وجوه

[حسـام المصـري]

من ساعة ماجتني فكرة المقال و انا محتار.. احطه فين بس يا ربي؟ موضوع جاد؟؟ لا مش جاد اوي. طيب موضوع خفيف؟؟ برده مش خفيف اوي. الادب؟؟ يا رااااجل ;) . لكن الظاهر انها بقت عادة عندي و قررت اقدمه هنا، في القسم الادبي- مع اني عارف و الله اني مش اديب :rolleyes: لكن اعمل ايه.. حبيتكم :excl:

المهم.. اكيد كلنا ممكن نرتاح لحد من مجرد نظره في وشه. كتير كنت بافتكر اني مختلف عن الناس علشان ساعات كووووووول اللي اعرفهم يقولو ان الامورة دي "حلوووووه اوي" لكن انا مش شايفها كدا. و ساعات مش شايفها كدا خالص. و ساعات "خالص" دي بتتكرر كذا مرة- هي و ظروفها بأه. دا حتى البنت الوحيده اللي اعجبت بيها بجد في الكلية مكنتش حلوة. كانت قصيرة و ضعيفه كدا و وشها كله حبوب. لكن عجبتني. علشان متفهموش غلط.. عجبتني :P

الغريب.. ان بالفعل في وجوه كتييييرة جدا. اشكال و الوان و مقاسات و تقسيمات ملهاش اخر. سبحان الله.. في وش طويل يخليك تفتكر انه عقل صاحبه دورين، و في وش مضغوط كدا لدرجة اني باستغرب عقله محطوط فين. في وجوه مستفزة، و في وجوه وقحة. في ناس تشوفها تحس انه لازم يكون "قليل الادب" و ناس تانية لازم يكون ملك. وجوه تريحك، و وجوه تثيرك. وجوه تشعل فيك الرغبة، و وجوه "تتوبك عن الصنف كله" :P . في وجوه حلوه، و شكلها وحش. و جوه وحشه، مع انها جميلة. في وجوه تعبانه و صفرا و مجهدة، لكن منوره. و في وجوه كئيبه و عبوسه، لكن مريحه. في وجوه بتضحك دايما، انا بشوفها حزينة. و وجوه ملخبطه- حاشى لله بس علشان توصل الفكرة- لكن بشوف فيها هندسه معجزة و سابقه زمنا و اكبر من قدرتنا على الفهم او الاستيعاب. بجد بجد.. معجزة.. سبحان الله الخلاق العظيم. حتى الناس اللي بشرتها سمرة، انا مش دايما بشوفها سمره.

هو ايه الموضوع؟ اتلخبطو ولا لسه mfb:

ابدا.. مفيش موضوع mfb: . كل الحكاية اني ساعات اشوف واحد اسمر، و يمكن اسود، لكن مع ذلك كإن في اضاءه قوية لكن مصدرها خفي. و احيانا اشوف حد بشرته بيضا، لكن بحس ان "عليه غضب ربنا". ساعات تعدي من ادامي واحده- او واحد :) - و في ثانية الاقي نفسي مراقبه بعيني و مش قادر اسيبه يفلت مني. عيني ملاحقاه و مرتبطه بيه. كل ما يبعد ادايق و ابقى عاوز انده عليه و اقوله استنى يا اخي ملحقتش اشوف "جمالك". و لما النضارة- رفيقه العمر- تنزل شوية ارفعها بسرعة علشان مفوتش لمحه.

اذا راقبت حد بعنيك من غير مياخد باله- و دي هوايتي المفضله- هتشوف حاجات مذهله. لما تراقب وش حد هتشوف جواه. ايا كان الشخص اللي بتراقبه.. بصله كويس، افهم وشه بيقول ايه، ايماءاته، تعبيراته العفويه و هو بيكلم اللي جنبه، حركة عضلات وشه اللااردية و هو بيتكلم في الموبايل، اتساع الفتحه اليمين في مناخيره و انقباضها تاني بسرعة بدون ما يقصد، حركة ودنه لورا و ادام برده من غيرما يقصد، ضحكته، عبوسه، ايماؤه براسه للسلام على واحد يعرفه معدي بالصدفه، حركة حواجبه لفوق و تحت كانها بتشاغلك من ورا صاحبها، لمحته لواحده حلوة معدية، او لراجل عجوز اتكعبل و وقع. نظرة عنيه و تركيزها على طفل بيلعب بطوبه هي كل دنيته ساعتها...

... و غير كدا تفاصيل كتييييره اوي.

لما تشوف كل دا..

هتعرف اد ايه البني ادم دا..

بني ادم.

مش مهم هنا هو عايش ازاي، ولا سلوكياته شكلها ايه، بيصلي ولا لأ، محترم ولا سافل و ابن ستين. كل دا مش مهم. المهم انه.. زيك.. انسان.

بتكلم عن نفسي.. بحس ساعتها اني محتاج احضنه. بحس اني اعرفه. بحس- ساعات- اني بحبه. بحس بانتماء ليه. بحس.. اني قابله بعيوبه و انحرافاته و غباوته و اخطاؤه.

بحس انه..

انا

لما بدأت الاحظ القصة دي كنت لسه في المدرسة. كنت دايما افتكر انها عادي يعني، عيل و عجبته واحده حلوة- ما هو طبعا ساعتها كانت البنات هم كل الدنيا :o . بعد كدا لما كبرت و بدأت دماغي تنشغل بمناطق تانية- جنب البنات طبعا :D قلت لأ مش هو دا الموضوع. بدأت افكر و افكر و افكر و موصلتش لحاجه. قلت يابني انت اللي حمار. هتعمللي فيها فيلسوف عصرك، هي دناوة و قلة حيا مش اكتر. الله.. لأ يا عم مش كدا. مش راجل دا ولا ايه؟ متقوليش بأه اني معجب بيه يعني.

انا لحد دلوقتي مش فاهم. لكن اللي عارفه كويس اوي، و متاكد منه، ان بالفعل الوجوه فيها اسرار. مش كدا برده ولا انا... حمار

تحياتي.. و السلام عليكم

[Salwa]

توقفت عند موضوعك ...قرأته ثم اعدت قراءته ...ثم تركته .

وجدت موضوع آخر لك بنفس الاسم .....لغيته ....قرأته قبل ان الغيه لأنه مكرر ..

عدت مرة اخرى وقرأت موضوعك ...ضبطت نفسى وانا اقرأ الموضوع اكثر من مرة .....لماذا؟؟؟...لماذا قرأته اكثر من مرة ؟؟؟...ببساطة ...لأنك تقول شئ افكر فيه دائما ...دائما ..

انا ايضا لا احكم على الوجوه ....الوجوه مجرد قناع ...والوجه ككل اناء ينضح بما فيه ..

كدة ببساطة وبدون تعقيد ..

الجمال اراه على الوجه ..نابع من الأعماق ..

احيانا بدون اى تفسير ...تتقابل مع شخص جميل الوجه متناسق التقاطيع دمث الأخلاق ودود ....وتشعر بنفور منه ...تحاول ان تدارى شعورك ولكن شئ داخلك يرفض حتى النظر اليه ...وان كنت صادق شفاف فسوف تثبت لك الأيام صدق احساسك ..

الاحساس لا يكذب ....لا يخدعنا ابدا ...

مسألة شخص دميم وشخص جميل تختلف مقاييسها من شخص لآخر ..

اعتقد ان الوجوه تظهر الضمائر ...يراها فقط ذو البصيرة النافذة ..

كل الاشياء الجميلة تنعكس على الوجه وتعطى صورة اكثر بهاء من الصورة التى تراها لأول وهلة ..

اعتقد ذلك ...

توجد وجوه جميلة ومريحة وتشعر مع اصحابها بالأمان ...وجوه تجبرك على ان تكون على سجيتك ..

وجوه تجبرك على عدم الخداع ...

تحياتى ....

[حسـام المصـري]

اختنا سلوى.. احسست من حديثك انه مكتوب في وقت لم تكوني مرتاحه فيه. يعني بالبلدي "مزاجك مكنش اد كدا". اتمنى ان يكون خير، او ان اكون اسأت التقدير. و اعذريني اذا تباسطت معك في الكلام، فلقد رأيت الجميع هنا يقولك "يا مدام". لكني حديث العهد بالمنتدى و ليس لدي علم ببيانات الاعضاء الشخصيه.

و الآن إلى التعقيب..

"انا ايضا لا احكم على الوجوه ....الوجوه مجرد قناع ...والوجه ككل اناء ينضح بما فيه"

لاحظت تناقضا لم افهمه بين كون الوجوه قناعا، و كونها تعكس ما بداخل النفس.

اختي العزيزة.. ربما لم اوضح وجهة نظري بالقدر الكافي.. انا لا اتحدث هنا عن كون احساسي تجاه الشخص صحيحا ام لا. كما اني اختلف معكي في كون الاحساس لا يكذب ابدا. المقصود مما كتبت ان الوجه هو بطاقة اثبات الانسانية. و ما نراه او نحسه من متابعة وجوه الاخرين هو "الكود" الالهي الذي يعطينا البيانات الحقيقية عن هذا الشخص. نعم.. البيانات الحقيقية. فهناك مثلا لصوص ذوو قلوب رحيمة. و هناك من نظنهم ملائكة و لكنهم العن من الشياطين.

ليس ما نراه في وجه انسان مطابقا بالضرورة لما نراه في افعاله. و لكن ما نراه في وجه انسان مطابق لحقيقته التي ربما غطاها الوحل لسبب او اسباب لا تعنينا هنا.

كنت أسأل إذا كان رأيي صحيحا. هل الوجه فعلا المرآة الربانية للنفس الانسانية؟ و هل بشرط الوحيد ان نحسن قراءته؟

تحياتي. و السلام عليكم

[Salwa]

صباح الخير ..

بجد بجد مكانش فيه اى سبب يجعلنى (( مزاجى مش رايق )) ..بالعكس.

بس الحقيقة انا احب الرغى فى المواضيع اللى بتعجبنى وخفت استطرد واستمر ساعة والا حاجة .......وانسى نفسى ...مانا اصلى اعشق الكتابة والتحليل ....

(( الغير منطقى )).....والموضوع ده الحقيقة موضوع ثرى جدا ...وممكن يتقال فيه صفحات وصفحات ......

مسألة انى قلت كلام متناقض ...............هذا غير حقيقى .

او لعلى لم اوضح كلامى بطريقة كافية على اساس انه مفهوم !!!..او انا اتهيألى كدة !!!.....

انا قلت ...الوجوه تعكس الضمائر ...وهذا واضح لذو البصيرة النافذة .

وايضا عندما قلت ان كل اناء ينضح بما فيه ....

يعنى يعنى انسان او شخص يرى ما امامه كما هو .....سوف يرى وجه كالشمع سواء كان جميل او قبيح او دميم على حسب مسميات الاشياء بالنسبة لكل شخص ....صح ؟؟...اتفقنا لحد كدة ؟؟؟....

لكن الانسان اللى ربنا عطاه القدرة على سبر اغوار النفس البشرية وعنده مقدرة لاستنباط اشياء ومشاعر خفية فى محدثه !!!! بالقطع هذا الانسان سوف يرى الآخر وكأنه مرآة واضحة ...........اتفقنا تانى ؟؟؟

سوف يرى جمال اعماق محدثه ..ظاهرة واضحة على وجهه ...حتى لو كان هذا الشخص للوهلة الاولى يعتبر دميم ؟؟؟...........اتنفقناتانى ؟؟؟

والعكس ايضا .....

مسألة مراقبة شخص..........

دى بقى هواية .........

يعنى مجرد رؤية شخصين ..كل منهما يحاول اقناع الآخر بوجهة نظره ...واحد بيتكلم بمنتهى رباطة الجأش والآخر من وقت لآخر (( يولع سيجارة )) ..يداه ترتعشان ....

.....طبعا ممكن نحكم على ان المضطرب هو شخص غير واثق فى نفسه ...ده اول انطباع وممكن يكون انطباع خاطئ ..

او اثنان يتناقشان ...واحد يتكلم بهدوء وهو ينظر للآخر من اسفل الى اعلى ويرفع له حاجب وينزل حاجب (( بيفرسه يعنى ))...والتانى (( رغم انه صاحب حق ))...عمال يصرخ ويشاور وممكن جدا يخبط اى حاجة قدامه ..

وانت تراقب ....

صاحب الحق ...باين مجنون ..

والآخر....باين عليه شخص كلامه منطقى ومقنع وفى منتهى العقل ...

كفاية كدة .......

على فكرة .......

ممكن تقول ببساطة مدام سلوى ..او الاخت سلوى ...او ماما سلوى ..او الحاجة سلوى ...مفيش مشكلة ..

وقريب جدا ان شاء الله حاكون .......الجدة سلوى .

[أبو الفوارس]

عزيزي خالد ...

قرأت موضوعك وانتابني الذهول

وتعاي نسيبنا من الفصحي ونتكلم بالبلدي شوية ,,,

الصراحه يا خالد نا مش عارف أقولك ايه الحقيقة كلامك وصلي قوي وحسيت بيك جدا

والاحساس دا عندي مكان زمن ان الوجوة غير الوجوه والأماكن دي غير الأماكن الحاجات دي شوفتها قبل كدة

كل الأفكار دي بتملا تفكيرى كتير من الوقت وهي السبب ورا كل كلمة بكتبها سواء كانت شعر أو نثر أو حتى قصة ,,,

الحقيقة انا متلخبط جدا ومش عارف زاي كلامك ده ممكن يكون تأثيرة علي لكن أكيد هيظهر في المشاركات الجاية بدون شك

الحقيقة يا عم خالد لموضوع بتاعك بيمس متاعب ناس كتير جدا وانت حطيته بصورة تكاد تقترب من السهل الممتنع أناحسيت أني ممكن أكتب زيك ولما حاولت أكتشفت الفاجعة ان كلامك من كتر بساطتة ماينفعش حد يكتب زيه غيرك انت وبس

وبتقول انك مش موهوب .. خده مني كلمة ياصاحبي أكيد انت عند شظيه في دماغك وهيا دي اللي هتخلينا فعلا لازم نرفع لك القبعة قريب جدا لو حطيت موضوع الكتابه ده في دماغك وحطيتة في شكل رواية مثلا

فعلا حاجة جميلة جاد وشكرا علي الأفكار اللي انت اديتهالى بكلامك من غير ما تقصد ,,,,

تحياتي لك ,,,

ابو الفوارس

[حسـام المصـري]

الحقيقة يا مدام سلوى انا- برده- قريت تعقيب حضرتك اكتر من مرة. معرفش ليه كان صعب افهم، او ارد. انا صحيح عندي مشكلة دايمة في التركيز، لكن مش اربع مرات يعني :D . على اي حال.. فعلا كدا مفيش تناقض بين "كل اناء ينضح بما فيه" و ان الوجوه تعكس حقيقة البشر. انا كنت فاهم الاناء هو الشخص صاحب الوجه، مش ان انا الحله :o. ياللا.. ربنا يسامحني بأه :D

كلامك كله صحيح يافندم- ربنا يباركلكم في البيبي بالمناسبة :D - لكن برده.. :D .. حضرتك مجاوبتينيش.. هل فعلا اللي بنشوفه في لحظة تأمل لاحد الوجوه هو الحقيقة؟ هل فعلا لو انا جوايا جميل هشوف الناس جميلة؟ طيب اذا دا صحيح.. فادني بإيه التأمل؟ ايه الفرق اللي عملهولي؟ في كل الاحوال هشوف الناس بنفس النظرة، صح؟ لو جميل هم زيي ولو وحش هم زيي.

و بعدين.. مش عارف اقولها ازاي.. الناس ممكن بالتأمل تشوفيها حلوة اوي، منورة كدا و نضيفه و يمكن تشمي ريحة حلوة كمان. و ممكن تأملهم يوريكي وش تاني مفيش داعي نقوله. اذا دي حقيقة الشخص دا.. مش دا معناه ان دي حقيقتك انتي كمان؟ ماحنا هنحيّد بأه السلوكيات و الافعال و نبص في العمق. هناقش جودة المعدن الموجود في بطن الارض، دون النظر للتراب او الطين اللي عليه. هنتجاهل ردود الافعال اللي بتتاثر بالبيئة و الظروف و التعليم و الثقافة و المستوى الاجتماعي و المالي و.. و.. و.. و.. لحد مانوصل القمر. جميل كدا؟ حضرتك متابعة معايا؟

طيب.. هل دا معقول؟ معرفش ليه مش قادر اصدق او اقتنع ان فعلا كلنا في الاصل "ناس زي الفل بالصلاة على النبي" هل ممكن الظروف و البيئة و خلافه، تخلي النور و البهاء و الطيبة و الراحة اللي بنشوفهم ساعات في وش حد بصيناله كويس اوي جدا خالص، يتقلبو لسواد ليل في غابه استوائية شجرها عالي زي سور السجن، مليانه كواسر و ضواري، و جوها رطب لدرجة تخنق؟ ممكن دا؟ انا عارف ان الانسان "يولد على الفطرة و ابواه يهودانه او ينصرانه" صدق رسول الله صلى الله عليه و سلم، لكن برده.. للدرجة دي يعني؟؟؟؟؟ يمكن تبان ملهاش دخل بالموضوع، لكن اكيد الفطرة اللي ربنا خلقها فينا هي احسن ما يكون. يبقى هل ممكن اننا بافعالنا نقلبها القلبة السودة دي؟

معايا ولا تهتي :D ؟؟

طيب.. نلف الناحية التانية.. خلينا نقلب العملة.. اذا اللي بنشوفه مش بالضرورة صح، و مش بالضرورة هو حقيقة الانسان دا، و انها زي مابيقولو "على حسب.." او "بظروفها" او حتى ملهاش مقياس خالص بالمرة بتاتا اطلاقا... الى اخره.. يبقي هل في معنى للموضوع كله من اوله لاخره؟ اعتقد كدا الحكاية ممكن ترسى في الاخر على اني تقلت في العشا مثلا :D . بجد و الله... بالشكل دا اصبحت عبث و ملهاش اي معنى على الاطلاق. و دا مش ممكن.

معرفش اذا انا كبرت الحكاية، ولا هي بالفعل مش موضوع يخلص في كلمتين، ولا انا بأه اللي.. تقلت في العشا. لكن على اي حال.. انا زي حضرتك بحب الرغي في المواضيع اللي بتشدني. علشان كدا ارجووووكي ابقي قولي كل اللي عندك. اصل انا بعيد عن اولاد حضرتك و اولادهم، عندي وقت فاضي يكفي اني اعيش مرتين. و دي مش دايما نعمة، صدقيني.

وجعت دماغك؟ سامحيني. انا خلاص ماشي.

تحياتي. و السلام عليكم

تم تعديل 14 يونيو 2005 بواسطة حسـام المصـري

[حسـام المصـري]

عزيزي خالد ...

قرأت موضوعك وانتابني الذهول

وتعاي نسيبنا من الفصحي ونتكلم بالبلدي شوية ,,,

الصراحه يا خالد نا مش عارف أقولك  ايه الحقيقة كلامك وصلي قوي وحسيت بيك جدا

والحساس دا عندي مكن  زمن ان الوجوة غير الوجوه ولأمكن دي غير الأمان الحجت دي شوفتها قبل كدة

كل الأفكر دي بتملا تفكير كتير من الوقت وهي السبب ورا كل كلمة بكتبها سواء كانت شعر أو نثر أو حتى قصة ,,,

الحقيقة انا متلخبط جدا ومش عارف زاي كلامك ده ممكن يكون تأثيرة علي لكن أكيد هيظهر في لمشركات الجاية بدون شك

الحقيقة يا عم خلد لموضوع بتاعك بيمس متاعب ناس كتير جدا وانت حطيته بصورة تكاد تقترب من السهل لممتنع أناحسيت أني ممكن أكتب زيك ولما حاولت أكتشفت الفاجعة ان كلامك من كتر بساطتة ماينفعش حد يكتب زيه غيرك انت وبسش

وبتقول نك مش موهوب ..ز خده مني كلمة ياصاحبي أكيد نت عند شظيه في دماغك وهيا دي اللي هتخلينا فعلا لازم نرفع لك القبعة قريب جدا لو حطيت موضع الكتابه ده في دماغك وحطيتة في شكل رواية مثلا

فعلا حاجة جميلة جاد وشكرا علي لأفكار للي انت اديتهالى بكلامك من غير ما تقصد ,,,,

تحياتي لك ,,,

ابو الفوارس

<{POST_SNAPBACK}>

اولا باشكرك جدا يا عزيزي ابو الفوارس، ولو اني بيتهيألي انك مكنتش بتكلمني أنا :D . يعني في الحقيقة انا مش شايف اني كتبت حاجه ادبية على الاطلاق. و مش تواضع ابدا لما اقول اني مش اديب. دي حقائق يا استاذذذذذذذذ :D . لكن على اي حال، كلامك اللطيف و اسلوبك يخلوني اشكرك الف شكر.

على فكرة انا اسمي حسام

تحياتي. و السلام عليكم

[أبو الفوارس]

ماشي ياعم حسام ..

علي فكرة الأحساس الصادق مش محتاج كوبري ده عامل زي السهم بخش القلب عدل تحياتي لك واحب أسمع رأيك في موضعي

وجـــــــــــوه ,,,

أبو الفوارس ,,

[حسـام المصـري]

ايه يا جماعة.. الموضوع بايخ ولا ايه؟ دانا كنت عامل حسابي نناقشه كام اسبوع مش يومين و خلاص. حد يقوللي حاجه مش كدا