دنيا كبيره

[daktara]

دنيا كبيره كبيره ... حبّ و كُره وغيره

ناس بتحبّ وناس تتحبّ وناس بتموت م الغيره

وان كان دول أو دول أو دول

عايشين برضو فى حيره

دنيا كبيره كبيره

اللى يحب بجد يلاقى ليالى الحبّ طويله

شوق لُلقا وفراق وشقا ودموع سايله كتيره

ساعه فى ودّ وساعه فى صدّ وليله تسلّم ليله

فرحه شديده وصدمه جديده وفكر وسهد وحيره

دنيا كبيره كبيره

واللى اتعود يكره أيامُه فى الدنيا قليله

مات الحب فى قلبُه وقلبُه مليان غلّ وغيره

ساعةِ الجدّ ما يعرف حدّ ويخلق مليون حيله

يكره نور الصّبح ويعمل للضلمه هلّيله

دنيا كبيره كبيره

شوف الدّنيا بنضاره تانيه تلاقى الدّنيا جميله

شوف الأبيض أبيض والأخضر قول له يا حليله

عيش أيامك شوف قدّامك وافرح ويّا العيله

تلقى الليله فى صحبه جميله بمليون ليله وليله

دنيا كبيره كبيره

***

<div align="center"></div>

تم تعديل 18 يونيو 2005 بواسطة daktara

[shahd]

تسلم الأيااااااادي جبت الي فيها :rolleyes:

[bentmasria]

العود احمد يا دكترة.......وحشتنا

يارب كلنا نقدر نبص للدنيا بنظرة الحب والتفاؤل

كلنا محتاجين دعوتك دى

وياريت نسمع الغنوة متلحنة فى القريب العاجل

[هشام الجنيدى]

رائع كما كنت وستظل رائع باذن الله يا دكتور خالد (دكترااااااااااا)

بجد حلوه قوى وفيها من الكلمات اللى فى حد ذاته موسيقى من غير تلحين ولا حاجه

دمت بارعا .................... :blink:

[ebnelganoup]

رائع يا د كترااااااااااا

فينك من زمان كنت رحمتنا من اللى بنسمعه ليل ونهار

بس انت استعجلت ليه كان ممكن تتحررمن تكرار القافيه

وتنوع بزات الايقاع وتختم زى ما ختمت فى الاخر بنفس

القافيه اللى بدات بيها خاصة انك متمكن والحروف والكلمات

فى ايدك سلسه كما رايت حتى نستمتع معك اكثر واكثر

وحتى تزداد امامك الفرص ليتغنى بها كبار المطربين

وفى النهايه سنستفيد جميعا لانك ستجبر كل من فرض علينا

من كتاب الاغنيه ان يحترم عقل المستمع واخيرا ارجوا ان

اقرا لك كل ما تكتب اولا باول

دمت لنا فارس الاغنيه الاول بمنتدانا الجميل

شكرااااااااااااا يا دكتراااااااااااا

ابن الجنوب