فاضل الجنيه الجبس .. !!

[achnaton]

هددتنى حرمنا النهارده بنقلى الى مستشفى آخر غير اللى انا كنت فيه . عندما لاحظت انى ابتسم .. وساعات اضحك بصوت عالى .. افتكرت انى جرالى حاجه تستدعى العرض على طبيب نفسانى .. خاصه عندما سمعت حديثى التيلفونى مع الترزى بتاعى .. حيث كنت اكلفه بارسال صبيه ليأخذ بنطولوناتى .. لتوسيع الجيوب بها وتحويلها الى سياله .. لأنى ناوى ان شاء الله اكلف ابن جدى الشيخ حسن رحمة الله عليه - الشيخ حسين – يبعت لى حافظه للنقود زى بتاعة هريدى بتاع البطيخ فى المركز .. ثلاثين فى عشرة .. بكبسون المانى .. وجيب برانى للفكه .. جلد اسود غطيس زى زمننا هذا .. وسألتنى المدام .. حتعمل بالمحفظة دى ايه .. ؟؟ دا حتى اليورو ورقه صغير ومش محتاج .. وايه فايدة السلسلة اللى انت عاوزها هى المحفظه حتطير ؟؟

انا بعد ما اترحمت على جدى .. وايامه .. والريال الفضه بتاع السلطان حسين .. قلت لها انا لسه بعقلى .. وبافكر ان شاء الله .. احضر انتخابات الرياسة .. وكل حزب حياخذ كام مليون .. والصوت حيبقى بعشرين جنيه .. ولما حصوت مرتين ثلاثه .. تصويته عن جدى رحمة الله .. وتصويته عن حمايا .. ربنا يقدس روحه .. وتصويته لي ولو انى بأصوت من زمان ومحدش بيدفع ..!! ما صوات عن صوات يفرق !! لما الواحد يصوت فى برلين ياخد حباية ضغط واحده .. ولما الواحد يصوت فى المحروسه .. يآخد جنيهات .. والحكومة الألكترونية ناوية تعمل جنهات نحاس .. تمهيدا لتعميم الجنيه الجبس ( اوفر فى التصنيع .. ووشه حيبقى ابيض يبان فى الأيام السوده ) .. وعشرين جنيه نحاس حتبقى شيله .. تقطع الجيوب .. وعشان كده حا اعمل زى هريدى واجيب محفظه .. واربطها فى حزام البنطلون .. وشر البلية ما يضحك .. وعشان كده بأضحك .. بعد ما قرأت الخبر فى جريدة الوفد " النعمانى "

طرح الجنيه المعدني الشهر القادم

دراسة إصدار ورقة مالية فئة 200 جنيه

تبدأ الحكومة اعتبارا من الشهر القادم اصدار عملة معدنية للجنيه بجانب العملة الورقية المتداولة في الاسواق. من المقرر اصدار الجنيه المعدني الجديد، واصدار فئة الخمسين قرشا المعدنية عن طريق مصلحة سك العملة التابعة لوزارة المالية. وأعلنت مصادر مسئولة الاتفاق علي اختيار شكل العملة، والتي من المقرر ان تحمل وجه الملكة كليوباترا علي احد وجهيها ومكونة من الحديد والنحاس، بالنسبة للجنيه والنحاس الاصفر بالنسبة لفئة الخمسين قرشا.. وبمقتضي هذا الاصدار الجديد تصبح حكومة نظيف هي اول حكومة تحول الجنيه الي معدني بعد ان كانت قيمته ذهبا.

[khaled_eid]

تصدر أول يناير القادم عملات معدنية جديدة فئة جنيه و50 قرشاً وذلك بالتنسيق بين المالية والبنك المركزي.

صرح مسئول بالبنك المركزي بأن الجنيه المعدني سيحمل قيمة العملة باللغتين العربية والأجنبية وتاريخ سكها وعلى الوجه الآخر توت عنخ آمون ونفس الحال بالنسبة للخمسين قرشاً المعدنية ولكنها تحمل صورة كليوباترا.

الموضوع كاملا

[عبدوس الوزير]

اليوم في الجمهورية:

جنيه معدني.. من أول يناير

توت عنخ آمون وكليوباترا.. علي العملات الجديدة

كتب إسماعيل بدر:

تصدر أول يناير القادم عملات معدنية جديدة فئة جنيه و50 قرشاً وذلك بالتنسيق بين المالية والبنك المركزي.

صرح مسئول بالبنك المركزي بأن الجنيه المعدني سيحمل قيمة العملة باللغتين العربية والأجنبية وتاريخ سكها وعلي الوجه الآخر توت عنخ آمون ونفس الحال بالنسبة للخمسين قرشا المعدنية ولكنها تحمل صورة كليوباترا.. أكد المصدر أن العملات المعدنية لن تلغي العملة الورقية ولكن سيتم تداولها مع

هل هذه بداية إحالة الربع جنيه والنص جنيه إلى المعاش بحيث تصبح جميع السلع بلا كسور للجنيه؟

تم تعديل 30 سبتمبر 2005 بواسطة عبدوس الوزير

[# الساحر #]

و سمعت كمان ان فيه ورقة فئة 500 جنيه نازلة السوق تلعلع

بس لو ضاعت من الواحد هيزعل جدا .

[احمد سعد]

غالبا عملوا الجنيه والخمسين حديد عشان الفقير لما يشيل 10 جبيه فكه يقتنع ان معاه فلوس

اما الـ 500 جنيه الورق دي عملوها للناس الكبار عشان كل ما يحطوا فلوس مايتعبوش من شيلها

[bodda]

الجنيه معدنى

وفئتين جديدتين من العملة الورقية 200 و 500

وفاضل فئة الألف جنيه

و

و

و

و

ولسه :angry:

تم تعديل 3 أكتوبر 2005 بواسطة bodda

[se_ Elsyed]

يعني أنا لو مقدم على نص كيلو لحمه من 32 جنية .. يبقى لازم أروح للجزار ومعايا صُرة من الدنانير :wub:

[كركر]

من الآخر مصروفى هيكون كام ؟؟؟؟

تم تعديل 4 أكتوبر 2005 بواسطة كركر

[وليد صفوت]

من الآخر مصروفى هيكون كام ؟؟؟؟

<{POST_SNAPBACK}>

ما تقلقش يا كركر ,........

بالشكل ده يا إمتاً مصروفك هيزيد ( 100% أكيـــــــد ) ,...

يا إمتاً هتتحرم من المصروف خالص خوفاً من إن الفلوس ( المعدنية الجديد ) تكون تقيلة عليك و لا حاجة .....

[ENG. BEHAIRY]

حتى أنت يا كركر

بدرى عليك

وماتخافش يا حبيبى على مصروفك

وشد حيلك واهتم بواجباتك ، واقرأ واتعلم ، واجرى والعب

ورينا همتك فى رمضان ، وفى كل وقت كمان

ربنا يبارك فيك يا كركور

وتفرحنا وتطمنا إن لك همة وشطور :D

-------

بقــدر البؤس والغــم الذى يُحيطنا مع هـذه المصـائب

التى يُرقــق بعضها بعضًــا ، إلا أن أســـتاذنا الفاضـل

إخناتون برع فى إخراجهـا لنا قصــة شيقة وممتعــة.

وأخشى ما أخشاه أن ننتقل بعد الجنيه الجبسى إلى :

= الجنيه الكرتونى الذى يستخدم مرة واحدة فقط ثم يُرمى ليتوافق مع الشــفافية التى صمت

آذاننا ليل نهار ، ولا يوجد لها سوى تفسير واحد إنكشاف الأمور وفقد الحياء .

= بل ربما نبدأ فى استخدام الجنيه الإفتراضى (virtual) ليتناسب مع الحكومة الإلكترونية

( أو الكرتونية حال استخدام الجنيه الكرتونى )

= أو الجنيه الســحرى الذى تـراه عنــد الدفــع أو الشــراء ثم يختفى فلا يعــود أبـــدا.

= كــــذلك لا أســتبعد العودة ثانية لنظام المقايضة حيث ستكون أســهل من دفع ثمن 2كجم

لحم 200 جنيه ، وأسهل من محفظة هريدى ، وصرة دنانير أخى الفاضل سى السيد.

وتطالعنا الأخبار ترفض وتشجب من يقولون : إرتفاع الأسعار ، لأن ذلك إرتفاع عالمى لما يواجهه العالم من تقلبات اقتصادية :wub: ( وعند تحسن الوضع وهبوط الأسعار فلا ينالنا من الحب نصيب ) .. ثم يقولون : ما شهده السوق مؤخرًا لا يعدو كونه تحريكًا محدودًا جدًا لبعض الأسعار فقط .

وكما تحرك قطار الأسعار فقد بدأ قطار العملات فى التحرك ، وستنزل كافة العملات الأقل منه فى محطة اللاعودة :wub: ، ليتربع الجنيه عرش العملات المعدنية كأقل فئة معدنية متداولة وبدون تغطية .

ويواصل القطار تحركه ، وفى المحطة التالية وتحت ضغط الرأى العام وارتفاع سعر الجلود المصاحب لشيوع محافظ عم هريدى التى فاقت انتشار الهاتف المحمول ..تأتى فكرة طرح الدينار المصرى وهو عملة جديدة يتم تداولها لأول مرة وتُعادل مائة جنيه مصرى .. :D

تم تعديل 4 أكتوبر 2005 بواسطة ENG. BEHAIRY

[se_ Elsyed]

تم دمج الموضوعين لإنهما يتحدثان عن نفس الموضوع

[Tafshan]

يا جماعة ما هو في جنيه استرليني معدنى ... و ايه المشكله ...

عارفين المشكله في ايه ؟؟

المشكلة ان ده معناه انهم ناويين يطبعوا فلوس على شهر يناير ...

اما الحق اغير الفلوس بتاعتى دولار قبل ما الجنيه يتشيع ...

[se_ Elsyed]

يا جماعة ما هو في جنيه استرليني معدنى ... و ايه المشكله ...

<{POST_SNAPBACK}>

ما في مشكل يا صديق ..

يا طفشان ياخويا .. ما أحنا حطين فردة شوز في بؤنا وما بنتكلمش إن شالله يعملوه الجنية من روق البفره حتى ..

لكن المُشكل يا صديقي العزيز إنهم بيخططوا إن الجنية يبقى هو أصغر عُمله في البلد ..

يعني حزمة الجرجير تبقى بجنية ...

والطعمياية بجنية ...

وبدلة حماده بجنية ... وفستان غاده بجنية ... وقررررب قرررررب .. ويابو العيال هاتلك شيال ...

[Abofady]

يعنى لما الجنيه الجبس ده ييجى ... ممكن نعمل المحفظة شيكارة جبس ولا شيكارة اسمنت , ومين فيهم اللى بيشك الاول . وده نشتريه بالالف زى الطوب