إنفعالاتى .. ومساجلاتى .. وتوابعى الشعريه والنثريه

[التونسى]

إهــدا .. شــويه...و كِــن يا بــاز
إللـى بيحصـل... ده .... إنــجــاز
على عيـنـنا .. وراسـنـا .. التــحرير
بـس... مـهـوش مـِعيار .. يا كَبـيــر
سـيـبـك .. مـن شــغـل ... التحويــر
ليــه ســوداوى ... و ليــه مُـنـحـاز
إهــدا .. شــويه...و كِــن يا بــاز

تم تعديل 21 أغسطس 2014 بواسطة التونسى

[التونسى]

أُحِبُها ...رغم اندلاع الحزن .. فى جوف الكلام
أُحِبُها...رغم انكسار الحلم .. وأنـيـن الألام
أُحِبُها ... أمواج بــحرٍ .. تحتوينى .. فى غرام
أُحِبُها ...صوت الأذانِ.. مُداعباً ..سرب الحمام
أُحِبُها .. وقت الصباحِ .. تستوى ..خلف الإمام
أُحِبُها .. وقت الغروب.. ترتدى .. ثوب السلام
أُحِبُها .. مصر التى .. عشقتها .. حــد الهيام

تم تعديل 21 أغسطس 2014 بواسطة التونسى

[التونسى]

وكأن الاشواق...تنتقم منى..فرغم ليالى البعاد الطويله..ما زلت أراك!!

فى أحلامى..فى ألامى..فى أوجاعى..فى ذكرياتى..أراك

وما زلت اراك!!

أراك...كلما تلفحنى الدنيا..بلهيب أحزانها..ونيران أشجانها..وبراكين تقلباتها.

أراك...كلما أمر سريعا..-وعلي استحياء-..بالقرب من الاماكن التى جمعتنا.

أراك...كلما..تجلدنى أغانى الغرام والهوى..وتدق طبول قلبى ..بلاهواده..أو رحمه.

أراك...وأرى ..أخر نظرات عينيك..قبيل وداعنا المأساوى

إنها ...نظرات..كانت تملؤها الحسره...واليأس..والاحباط..

بفعل طيشى...وحماقتى..ورعونتى..واستهتارى..بمشاعر الحب!!!!

ومازلت أراك!!!!!!

[التونسى]

الحب ..لا هو سجن
والحب .. مش حُريه
الحب... بكل بساطه
تجسيد ...للمسئوليه
يعنى أخـاف عليك
وكمان تخاف عليا
يعنى أحـس بيك
أكتر ما تحس بيا
يعنى بجد مشاركه
عاطفيه....وجدانيه
يعنى شعور متبادل
بالدفء .. والحنيه
يعنى إيثار..تضحيه
بعـيد عن الأنانيه
الحب دا أجمل شئ
قابلتُه فى الدنيا ديا
الحب.. لا هو سجن
والحب ...مش حريه

[التونسى]

ومصر بتقول لِك

سامحينى .. مكنش بإيديا
يا بنتى .. دا انكَتب .. ليا
فى يوم السعد .. والفرحه
فى يوم الزفه .. والطرحه
ألاقى..قِسمتى ... طارحه
ليالى .. مِضَلِمَه.. جارحه
وعُمرى يِعَدِى .. يا بِنتى
دموعى بحور..عليكى انتى
يا مظلـومه ... ولا خُنتى
يا مهمـومه .... ولا بِعتى
يا صاينه حُبى .. وبتدعـِى
تعـود الضحكه .. لـ عينيا
يا بنتى ..مكـنش بإيــديا
دا قـدرى .. وانـكتب .. ليا

[التونسى]

بدموعى .. وشوقى ..ونارى
أنا بستناك ...يا حـمـارى
نهـقت كـتير .. من حُبك
يا رافسـنى...ولانتش دارى

ولا شئ ف الدنيا يساوى

ضمة حضنك يا حصاوى
نفسى أبرطع ف حـنانك
أه يا مشعلل أفـكـارى
وا رافسـنى...ولانتش دارى
بدموعى .. وشوقى ..ونارى
أنا بستناك ...يا حـمـارى

عـارف أنا لـيه حَـبَّـاك

عـلـشان دايما راكـبـاك
وبتـسـتحمل..وبتـصـبر
مـع إنى كـتـير تاعـبـاك
يا أويـنـى..ودايما شــارى

وا رافسـنى...ولانتش دارى
بدموعى .. وشوقى ..ونارى
أنا بستناك ...يا حـمـارى

ولا شِى..ولا حا..ولا هِس
أنا عـايـزاك ليا .. وبس
تلمسنى ب رِقه ..حوافرك
وب دقـة قلبى ... تحس
يازِرِيبتى يا سكنى يا دارى
وا رافسـنى...ولانتش دارى
بدموعى .. وشوقى ..ونارى
أنا بستناك ...يا حـمـارى

[التونسى]

أخويا يا ثاير .. يا رمز الفِـدا
يا عاشق لوطنك.. لأبعد مدى
بحـق الإخـوه.. بنادى عليك
ياريتك يا خـويا .. تلبى النِـدا
بنادِى .. وبقُلَك.. بِصِدق وضمير
بحبـك ... برغم اختلافنا الكبير
ولكن سامحنى..معاك مش حـ اسير
الوضع فـ بلدنا ... ياخويا .. خطير
وخايف عليها :egyflag: تضيع..تنكسر
و دمك معاهـا .. كده يروح هدر
وطبعا .. كلامى .. دا وجهة نظـر
بقـولها .. وبَعِيدها .. بكل الصور
وتِفضَل أخويا .. كِدا .. أو كِدا
ونِفضَل حبايب .. ومحناش عِدا
أخـويـا يا ثاير .. يا رمـز الفِـدا

[التونسى]

أنا محسوبكم .. دَاكتور أُسطى
بمسح جوخ .. وبشيل الشنطه
عندى قناه .. مليـانه أونـطه
وانا و زبـايدر.. نِن عيـونى
راح نقضى .. على كل ماسونى
بـس يا ريتكم .. تنتـخبـونى
رمزى -بدون تهـزيئ- البطـه
ونا محسوبكم .. داكتور اُسـطـى

********************

أنا محسوبكو .. عوكاشا التييييت
معـروف عنى .. بإنى ..غـتيت
أنا..بلا فخر..بفـوت فى الصخر
وبارع جـدا... فى التخبـيـط
عندى طمـوح..وبكل وضـوح
أبقى .. بجــد.. وزير تخطـيط
دنا أستاذ .. دكتـور..وحكـايه
جيت الدنيا ... ومن غير دايـه
والمشـروع القـومى.. حَـدايا
لامؤاخذه :blush2:.. فـ علم التزغـيط
ونا محسوبكو...عوكاشا التييييت

[التونسى]

وبوصف فيها .. وكأنى

أنا الموصوف

وأبعد عنها .. وأكابر

وانا الملـهـوف

جرئ .. ولكنى ف حضورها

ولد مكســوف

وكل ما شوفها بتكهرب

وببعد .. كل ما تـقرب

تلومنى بعينها..تستغرب

وتِتصَعَب .. وانا بهرب

ما قلبى اللى بيعشقها

مريض بالخــوف !!

[التونسى]

عود .. عود
يا حاضر..بس فـ ( الظاهر)

وفـ( الباطن) مهوش موجود

يا هادر .. بس مش قادر
وبتغنى ب أسى(موعود)
عود .. عود
يا غايب .. قبل ما يسافر
يا خايب .. بــس بـيعـافر
يا دايب .. ف الهوا الطاير
يا شايب .. يشبه المولود
عود .. عود
يا مِتغَطِى ..ب أمل هايش
يا راكِـب خِـيـلـك الطايش
ياأصلك..فى الخيال عايش
وإسمك فى البشر(محمود)

عود .. عود

6 يوليو 2012