محمد محمد محمد صليب

[wagdi]

مش عارف إيه حكاية الأحلام معايا....

امبارح جالي في المنام نفس الهاتف....

وقاللي القصيدة دي...وقاللي يابني روح انت متغطي...

وصحيت من النوم برضه على الأدان وبرضه السرير كانت غرقان عرق....

وبرضه متأكد إنه عرق....

والمرة دي احساسي بالندم زاد... وحسيت قد إيه انا كنت بأظن في أسياد الناس سوء...

قد إيه انا كنت انسان وحش....ضبع...دراكولا...خفاش...

بتجشأ من كثرة الأكل..!!

وتذكرت تلك الليالي المظلمة التي ظللت اتحدث فيها مع شرزمة من المواطنين عن النظام وعن ضرورة تغيير الأسياد...

وقررت أكسب فيكو ثواب وأفهمكوا الي انا فهمته...

قالك الفساد موجود ولكنه مش موجود ومع إنه موجود في الحكومة لكن الحكومة بتحارب الفساد لأن هيه أصلاً مافيهاش فساد....

وقالك الحكومة عملتلكو الانترنت علشان تتفرجوا على الافلام السيكس مش علشان كل ندل جربوع مايعرفش عن السياسة غير ان هيا موتت عيلته من الجوع...أقول هؤلاء الصيع بعد أن منت الحكومة عليهم بنعمة الانترنت عضوا الايد الي اتمدت لهم و أخذوا يتحينون الفرصة للتبول في كل إناء.

قالك الحكومة العميلة بتحارب العملاء الذين لا هم لهم إلا بث السموم في الشعب العميل... وده برضه واضح في اساليب العمالة المكشوفة التي يتبعها العملاء العمليين والعملاء العلمانيين والعملاء العلميين والعملاء المعمول فيهم...

قالك الرأي له رأي أخر مساو له في القوة ومضاد له في الاتجاه...وكون انك مش قادر تفهم هذا الرأي إلي هو نور الشمس وبدر اليل يبقى انت حمار...ولو خمسين واحد مش فاهمين يبقى الخمسين حمير...وده لأن الرأي إلى هو له رأي تاني واضح زي نور البدر وشمس الليل...والشمس والقمر مايخفوش إلا عن الأعمى...

قالك ثم انت لو اتكلمت ورديت بالموافقة تبقى متسلق ولو بالمعارضة تبقى حقود وحسود ولو سكت تبقى سلبي...ولو صرخت تبقى بتهيج الشبان...ولو بكيت تبقى بتستعطف الشابات...ولو طفشت تبقى جبان...ولو قعدت حتفضل حيوان...

قالك ان عصور الديمقراطية و نقاط التحول التاريخية في حياة الشعوب لابد لها ان تمر بنقاط حرجة وأعناق أزايز...وفي زهوة هذه الصحوة التي يتكاتف لها ابناء الشعب الضال البار بأبويه تخرج علينا ذئاب الجبل من ظلام الكهوف وشرايين اليأس لكي تنتفض وتسقط عنها الاقنعة وتنكشف ولكن هيهات فأين هم من أسد الغابة وقاهرالديابة انسان الغاب طويل الناب....

أعلم أني أطلت عليكم وأعلموا أني لا اريد تعليقات أو مزايدات أو مناقصات أو مرابحات ...وأنا أكتب وانتو تسمعوا وهوه ده النظام....

ماحوظة" النظام هنا المراد به النظام مش النظام"

كفاية كفاية...موش كفاية كفاية....كفاية موش كفاية....

والأن مع القصيدة الي الهاتف جاللي بيها....

والحمد لله الهاتف المرة دي عرف المشكلة الي كانت حتحصل من القصيدة الأولى فجاب لي واحدة متسمية جاهزة....

محمد محمد محمد صليب

مؤلف اغاني وشاعر اديب

يجوز راح تقول ان اسمه غريب

ولكن ح افهم جنابك قوام

محمد محمد ومسلم قوي

وممكن يهودي لئيم ملتوي

وممكن صعيدي ومن ملوي

وممكن منوفي وممكن مدام

وممكن يقول للبصل يا قمر

ويحلف بان البقر ع الشجر

وفارش خدوده لعالم غجر

وجاهز قفاه لاحتمال القلام

مؤلف اغاني ولكن بلا

وكاتب وشاعر ويلعب جلا

وله في الحياه كلها مشكله

ملخصها كلمه -حتدفع لي كام

وتدفع فيكتب ادب بالطلب

تعوزه حماسي تعوزه طرب

تعوزه فكاهي يقول لك وجب

كانك في مسمط بتطلب طعام

ويعرف يزمر لكل العهود

ويمسك كمنجه ويلعب بعود

ولومصر دي يحكموها اليهود

حيصبح يهودي وممكن حاخام

وله حاسه سادسه تشم الميول

وحافظ كويس اصول الاصول

ويعرف يطاطي ويعرف يقول

يعيش اي حاجه ويضرب سلام

شريف المنباوي - وكيل نيابه

[Aladino]

ايه يا أخ وجدي

ابه الهلوسة اللب انت فيها دي ...........انت مش ملاحظ ان الجو مكهرب في مناقشة موضوع مماثل ............وتسكب مزيدا من البنزين ........

ده الى جانب الاسفاف والانحطاط في كتاباتك .........واستخدام ألفاظ خارجة وجارحة وايماءات جنسية.............بالاضافة الى اللعب على الاوتار الحساسة......واختيار عنوان الموضوع بعيدا عن جوهره لاغراض غير نقية

فارجو من الادارة تعديل العنوان ........أو ازالته نهائيا ....

[wagdi]

ايماءات جنسية؟؟ اسفاف ...

اوتار حساسة...

اغراض غير نقية؟؟؟

أرجو من الادارة ازالة الموضوع ....

[وليد صفوت]

ايه يا أخ وجدي

ابه الهلوسة اللب انت فيها دي ...........انت مش ملاحظ ان الجو مكهرب في مناقشة موضوع مماثل ............وتسكب مزيدا من البنزين ........

ده الى جانب الاسفاف والانحطاط في كتاباتك .........واستخدام ألفاظ خارجة وجارحة وايماءات جنسية.............بالاضافة الى اللعب على الاوتار الحساسة......واختيار عنوان الموضوع بعيدا عن جوهره لاغراض غير نقية

فارجو من الادارة تعديل العنوان ........أو ازالته نهائيا ....

<{POST_SNAPBACK}>

معلش يا سيد aladino ,....

بس دى مش هلوسة و لا حاجة ,...و أقرأ الموضوع تانى هتعرف ,......

ثم الجو عمره ما حيبقى مكهرب ,..... لأن أصلاً ما فيش حاجة تستاهل الحالة اللى حضرتك بتوصفها ,..... و عمر ما المناقشات مع قليلى الحيلى بتعمل جو مكهرب ,...

و قد اسأت إختيار الكلمات عندما وصفت كلام الأخ وجدى بأنه بنزين يسكبه ليزيد المشكلة ,... و الخطأ انه لا يوجد مشكلة أصلاً لكى تزيد ,.......

أما عن الأفاظ الجارحة فإبمكانك الرجوع الى نص الكلمات الأصلية لدى الأخ جرامون و التى اكتفى الأخ وجدى بإقتباسها من مصدرها ( إقرأ موضوع الأخ مخلص ) ,......

تحياتى,....

[Aladino]

يا حضرات

مال الموضوع دة وجرسون الحزن الوطني ..........ايه اللي جاب سيرته ...لو الكاتب كان عايز يعلق على اي موضوع من

المواضيع التافهة اللي بيقدمها سالف الذكر........كان قدمها خلال اي مشاركة من مشاركاته الهلامية ........

اللي بالكوم في المنتدى...........لكن اختر عنوان ملهوش اي علاقة عن هو اللي كاتبه ........

اللي جاب القصيدة دي والاسم الرباعي ......هو بيطلع بطاقة تموين ولا اية ...؟

الموضوع تزامن مع موضوع زينب ومناقشته في المنتدى .......هل بتلمح من بعيد أو قريب عن الموضوع ........ياريت اسمع اجابة واضحة وشافية

[حسـام المصـري]

الحقيقة مقدرتش افهم اخونا "علاء الدين" زعلان من ايه. انا كنت نازل في الصفحة علشان اوصل لـ "اضافة رد" و اشكر اخونا وجدي و اهنيه على المشاركة اللطيفة جدا و المعبرة جدا في نظري. فوجئت بكلام مفهمتوش و ردود برده مفهمتهاش. على كل حال.. اشكرك يا اخ وجدي.

يا ريت كمان حد يفهمني ايه الحكاية.

تحياتي. و السلام عليكم

[wagdi]

الأخ الكريم علاء الدين....

الموضوع كله لا يعدو عن مجرد تناول فكاهي لحال البعض...

والبعض هنا لا أقصد بها فقط أشخاص بعينهم في هذا المنتدى ولكن أقصد بها هذه النوعية من البشر التي تحترف النفاق وتتعاطى الرياء وتجادل في ما لا يحتمل الجدل...

"الموضوع تزامن مع موضوع زينب ومناقشته في المنتدى .......هل بتلمح من بعيد أو قريب عن الموضوع ........ياريت اسمع اجابة واضحة وشافية"

يا سيدي أنا لم أقرأ موضوع زينب الا بعد أن أشرت أنت إليه... وبالمناسبة هذه القصيدة كتبها شريف المنباوي منذ أكثر من 30 سنة ورواها عنه أحمد فؤاد نجم في مذكراته...

والأسم الذي استخدمه الشاعر في القصيدة لا يعدو عن كونه مثال تعبيري للتناقض في المبادئ لدى البعض... وهو أمر ظننته واضحاً...

ولهذا فقط أستخدمته كعنوان....وأعذرني لأني بعيد عن مصر منذ فترة كبيرة ولا اعرف أن الحساسية وصلت إلى هذا المستوى... ولو كنت أعلم أن هذا العنوان سوف يثير حفيظة البعض ما أستخدمته....

وختاماً فأنا لازلت أرحب أن تحذف الادارة الموضوع إن كانت ترى أن فيه ما يضر او يسئ...

[مصرى]

تصدق وتآمن بالله

إنت أجدع من أنور وجدى :angry:

[Alshiekh]

انور وجدى ميت وماتجوزش عليه الا الرحمة !

[تصحيح]

الاخ الفاضل وجدي

قرأت موضوعكم و بدأت الاستعداد لكتابة رد ..

المشاركة الاولي بعد موضوعكم أزعجتني ..

اصبح العوج في الفهم وباء

ما كتبتم يكاد أن يكون قصيدة ينشدها معظم المصريين بالطريقة المصرية المعروفة ..

السخرية من الحال المعوج

و شكرا