره وزهقه مذاكرة وما فيش مصيف الا يومين وكمان رمضان والعيد الصغير والكبير فى وسط الامتحانات آآآآآآآآآآآآآآآآآآآآآآآآآآآآآآآآآآآه :lol:

[se_ Elsyed]

أنا طول عمرى من حزب أخر 10 أيام قبل الامتحان..

<{POST_SNAPBACK}>

إمشي يا عفريت ..إمش يا بوبع خلاص التلاميذ ناموا ..

كليو طلعت تبع حزب الشيطان يا رجاله ...

إوعى حد يسمع الكلام ده فإذا كانت كليو ذكية فمش كل الناس كده يقدروا يكلفتوا العملية ويتاووا القتيل في 10 أيام ..

[عصام]

إوعى حد يسمع الكلام ده فإذا كانت كليو ذكية فمش كل الناس كده يقدروا يكلفت العملية ويتاووا القتيل في 10 أيام ..

والله .. ولا ليك عليا حلفان ..

غيرها كان بيتاويه فى ساعتين زمن :blink: