حدث في بر مصر

[هادي]

شهادات على إصلاح مبارك

حدث يوم 25 مايو في وسط القاهرة

إيمان ، باحثة

وصلتنا الرسائل وعرفنا منها مكان المظاهرة وبعد كده لما وصلنا عرفنا إن فيه 5 أو 6 اتقبض عليهم. كان عددنا قليل جدا والأمن بدأ ييجي. كانت الساعة 12.10 تقريبا. قررنا نمشي جماعات لغاية العدد ما يزيد عدد الناس حتى نتجنب المشاكل اللي حصلت للناس التانيه.

لاحظنا اننا متراقبين منذ وصولنا وسط البلد، وكل مات نمشي في اتجاه في ضريح سعد نلاقي عربيات شرطة ومخبرين لابسين مدني. واحنا واقفين لقينا أوتوبيسات سياحة ونقل عام فيها ناس من الحزب الوطني محملة بالناس ووقفوا الطريق وبدأوا يهتفوا ونزلوا الشارع. كنا مترددين نشارك ولا لأ في مظاهرة مضادة لأن عددنا كان قليل ولكن فجأة قال لنا زيل ان فيه مجموعة بدأت تهتف بجوار مظاهرة الوطني، وفيه كردون أمني بينها وبينهم ولازم ننضم لهم.. لما رحنا وقفنا على الرصيف وكانت مظاهرة الوطني في نص الشارع.. كنا ما بين 30 – 50 وهم حوالي 200. بعد شويه وصل عددنا حوالي 60. فجأة لقيت اتنين بيشدوا خالد زميلنا وبدأوا يضربوه فتدخلت أنا وزميلي لإنقاذه وفعلنا خلصناه منهم. قلت لخالد إجري وأنا كنت هأجري لكن فيه ضابط شدني بعنف وشتمني وخربشني في رقبتي ومازال الأثر واضح.

بعد شويه لقينا نفس الضابط ومعه بعض العساكر والأمن المركزي وأفراد أمن بملابس مدنية بدأوا يزقونا عشان يحشرونا بين شجرتين على الرصيف وبدأوا يضربونا عشان ندخل في الكردون بين الشجرتين. كنت حاسة ان فيه ناس بعينها بيحاولوا يدخلوها. كان فيه تركيز على الصحفيين وعلى أعضاء الحركة المصرية من أجل التغيير.

فعلا دخلونا في مسافة صغيرة جدا حوالي متر وكنا حوالي 10 أشخاص وحوالينا امن مركزي وضابط وعربية ملاكي ووراها مظاهرة الحزب الوطني. وبمجرد ما قفلوا الكردون بدأوا يضربوا فينا كلنا.

وهنا بدأت التحرشات الفظيعة.. كان حوالينا 3 أو 4 دواير من مخبرين وأمن لابسين مدني ووراهم أمن مركزي بدأوا يمدوا ايديهم على البنات ويلزقوا فيا من ورا.. الولاد اللي كانوا معانا حاولوا يحموا ضهرنا من التحرش فبدأوا يصربوا فيهم لغاية ما واحد سال منه الدم. بدأوا يمسكوا واحد واحد مننا ويضربوه. كنت أنا تاني واحدة جاء عليها الدور. ضرب بالشلاليت وعلى الدماغ وفي الضهر لغاية ما وقعت على الأرض، مش قادرة أقف.

كان معايا داخل الدايرة سارة الديب وعبد الحليم قنديل وتامر وجيه ونشوى طلعت وخمسة آخرين لا أعرفهم. قبل ما اسقط على الأرض كان المخبرين بيمدوا ايديهم في كل مكان في جسمي. وحاولوا مرتين يشدوا الجيبة من ورا عشان يقطعوها وأنا على الأرض واحد رمى نفسه فوقي وكان تقريبا نايم عليا. لكن زمايلي شدوني جامد وتامر أخدني بعيد وحاوطني عشان ما يقربوش مني تاني ولكن كان عندي حالة من الذهول مش قادرة أفهم ايه اللي بيحصل.

وقتها سألت الضابط اللي معاه اللاسلكي: احنا مقبوض علينا دلوقتي. يعني في حمايتكم ولا إيه؟ لكن ما ردش عليا. ورغم إن تامر محاوطني علشان يحميني ولكن بدأوا برضه يمدوا إيديهم وصوابعهم وفجأة لقيت ايدين تاني بتشد الجيبة عشان تنقطع ولما بصيت ورايا ما لقيتش حد. كل البنات اللي كانوا واقفين جوا الكردون حصل معاهم كده. وسارة حصلت لها حالة ذهول وبدأت عياط هستيري والمصور اللي كان معاها بدأ يتوسل إليهم عشان يطلعوها وقال لهم دي صحفية, مفيش فايدة. ونشوى كانوا تقريبا بيحاولوا يقلعوها البنطلون بأي طريقة. بعد شويه لقيت في وسطنا طفل عمره حوالي عشر سنوات. فبدأت أصرخ فيهم عشان يطلعوه. كان شكله من أطفال الشوارع وكان ماشي وانزنق في وسطنا وعمال يعيط والضرب شغال. وهو بيقول بيعملوا كده ليه. أخدته في حضني وقعدت أطمنه. حسيت ان الولد هيفطس. قعدت اترجى الضابط عشان يطلعه فشاله وحدفه على العربية الملاكي وقع على دراعه وصرخ فصرخت أنا كمان فقعد يضربني تاني. طول الوقت اثنا الضرب لم يكن التحرش الجنسي يتوقف.. حتى في وسط الضرب كان التحرش يستمر.. كانوا بيمدوا ايديهم علينا من بره الكردون.

كان التحرش في البداية من الأمن وبعد شويه لقينا راجل في وسطنا شايل يافطة "نعم لمبارك" بدأ يمد إيده عليا أنا ونشوى فضربته بين رجليه لأني كنت وصلت لحالة غير عادية من الذهول.

يعد شويه الضابط جاب ولد شكله رهيب. عينيه حمرا وجسمه ضخم جدا ومعاه 3 أو 4 أجسامهم رهيبة. الضابط فتح له الكردون وقال له ادخل شوف عاوز مين فيهم. اختاروا اللي كان بيحمينا هو تامر وشدوه . قعدت أشد فيه عشان يسيبوه وفجأة حسيت بضرب جامد على ضهري وحسيت بجسم حاد زي مطواه بيشق الجيبة بتاعتي من ورا من فوق.

أخدوا تامر من وسطينا وقعدوا يشدوه لغاية ما دخلوه وسط مظاهرة الحزب الوطني وكل المظاهرة بدأت تضرب فيه.

لما تامر رجع تاني ابتدوا يختاروا واحد تاني مننا وما كناش عارفين مين اللي عليه الدور.. كنت منهارة وبأعيط بهستيرية.. مش قادرة أعمل حاجة. قلت للضابط: لو احنا مقبوض علينا خدنا من هنا، مشينا. بعد كده جاله حد شكله عضو مجلس شعب، وشه مش غريب علي، كلمه، فقال لي: ممكن نخرجك بس تروحي تهتفي في المظاهرة التانية لمبارك بنفس الصوت اللي كنتي بتهتفي بيه هنا. ولو قلتي لأ احنا واخدين أوامر نموتكم النهارده وانتوا ما تفرقوش معانا *******************.

في الأول رفضت، فراح الضابط لتامر ونشوى وقال لهم نفس الطلام، وفتح الكردون من ناحيتهم فخرجوا، حاول تامر يشدني عشان أخرج معاه لكن الضابط قال واحد واحد. بعد تامر ما خرج بدأ العيال يمدوا ايديهم اكتر خاصة بعد الجيبة ما اتقطعت. خرجت من الكردون وكنت وحدي. طول ما انا خارجه بيحطوا ايديهم على جسمي ويزقوني. واحد منهم زقيته بعيد عني فضربني بالشلوط. كل ده وشتايم وسخة طول الوقت.

بصيت فوق لقيت أختي بتبص عليا من شباك مبنى كانت دخلت تستخبى فيه وكانت تصرخ ومنهارة لأنها شايفه اللي بيحصل لي.. خرجت على اني رايحة المظاهرة التانية لكن مشيت من الناحية التانية عشان أطلع على الشارع لقيت الضابط جايب خمس ستات شكلهم فظيع، مشيوا ورايا وبدأوا يضربوني ويمسكوني من صدري ويحاولوا يشدوا الجيبة من علي. كنت حاسة اني في كابوس مش عارفة ايه اللي بيحصل، فنزلت على الأرض ولما فقت لقيت ستات من الشارع خدوني على جنب يفوقوني وقالوا لي إجري. لقيت اصدقاء بيشيلوني وبيمشوا بي وشفت زميلنا رامي بينزف دم من وشط ويعيط. ما قدرتش أقول له حاجة.

بعدها بدقايق كنا ماشيين في شارع متفرع من شارع ضريح سعد، بندور على تاكسي، لقينا 5 أو 6 رجاله بيجروا ورانا عايزين يكملوا علينا وكانوا هيمدوا ايديهم لكن رامي وعادل زقوني الناحية التانية وكان الشارع زحمه والناس بتتفرج فمشيوا بعد كده. بعدها رحنا مركز هشام مبارك غسلت وشي وخيطت الجيبة وشربت شاي وبعدها بساعتين تقريبا نزلنا أنا وأبويا وأحتي اللي كانوا معايا في ضريح سعد واحنا ماشيين عرفنا إن في نقابة المحامين فيه مؤتمر وإنه تم الاعتداء على الناس هناك، فصممت أروح. لما رحت النقابة لقينا عدد صغير من الناس بتهتف وكان الأمن على الباب وفيه شبابا من النقابة واقفين على الباب عشان الناس ما تدخلش من الأمن.

بعد شويه جم ناس من الحزب الوطني وسمح لهم الأمن يقربوا من باب النقابة فبدأوا يحدفوا علينا حجارة وزجاجات فارغة وخشب ولم يذهبوا إلا بعد أن جاء سامح عاشور وتفاوض مع الأمن لكي يخرجونا بدون مشاكل.

بعد المفاوضات الأمن حل محل بتوع الحزب الوطني ومشوا الناس بتاعة الحزب الوطني وخرجت مع عدد من المحامين وصلوني لباب اللوق. لا أظن ان اللي حصل للبنات له علاقة بمفهوةم عند الأمن عننا كيسار. كان معانا ناس من شباب من أجل التغيير وهم عارفين ده كويس. وكان معانا ناس من اتجاهات مختلفة ناصريين وحزب عمل. جوه الكردون كان معانا واحدة محجبة واتعمل فيها نفس اللي انعمل فينا. واضح ان كان فيه قرار بالقضاء على نصف الحركة وهم البنات عشان يتعلموا الدرس وما يعملوهاش تاني.

هأنزل مظاهرات تاني حتى لو حصل لي كده تاني. بالعكس اللي حصل يجعلني أصر على أن تحدث مظاهرات وأن نكون فيها.. مش لازم يفهموا إن دي نقطة ضعف وإنهم نجحوا في اللي كانوا بيخططوا له وعشان ما يكرروش الطريقة السافلة دي. الشيء الوحيد اللي ممكن يهديني هو استمرار النشاط.

لغاية دلوقتي حاسة اني مش طبيعية خالص. حاسة اني خايفة موت وإن إحنا كبني آدمين رخاص قوي لدرجة أن تحدث أشياء زي دي. إمبارح بالليل كنت كل شويه أقوم مفزوعة من النوم رغم اني كنت ميتة من التعب وقبل النوم قفلت الباب من جوه بالمفتاح لأول مرة. كنت حاسة إن في أي لحظة ممكن العيال بتاعة الحزب الوطني تدخل الشقة وتاخدني. حتى الصبح لما نزلت الشغل وأنا رايحة المترو شفت ولاد شبههم فأصبت بالرعب.

حضرت مظاهرات كتيرة قبل كده وانضربت كتير، خاصة في جامعة عين شمس، لكن عمر ما حصل لي حاجة زي دي. أنا اتقبض عليا قبل كده 17 يوم ودخلت امن الدولة يوم كامل كان فيه ضرب وتهديد بالتحرش الجنسي، لكن دي أول مرة يحصل كده. دول خلاص توحشوا وبقى عندهم قناعة إن احنا ما نساويش حاجة خالص.

[هادي]

عفواً

نسيت أذكر المصدر

http://www.manalaa.net/node/199

وهكذا تكون مبايعة الرئيس من عقائد أهل السنة والجماعة !!!

خلص الكلام

[هادي]

معتصمون أمام النائب العام

تهديدات بتلفيق قضايا اداب واعتقال وبهدلة لعائلاتهم

اعتصم اليوم مجموعة من المهددون والمهددات من قبل جهات امنية من اجل الرجوع عن بلاغاتهم حول احداث الاستفتاء امام مكتب النائب العام احتجاجا على رفض تقديمهم لبلاغ حول ما يتعرضون له واستمر الاعتصام نحو الساعة حتى رضخ النائب العام في النهاية واستقبل عبير العسكري لمدة ساعتين واجل الباقين لليوم التالي الحادية عشر صباحا وكانت هذه الصور للاعتصام والتي التقطها رغما عن الامن الذي حاول منعي من التصوير بشتى الطرق بحجة ان التصوير ممنوع !!!

خلص الكلام

الفاضل هادى

للمحاورات لغه فى االخطاب حرص عليها الجميع ويبدو ان الحماسه قد اشتدت فذكرت الفاظا كان من الممكن ان تحرمنا من مداخلاتك.

ارجو ان تنتقى ما تنقل او تكتب وحتى مصدر الخبر يعتبر مصدر شخصى لا يرقى الى درجه النقل واعترافا بمجهودك لن يحذف الموضع ولكن سيغلق...

الاداره

ابن مصر