قلة النوم دي مسخرة

[حسـام المصـري]

سامحوني بأه.. هي بس قرصة ودن علشان تتعلمو تنامو كويس جدا. حبيت اوريكم قلة النوم بتعمل ايه في الواحد. على الله تتعظو

سلام عليكم.. خير يا حبيبي.. النوم غلي في مصر كمان؟ يا سواد الليل يا ربي. ليه كدا يا بنتي، دانتي سمعتك انك مكنة نوم ولا مؤاخذه. ايه اللي جرالك يا عم؟ بعدي عامل فيك كل دا؟ معلييييش معليييييش هي الدنيا كدا. ساعة فل و ساعة زل. الله في.. على راي اخونا رباني.

امتى نمتي اذا رنيتيلي الساعة ستة تقريبا؟ و امتى صحيتي؟ دانتي كدا منمتيش بأه. ياللا يا جميل هتبقى زي جوزك. ابقى سلملي على جوزك يا قبتن.

اسكتي يا امورة جوزك اتنغنغ اول امبارح. أي و النبي يا اختي. انا نمت حاولي ست ساعات.. تخيلي؟ طبعا بالمعدل بتاع الايام دي ابقى نمت لما قطعت الدنيا. قوم ايييه بأه.. مفيش نوم امبارح الضهر. عااااادي. ماهو مش مقدس يعني. طالما فايق بالصلاتو على النبي يبقى خلاص. اسود- دا مش لون دا جمع اسد. قوم ايه باه.. انا اتأخرت بالليل كالعادة. وصلت البيت واحدة و نص و الله اعلم. و طبعا كان بابا نام.

طيب. لحد كدا كلام جميل و معقول و متقدريش تفتحي بق حضرتك بواحد على خمسة و تلاتين من الكلمة. طيب.. هو هيصحى الساعة خمسة و نص. و انا طبعا لازم اكون صاحي، و كدا كدا مفيش نوم دلوقتي، يبقى اعمل ايييييه؟؟ اسود.. انا لها يا اخ العرب. انا هفضل صاحي و اودعه و طبعا مش هلحق انام بأه لكن ايه.. مش مهم. مش مهم ليه.. لان احنا ايه.. سمعيني صوتك.. لان احنا اسود. برافو عليكي.

قوم ايه.. ما الليل طويل بأه.. قعدت حوالي ساعة كدا، و فجأه.. ان، ان، ااااان.. البطارية خلصت. يا لوزة.. يا امورة.. يا بت.. يا ولية.. طب شوية كمان.. طب اودعه بس و بعدين انام.. مسسسسسسحيل. راسها و الف جزمه شمواه قديمة من بنوعك غرقانه تراب.. لا يمكن. طب وبعدين يا ربي في الحوسة دي. ما هو انا لو نمت ممكن اكيد لازم محتمل هو يزعل. و ممكن ميحبش يقلقني و يسافر و خلاص. و كمان انا عاوز اشوفه قبل ما يمشي. قوم اييييه.. قلت احسن حاجه يا حسام يا بدر الدجا يا نور الفيافي، يا جحش الفلا يا غراب القوافي، انك تنام في الصالة. بالشكل دا لازم هيصحيك. اذا مش علشان يسلم عليك، يبقى علشان هيصعب عليه نومك في الصالة.

ساعتها قلت بس.. هو دا الكلام... ياختي علي و على جمال مبارك.. و النبي انا محصلتش يا اختي. طفيت نور الصالة و فتحت نور الحمام و ايه.. ايه.. انطقي يا امورة.. اتكومت على الكنبه. ااااخ.. دغدغت ضهري الله يحرقها. لاول مرة من زماااان اوي اتخمد علطول من غير وجع القلب اياه.. اتقلب يمين، طب شمال، طيب فوق، طيب هوبا لتحت، طب قوم اقعد، طب قوك اقف و انت بتكلمني.

المهم.. ماااا علينا.. انا قلت ازبط الموبايل على اربعة و نص على اساس اجهزله شاي ولا حاجه و اصحيه لحسن تروح عليه نومه. و كمان ميصحش يصحى و يلاقيني نايم. قال يعني الواد الغضنفر حيلة امه و ابوه هو اللي هيصحى. طبعا رن الموبايل لما اتقطع قلبه و كره نفسه و انا في غيابة الجب مش حاسس باي حاجه خالص.

قوم ايييه.. صحاني الباشا الساعة خمسة و تلت. اخ خ خ خ شكلي وحش خالص. لكن ابويا بأه و لازم يستحمل. شلت الشنطة و كنت ماشي متدهول و متنيل على عيني. نايم يا ناس و مش شايف ادامي. المهم.. يا رب.. يا معين.. اتنتعي بأه الله يخرب بيتك.. فيييين لحد الاسانسير. زمن يعني.. مانا نايم بأه. نزلتها و طلعت زي الخروف مش عارف انا مين.

شوية.. خلاص بأه لبس هدومه و حانت لحظة الفراق.. اهئ اهئ.. لا بصراحة محدش فينا عيط. اعدنا نبوس شوية و هو يوصيني اخلي بالي لحسن الغسالة ساعات بتعمل معرفش ايه، و اوعى يا موكوس تشغل البوتوجاز و تقول اريح العضمتين للشقة تولع بيك انت و الكتب، انا بدرس للعيال منها يا روح امك. و خلي بالك من كذا، و احترس من كذا، و حاذر من كذا، و... يا عم انزل بأه الطيارة هتفوتك. دا ايه الصباح اللي ميعلم بيه الا ربنا دا. ياللا يا حبيبي... ممممموووواه، حضن كبير خاااالص لبابا حبيب حسام.. مع السلامة.

طبعا بعد المسخرة دي مين هينام تاني. باظت الليلة يا جميل. الساعة حوالي سته الا ربع. طيب هنام دلوقتي ازاي؟ و كمان كل الحاجات دي فوقتني. او يعني طيرت النوم من عيني. محتاج وقت علشان اقدر انام تاني. و كمان الشمس طلعت و احنا مش مركبين ستاير هنا.

انت بتتكلم في ايه... اسود يا استاززز. ولا يهمنا كل الكلام دا. داحنا بالصلا عالنبي نقرقش الزلط. طيب يا سيدي. افتح التليفزيون و اقعد ادامه بأه زي قفص الجوافه اسم الله على مقامك.. اوووكي. ساعة ما بعتلك الرسالة يا امورة.

قوم اييييه... شوية.. أي يا نينااااا بأه.. ضهري واجعني بجد. طب اعمل ايه بث يا لبي.. الوح لمين.. و اقول يا مين ينثفني منت يا حثنين. اسوووود.. عيب عليك يا راجل. عملت نسكافيه و قعدت زي القفص اللي كلمتك عليه من شوية. بس الممل بأه.. مفيش حاجه لها لازمة اتفرج عليها.

قوم اييييه... قلت اخدلي جرعة فنيه حلزونية خزعبلية من الفن الرفيع الراقي اللي بتقدمه قناة مزيكا و قناة ميلودي. و فعلا يا خالة اعدت ااربع نسكافيه و اشوف مناظر و اشكال توجع البطن. و لا الاصوات.. حاجه قرف. و كله كوم و الحاجه روبي كوم تاني. هو في كتير بيعملو زيها كدا، انما دي فيلم لوحدها. تحسي كدا انها واخده الموضوع هواية... واخده الانحراف بمزاج.. بسلطنه.. بمعننه. حاجه سودا و الله.

المهم يعني كانت ليله زحل.

قوم ايييه.. خليكي فاكرة احنا اسود لحد دلوقتي.. بس ضهري بيوجعني.. الله يخرب بيتك يا كنبتنا يا حلوة يا جميلة.. يبقى مفيش غير حل واحد.. اقوم آخد دش محترم من اللي بخزنهم عادة لليلة العيد. اخدت الدش.. نضفت خالص و بقيت راجل زي الفل. ضهري لسه واجعني.. لكن ايه.. عادي جدا يعني. متفكريش اني بلطم منه ولا أي حاجه من دي خالص. منصدقش الكلام دا بالصلا عالنبي. احنا ناس كبار و متعلمين و عندنا عيال حلوين جدا جدا جدا و وحشوني اوي بأه.. يا رب بأه

و اديني يا ستي جيت المكتب علشان نبدأ يوم جديد، مشرق بالسعادة و التفاؤل في عهد السيد الرئيس و حرمه و ولاده و الشلة السعيدة كلها و احنا مش مهم. و طبعا السماء في مكة صافية، كالعاااادة، و الشمس مشرقة زياااااااادة عن اللزوم، و حاجه حريقة بعيد عن سطوح بيتكم اللي فيه بط و حمام طعمهم حلو خالص.

ايمان.. قولي نعم يا حبيبي.. انا اتهبلت خلاص. ضهري مع قلة النوم مع كتر الكافايين و التدخين خلو دماغي اخر كراوية. و قاعد زي فردة قبقاب قديم في معرض كريستيان ديور للاحذية سنة الفين و خمسة و تلاتين و نص. الله يرحمك يا نينة.. كانت دايما تقول يا هباب يابني.. النوم ميزان العقل.

كفاية كدا علشان متطلبيش الطلاق.

بحبك و بموت فيكي و وحشتيني اوي اوي اوي

و الى لقاء قادم ان شاء الله

و

السلام عليكم و رحمة الله و بركاته..

وبعد...

زوجتي الحبية.. لا لا متشتميش خلاص ماشي