كل ما تريد معرفته عن (كندا)

[Lembic]

لكن ما هي الدرجة المطلوبة في الـ ILET عشان آخد الدرجة بتاعت اللغة كاملة

[/quote

من 7 الى 9 تاخد الدرجة كاملة فى الجزء ده ... يعنى من سبعة الى تسعة فى المحادثة تأخذ 4 نقاط فى ال assissment ومن سبعة الى تسعة فى الكتابة تاخذ 4 نقاط فى جزء الكتابة فى ال assissment وهكذا...

[الحازم حسن]

لكن ما هي الدرجة المطلوبة في الـ ILET عشان آخد الدرجة بتاعت اللغة كاملة

[/quote

من 7 الى 9 تاخد الدرجة كاملة فى الجزء ده ... يعنى من سبعة الى تسعة فى المحادثة تأخذ 4 نقاط فى ال assissment ومن سبعة الى تسعة فى الكتابة تاخذ 4 نقاط فى جزء الكتابة فى ال assissment وهكذا...

ألف شكر يا لمبي على المعلومات المفيدة دي ولو انك كنت حتضربني في موضوع قناة الجزيرة :angry:

بس ايه ده انت طلعت اخويا بحق وحقيقي يا لمبي :P

أنا مش مصدق نفسي يا لمبي :P

لا حقيقي مش مصدق نفسي يا لمبي :P

مش مصدق نفسي يا لمبي :D

[هادي]

أشكر أخي العزيز الدكتور (واحد تايه) على سؤاله

وأشكر جميع الاخوة على التفاعل والايجابية

ويارب يجمعنا في الخير دوماً

------------------------------

عزيزي الاستاذ "القرموطي"

السلام عليكم

أنا دخلت موقعهم على النت وحسيت اني مش فاهم بصراحة الناس دي متخصصة في إيه !!!

انت هتدفع لهم المبلغ ده نظير إيه بالتحديد ؟!

هيقدموا خدمات من أي نوع يعني ، وقبلت عندهم في إيه بالتحديد ؟

هل المقصود مساعدة في الهجرة الى كندا

خدها نصيحة من اخوك الصغير

يا تحط فلوسك عند محامي هجرة مضمون

كما فعل اخونا وجدي

يا تتكل على الله كما فعلت أنا والكثير من أصدقائي والكثير من اعضاء المنتدى الكرام ، وتعمل ملفك بنفسك

طالما بتعرف انجليزي بمستوي جيد جدا، يبقى قلقان من إيه

ولو المامك بالإنجليزية ضعيف ، يبقى حاول تقوية في البداية وبعدين تبدأ مشوار الهجرة

ولو انت عايش في الخليج، حاول تصتل على مندوبهم هناك، واليك رابط العناوين والهواتف

http://www.cglobalc.com/en/contact.html

وتقبل تحياتي

[nancyezat]

الاخت العزيزة جيهان - الاخوة الاعزاء هادي و وجدي .

الحمد لله انا الان في صدد عمل الكشف الطبي والسفارة في مصر افادت بانه سيتم الرد في الفترة مابين 2 الى 4 اشهر يعني قربت اجي خلاص انا عايزة اسالكم شوية حاجات معلش ممكن تكون اتقالت قبل كدا بس انا عايزة تاكيد تاني لاني حاسة اني متلخبطة جدا وخايفة جدا ( ربنا يستر ) :-

1 - انا المفروض حاجي مونتريال او تورنتو فكنت عايزة اعرف احجز فين وازاي اول اسبوع لغاية ماندور على شقة .

2- ايه المناطق المعيشية المتوسطة والراقية فيهم واسعار الشقق هتكون كام ؟

3- المدارس الكويسة اوي اسماءها وموقعها فين ( بالنسبة لـDaycare and KG1 ).والاسعار كام .

4- بالنسبة للتطعيمات هيبقى نظامها ازاي بنتي عندها سنة وطبعا في تطعيم شلل اطفال وثلاثي وحصبة .............. .

الخلاصة عايزة اعرف منطقة يكون فيها المواصلات سهلة والمدارس كويسة ومستواها ميقلش عن المتوسط .

معلش ياجماعة انا هتقل عليكم شويا بس ردو عليا بسرعة لو سمحتم . :blush:

[wagdi]

الأخت الفاضلة نانسي...

quote name='nancyezat' date='Nov 7 2006, 12:17 AM' post='241163']

لاني حاسة اني متلخبطة جدا وخايفة جدا ( ربنا يستر ) :-

مادام خايف يبقى حتنجح يا رأفت... (وش يوسف شعبان في رأفت الهجان)... :sad:

أنا حاحاول أرد عليكي... طبعاً على أساس إنك حتيجي مونتريال... أما تورونتو فممكن العزيز هادي أو اي من الأخوة الأفاضل هناك يفيدوكي...

معلش أنا ممل شوية وباحب التفاصيل...يمكن لأني مؤمن إن التفاصيل الصغيرة دي هيا دايماً إلى بتعمل فرق في كل حاجة...إستحمليني...

شوفي يا ست الكل...

قبل ما تسافري تعملي ليستة موفتكسة بكل إلى عندك ولو تقدري إلي عند الجيران بالمقتنيات الشخصية بتاعتكم... طبعاً أهم حاجة المجوهرات وما خف حمله وغلا ثمنه... وبعدين تلفي البيت كدة أوضة أوضة... وتكتبي... عدد 3 سجادة عدد 2 لوحة عدد 1 شمعدان فضي.. وهكذا...

وتعملي نسختين من الليستة دي...وحاقولك فايدتها بعدين...

ثانياً... الفلوس إلى حاتخديها معاكي... حاولي تاخدي معاكي كاش بس مش كتير... يعني عشر ألاف أخضر أو كندي على الأكثر... (وياريت أقل...)...أما باقي الفلوس –خاصة لو مبلغ كبير- فتروحي البنك تخليهم يعملولك شيك بنكي بأسمك...وتاخديه معاكي...(أوعي تنسيه) :D

وبعدين... تبتدي تدوري على النت على أوتيل في الdowntown....

أنا عن نفسي كنت حاجز قبل ما أجي في chateau royal ... ده في شارع crescent في قلب قلب نص البلد...

هو مش قد كدة... بس ميزته إن أوضه واسعة وسعره معقول وأهم حاجة (بالنسة لي وأعتقد بالنسبة لأي حد عنده أولاد صغيرين) إن فيه في الأوض kitchenette... أيام ما جيت كان ب 170 دولار في الليلة.... إعملي حسابك في حوالي عشر أيام... فترة معقولة تكوني خلصتي فيها أوراقكم وتكوني شوفتي سكن وفرشتيه بالأساسيات...

هو الموقع بتاعه www.chateauroyal.com.... بس مش عارف ليه مش شغال...عامة تقدري تعملي بحث عليه وحتقدري تاخدي فكرة... وعامة قبل وصولك إن شاء الله ممكن نبقى نقولك على معلومات طازة....

لما حتوصلي المطار إن شاء الله المواضيع حتلاقيها أبسط ما تتصوري.... خاصة إن معاكي أطفال... والأطفال هنا ميزة كبيرة حتعرفي فايدتهم ...بيفتحوا كل الأبواب المتقفلة... يعني لو فيه طابور حتلاقى واحد جاي وفاتحلك سكة علشان تعدي...وتخشي على الemigration... هناك حتقعدي مع شخص ظريف تبع الحكومة الكندية حيقولكوا بقين حلوين من عينة bienvenu وكدة....وبعدين حايملا معاكم إستمارة الدخول لكل شخص فيكم وحايسألك معاكي فلوس كاش قد إيه وحيسجلها... وحيدردش معاكم شوية يقولكوا إلى لكوا وإلى عليكوا...الإستمارة غلى حايدهالكوا (IMM 5292) تحافظوا عليهم زي عنيكوا...لانكم حتستخدموها كتير في الشهور التالية...

هنا حيسألكوا سؤال حيوي... عنوانكوا إيه... وده العنوان إلى حيبعتوا عليه الPR بتاعكم... أنا فهمت إن مالكيش قرايب هنا... لو ليكي إديهم عنوانهم والجواب حيبقى يروحلهم... لو مالكيش... قوليله إحنا لسة معندناش عنوان... حيديكي نمرة تليفون تتكلمي فيها علشان تبلغيهم بعنوانك في أقرب وقت...

وبعدين حايخدكم يصوركم (خلي المشط معاكي في الشنطة) علشان كارت الPR... (ملحوظة...لو معاكي طفل صغير أوي حاولي على قد ما تقدري إنه يبقى ثابت في الصورة وتتأكدي من الراجل إن الصورة إلى طلعت مطابقة للمواصفات لأن هما ساعات بيستسهلوا خاصة في تصوير الأطفال وبعدين بكام شهر يجيلك جواب يقولك الصورة ماتنفعش تعالي صوري الأولاد تاني...حصلت معايا)....وحايديكوا شوية فلايرز وكتيبات شبيهة بإلى السفارة بعتتهالك قبل السفر...

وبعدين يا ستي حاتخشوا على بتوع quebec... هنا حيشوفوا ال csq (certificat de sélection du Québec ( بتاع كل فرد... الست حتبقى بتتكلم بالفرنساوي... تردوا عليها بالفرنساوي...وحتديكوا برضه كبشة فلايرز وكتيبات...

وبعدين...تخشوا على بتوع الجمارك... هما عادة اغلس من الغلاسة بس مع المهاجرين الجدد ألطف من اللطف...وخاصة لو معاكوا أطفال...حتسألك معاكي إيه...قوليلها (ولو معاكي أي اكل للأطفال قولي...مهم أوي)...وقوليلها بس إحنا لسة في حاجات جاية ورانا... وإديها الليستة (فاكراها؟؟ حاتقولك قيمتهم أد إيه...قوليلها خمسين ألف ميت ألف...زي ما أنت عايزة... زبعدين حايختم على الورقة دي... برضه ؛ايسالك على الفلوس إلى معاكي... تقوليله على الكاش (إلى مكتوب في الورقة إلى الراجل صاحبنا لسة ماليها) وتقوليلها على أي شيك بنكي معاكي وقيمته...وعادة حاتتطلب تشوفه... وحتثبت المبلغ ده.... الكلام ده مهم أوي... ممكن ما ينفعكيش بس ممكن ينفعك أوي أوي بعد كدة في تظبيط الضرايب... وعامة شئ مابيخسرش...

أنا شايفك دلوقتي أتفجعتي وحسيتي إن الموضوع مكلكع... أحب أقولك كل إلى أنا قلته ده من أول وصولك المطار لحاد ركوبك التاكسي برة المطار مش حياخد أكتر من نص ساعة... وغالباً أقل...

حتركبوا التاكسي..الأوتيل يا باشا لو سمحت... (معظمهم لبنانيين ومغاربة على فكرة)... تروحوا الأوتيل تعملوا check in ... تطلعوا الأوضة....قبل ما تفتحوا الشنط وقبل ما تكلموا الأهل تطمنوهم في حاجة مهمممممممممة أوييييييييي..... تفتحوا الbooklets إلى إيدوهالكوا في المطار حتلاقوا عناوين لكذا شركة تأمين صحي خاص... نقي اي واحدة فيهم... تكلموهم وتعملوا insurance لكم كلكم لمدة 3 شهور على الأقل... إعملوه بميت ألف أو ربع مليون...مهم اويييي....ولو ينفع تعملوه قبل ما تسافروا إعملوه.... (أنا بنتي سخنت أول يوم جينا... رحنا مستشفى أطفال جنب الأوتيل... دفعت 500 دولار علشان بس دكتور يشوفها... وبعدين طلع مافيش أي حاجة...نظام كمادات ساقعة وتمبرا... :P

تاني يوم الصبح جوزك ممكن يخلص موضوع الsocial insurance لوحده... بس الmedicare لازم تكوني معاه... وتفتحوا حساب في البنك...وتحطوا الشيك في حسابكم...(على فكرة...هو حيخش في حسابك بس حيفضل متجمد شهر...يعني ماتقدريش تصرفي منه...لذلك خلي معاكي كاش كفاية والأهم كريدت كارد من مصر إن أمكن تصرفي بيه الشهر الأول وحد يبقى يسدد لك في مصر...نظام بابا بعت فلوس... :wub:

بالنسبة للسكن...وده مهم إنك تحدديه بدري بدري علشان تقدري تبعتي العنوان لبتوع الهجرة علشان يبعتولك كارت الPR عليه....

حاولي في البداية إنك تتعاملي مع شركة مش أفراد...يعني شركة بتبقى مسئولة عن عدد المباني...أولاً حيبقى عندك إختيارات كتير... ثانياً بيبقوا مسئولين لو حاجة حصلت في الشقة...يعني مثلاً لو التدفئة حصل فيها حاجة بتكلميهم بيبعتولك واحد بتاع صيانة على طول...كدة...

عادة حتضطري تدفعي شهرين مقدم لأنك معندكيش اي تاريخ في كندا...ولو العقد سنوي (ومعظم البيوت كدة) وحبيتي تخلعي من الشقة قبل السنة حيروح عليكي الشهرين (وده برضه نظام في كل حتة)...

في حاجات كتير لازم تشوفيها في البيت إلى حتسكني فيه بس ده موضوع لوحده ممكن نبقى نتكلم فيه لما يجي وقته...خلينا في المناطق...

انا عن نفسي سكنت في Ile des soeurs ... وكنت متكلم مع إحدى الشركات إلى بتدير عدة مباني وبيوت في الجزيرة... بالإيميل طبعاً... وكنت محدد ميعاد معاهم تاني يوم وصلت...رحت فرجوني على كذا شقة... نقيت واحدة ومضيت العقد يوميها وكلمت علطول الهجرة أديهم العنوان... هو العيب إن العقد سنوي... ودي كانت مخاطرة مني... بس الصراحة المكان جميل جداً... ويعتبر من أرقى وأمن المناطق في مونتريال... وله مميزات كتيرة...منها إنه 10 دقايق بالعربية من الdowntown... وأنا على حسب ما فهم إنك عايزة تشتغلي في التصدير... ومعظم شركات النصدير والملاحة بتبقى في الdowntown...ده غير الجامعات...ده غير إن واصل إتنين هاي وايز (10 ، 20) ودول بيعتبروا شرايين مونتريال ومنهم تقدري توصلي أي حتة... ده غير إن المنطقة هنا أمن حتة للأطفال... في طريق للعربيات...وطريق للعجل...وطريق للبني أدمين...وبيفكروا يعملوا طريق للكلاب والقطط... فيه باركات كتير ...حضانات كتير... معظمهم حلوين...(لاحظي إن علية القوم ساكنين هنا)...غير إن المكان له طابع خاص في البني أدمين إلي ساكنين فيه... يعني لا هو west وتلزيق...ولا هو east وغباوة ولا هو downtown وزحمة...جزيرة...جوة جزيرة....فيه غابة صغنونة لو بتحبوا المشي... فيه ملاعب تنس وحمامات سباحة مترمية في كل حتة... وموقع المنطقة إستراتيجي بين Ile de montreal والsouth shore....

طبعاً مافيش حاجة من غير عيب... والعيوب هيا...

مافيش مترو بيعدي هنا... أوتوبيس بس... وإن كان فيه خطين اوتوبيس...ومثلاً انا لو عايز أروح ال downtown

ومش عايز أوجع دماغي بالركنة باخد أوتوبيس بأكون هناك في تلت ساعة...بس لازم عربية... (وإن كان في جميع الأحوال العربية أمر ضروري)

تاني حاجة المنطقة غالية حبتين في الإيجارات... بس لو حتحطي في إعتبارك كل الخدمات إلى بتخديها حتلاقيها مربوحة...يعني مثلاً شقة أوضة واحدة تخشلها في حوالي 800-900، وشقة أوضتين فوق ال1100...بيت تلات أربع أوض..فوق ال2000.... طبعاً ال900 دولار إلى بتدفعيهم هنا في أوضة ممكن تاخدي بيهم أوضتين في ختو نص نص...أو حتى بيت كامل في الأدغال...بس مانصحكيش.... لأن بيتك والمنطقة إلى إنت حتعيشي فيها حتأثر جامد على تكيفك وتقبلك للوضع الجديد...يعني يا حتحبي البلد وغلى فيها...يا حاتكرهي كندا وإلى فيها....

شوفي مثلاً الأخ العزيز إيهاب سالم لما راح عمل لاندينج وأصدقاءه إلى قعد معاهم كانوا عايشين في حتت حلوة...الراجل نفسه إتفتحت وأخد صور وتفكيره للقرار الهجرة بقى إيجابي... أما مثلاً لو كان راح لأصدقاءه لقاهم عايشين في منطقة مش قد كدة...كان نفسه إتصدت وبدأ عقله يودي ويجيب....

تالت عيب...وإن كنت لا أعتقد إنه عيب أوي بالنسبة للي عندهم اطفال هو إن المنطقة هاااادييييية.... يعني لو واحد جاي بطوله وعايز كل يوم يخرج يروح حتة مش حتاكل معاه خالص... وبالعكس إلى عنده أطفال ممكن دي تبقى ميزة....

أنا عامة شفت مناطق كتير...وبالمقارنة لقيت هنا أحسن حاجة... خاصة في السنين الأولى... وبعدين لما يستقر بكم الأمر إن شاء الله...وتفكروا تشتروا بيت مثلاً ففي الحالة دي ممكن يبقى فيه كلام تاني....

عامة...ده موقع الجزيرة...

www.ile-des-soeurs.ca

وده موقع شركة هنا تدير العديد من المباني والبيوت

www.structuresmetropolitaines.com

ممكن تخشي وتتفرجي وتاخدي فكرة....

ده موقع المدرسة

www2.csmb.qc.ca/iledessoeurs

الحضانات فيه كتير... وزي ما قلتلك...إلى مسجلين مع الحكومة ب 7 دولار في اليوم...وإلى مش مسجلين مع الحكومة فأسعارهم بتتراوح من 18 إلى 35 دولار في اليوم... وبعدين إنت بتبعتي تاخدي الفرق من الحكومة...

ومتسأليش أي حضانة أحسن من التانية لأن ده موضوع نسبي بحت... والمهم تبقي إنتي مستريحة للمكان والناس إلى فيه...لأنك لو مستريحة فبنتك برضه حيستريح والعكس صحيح...

فيه هنا عرب مسلمين كتير يسكنون المنطقة (معظمهم سعوديين أو مصريين وأغلبهم أطباء ومهندسين يدرسون في mcgill و Concordia )....

في أماكن برضه حلوة للسكن .westmount و rockland و Plateau Mont Royal ....بس اغلى شوية...ومحتاجة خبرة شوية في التنقية...

طبعاً الأخوة الأفاضل هنا ممكن يفيدونا أكثر كل حسب المنطقة التي يعيش فيها....

بالنوسبة للتطعيمات فدي ما تشغليش بالك بها...إنت إمشي مع التطعيمات بتاعة مصر عادي لحاد ما توصلي... وقبل ما تسافري تروحي للدكتور بتاعك خليه يكتبلك شهادة أو على الروشتة بتاعته التطعيمات إلى بنتك خدتها كلها بالإنجليزي...لما تيجي هنا إن شاء الله... وبعد ما الmedicare يجيلك...تاخدي البنت وتروحي على أقرب عيادة جنب البيت... كل طفل هنا لازم يبقى فيه له دكتور... فالدكتور حيملى ورقة وتمضي عليها وتديله قائمة التطعيمات إلى البنت أخدتها...هو حيعملها carnet de vaccination وحايكتب التطعيمات إلى هيا خدتها في مصر وبعدين حايشوف إيه إلى ناقصها من التطعيمات حسب النظام هنا ويحدد معاكي ميعاد تودي البنت تطعم وبعد كدة عادي بقى...كل تطعيم في ميعاده زي بقية الشعب (نظام كمل شهرين يطعم ضد الدرن...السل يعني لو ناسي).... كدة...

لو فيه اي مشكلة لا قدر الله ممكن تروحي لأي دكتور على فكرة...إنت حرة... بس التطعيمات والمتابعة الدورية فيفضل يبقى في أقرب عيادة جنب البيت...أما لو أي حاجة تانية فأنا بودي بنتي في عيادة إسمها tiny tots....هيا بعيدة شوية...بس فيها أحسن دكاترة أطفال في البلد... وده الموقع بتاعهم

www.tinytots.ca

خد فكرة وأشتري بكرة...

معلش طولت عليكي يا ست نانسي...

ربنا يوفقك ويكرمك إن شاء الله...ونصيحة أخيرة...

ماتعمليش حاجة في البلد دي قبل ما تسألي وتستشيري حد عايش هنا.... لأن الواحد أتخم في حاجات كتيرة أوي لو كان لقى حد ينصحه كان ممكن يوفر عليه كتير أوي.... لا خاب من إستشار حتى لو إستشار حمار....:)

وعامة لسة بدري وقبل السفر إن شاء الله حيبقى فيه كلام تاني ونمدك بما هو طازج وحديث من المعلومات....

أخوكم وجدي.... دكتوراه في الهجرة تخصص كيبك لجميع إكسسوارات المحمول...

تم تعديل 8 نوفمبر 2006 بواسطة wagdi

[ابن الصعيد]

الاخ / هادى

مرحبا بعودتك الى منتداك

على الرغم اننى لم اتقابل معك شخصيا ولكنى والله احبك فى الله

وحشنا حديثك الرائع ونصايحك الغالية

ونرجو منك ان تحدثنا على اونتاريو وتورونتو وكيف ببيقضى المسلم الملتزم ايامة هناك وكيف بيفسح

كلنا اذان صاغية

الاخ / وجدى

الموضوع السابق رائع يا ريت تكمل بنفس الاسلوب وبنفس التفاصيل والهدوء

ولى سؤال طوال الشتاء فى كندا الواحد بيعمل بيات شتوى ولا فية نشاطات وفسح وسط الجليد

والسلام

[هادي]

مداخلة سريعة ثم نعود الى التفاصيل

حبيت أشكر أخي الدكتور الصعيدي الرائع (واحد تايه) واخبره أني كذلك احبه في الله تعالى

ونسأله سبحانه أن يجمع بيننا في الخير دوماً

وحبيت أدعي لاختي نانسي ان تصل بسلامة الله وان يحفظها رب العالمين ويرعاها ويحفظ اوىدها واسرتها

وحبيت أشكر اخي الحبيب جدا الاستاذ وجدي على ما نقله لنا جميعا وأنا منهم من خبرات " مونتريالية "

:unsure:

وعلم الله كم احب هذا الانسان الرائع المحترم

يارب يكتر من أمثالك في منتدانا وفي حياتنا

كان هدفي من الموضوع في البداية متواضع

ولكن سبحان الله العظيم

صار الموضوع من أحب مواضيع المنتدى الى قلبي

لما يذخر به من اخوة كرام واخوات فضليات هم مثال لكل مصري جميل ولكل مصرية أصيلة

هذه الروح الحلوة

وهذا الود الحقيقي

وتلك النصائح و الاحساس بأننا ننتمي الى اسرة واحدة ويخاف كل منا على مصلحة اخوانه واخواته

ويسدي النصح باخلاص ورفق

هي من أهم المكاسب في هذا المنتدى الجميل

دمتم لي جميعا بألف خير

وسنلتقي لنشرح تفاصيل تورنتو والحياة فيها

محمد الهادي

مراسلكم في سرس الليان محافظة كندا جنب بتاع العصير

[nancyezat]

الاخ العزيز وجدي,

صباح الخير ,

انا طبعا كنت متاكدة انك هترد عليا بس بصراحة مش بكل التفاصيل والدقة دي . والله انا مش عارفة اشكرك ازاي انت فعلا فتحت نفسي على كندا اكتر من الاول, انا فعلا حاسة انكم مجموعة كويسة جدا جدا ربنا يديم المعروف ويوفقكم ان شاء الله ,

انا فعلا عايزة اشتغل في الاستيراد والتصدير او الملاحة اي حاجة يعني في المجال دا وانت فاجئتني انك عارف الموضوع دا , لان دا دليل على انك متابع الموضوع بتاع المنتدى متابعة من نار ربنا يجازيك خير ان شاء الله ( شفت دعيتلك كام دعوة :wub: ) انت تستاهل بصراحة اكتر من كدا . المعلومات اللي انت بعتها قيمة جدا لكن عايزة اسالك سؤال مهم جدا تفتكر لو متكلمتش فرنساوي في المطار هعرف اسلك ولا في مشكلة لاني مش اوي في الفرنساوي يعني بتكلم بس ممكن الخبط حبتين ؟؟؟؟؟؟ :)

طيب والشغل هيبقى في فرصة وانا مش اوي في الفرنساوي .

ومستنياكي يا جيهان ياحبيبتي انتي وهادي تكملولي الموضوع .

على فكرة انا خلصت الميديكال خلاص وقالولي خلال 4 شهور هيرده علينا .

[اسامة]

الاستاذ وجدى :

شكرا شكرا شكرا شكرا شكرا شكرا كثير جداجدا جدا

احب اقولك لحضرتك و لكل الموجودين انا ونانسى " المدام " الف شكر لن انت حضرتك قولت من قلبك عشان تفيد الناس و ده كان واضح وعشان كدة كان فى مصدقيه فى كلامك . انا فعلا سعيد بوجودك لان رجل مريح جدا و بشكرا جدا

و اتمنى فعلا لو فى اى حاجة انت عاوزها منى " من مصر هنا " قبل ما اسفر من مصر خلال الشهور القادمة ان فعلا تحت امرك .

و مش حضرتك وبس بل كمان مدام جيهان الرائعة والاستاذ هادى عمدة " وهو فعلا عمدة المنتدى " انا تحت امركم و انا احب اقدم لكم افضل تحية لمشركتك اما كل قراء المنتدى .

وان كان هذا لا يمنع ان هناك اناس اخيرين ممتزين مثل فوركس و ا. ايهاب سالم واخيرين "

انا ونانسى عندنا اساالة مهمةو القلق اكلنا :

1- الاستاذ وجدى : ان مقتنع زيك ان التفاصيل الصغيرة هى المهمة جدا و انت لازم تفهم الحياة ماشى الزى عشان تعرف تخش الدوامة وتبدا

عشان كدة : عاوز اساللك اعلى نسبة بطالة فى كندا فى مونتريال 12.3 % . وعليه انا قلقان تفتكر فرص العمل لى MBA محاسب خبرة 10 سنين و english كويس و french ضعيف ممكن ابدا باى شغلانة واي هو الدخل المتوقع فى البداية " انا طبعا سالتك السوال ده قبل كدة بس عشان ان قريتك عاوز اعرف ايه اخبار سوق العمل و انا المروح ادور على انه وظيفة وزى طبعا انعارف WES و معدلة الشهادة .

2- هو رد الفرق Day care من الحكومة شهريا ولا سنويا لن عندى بنتان ( 35 $ X 2 girls X 25 Day ) يعنى 1750 دولار كندى

3- موضع العنوان عشان كل حاجة بتيجى بالبريد صعب اقوى !!!!!!! و لكن التامين الصحى تفتكر حيتكلف كام اول 3 شهور لى ول نانسى و الطفلتين )

الاستاذ هادى و مدام جيهان :

ارجو ان تمدونى بوصل تفصيلى زى ساعدة الباشا الكبير الاستاذ وجدى و شكرا

لان انا Senior accountant and build my budget for canada

و شكر ا لسيادتكم جمعيا و اتمنى لكم صدقونى كل خير

[Gihan]

مساء الفل عليكم

معلش بقالى مدة مشغولة ومش عارفة الاقى وقت ادخل المحاورات

اصلى نازلة مصر كمان اسبوعين ان شاء االلة وطبعا باحضر للسفر

حبيبتى نانسى والاخ العزيز اسامة

الف مبروك و ربنا يوفقكم في اخر الخطوات قبل ماتخشوا دنيا جديدة فى كندا

دة الاخ وجدى طلع جارنا لانى عايشة فى Brossard فى الضواحى الجنوبية لمونتريال

يعنى وانتو طالعين من مونتريال تعدوا على وجدى وبعدين تاخدوا pont champlain وهوب تلاقوا نفسكم فى بروسار

بروسار كمان منطقة حلوة وفيها احياء متوسطة واحياء راقية وميزتها ان شبكة المواصلات فيها ممتازة وفية اتوبيسات بتروح down town فى 20 دقيقة

ممكن تلاقوا فيها شقق ارخص من ile des soeurs لكن فيها luxe اقل

بالنسبة للاولاد فالمنطقة فيها انشطة كتير ومدارس ممتازة

الموقع http://www.ville.brossard.qc.ca/asp/sitewe...il_Brossard.asp

الجالية الاسلامية كبيرة جدا ولسة بانيين جامع من اكبر الجوامع فى مونتريال وحيبقى فية مدرسة ومكتبة وصالة اجتماعات

كل السلع العربى موجودة من القطايف للفسيخ بس اللى بيقهرنى هى الجوافة المصري اللى بيبيعوها بدولار الواحدة

اكتر العرب هنا لبنانيين ومغاربة لكن فية طبعا مصريين كمان

تصوروا ان في فصل ابنى فية 10 اولاد عرب من 27

ممكن تشوفوا موقع بروسار بالنسبة لمونتريال على

http://www.mapquest.com/maps/map.adp?formt...QC&zipcode=

بصراحة وجدى شرح الوصول لكندا بشكل راءع

بالنسبة للفرنساوى اول ما توصلوا ماتقلقوش حاولوا تردوا على قد ماتقدروا بالفرنساوى وكملوا بالانجليزى وعموما انتم خلاص مهاجرين يعنى مش لسة بيبتوا فى امركم

حادورلكم من هنا لبكرة ان شاء اللة على معلومات اكتر عن السكن والحضانة والشغل واكمل باقى الرد

قلبى معاكم في الفترة الراءعة والمقلقة اللى قبل السفر دى وان شاء اللة ربنا يسهلكم كل خطواتكم

يلا تصبحوا على خير و اكمل بكرة

[wagdi]

السلام عليكم ورحمة الله….

الأخ واحد تايه…. ياباشا الشتا هنا أحلى ألف مرة من الصيف… الصيف إلى فات مثلاً كان فيه مطر كتير… يعني تبقى درجة الحرارة 30 وأنت لابس نص كم والدنيا بترخ مطر على راسك….الخريف جميل…منظر الشجر…الجو فيه لسعة برد بس الشمس بتدفيك..كدة…وكذلك الربيع لما التلج يسيح والأخضر يبان والدنيا تزهزه… أما الشتا فعلى الرغم من البرودة الشديدة بس له حلاوته… ياسلام لما الجو كدة يبقى ناقص 20 وتنزل تتمشى في وسط البلد… ولا تروح الويك أند تعمل سكي… ولا تروح ال vieux port تعمل سكاتينح.... هو يمكن أول سنة يبقى صدمة حضارية شوية بس لما تتعود تلبس إزاي وتعرف تروح فين حتلاقي الشتا جميل...

العزيز هادي... والله ربنا يعلم مكانتك في قلبي من غير ما أشوفك...وأتمنى يوم من الأيام الظروف تجمعنا على خير إن شاء الله...(إلا صحيح إنت ما بتجيش مونتريال ليه؟  ... والفضل ليك بعد ربنا في تجميعنا في الموضوع الجميل ده...

الأخت نانسي والأخ أسامة...

بما إنكم عملتوا الميديكال يبقى قدامكم سنة من دلوقتى على السفر إن شاء الله... نصيحة بقى...حاولوا ترتبوا نفسكوا من دلوقتي علشان لما تيجي الفيزا تسافروا على طول...ليه؟... علشان إحنا دلوقتي شهر 11...لو ربنا سهل وجت الفيزا على شهر 3 يبقى إنتوا تيجوا هنا على شهر 4...ليه؟... علشان مونتريال في الوقت ده بتبقى عاملة زي العروسة إلي لسة صاحية من نوم طويل... الدنيا ربيع والجو بديع... الشغل بيبقى كتير... موسم العزال بيبقى لسة ما بدأش فاصحاب الشقق بيدللوا على الشقق...وهكذا...

بالنسبة للفرنساوي زي ما الأخت جيهان قالتلك بالظبط...بس شوفي...عامة حاولي تتكلمي فرنساوي على أد ما تقدري... حتى لو فرنساوي مكسح... كدة كدة إنتي حتقعدي أول كام يوم مش فاهمة حاجة...لأن اللكنة هنا بتخلي الفرنساوي لغة تانية خالص... عايز أقولك أنا أعرف فرنسويين هنا ساعات مابيفهموش الكيبيكوا... بس الناس هنا تحبك اوي لو تتكلمي فرنساوي...حتى لو قعدتي تتهتهي وتدوري على الكلام...حتى لو مافهمتيهومش...حايعيد إلى قاله مرة وأتنين... عارفة زي كدة ما تلاقى واحد صيني حافظ القرأن كله بس بالصيني وواحد تاني قاعد بيتهته ويعافر في أية واحدة بس بالعربي...غصب عنك قلبك حيميل للي بيتكلم لغتك حتى لو غلط.... ده غير إن أصلاً هنا الموضوع له جذور نفساوية وتاريخية وكلاكيع وعقد وكلام مش مكانه دلوقتي إنتوا لما تيجوا إن شاء الله حتعرفوه...:)

بانسبة لموضوع الشغل.... شوفوا... هو لو كان زي ما بتقول نسبة البطالة 12% فلازم برضه تحط في حسابك إن نسبة إلى معاهم شهادة جامعية هنا لا تتعدى ال30 في المية...يعني الخبرات والبكلريوسات والماجستيرات إلى بيشحتوا بيها على الرصيف مصر من كترتها هنا لها قيمة وبتتقدر.... بس المشكلة هو أول السكة... إنك تلاقي الشغلانة إلى فعلاً إنت عايزها... بص...أولاً وأخيراً وفي النص الموضوع توفيق من ربنا سبحانه وتعالى...بس برضه ربنا قال إسع يا عبد...والسعي هنا عايز شوية صبر وشوية همة وعزيمة وشوية ترتيب في الأولويات...

(طب كفاية كدة كلام إنشا...:)

بص...إنت من دلوقتي تقعد تتسلى في ال cv بتاعك... شوف المواقع زي joboom و workopolis... حتلاقي نصائح عن طريقة كتابة الcv... عن الinterview...كدة..

لما توصل إن شاء الله وتستقر...تبتدي تشوف إعلانات الشغل في المواقع والجرايد وكدة...كل دة –بيني وبينك- كلام لا بد تعمله بس من الأخر مش حايودي ولا حايجيب...حتعمل إيه... تطلع على شركات العمالة المؤقتة...زي دي مثلاً... http://www.randstad.com... دي شركات بتعلن عن وظائف مؤقتة...يعني مثلاً شركة عندها موظفة بتولد وحتغيب شهرين تلاتة وعايزين Temp يقعد مكانها...شوفلك أي شغلانة إن شاء الله data entry بس المهم تبقى في شركة في مجال عملك... يعني مثلاً الأخت نانسي بتقول عايزة تشتغل في التصدير...هنا شركات الشحن والتصدير بتبقى محتاجة عمالة مؤقتة كتير بالذات مع بداية الصيف....الموضوع ده له فايدتين مهمين أوي...أولاً حتعرف الدنيا ماشية إزاي...نظام الشغل...سوق العمل في مجالك...حتتعرف على الناس إلى شغالة معاك...حتعرف منهم كتير وتتعلم وتستفيد منهم أكتر...

الميزة التانية والمهمة أوي إنها شغلانة مؤقتة...ودا مهم أوي...لأنك لو اشتغلت اي حاجة بطريقة دائمة تبقى إنت إبتديت غلط وإلى بيبتدي تحت حيفضل تحت...لكن الشغل المؤقت حيديك الخبرة إلى إنت عايزها وفي نفس الوقت حيبقى في دماغك دايماً إنك بتدور على الشغلانة إلى إنت عايزها فعلاً...والشغلة دي حتيجي إن شاء الله...بس مش حاتيجي عمرها وأنت قاعد في البيت...ومش حاتيجي برضه أول ما توصل على طول...مش عايز أقولك إن أنا شغلتي فيه منها في كيبك كلها تمانية...شوف إنت بقى الإحتمالات... وماجتش إلا بعد أكتر من سنة... طبعاً توفيق وترتيب من ربنا سبحانه وتعالى... بس برضه ماينفعش تقعد وتقول أستنى...لازم تبقى في الدنيا علشان الدنيا تحس بيك...

حاجة تانية برضه هو إن الموضوع ده حيديك خبرة كندية...والموضوع ده حتسمعه هنا كتير... وحاتستغرب وتقول طب منين أنا لسة جاي وحايبقى عندي خبرة كندي... والموضوع الصراحة مش كدة أوي... يعني هو الراجل إلى بيعين واحد في وظيفة معينة (وظيفة بجد يعني مش مؤقتة) ولها مسئوليات وأثر في الشغل...لازم يبقى متأكد إن الراجل إلى بيعينه ده فاهم الدنيا هنا ماشية إزاي...حايتعامل مع الناس إزاي... وبرضه عايز يرفع سماعة التليفون يلاقي حد إنت كنت شغال عنده قبل كدة يسأله عليك...references يعني...عايز يتأكد مية في المية إنه بيعين الشخص المناسب... مش مثلاً يعين واحد يلاقي مواعيده بايظة...أو يلاقي مش بيتعامل بإحترافية في شغله...تفاصيل الشغل دي مش مهمة...يعني مثلاً إنت محاسب ومعاك ماجستير...يعني أكيد بتفهم...وإلى مش عارفه حتتعلمه مع الوقت...لكن طبيعة الشخصية نفسها هي المهمة.... طبعاً الكلام ده لا ينطبق على الشغل المؤقت أو الوظائف الصغيرة... ... وعلى قد حساسية الوظيفة بيحتاج refrences... مش عايز اقولك إن أنا طلبوا أرقام تليفونات الجهة التي كنت أعمل بها في مصر...وكلموهم أكتر من مرة...

حاجة جميلة ممكن تعملها مع الشغل المؤقت ده هو الدراسة…وهنا الدراسات العليا معظمها بتبقى بليل…يعني من 6 إلى تسعة…وأكبر جامعتبن mcgill و Concordia في نص البلد...يعني ممكن تخلص شغلك وتنزل تحضر محاضراتك....طبعاً تدرس حاجة لها علاقة بشغلك...ودي حتفيدك اوي...فوق ما تتصور... يعني مثلاً الcv بتاعك لو مكتوب فيه MBA من جامعة مصرية ومعاها إن شالله certificate من mcgill مثلاً حتفرق كتير...وإنت برضه حتستفيد وحتتعرف على ناس...ومعرفة الناس إيه؟.كنوز...:)

بالنسبة للفرنساوي حاول تقويه... فيه أعمال مش مهم أوي فيها اللغة الفرنسية...يعني مثلاً شركات الشحن والتصدير بيبقى كل شغلها بالإنجليزي..بس برضه الأفضل يبقى الفرنساوي بتاعك كويس...وكويس هنا مش يعني تكتب قصايد...المهم تفهم و تتفهم...والباقي حايجي لوحده....

يعني بإختصار علشان ماطولش عليك (اّل يعني ما طولتش..:) خلي عقلك في راسك...إعرف إنت عايز إيه... ألعب بكل الأوراق...خلي السلاح صاحي...وقبل كل ده خليك مع ربنا...ربنا حيكرمك إن شاء الله...ولو بعد حين...

أه....سيبك من الwes...إنت هنا أول ما تيجي تروح تعمل معادلة للشهادة بتاعتك...أنا فاكر كنت كاتب اللينك في مداخلة سابقة...المهم دي تبقى من الحاجات الأولى إلى تعملها لأن الموضوع ده بياخد حوالي تسعة اسابيع...وهي دي المعادلة المعتمدة في كيبك...

بالنسبة للdaycare... يا سيدي الفلوس ممكن تجيلك مقدماً لو عايز....شفت الحلاوة... بس على فكرة...لازم أنتوا الأتنين تبقوا بتشتغلوا أو بتدرسوا full time...غير كدة نؤسف...

التأمين مش فاكر والله...بس مش كتير يعني...قول مثلاً من مية لمتين دولار...حاجة كدة...

الفاضلة جيهان...

طب دا إحنا طلعنا جيران أهو... ياللا بقى فين واجب الجيرة... صينية محشي ولا حاجة...:)

طب أنا عندي لحضرتك سؤالين...

المصريين فين في البلد دي.... يعني أنا داخل على تالت سنة هنا وما شفتش غير إتنين مصريين...واحد رجع مصر والتاني راح أمريكا....يعني المغاربة تلاقيلهم تجمعات وجالية ومواقع على النت وكدة....وكذلك اللبنانيين والباكستانيين وحتى السوماريين وأهل بابل...إلا المصريين...هما كتير أنا عارف...وموجدين...شاممهم....بس فييين بقى؟؟؟؟ 

السؤال التاني بقى على سيرة الفسيخ والقطايف... ماتعرفيش الكرفس إلى زي بتاعنا في مصر ألاقيه فين؟ أه وحاجة كمان والنبي...السلق بتاع القلقاس...لأني كل ما أروح أقول لحد في المحلات اللبناني سلق بيبصلي من فوق لتحت ويمشي :o

هو إسمه إيه طيب....

طب صينية المحشي إيه ظروفها...حتبعتوها إزاي..؟؟؟

طب زي بعضه :D 

تصبحوا على خير....

تم تعديل 11 نوفمبر 2006 بواسطة wagdi

[nancyezat]

الاخت جيهان

اهلا بيكي في مصر , مصر كلها هتنور والله . ومستنية المعلومات اللي هتبعتيهالي

[nancyezat]

الاخ وجدي

طبعا انا برده مش عارفة اشكرك ازاي انا فعلا حاسة انك بتدي كل المعلومات اللي عندك وانت فعلا نيتك خير ونفسك تخدم , بس بصراحة المرة دي انت خضتني لما قلتلي قدامكم سنة بس لما قلت شهر ابريل رجعت ارتحت تاني احنا فعلا عاملين حسابنا على كدا عشان هانيا بنتي تكون خلصت المدرسة والجو يكون بقى كويس في كندا بس احنا فعلا مستعجلين جدا ومش عايزين نتاخر عن كدا ادعولنا ربنا يوفقنا .

على فكرة ياوجدي انا لبنانية والسلق هو هو نفس الاسم بس قوله بالقاف العربية الفصحى وعموما ياسيدي ان شاء الله واحنا جايين هنجبلك معانا شوية سلق واللي انت عاوزه اول مانحجز هقولك عشان تشوف اللي انت عاوزه من مصر نجيبهولك معانا والكلام دا لكل الناس الحلويين اللي في المنتدى والله انتو تامروا .

[مهاجر سوري]

السلام عليكم اخواني الكرام

وصلت كندا في 16 اوكتوبر يعني لسه ما كملت شهر

تم تعديل 14 نوفمبر 2006 بواسطة مهاجر سوري

[Siwa]

السلام عليكم يا قوم: :o

يا استاذ وجدي، والله انا مندهشة ان حضرتك مش قادر تلاقي مصريين وحضرتك عايش في مونتريال. دا انا سمعت اشاعة بتقول ان هما فوق ال150,000 هناك. بس انا متفقة معاك تماما انهم متفرقين عن بعض اكتر من اي جنسية تانية. بس على الاقل مكن تشوف بعضهم في الجوامع،و الكنائس، و الجامعات. انا كنت زي حضرتك هنا في مانيتوبا لغاية رمضان اللي فات لما رحت افطار لقيت فية اكتر من 100 مصري و مصرية، معظمهم طبعا طلبة في الدراسات العليا. ما علينا، إن شاء الله تنوري كندا يامدام نانسي. و ارجوكي يا مدام جيهان تسلميلي على مصر كلها لاحسن ماشفتهاش من اكتر من تلات سنين . وإن شاء الله تسافري و ترجعي بالف سلامة.

اختكم الاميرة الطيبة، اللي هو انا طبعا.....سيوة :)

تم تعديل 13 نوفمبر 2006 بواسطة Siwa

[اسامة]

الاستاذ هادى :

ازى صحتك وفى انتظار الرد والوصف التفصيل بالنسبة لمدينة تورنتو كما حدثنا الاستاذ وجدى المحترم

اجمل التحيات وصباحات على عيون المنتدى و عيونكم و شكرا جزيلا ياستاذ وجدى وانا منتظر بصراحة المزيد من المعلومات لن كل مفهمت كل ما تعرف تلعب وكل ما انت بتشترى عمر من الزمن وهى الخبرة

استاذ هادى باشا فين الاذاعة بتاعت الوصف التفصيلى لمدينة تورنتو

الى SWIA قللى ايه اخبار مونتابيا و ايه رايك فى الهجرة هناك و لو انت اختارتى موناتبيا اخترتيه لايه

و شكرا انك بترحبى بانانسى وانا فين انا جوزها والله

شكرا

و فى انتظر المزيد

[sendrella119]

المصريين فين في البلد دي.... يعني أنا داخل على تالت سنة هنا وما شفتش غير إتنين مصريين...واحد رجع مصر والتاني راح أمريكا....يعني المغاربة تلاقيلهم تجمعات وجالية ومواقع على النت وكدة....وكذلك اللبنانيين والباكستانيين وحتى السوماريين وأهل بابل...إلا المصريين...هما كتير أنا عارف...وموجدين...شاممهم....بس فييين بقى؟؟؟؟ 

السؤال التاني بقى على سيرة الفسيخ والقطايف... ماتعرفيش الكرفس إلى زي بتاعنا في مصر ألاقيه فين؟ أه وحاجة كمان والنبي...السلق بتاع القلقاس...لأني كل ما أروح أقول لحد في المحلات اللبناني سلق بيبصلي من فوق لتحت ويمشي

هو إسمه إيه طيب....

ياراجل حرام عليك ده انا زوجي اصحابه مسميينه شيخ حارة

من كتر ما هو شغال يجيبهم من المطار ويسكنهم ..جنبنا

عايزة اقولك ان احنا لما بنخرج في الويك اند .......بنخرج اسر ...تجمعات . :closedeyes: :rolleyes: ..الناس بتتخض مننا ..خصوصا اننا محجبات كلنا ...يعني بيقولي علينا ارهابيين ...بس بيني وبينك :P ..حلوة

بنضحك وبننبسط والاولاد بتهيص :D

ولو جييت في يوم وصليت في المسجد ده

6550 -6570 Darlington Montreal (quebec) H5s2j3

Tel:(514)736-5023

حتشوف بنفسك

تاني حاجة في محل اسمه مونديال .....

مش عارفه تعرفه ولا لا

جنب مترو ستور اللي في فان هورن

مش عارف اوصفه.ده فيه كل حاجة عربي ...وبسعر رخيص

بس انا معرفش السلق اصلا

لاني عمري ما عملت قلقاس .......اصلا

ينفع جرجير -_-

[nancyezat]

الى العسولة سيوة ,

مرسي على ترحيبك بيا وماتنسينيش من دعواتك ياباشا , وقوليلي انتي بتشتغلي ولا ست بيت ؟ وبشتغلي ايه ؟ واخبار الشغل بالحجاب ايه واخبار الاولاد ايه بتسيبيهم ازاي وفين وبتبقي مطمنة عليهم ولا ايه ...... واي معلومات مفيدة ياريت , بصي انا اللي فعلا يهمني الاولاد يعني موضوع الفلوس والشغل والحاجات دي سيباها للباشا اسامة , اي نعم انا لازم اشتغل عشان انا مبحبش قعدة البيت بس دا طبعا في مصر عشان مطمنة على اولادي مع حماتي لكن في الغربة معرفش النظام ايه .

بس انا معرفش السلق اصلا

لاني عمري ما عملت قلقاس .......اصلا

ينفع جرجير

طبعا ياسندريللا ينفع الجرجير اي حاجة ممكن تخضر القلقاس هتنفع . بس انتي عارفة احسن حاجة انك ماعمركيش عملتي القلقاس يبقى اكيد مبتحبيهوش اصل انا كمان مبحبوش . مع ان الكلام دا ممكن يزعل وجدي بس متقلقش انا برده ممكن اجيبلك معايا سلق .

[forex]

السلام عليكم

يا اخوان في شي بالطلب الجديد اسمه

identity card nomber

هذا شو المقصود فيه

هل مقصود في الرقم الوطني الي مكتوب بجواز السفر

و لا رقم بطاقة العمل للي بيعمل ببلد تاني غير بلده

الرجاء الاجابة من الي عبو الطلب و متأكدين من الجواب

تحياتي للجميع

[sendrella119]

بس انا معرفش السلق اصلا

لاني عمري ما عملت قلقاس .......اصلا

ينفع جرجير

طبعا ياسندريللا ينفع الجرجير اي حاجة ممكن تخضر القلقاس هتنفع . بس انتي عارفة احسن حاجة انك ماعمركيش عملتي القلقاس يبقى اكيد مبتحبيهوش اصل انا كمان مبحبوش . مع ان الكلام دا ممكن يزعل وجدي بس متقلقش انا برده ممكن اجيبلك معايا سلق .

اهلا نانسي.....

عايزة اقولك اني مرة قطعت مع السبانخ جرير ....صحباتي قالوا لي قطعي لنا السبانج

وانا اشتغلت ..علي كل الخضار :) اللي علي السفرة

كانت ايام :ninja:

ما تقلقيش ابدا من...المجي كل شئ هنا مترتب ومنظم ...وما تحمليش هم حاجة ان شاء الله ..اما من ناحية الحجاب ما تقلقيش ابدا ..ما فيش حاجة تخجلي منها...

هما ما لهمش غير اللي يدخل فيهم شمال .....ومفيش مانع يمين :lol:

من ناحية المدارس ...اولادك حيروحوا المدرسة اللي تابعة للحي ..هما اللي حيختاروا لك المدارس..لو حتدخليهم مدارس حكومية .

ومتخافيش عليهم حيبقوا نوابغ جنب ..الكيبكوا اللي هنا

عايزة اقولك ان ابني كل سنة بياخد اخر السنة جايزة افضل طالب ...في المجهود او الابداع ..لانهم بيختاروا 3 طلاب اخر كام عام ..الحمد لله

لو جيتي علي موريال ....حا اديكي نمرة تليفوني وتبقي تسألي علي كل فتوتة

وان شاء الله نبقي حاضريين

في حدود ما أوتينا.....من علم :D