كل ما تريد معرفته عن (كندا)

[Ebn Sina]

اخوانى الاعزاء....بداية انا عضو جديد فى منتدى حوار المصريين وسعيد جدا بانضمامى للمنتدى الشامخ ده رغم ان لم اعرفه الا مؤخرا وبالصدفة......وفى الحقيقة انا مهتم جدا بالهجرة لكندا وتابعت كل الحوارات اللى دارت حول الموضوع واللى غطت جوانب كتيرة منه لكن انا فى الحقيقة عايز اعرف حاجات بسيطة لم يتم التطرق لها من قبل وهى:ما هو الاعمال المناسبة التى يمكن ان اعمل بها لحد ما احصل على البورد فى الصيدلة حيث اننى صيدلى بمعنى هل يمكننى العمل باى مجال قريب من الصيدلة لحد ما اخد البورد

ثانيا بناء على خبرة الاخوة المتواجدين فى كندا هل من الافضل لشاب مثلى غير متزوج ان يتزوج من مصرية قبل سفره او من الافضل ان يرتبط بفتاة من كندا وما هلى القوانين التى تحكم زواج الكنديات من الاجانب وما عواقب الانفصال لو حدث مثلا بخصوص الاطفال والممتلكات الخاصة بالزوج

ثالثا هل من الممكن بعد حصولى على البورد ان اتقدم بطلب لفتح صيدلية بتمويل من احد البنزك الكندية وكم يتكلف تقريبا انشاء صيدلية فى كندا

ارجو رد سريع من الاخوة اللى عودونا على مساعدتهم دايما لاى حد بيطلب منهم معلومة

وجزاكم الله خيرا

[Ebn Sina]

يا جماعة حد يرد على انا عمال اتكلم لحد ما لسانى دلدل وبقى ورم ومفيش حد عايز يرد او يضيف اى تعليق...ايه يا عم هادى رحت فين،وانت يا عم ايهاب يا موسوعة ،وانت يا استاذ وجد يا محترم رحت فين؟.....يا جماعة اغيثونى اغاثكم الله.....اخوكم مزنوق وعايز يعرف راسه من رجليه

[wagdi]

الفاضل إبن سينا...

أنا أعتذر والله إني معنديش معلومات عن موضوع الصيدلة ده... لكن كون حضرتك تفتح صيدلية ده أعتقد حيبقى صعب شوية كتير...

بالنسبة للشغل أنا قرأت من كام أسبوع إن في كيبك بيدرسوا ن يدوا تصريح مؤقت للصيادلة الوافدين يستطيعون به العمل حتى يستكملوا المعادلة وده علشان يسدوا العجز في الصيادلة ...(حوالي 10%)... مش عارف النظام ده إتطبق ولا لسه...بس إن شاء الله على ما توصل يكونوا طبقوه...:)

أما بالنوسبة للعروسة الكندية فنصيحتي إنك تشيل الموضوع ده من دماغك خالص مالص...

إن كنت ناوي تعيش هنا طول عمرك يبقى تشوفلك واحدة بنت حلال تستحمل معاك الغربة وتربيلك عيالك...

تحياتي وتمنياتي بالتوفيق

[متمردة]

ما هذا انا شاركت فى هذا المنتدى وكتبت مشاركتى واتنظرت حتى يظهر الاستاذ مجدى او ايهاب حتى يردوا عليا

والان يردون على غيرى رغم انى كتبت مشاركتى اولا

ما هذا التميز العنصرى

[El-Masri]

الأخ إبن سينا، بالنسبة لموضوع الزواج فهنا فيه حالتين، ممكن تتجوز فى المسجد ومتسجلش الجواز فى الحكومة، وفى الحالة دى الحكومة ملهاش حاجه عندك والفاصل الوحيد هو الضمير.

لو سجلت الجواز فى الحكومة يبقى بتخضع للقوانين هنا وهى إنهم فى حالة الطلاق بيقسموا الممتلكات بالنصف.

طبعا العربيات بيقلقوا من المشوار ده لإنهم دائما بيدورا على ضامن خارجى، زى قانون الحكومة أو المؤخر أو غيرها وحضرتك عارف.

وبرضه الطلاق من زواج حكومى هنا بياخد سنة كاملة على الأقل.

بالنسبة لموضوع الصيدلية فأنا أعرف إن القوانين بتختلف من ولاية للتانية وأعرف واحد صيدلى مكانش قادر يشتغل فى تورونتوا، راح طالع على ساسكاتشوان إشتغل سنة هناك وبعد السنة بقى من حقة يشتغل فى أى مكان فى كندا راح طالع على فانكوفر، أحلى بلد فى كندا فانكوفر على فكرة ، بس غالية شويتين.

بالنسبة لأشغال تانية غير الصيدلة فمتوفرة لاكن العائد مش كبير، وبرضه مش بطال يعنى ممكن تغطى تكاليفك لو بتاخد الحد الأدنى من الدخل وبتشتغل أربعين ساعة فى الإسبوع.

بس لو متجوز وبتاخد الحد الأدنى حتبقى صعبة شويتين خصوصا لو اللى إتجوزتها فاكرة إنها فى الخليج. فى النهاية حكاية الماديات دى نسبية، يعنى فيه ناس عمرها ما بتشبع ودائما تحس إنها فقيرة وفيه ناس بتحمد ربنا وحاسين إنهم مش ناقصهم حاجه.

[Ebn Sina]

بداية اشك اخى العزيز المصرى على اهتمامه بالرد......وكذلك اخى العزيز وجدى....شكرا جزيلا على ردك وان كنت لم توضح لى تماما بعض الامور مثل موضوع تمويل احد البنوك لى لكى افتح صيدلية.....انت قلت انها صعبة اوى يا ريت توضحلى صعبة لى ؟...مش الصيدلية مشروع زى اى مشروع ممكن يتمول من اى بنك .....ولا ده صعب ولا ايه يا ريت توضح لى ارجوك .وكمان انت قلت ان الزواج من اى فتاة كندية صعب جدا وبرضه ما وضحتليش صعبة ليه؟.....ولو صعب الزواج من اجنبية هل هناك امكانية للزواج من مصرية تعيش هناك بمعنى هل من السهل الاحتكاك بالجالية المصرية هل للمصريين هناك رابطة او تجمع مثلا ....انا اسالك عن هذا الموضوع تحديدا لانى مش ناوى اتجوز دلوقتى خالص لانى لازم اخوض تجربة الهجرة دى الاول لوحدى عشان اتحمل نتايج التجربة لوحدى......اخى وجد اعلم اننى اثقل عليك لكن ده من باب العشم ...وارجو برضه انى اعرف راى هادى وايهاب و كل الاخوة الكنادوة فى الموضوع ده

[maksoof]

الأستاذ Ebn Sina

(أنا مش صيدلى) بس ممكن حضرتك تبتدى البحث هنا

[السيد مرسي مخيمر]

السلام عليكوا انا مصري ارغب في الهجرة الي كندا وحاصل علي ليسانس اداب مساحة وخرائط ماهي المهن التي تحتاج الي هذا المؤهل في كندا طبعا بعد المعادلة ارجوا الرد وبسرعة

[ايهاب سالم]

كندا سنة 2020

[مهاجرسوري_1]

بسم الله الرحمن الرحيم

عذرا للاخوه الكرام على انقطاعي ولكن بسسب انشغالي وتحضيري للسفر حيث انه لم يبق الا القليل

جهد رائع منكم وتعاون مشكور وهذا ان دل انما يدل لى طيب اصلكم وكرم اخلاقكم

حقيقة عندي سؤال في غاية الاهميه:

تعلمنون انه لابد من حمل مبلغ عند الوصول حسب عدد افراد العائله يعني زي حالتي 4 افراد حوالي 19000 دولار كندي

كما انني قرات انه لابد من ابراز ما يثبت المبلغ لموظف الهجره عند الوصل الى المطار والسؤال هنا كيف يمكنني حمل مثل هذا المبلغ كاش ؟؟ وهل هناك بديل يعني مثلا شيكات سياحيه هل تقبل عند موظف الهجره لاثبات ذلك ؟؟

وفي حال ان المبلغ لم يكن كاملا يعني مثلا 16000 دولار ماذا ممكن ان يتصرف موظف الهجره ؟؟ هل من الممكن ان يعيد المهاجر على نفس الطياره؟؟؟

ارجو الرد للاهميه وشكرا لكم

[ortho]

السلام عليكم

أنا طبيب مصرى شغال فى السعودية

ان شاء الله هأدم أوراق الهجرة

بس أنا عندى سؤال

أيهما أسرع وأحسن ,,,,, انى أقدم أوراق الهجرة عن طريق مكتب لندن على أساس انى مقيم فى الخليج حاليا ولا أقدمها عن طريق السفارة فى القاهرة

أكيد انتوا عندكوا خبرة بالموضوع ده ....

[ايهاب سالم]

بسم الله الرحمن الرحيم

عذرا للاخوه الكرام على انقطاعي ولكن بسسب انشغالي وتحضيري للسفر حيث انه لم يبق الا القليل

جهد رائع منكم وتعاون مشكور وهذا ان دل انما يدل لى طيب اصلكم وكرم اخلاقكم

حقيقة عندي سؤال في غاية الاهميه:

تعلمنون انه لابد من حمل مبلغ عند الوصول حسب عدد افراد العائله يعني زي حالتي 4 افراد حوالي 19000 دولار كندي

كما انني قرات انه لابد من ابراز ما يثبت المبلغ لموظف الهجره عند الوصل الى المطار والسؤال هنا كيف يمكنني حمل مثل هذا المبلغ كاش ؟؟ وهل هناك بديل يعني مثلا شيكات سياحيه هل تقبل عند موظف الهجره لاثبات ذلك ؟؟

وفي حال ان المبلغ لم يكن كاملا يعني مثلا 16000 دولار ماذا ممكن ان يتصرف موظف الهجره ؟؟ هل من الممكن ان يعيد المهاجر على نفس الطياره؟؟؟

ارجو الرد للاهميه وشكرا لكم

الأخ / مهاجر سوري

لما عملت لاندينج كنت واخد معايا مبلغ بسيط كاش و اعتمدت على استعمال بطاقة الأئتمان في مشترياتي

لكن الغريب أن ضابطة الهجره لم تسألني على إثبات للأموال و لا طلبت حتى تشوف الكاش اللي معايا

لكن في رأيي ان الشيكات السياحيه حل جيد

بالتوفيق

[salem khaled]

السلام عليكم يا شباب

الحقيقة مجهود رائع جدا الي بيحصل في الموضوع ده واحد اشكر كل الي بيساهموا فيه

كنت اود ان اسال اهل الخبرة عن الاتي

انا صيدلي (10 سنوات خبرة) متزوج وعندي طفلين لسه يادوب شهور

باشتغل في السعودسة

من حيث اجراءات الهجرة ومعادلة الشهادة انا عارفها كلها تقريبا ماعنديش سؤال هنا

كل مشكلتي اني باحب احسبها كويس قبل ماخد قرار هاياثر في مستقبل عائلتي واولادي

دلوقتي عاوز اعرف (على وجده التقريب طبعا) ايه وضع الصيادلة في كندا ( انا بافكر في تورنتو)

كل الي باسمعه ان الوضع جميل والدنيا ربيع بس ده بالنسبالي مش كفاية ابدا لاتخاذ قرار زي ده خصوصا ان العمل في السعودية حاليا ممكن اعتباره مستقر نوعا (بس مش هايدوم) علشان كده بافكر في بدائل

هل العيشة مستقرة (امان يعني)

هل الوسط حواليا هايطلع عيالي "على خلق" ولا "لامؤاخذة" من حيث تاثير المدرسة والاصدقاء ولا هاتكون عملية صعبة ومحتاجة حرب عشان نحافظ على العيال؟ انا اقصد الاحساس الشرقي والتقاليد والاخلاق

كمان يهمني اعرف متوسط دخل الصيدلي كام (بعد انهاء المعادلة والحصول على الترخيص بمزاولة المهنة من ال PEBC) طبعا الي بياخده في ايده بعد الضرائب

وكمان مصاريف اسرة زي اسرتي في الشهر من حيث السكن والمعيشة في مستوى عادي وهل سيمكن "تحويش" اي حاجة ولا هايبقى الي جاي على قد الي رايح مقابل عيشة كويسة وبس

هل يمكنني ان افتح صيدلية خاصة ملكي انا (من الناحية القانونية) وهل في امثلة على حد عمل كده وتكلفة ده ايه بالتقريب

التامين الطبي بيغطي الاسرة كلها ولا انا بس، وهل لو باشتغل بتفرق عن لو مش باشتغل؟ يعني هل العمل بيوفر تغطية تامينية مختلفة وهل افضل ولا اسوأ؟

يعني ده اللي فبالي عن موضوع الهجرة وبالرغم من ان عندي كل المعلومات عن الاوراق المطلوبة للتقديم بس اللي موقفني ان الصورة مش واضحة قدامي

هل اتحرك ولا لا

خايف بعد ماروح هناك اكتشف ان السعودية كانت احسن (مثلا يعني) واني غلطت اني غيرت حياتي لمجرد احلام لا اعرف تفاصيلها

الكل بيقول ان الاطباء والصيادلة فرصهم عالية ووضعهم كويس بس انا كلمة (كويس) دي مابتريحنيش

احب اعرف تفاصيل

أرجوا منكم المساعدة وشكرا

[هادي]

ياعم سالم

السلام عليكم ورحمة الله

يعني صيدلي وعندك خبرة سنين وساكت

يا راجل

ده انت بتضيع وقتك بدون أي مجاملة أو رتوش

شوف ياعزيزي

انت بتعمل الصح

قصدي من ناحية انك بتحسبها

ده شيء طبيعي وانا موافقك عليه بكل تاكيد

لان قرار الهجرة قرار مصيري وهام

من ناحية الفلوس

اعرف صديق لي هنا بيعمل حوالي 120 الف دولار سنوي

يعني تقدر تقول بعد الضرائب ومصاريفه (لانه عازب) يمكن بيحوش حوالي نصهم !!

كيف الحال بقى !!!

وبخصوص اولادك

هتلاقي وسط ملتزم واخلاق وهتلاقي وسط مش ولابد .. والطيور على اشكالها تقع

هتلاقي نفسك تلقائي بتبعد عن الناس الضايعه

وتصاحب وتصادق وتزامل الناس الملتزمة اللي طباعها موافقه لطباعك وطباع اسرتك

يعني لا تخاف ابدا من هذه النقطة

التامين الطبي يغطي العائلة كلها بعد ثلاث شهور من يوم وصولك الى كندا

اي سؤال لا تتردد فيه

اخوك في الخدمة

انا هاكون ف مطار تورنتو يوم الاحد .. قول لي رحلتك الساعه كام ؟

[Horus]

الموضوع موش بالسهوله دى ...

اعرف صديق صيدلى ... و هو يعمل بصوره جيده و الحمد لله هنا فى البرتا

و لكن لابد من ذكر الايام و الشهور التى قضاها - بدون دخل - فى مذاكره ما يعرف بامتحان المعادله لكى يتم الاعتراف به كصيدلى فى كندا

و عندها يكون بدأ يضع ارجله على أول السلم

و لصاحب السؤال البلد هنا ممتازه و العيشه زى الفل

بس اعمل حسابك على 6 - 8 أشهر من المجهود و التعب و "المصاريف "

و بعدها إن شاء الله كلله هيبقى تمام

[Horus]

بالنسبه لحكايه الاولاد و التربيه ....

بقالى هنا كام سنه ... و الحكايه ماتطمنش

يعنى احساس اللى بيسبح ضد تيار قوى ... :angry:

كل حاجه ضدك ... المجتمع و الاصحاب ... فى المدرسه و التليفزيون

100 حاجه

و إذا كنت بتشتغل 10 ساعات يوميا ...

قوللى امتى هتقدر تربيهم زى ما انت عاوز ???

تاثيرك موش هيكون ملحوظ

خصوصا لما الاولاد يدخلوا مرحله المراهقه

و العند و الاعتراض بيكون فى تصرفات المراهق اليوميه ... نتيجه احساسه انه خلاص .. بقى كبير و فاهم كل حاجه :blink:

الحقيقه ..... أنا قلقان

مصر كمان حالها مايسرش ... طب نروح فييييينننن :blink: :blink:

[waleedss88]

معلش ياجماعة هوا سؤال مكرر

بس مش لاقيله اجابه قاطعه

انا شغال شغلانه غير تخصصي الدراسي

ولكنه في لستة الوظائف المطلوبه

حد عنده خبرة كفايه؟؟

[مهاجرسوري_1]

شكرا يا اخ ايهاب على المعلومات لكن كم تتوقع ان يكون معدل المصروف الشهري لعائله مكونه من اربع افراد وطبعا المصاريف المعقوله والموزونه

[Horus]

لو سمحتللى أرد - حسب معلوماتى - لغايه ما ييجى الاستاذ هادى

مصروفاتك الشهريه هتختلف شويه حسب انتا فى اى مقاطعه و لكن بالتقريب كده

- الايجار الشهرى 900 - 1500 (قول متوسط) = 1000

- الاكل و لوازم البيت 400 - 600 = 500

-السياره من تامين و بنزين 300-500 = 400

-الفواتير الشهريه من

غاز و كهرباء و تليفون و انترنت الخ 200-400 = 300

-مصروف خاص للزوج و الزوجه و الاولاد -الادويه = 300

يعنى متوسط شهرى 2500 دولار شهريا

طبعا الكلام ده على اساس ايجار شقه معقوله فى حى متوسط

لو فكرت فى شراء بيت فسوف تزيد بعض المصروفات الاخرى

حوالى1000 دولار تقريبا شهريا

ايضا اى مصروف استثنائى مثل المفاجأت .. الغير ساره

- مخالفه سرعه

- مكالمات دوليه طويله من الزوجه لوالدتها :sad:

- فسحه جامده مع الاولاد

او ... السفر الى بلادنا .... فهى تعنى الاف اخرى ثمن التذاكر و الهدايا و خلافه

اتمنى ان اكون وضحت المسائل شويه لحضرتك

و السلام عليكم

[Horus]

اذا حسبت كمان انه يجب عليك ان ةؤثث الشقه ....

حيث ان الشقق هنا تكون مجهزه فقط بالاجهزه الاساسيه (تلاجه - بوتجاز - وساعات .. ميكروويف)

اذا لابد من شراء اسره و حجره معيشه الخ = 5000

كما ان احتياج سياره فى البرد القارص هنا لا اعتقد انه من الرفاهيات = 5000

و هو السبب اللى بيخللى الحكومه الكنديه تطلب ان تحول الاسره مبلغا من المال = 17000 لان هذا المبلغ فعلا يتم انفاقه خلال السته اشهر الاولى

الجميل بقى الحته اللى جايه دى ...

اذا انت عملت اللى عليك و جيت و استقريت و صرفت

و عدى السته اشهر من غير ما تلاقى شغل .. :sad: :P

هتروح للحكومه و هما هيدوك اعانه شهريه - الى ان تعثر على عمل -

أعرف ناس شخصيا على الويل فير دى من شهووووورر و شهووورر

و اللى مالوش أهل الحكومه الكنديه أهله

ناس طيبين اوى الحقيقه :D

تم تعديل 2 أغسطس 2006 بواسطة Horus