همسات جنين .....ترقب وانتظار .

[Salwa]

بسم الله الرحمن الرحيم ....

يخلقكم فى بطون امهاتكم خلقا من بعد خلق فى ظلمات ثلاثا ..( سورة الزمر ).

مالكم لاترجون لله وقارا. وقد خلقكم اطوارا ..( سورة نوح )

ولقد خلقنا الانسان من سلالة من طين .ثم جعلناه نطفة فى قرار مكين ( سورة المؤمنون)

ثم خلقنا النطفة علقة فخلقنا العلقة مضغة فخلقنا المضغة عظاما فكسونا العظام لحما ثم انشأناه خلقا آخر فتبارك الله احسن الخالقين .ثم انكم بعد ذلك لميتون .( سورة المؤمنون )

هو الذى يصوركم فى الأرحام كيف يشاء لا اله الا هو العزيز الحكيم .( سورة آل عمران )

صدق الله العظيم .....

-----------------------------------------.

لست ادرى كيف ابدأ كلامى معكم ؟؟؟؟

انتم لاتعرفونى ولكنى اعرفكم جيدا .....ولهذا ...اردت ان تعرفونى كما اعرفكم ..

من انا ؟؟؟؟

انا الحفيد الأول ....القادم ل.....سلوى.

باقى من الزمن ستة اشهر تقريبا على الاطلالة الاولى للحياة ...او لعالمكم هذا ...

ما رأيكم لو تحدثت معكم على سجيتى ؟؟؟...خصوصا انى صغير جدا وللآن لم تتكون عندى تماما كل الأجهزة ...!!!

سوف تقولون ؟؟؟..........جنين يتكلم ؟؟؟...ولعل بعضكم يقول : قال احد العارفين قديما ان الجنين يرى حياته حتى مماته وهو فى بطن امه ...ولكنى اقول لكم .

دعونى من كل هذا ....فانا لااعرفه ...انا فقط خائف واريد ان اتحدث معكم ..

لست ادرى ماهو شكل هذا العالم الذى انتظر الوصول اليه ؟؟

لقد قدم لى ابى وامى هدية عظيمة باتحادهما ومحاولة اعطائى فرصة للتعرف على عالمكم هذا ...بعون ربى وارادته وقدرته ..

لعلكم لاحظتم انى بدأت حديثى بوضع الآيات القرآنية التى تثبت معجزة الخلق ....لهذا سوف اتجاوز الشرح ...فأنا هنا لأعرفكم بنفسى ..

سوف اتابع معكم كل مراحل تطور حياتى ...

نسيت اقول لكم .......

انا الآن فى الاسبوع الثانى عشر ....عرفت انى طولى 12 سم ...قالت الطبيبة لأمى انى ساكون طفل طويل ...اعتقد ان هذا طبيعى لأن ابى طوله 187 ..وامى 162..ليست طويلة مثله لكنها اروع واجمل ام فى الدنيا ...

سوف اكمل حديثى فى وقت آخر ....

[bodda]

بص يا واد انت يا حفيد سلوى mfb:

انت محظوظ يا بنى انك اول حفيد :D

لانى زى مانا متخيل امك مستنياك ازاى

متخيل ان سلوى هاتتجنن عليك من قبل ماتشوفك :) :D

وبكره لما توصل بالسلامه وتبهدلك الدنيا وتعجز شويه :angry:

هاتعرف ان أعز الولد هو ولد الولد ( بكسر الواو )

يوووه .. نسيت ... ده انت لا عارف الواو من البتنجانه لسه

B)

حبيبنا الغالى أعز حفيد

شد حيلك فى أيام الحر الجايه دى واحلى حاجه انك هاتوصل عالشتاء

ودى يا بنى مواعيد ميلاد العظماء

مش علشان انا شتوى لا سمح الله :blink: ولكن هيه دى الحقيقة

وبعدين هاتشيل هم الصيف ليه ؟؟ ما انت قاعد فى التكييف الربانى

وامك هيه اللى هاتبقى فطسانه يا عينى

بس ولا يهمك دول هايزلوك بالشهرين دول طول العمر

ويقولولك الجنة تحت أقدام الامهات !!!!!! ;)

مع ان تفسيرى للجمله دى ان الانسان عمره ما يشوف اللى تحت رجله

وبالتالى مافيش ست هاتشوف الجنة :D

طولت عليك وعارفك مش فاضى عمال تكون فى عضم وحاجات كتير

مستنيك بكره نكمل كلامنا

:blink:

[شاعرالرومانسية]

يا اهلا وسهلا بالاستاذ......

اية ياعم مش كنت تقولنا الاول ماما وبابا مختارينلك اسم اية ...والا تيتا سلوى هى اللى حتختار اسمك...، :D

(معلش ياست سلوى على كلمة تيتا دى ...طبعا غلسة منى :D بس أكيد حتبقى زى العسل من الكتوت اللى جاى دة... :blink: ربنا يجيبة بالسلامة ويقوى مامته لحين وصوله)

المهم ... منتظرين حكاويك يا سيدى ووجه نظرك فيما حوللك من أحداث وقضايا ..( الا انت دارى باللى بيجرى حواليك والا لاء mfb: ... أصل بصراحة احنا مش فاكرين لما كنا زيك كدة كنا حاسين باللى حوالينا والا لاء... :blink:

عموما شد حيللك يلا وقولنا اخر الاخبار.... اسيبك دلوقتى يا بطل تمخمخ ، بس امانة عليك تخف عن ماما شوية وبلاش تتعبها كتير B)

من جدو ( لاء كبيرة جدو دى قوى ..كفاية عمو :angry: )

من عمو حسن الف تحية،،، :)

[Salwa]

السادة الأفاضل الكبار قوى قوى bodda وشاعر الرومانسية .

فرحتونى لما لقيتكم مهتمين بية طيب ده انا قلت انا لسة حتى (( مطلعتش من البيضة ومحدش حايشوفنى ))..صح ياسيدى المحترم المولودين فى الشتاء دول لهم مخ لوحدهم ..ماهو انا عندى خال وخالة كدة برضه وبرضه امى مولوده فى اول الشتاء وبرضه ابويا مولود فى الشتاء ..انا بس مبسوط علشان كدة مش حاخسر سنة فى الدراسة لأن حساب السنة بيبدأ من اول يناير فأنا كدة حكسب سنة جدعنة يعنى ؟؟ ماهو خالى كدة برضه ...

انا عاوز احكيلكم حاجات كتير قوى ....بس انا امبارح مكنتش فاضى ...كنت مشغول بسماع آخر الأخبار ..

كانت جدتى عملت مفاجأة لأمى وعملت لها مريلة مطبخ شيك وكتبت لها عليها ..

mama en practicas ....

وطبعا عملتها بشغل الكانفاه وكمان عملت لها فيها حرف L داخل مربع ..المربع كله بالأخضر وحرف ال L لونه ابيض ..

يعنى كتبت لها ....ماما تحت التمرين ...ووضعت حرف ال L وكأن امى لسة بتتعلم السواقة ؟؟

ماهو بعد ما اخدت الكارنيه من ييجى تسع سنين ...فضلت سنة واضعة الحرف ده اجبارى ....وده علشان كل السيارات تعرف ان هذا الشخص لسة واخد الكارنيه ..

طبعا ضحكوا كلهم ضحك جامد ....انا جدتى دى عليها افكار ؟؟؟ والله انا خايف منها مش عارف حاتعمل معايا ايه ؟؟؟

المهم سمعت الأخبار وخفت برضه تانىىىىىى....تصدقوا بيقولوا ان كل خمس ثوانى بيموت طفل من الجوع ؟؟؟؟...يعنى اكثر من مجموع اللى بيموتوا بسبب الأمراض فى العالم كله ؟؟ يعنى الجوع العن من مرض السل ومن مرض السيدا ؟؟

فضلت امى تتكلم مع جدتى وهى مصممة ان دى مشكلة عالمية !! وقالت ان منتهى التهريج محاولة حلها عن طريق جمعيات ال ong...والا المطالبة بتبرعات او معونات ؟؟؟..امى بتقول ان تكلفة معيشة طفل فى السنة (( سنة كاملة )) فى البلاد الفقيرة ..ممكن يكون 41 يورو فقط ...يعنى مثلا مثلا رغم ان اسبانيا تعتبر رقم 9 فى ترتيب الدول الغنية ورغم انها من اول الدول التى تساعد الدول الفقيرة لكن برضه لسة قدامنا مشوار طويل ..

يعنى يعنى 41 يورو دول يعتبروا اقل من مصروف اى واحد فى اوروبا واميركا فى اليوم ...

هو ايه الظلم ده ؟؟؟

هو ده العالم اللى عاوزينى اوصل له ؟؟؟

انا برضه لسة خايف ...مع انى مش حنزل فى بلد من دول بس برضه خايف وحزين ...طيب مش دول كمان زيى ؟؟ ومن حقهم يفرحوا انهم حايوصلوا فى بلدهم دى ؟؟؟ زى مانا فرحان ببلدى ؟؟قصدى ببلدينى ؟؟؟ ماهو ده له قصة ححكيها لكم بعدين ؟

يعنى رغم ان امى وابويا من هنا ...لكن انا برضه من هناك ...ماهو انا دمى فيه من هنا ومن هناك ..

باى باى مؤقتا ...انا رايح انام ..

[bodda]

جرى ايه يا واد انت يا حفيد سلوى ؟؟؟

هوه انت من الأول كده هاتشيل هم العالم ؟؟؟ :wub:

ماللى ياكل ولا يموت من الجوع حر فى نفسه

وهل تعلم ان الصومال اللى بيموتوا فيها من الجوع ممكن تزرع كل شئ؟

وهل تعلم انها من البلاد المطيرة .. يعنى السما بتنزل ميه لوحدها ؟

لازم تعرف يا بنى ان الانسان هوه اللى مجوع نفسه من كسله وتراخيه

واعتماده عالاخر يأكله

واوع تصدق شماعة الاستعمار وغيره :ninja:

بلاد كتير استعمرت واتحررت وعايشه كويس

وبلاد تانيه لم تستعمر ولكن نايمين جنب الحيط رغم مواردهم الطبيعية

يووووووه ... مش هاقلب دماغك من دلوقت

لكن افتكر بس ان ربنا قال اسعى يا عبد وانا اسعى معاك

وتصبح على خير وسلم على ماما

:o

[شاعرالرومانسية]

أبننا العزيز،،، مين قدك ياعم حتيجى تلاقى عندك جدة بتموت فيك وادى انت حاسس وانت لسة ماوصلتش اهه هى بتحبك قد اية .. دة غير حب ماما وبابا طبعا وبقية العائلة الكريمة :D

كل الحب دة يا سيدى وخايف ... ياعم شرف انت بس ولايهمك .. :angry: :angry:

ولما توصل بالسلامة ةابقى خلى تيتا تعمللك اشتراك معانا هنا وابقى ادخل نتكلم ونتباحس فى جميع الامور والمشكلات القومية والقطرية و العالمية كمان :P

بس على فكرة حتى لو بقيت سياسى كبير ، برضة خلى ماما ستو تديللك شوية من خبراتها المطبخية الغيرمحدودة ..عشان تنضم لقائمة شيفات المطبخ ;)

اما دلوقتى فماتشغلش نفسك بكل دة ..فكر بس ازاى ماتتعبش ماما ، وتوصلنا بالف سلامة

وتصبح على خير ياغالى يابن الغالين واحلام سعيدة :angry:

[Salwa]

صباح الخير ..

السادة الأفاضل bodda وشاعر الرومانسية ..

كتبت كتير ومعرفش ليه المداخلة ضاعت منى ...؟؟؟...زعلت قوى ..

لكنى اريد ان تشاركونى ما رأيته مع ماما بالأمس من صور ومراحل تطور حياتى الى موعد خروجى ( من الجنة ) اقصد ( الى الجنة الموعودة ...دنياكم ).

انا الآن فى الاسبوع الثالث عشر ....سوف اضع لكم الوصلة وبعدها نكمل كلامنا .

http://www.contusalud.com/website/folder/s...zo_desfetal.htm

[bodda]

والله مش عايز أقولك ان دول احلى تسع شهور فى حياتك

:D :excl: :wub:

لكن بلاش نكون متشائمين :blush:

ونقول وراهم برضه 4-7 سنين بدون مسئولية

او احساس ببلاوى الدنيا

واوعى تصدق تانت سعاد حسنى وهيه بتقول :

ان الدنيا بمبى بمبى

فيه ألوان تانيه كتييييييييييييير

:D

[عصام]

يا بختك بجدتك .. :blush:

لازم تعرف إن ربنا وهبك أحسن وأجمل وأرق جدة فى الدنيا .. خللى بالك منها ..

[شاعرالرومانسية]

سبحان الله يا اخى ... الخالق الناطق شبه جدتك سلوى :D

أما بخصوص خروج من الجنة اللى انت فيها .. فدة يتوقف على المكان اللى حتبقى فية لما تخرج :blush: ... لكن طبعا اى مكان - صحرا ان كان أو بستان ..يبقى امان طول ما بابا وماما وتيتا سلوى حواليك :excl: ...

لكن برضة يا عم الاجنة ( لما تخرج وتكبر شوية تبقى عم الشباب ... :wub: ( ممكن تحول اى مكان تبقى فية لجنة ...و الدنيا حتبقى فاتحالك اديها والكل بيحبك , ...و ..و

دول بس حبة تفاؤل يابنى ...

بس على فكرة ..( زى ما عمو بودا ماقالك فية الوان كتير تانية غير البنبى :D )

[Salwa]

السادة الأفاضل ..bodda ...عصام شوقى ...شاعر الرومانسية ..

شكرا جزيلا لكلماتكم الجميلة التى اسعدتنى كثيرا جدا جدا ...

انا اعرف انى اتأخرت عليكم فى الرد لكنى خلاص بيتهيألى ان فيه حاجات كتير مش مفهومة ؟؟ والواحد مش حايقدر يحدد بعد كدة اى حاجة يعملها .....الأطفال بيلخبطونى ...

حصل معايا حاجات عجيبة ...

فى آخر زيارة للطبيبة قالت لأمى ان كل شئ على مايرام ....وان اول اسبوع فى اغسطس ممكن نعرف انا ولد والا بنت ؟؟ لو ان ده مش مهم دلوقت ...وانا فى مكانى الأمين واحنا فى صالة الانتظار سمعت حديث بين طفلين ...اعتقد انهم اخوات .....قلت لنفسى ايه ده ؟؟ هو انا حبدأ افكر من دلوقت ؟؟....طيب احكموا معايا ؟؟؟..بالذمة الديالوج اللى بينهم ححكيهولكم بالتفصيل وانتوا احكموا :

- انت عارف ان فيه حضارات قديمة كانت اكثر تمدن مننا ؟..وكان عندهم تكنولوجيا ؟؟؟

- يعنى ايه ؟؟..يعنى ايه تتتتلوجيا دى ؟؟؟

- يعنى كانوا مودرن فى حاجات كتير ...

- كان عندهم dvd..,وكمبيوتر ؟؟؟

- لالا بس كان برضه عندهم تكنولوجيا ..

- قصدك دول اللى كانوا بيكسروا الأحجار ؟؟

- بالضبط .....اصلى انا معتقدش اننا جينا من القرود ..عارف ليه ؟؟

- مش عارف....لكن يمكن علشان لسة فيه قرود ؟؟؟ ومتحولوش لبنى آدمين ؟؟؟

- طيب ليه متقولش او يمكن علشان قرود زمان مش زى قرود دلوقت ....دى قرود مودرن ...يعنى دى فصيلة من ضمن فصائل قديمة ..

- انا مش عاوز اكون اصلى قرد .

- اطمئن ...اطمئن ...فيه حاجات كتير كلها كذب...

- يعنى ايه ؟؟؟...اوعى تقوللى ان مفيش حاجة اسمها بابا نويل ؟؟؟...اوعى تقوللى ان مفيش حاجة اسمها الفأر الصغير بريز ؟؟...اوعى تقوللى ان مفيش بيتر بان ؟؟؟

ماما ....ماماااااااا........مامااااااااااااااا....

- ماما جوه عند الدكتورة ومش حاتسمعك ومش حاتجيلك هو انت بتزعق ليه ؟؟ احنا هنا فى مستشفى ؟؟؟ طيب ايه رأيك بقى مفيش حاجة من دى ؟؟؟

- طيب ايه رأيك انت ....انت متعرفش حاجة ؟؟...انت عاوز تموتنى ؟؟؟ انت بتخوفنى منك ؟؟..طيب مين حايجيب لى اللعب اللى نفسى فيها ؟؟؟..ياماماااااااااااااا..

انا مش عارف ؟؟ طيب يعنى اصدق مين فيهم ؟؟

الكبير والا الصغير ؟؟؟

انا حنام شوية واكلمكم بعدين ....

سلام.

[Salwa]

وحشتونى ..

وحشتونى قوى قوى ..

امبارح كتبت لكم كتير وفجأة (( النور عملها معايا واتقطع ...يعنى راح )).

مفيش فايدة ...انا زهقت كدة من اولها .

حصل معايا حاجة غريبة من اسبوع ...كانت جدتى لسة فى مصر .

كنا فى زيارة للطبيبة ..

كنت نايم ....

فضلت تهز فيه وتحاول تقلقنى معرفش ليه ؟؟؟

فجأة لقيتها بتقول :

ولد..

شايفين ؟؟

ده ولد ...

مش ححكى لكم امى وابويا عملوا ايه ؟؟.مع ان ماما كان نفسها فى بنت ..لكنها برضه فرحت جدا ...

كنت مش على بعضى لما امى كلمت جدتى ...عمالة تقول بفرحة انى ولد ....وان شاء الله على نصف ديسمبر اكون بينكم ...

جدتى فاجئت الجميع انها كانت عارفة وكانت تشعر بذلك واحضرت لى حتى (( لبس فريق سان انطونيو ...للسلة !!........ولبس فريق البرشلونة فى الفوتبول ))...ابويا زعلان لأنه بيشجع ريال مدريد .

على فكرة انا كنت بعاند معاهم !!...هم بيقلقونى ليه ؟؟؟....هم مستعجلين على ايه ؟؟

من كام يوم وصلت جدتى وخالى وذهبنا لاستقبالهم فى المطار .....فرجوا علينا الدنيا ..

الناس كلها كانت بتبص علينا ويضحكوا ويشاركونا فرحتنا ...جدتى اخدت امى بالاحضان وباست بطنها ......قصدى باستنى .

هى بتقول انها فى حالة انعدام وزن .........يعنى ايه انعدام وزن ؟؟؟

سامع كلام غريب ومش فاهم حاجة ........

شكل جدتى مش راضية عن حاجات كتير .......كتير.

على فكرة فى آخر صورة مجسمة متحركة لى ....سوف اضعها هنا لكم ....لسة بدرى ...

لكن دلوقت ممكن تسجيل كل حركتى ووضعها على cd.

انا رايح انام شوية واكلمكم بعدين ...

نسيت اقول لكم ان طولى دلوقت 18 سم ......اطول برضه شوية من الطول الطبيعى ...

صباح الخير عليكم جميعا ....

[شاعرالرومانسية]

حمدالله على السلامة يا

فينك ياعم بقالك كتير مش بتطمنا عليك وعلى اخبارك لية ....

وحمدالله على سلامة تيتا سلوى .. وسلامة ماما ..وخالو ... وكل اللى عندك

,وخليك فى لبس ريال مدريد عشان انا بشجعه .. هههههه

ومنتظرين صورتك يا ( عم الاجنة ) .. لما تكبر شوية تبقى ( عم الشباب )

وخلاص هانت كلها اربعة اشهر وتشرفنا صوت وصورة

عموما ياسيدى تيجى بالسلامة وكدة انت حتوصل فى العهد الجديد ...( الله اعلم حيبقى جديد والا قديم ....)

اسيبك بقى تكمل نوووووووووووووووم

عمو الشاعر،،،

[Salwa]

اهلا ياعمو الشاعر ..

انا عاوز اكلمك كتير انهاردة بس قالوا لى الأحسن تفضل ساكت شوية ..

انا مش فاهم ايه الحكاية ؟؟

هو ايه حكاية بلاش كلام كتير فى الموضوع ده ؟؟

هى كل حاجة ممنوعة فى الدنيا دى ؟؟؟

هى كل حاجة فيها ......والا ؟؟

يعنى ابعد عن النار ...والا ..حاتحرقك ؟؟

ابعد عن البحر ...والا ...حاتغرق.

ابعد عن اظهار الفرحة ...والا ...حاتقلب بغم ؟؟

ابعد عن الكلام الكتير فى الموضوع ....والا ....مش حايتم على خير ؟؟

هو ايه اصله ده ؟؟

امال فين الايمان بالله ؟؟

وفين ؟؟ واما بنعمة ربك فحدث ؟؟

وفين ؟؟ قدر الله وماشاء فعل ؟؟

طيب ...فين الصح وفين الغلط ؟؟

اخاف من الحسد والقر ؟؟؟ ...اخاف من الكلام الكتير ؟؟ والا اعيش بالبركة ؟؟ والتفاؤل ؟

انا رايح ياعمو انام شوية ومش عاوز افكر ....

[bentmasria]

الحبيبة مدام سلوى

قل لن يصيبنا الا ما كتب الله لنا وربنا سبحانه وتعالى يحفظ هذه الملائكة فى احسن حال دائما ارجوكى كملى وماتنسيش تسجلى فى عملك الادبى الواعد ده انك خفتى مرة واترددتى ثوانى وقلتى افكر وبعدين رميتى حمولك على رب كريم وكملتى الحكاية بكل تفاصيلها

انا فاكرة كويس يا مدام سلوى ومحمد ابنى تعبان وهو فى اشد حالات الابتلاء قلتى لى اكتبى واحتفظى بكل الحكايات وكل مشاعرك احفظيها فى كتاب الذكريات عشان ابنك لما يكبر يشوف ويعرف احساسك كان ايه والموضوع ده حصل وموش قادرة استنى لما يكبر عشان احكى له واقرا له

ربنا يتمم لبنتنك الغاليه بالف سلامة ويطمنك عليهم هم الاتنين خلاص هانت كملى حكاياته وبكره يكبر ويحكى لنا بلسانه هو عن تيتا سلوى اللى علمته وبتعلمه اجمل واحلى الحكايات

تفاءلى بالله خير وثقى فى رحمته ونتمنى ما تحرميناش من السلسلة الرائعه دى من همسات جنين

رغم انى ما شاركتش قبل كده بالرد الا انى بتابع بمنتهى الاهتمام وربنا يعلم اد ايه بندعى للملاك الجميل ينورنا ويملا دنيتك سعادة ورضا باذن الله تعالى

:D ;) B)

دول فرحة الدنيا وزينتها ياغاليه

[Salwa]

بنت مصرية جميلة مرت من هنا ...

بنت مصرية رقيقة همست همسة صاخبة .....زلزلت الهدوء المختفى على استحياء ...

صحيت ....

ليه افضل مستخبى وهربان من كل حاجة ....بالنوم ؟؟

زرعت فيه الأمل مرة تانية ......كبر الأمل ....هرب الخوف .

انا انهاردة اعلنت احتجاجى ...ضربت ضربات متواصلة فى جدار ( يحمينى )..

ثم استكنت فى دعة ...

آمنت بالله...

آمنت بالحافظ ....الكريم ...الحنون .

[Folana]

السلام عليكم ورحمة الله وبركاته .....

ايه الحكاية ياعم الجنين ..بطلت تبعت لنا همساتك ليه ...انا عارفة انك بتحضر شنطتك علشان تيجى بقى تنورنا وتنور جدتك سلوى اللى اكيد هى منتظراك بشوق عارم....

مستنين البشرى ياسلوى علشان نهنى ونبارك ....

تم تعديل 11 ديسمبر 2005 بواسطة folana

[Salwa]

مش ممكن سيدتى الفاضلة فلانة ؟؟

مش ممكن ؟؟

اأنتى تقرئين الغيب ؟

اليوم فى الساعة العاشرة وعشر دقائق....

تنسمت اول نسمة من عالمكم الجميل الذى سيصبح عالمى ايضا ..

كان من المفترض ان يكون ميعادى فى اواخر هذا الشهر لكنى فضلت التعجيل بالميعاد..

كل شئ على خير ما يرام ...

اجد دفء انسانى رائع يرفرف حولى ...

اسمع همسات الكبار ...ياله من ولد ....حتى فى شكله ...يرضى جميع الاطراف ..

ياله من وليد هادئ ...

جدتى لامى ...تحتضن جدتى لابى ....اتفقتا على (( افسادى )) ..

قالت لى جدتى لابى :

نحن هنا كى نلغى كل قوانين والديك ...

مهمة والديك تربيتك وتوجيهك للسير فى خط مستقيم ... ....ومهمتنا توجيهك للسير فى كل الاتجاهات !!!...و ان يكون لك رأى خاص بك ...

ان قالت امك : لاتأكل كثيرا من الحلوى ..

فسوف تأتى الجدات لك بكل انواع الحلوى ...

قالت لى جدتى لامى :

مهمتى افساد كل ما تصلح امك .....

انتهت مهمتى .....كنت كالصقر ....اسهر بعيون مفتوحة ...وآن اوان التغاضى ...وقد اخترناك ...

اخترناك كى نمارس معك حنان بلا قيود ....

الكل فى حالة فرحة وفى حالة حب ووئام وسلام ...

تعبت امى كثيرا .....فرح ابى كثيرا ...قبلنى وهو ينظر بحنان طاغ لامى ويقول لها ....شكرا يازهرتى الجميلة ..انه اجمل حتى مما كنت اتخيل ..

اترككم مؤقتا ...

انا ايضا احتاج للنوم بعض الوقت ...

[bentmasria]

يللى ياقمر ياللى نورت دنيتنا

املا الدنيا ضجيج

اوعى تخلى جدتك ترتاح

كلمها واحكيلها ولاغيها طول الليل

وريح مامى شويه اكيد تعبتها كتير

المهم

نورت دنيتنا الكبيرة وسبت بيتك الصغنن واسعدت قلوب كل اللى حواليك ربنا يبارك فيك ويحميك يارب

مستنيين حكاويك وسهرك وطول لياليك ياترى تيته حتحكى ايه بعد الاسبوع الاول؟؟؟؟؟؟؟؟؟؟؟؟؟؟؟؟؟؟؟؟؟؟؟؟

:blink: mfb: :) :D نورت قلوبنا ودنيتنا يا اول واجمل حفيد لمدام سلوى :D :P :wub:

[شاعرالرومانسية]

نورت يا جنينا من بعد طول انتظار ..

وحنسمع همساتك ليل ويا نهار ..

تملا حياتك بهجة ..

وتملا الدنيا عمار

من غير مانشوفك حبيناك .. وكنت بينا حى

وكل يوم نقول اهو قرب .. واهو خلاص جى

واديك وصلت بالسلامة ..

ومليت الدنيا ضى

خلينا نسمع صوتك .. فى السما دايما زى الرنين

وعيش حياتك واوعى تبقى مرة حزين

وخلاص مش راح نقول بعد انهاردة

ابدا .. ياجنين

الف حمداللة على سلامتك يا طفلنا السعيد،،،