كل ما تريد معرفته عن (كندا)

[اسامة]

الاستاذ هادى :

انا بشكرك جدا جدا وكويس انى سمعت حسك

بالنسبة للفلوس المحامى بتاعى ممكن يكون بيفتى بس الا انا متا كد منه ان احد اهم الفروق بين كندا و هجرة كيبك انك لازم تحول مبلغ حسب عدد افراد الاسرة على بنك كندا قبل ما تسافر و كما ذكرت ان كنت حسابها ساعتها حوالى 75 الف جنية مصرى كان من 3 سنين كان مبلغ لحد ما .

السوال هو حضرتك بقالك 3 سنين فقط ؟

بالنسبة ل DEE

انا عن نفسى عاوز اقولك انا نفسى اروح فانكوفر - بس ان عرفت انها غالية جدا جدا

احسن حاجة تروحى كيبك - مونتريال لان حاسس ان اكتر دعم وراحة فى كيبك -بس لو ليكى فى الفرنساوى عشان تقدرى تبدا - من وجة نظرى

تورنتو اعتقد هى ده المدينة الا كل المهاجرين بيروحلها - اللغة انجليزى - اكبر جالية اسلامية هناك كل ده معلومات من هادى وجدى وجيهان و اعتقادت شخصية من قراتى عن النت

بس انا حسس ان المكن الا يكون فيه شغل حيبقى فى اقامتك و عامة ايه رايك لو نرتب مع بعض

هادى وجدى سندريلا و حياتى جيهان انا اعتقد حاعمل لاندج فى منتصف يناير

شكرا وانا بحبكم جميعا

انت فين ياجيهان

و الله يامستر ايهاب على الصور الاكتر من رائعة على الواحة المصرية

[DEE]

شكرا يا اسامه ايوه كده عرفت ان مشاركاتى مرئيه الحمد لله والله يا أسامه انا ماليش فى الفرنساوى للأسف مدارسنا فى مصر انت عارف بتأسس الواحد كويس فى اللغه الفرنسيه :wub:

لاندنج فى نصف يناير انت مستعجل قوى يا اسامه وهذا ان دل لا يدل الا على راحتك وانبساطك فى المكان الى انت قاعد فيه :D

وياريت ياجماعه نكون على اتصال دائم ونكون جاليه رائعه حتى لو اختلفت المدن التى سنستقر فيها وليست ككل الجاليات المصريه الى فى الغربه الى انا عرفاهم دول :wub:

[ايهاب سالم]

لم ارى نصائحكم يا اخوانى وأخواتى نذهب الى اى مدينه تكون افضل لى ولزوجى وبناتى لم ارى التفاعل مع سؤالى حتى ايهاب[/][] لم ينقل لى خبرته فى الاندنج وكم يأخذ الأوراق من وقت وينصح بمحامى ام ماذا .... انا كده حبتدى اشك فى نفسى ان مشاركاتى غير مرئيه ولا ايه :wub:

يا ابن سوريا[=#] ماذا فعلت انت احدث الناس وصلت لكندا ياريت تنقل لنا ماذا حدث لغايه ما ايهاب يطل علينا ويرد على تساؤولاتى :wub:

أستاذ / dee

لإنهاء إجراءات الأقامه القانونيه فقط .. أنت لا تحتاج أن تبقى في كندا و لا يوم .. لأن الإجراءات تنتهي في المطار عند و صولك و يمكنك أن تستقل أول طائره و تعود بدون ما تدخل تورونتو حتى

المشكله هو إنك لازم تعطي لهم عنوان ليرسله لك الpr card عليه و لو عندك صديق مقيم هناك هيستقبل الكروت (لكل فرد كارت) و يرسلهم لك كما حدث معي

لو معندكش صديق يبقى لازم تتفق مع محامي عشان يستقبل لك الكروت على عنوانه و يرسلهم لك

بالتوفيق

[ايهاب سالم]

رأيت زميل لنا في العمل جاء ليعمل (مدخل بيانات) وهو هندي ومعاه ماجستير في علوم الحاسب من استراليا

بلد فيها العجايب

بلد بتاعت شهادات صحيح

:wub:

هادي حبيبي

تسمح لأخوك الصغير يقول رأيه في النقطه دي تحديدا من واقع أنه مجالي و من واقع أن لي 3 أصدقاء في كندا حاليا يعملون في نفس المجال و نقلوا لي خبرتهم

بالعكس يا هادي يا أخويا

معلوماتي بتقول إن مجال ال IT بالذات الموضوع مالوش دعوى بالشهادات الأكاديميه

الا إذا كنت ستعمل في مجال أكاديمي مثل التدريس بالجامعات أو المدارس

أو قسم ال R & D في إحدى الشركات العملاقه

أما إذا كان الحديث عن العمل في شركات IT تجاريه تستهدف الربح في أي مجال مثل

SOTWARE DEVELOPMENT

DATABASE ADMINISTRATION

NETWORKS

الخ .. فليس من المهم تماما الشهادات الدراسيه التي حصلت عليها .. المهم انت بتعرف تشتغل ايه .. عندك مهارات في ايه .. بتعرف تبرمج بلغة ايه ..

بتعرف تدير قواعد بيانات ايه و هكذا

هل إشتركت في تطوير نظم مشهوره و متداوله بكثره مثل أنظمة الحسابات و غيرها و تعلم خبايها ووووو

الشهادات المهه في هذا المجال هي شهادات إثبات الخبره التي تحصل عليها بعد إمتحان مثل شهادات أوراكلOCP - OCA - OCM

ميكروسوفت MCSE و غيرها

أحد أصدقائي طلبت منه وكالة التوظيف صراحة حذف معلومات مؤهله الدراسي من السيره الذاتيه و التي تنص على أنه مهندس حاسبات .. لأنه لن يعمل مهندس حاسبات و لكن سيعمل كمدير شبكات و قواعد بيانات .. و لا يوجد داعي لوجود معلومه في السيره الذاتيه لا تفيد

هذا الصديق .. ماشاء الله .. ربنا يباركله.. تعدى راتبه السنوي حاليا ال 5 خانات و لا يحمل سوى بكالوريوس الهندسه و من إحدى الجامعات الإقليميه في مصر

و لكنه محترف في مجاله .. مش نظام مذاكرة كتب و إمتحانات

و لأن مجال ال IT هو مجال خدمي SERVICE SECTOR فهو يعتمد بالدرجه الأولى على رواج القطاعات الأخرى و لذلك فنفس هذا الصديق جلس في بيته بدون عمل أكثر من مره في فترات الكساد و لكن طبعا الأنظمه الأجتماعيه تغطي هذه الفترات مش زي عندنا

أرجو أن أكون قد أفدت

و إتدرب كويس .. أنا جايلك

[DEE]

أستاذ / dee

لإنهاء إجراءات الأقامه القانونيه فقط .. أنت لا تحتاج أن تبقى في كندا و لا يوم .. لأن الإجراءات تنتهي في المطار عند و صولك و يمكنك أن تستقل أول طائره و تعود بدون ما تدخل تورونتو حتى

المشكله هو إنك لازم تعطي لهم عنوان ليرسله لك الpr card عليه و لو عندك صديق مقيم هناك هيستقبل الكروت (لكل فرد كارت) و يرسلهم لك كما حدث معي

لو معندكش صديق يبقى لازم تتفق مع محامي عشان يستقبل لك الكروت على عنوانه و يرسلهم لك

بالتوفيق

مقبوله منك استاذ بالرغم انى عماله اقول انا وزوجى وبناتى .... :wub:

وشكرا على الرد يا ايهاب وسؤال تانى يا ايهاب لو سمحت يعنى اى فاسلتيس الحكومه الكنديه بتعطيها زى مصاريف الأولاد ممكن يبعتوها على العنوان ولا لازم نكون متواجدين هناك اعذرونى يا جماعه على الاسئله الكتيره

تم تعديل 12 ديسمبر 2006 بواسطة DEE

[wagdi]

الفاضل أسامة...ألف مبروك ويارب تكون خطوة موفقة في حياتك إن شاء الله...

عزيزي هادي... اسامة محجوز كيبك خلاص وعملناله إذن مخازن....تورونتو إيه إلي انت عايزه يروحها دي... لا لا لا....لو سمحت مش عايزين سرقة زباين....<_<

أسامة تاني... أنت جاي في يناير إن شاء الله؟....ونعم الإختيار... طب ماتنساش تجيب معاك المايوهات ولوازم البحر...

ياللا الخيرة فيما أختاره الله....mfb:

[ابن الصعيد]

مبروك اسامة

ومتنساش تاخد كاميرا ديجيتال علشان الصور

وتكتب لنا كل شئ

وتسلم لنا على الاخوة بكندا

....................................................................................................

بالنسبة للشغل بكندا مثل الشغل فى اى حتة بالدنيا توفيق ورزق من الله

بتلاقى اتنين معاهم نفش الشهادة ونفس الخبرة

وواحد شغال براتب اكتر من التانى

وبتلاقى واحد لا معاه شهادة ولا حاجة وبيعمل فلوس اكتر من اللى معاهم شهادات

وكل واحد عندة اكتر من مثال

المهم يسعى وفى النهاية العمل رزق وكما قال الامام على كرم الله وجهه "علمت ان عملي لن يقوم به أحد غيري فاشتغلت بة"

.........................................................................................................

الاخ هادى

اخيرا سمعنا صوتك انت فين يا راجل .... طبعا بيات شتوى الان بكندا

يا ريت نسمع صوتك على طول

..........................................................................................................

كنت اريد اى احد يكلمنا على ولاية مانيتوبا manitoba انا قرأت عليها فى النت

ولاية السكن فيها رخيص وهادية وعدد السكان فيها قليل

ولكنها برد بالشتا

حد ممكن يكلمنا عنها حتىلوسمع من أحد عنها

وشكرا للجميع

[اسامة]

جيهان انت هنا اهلا وسهلا

[ايهاب سالم]

أستاذ / dee

لإنهاء إجراءات الأقامه القانونيه فقط .. أنت لا تحتاج أن تبقى في كندا و لا يوم .. لأن الإجراءات تنتهي في المطار عند و صولك و يمكنك أن تستقل أول طائره و تعود بدون ما تدخل تورونتو حتى

المشكله هو إنك لازم تعطي لهم عنوان ليرسله لك الpr card عليه و لو عندك صديق مقيم هناك هيستقبل الكروت (لكل فرد كارت) و يرسلهم لك كما حدث معي

لو معندكش صديق يبقى لازم تتفق مع محامي عشان يستقبل لك الكروت على عنوانه و يرسلهم لك

بالتوفيق

مقبوله منك استاذ بالرغم انى عماله اقول انا وزوجى وبناتى .... <_<

أنا أسف و الله مخدتش بالي

وشكرا على الرد يا ايهاب وسؤال تانى يا ايهاب لو سمحت يعنى اى فاسلتيس الحكومه الكنديه بتعطيها زى مصاريف الأولاد ممكن يبعتوها على العنوان ولا لازم نكون متواجدين هناك اعذرونى يا جماعه على الاسئله الكتيره

ممكن و أعرف حاله زي كده عايشه هنا في قطر و فلوس العيال بتنزلها في الحساب هناك في كندا

[الحازم حسن]

هذا الصديق .. ماشاء الله .. ربنا يباركله.. تعدى راتبه السنوي حاليا ال 5 خانات و لا يحمل سوى بكالوريوس الهندسه و من إحدى الجامعات الإقليميه في مصر

يا بــخــتـــــه :angry2:

[Gihan]

ازيكم يا شباب وحشتونى جدا وعمالة اشقر عليكم من ساعة مارجعت كندا من يومين لكن مش لاحقة اكتبلكم

حبايبي نانسى واسامة

الف مبروك ولو انهم ضيعوا على الشربات يعنى مش كانوا يبعتولكم الجواب يوم ولا اتنين بدرى وانا لسة فى مصر يللا ملحوقة يبقى لى عندكوا واحد sirop d'érable لما توصلوا ان شاء اللة

وانا شايفة اسامة متحمس وناوى على يناير على خيرة اللة ان شاء اللة عموما السنة دى الجو برضة معقول بالنسبة لديسمبر وربنا يهدية فى يناير ويبقى حنين عليكم

طبعا لو عندكوا اى اسءلة قولولى على المحاورات او على msn

على فكرة انتو قررتوا حتسكنوا فين ولا لسة

[هادي]

الاخوة الافاضل

اخبار الشتا والبرد معاكوا ايه ..

احنا هنا لا زلنا بخير والله والتلج لم نراه بعد

:wub:

====================

عزيزي الاستاذ 123

انت دخلت دخله غلط باين عليك

موضوع زواجك من كندية بالـ " فلوس " ده اصرف نظر عنه ..

دي مجرد أفلام هندي ليست في واقع الحياة

اعتقد انك محتاج تجلس في هدوء لتحدد ماذا تريد في الفترة القادمة من حياتك بالتحديد

تحياتي

====================

ايهاب باشا

عارف والله ان فيه ناس بتاخد في مجال الـ IT مرتبات كبيرة (وان كانت حدوتة فوق الـ 100 الف دي واسعه حبتين)

:o

لكن راح اعديها عشان خاطر عيونك

عموماً انت جبت المفيد لما قلت ان مجال الكمبيوتر زي كل المجالات بيتأثر بعوامل كثيرة وتحدث فيه بطالة

وهو حاليا في كندا في بطالة

والاستثناء فقط هو أصحاب المواهب العالية في هذا المجال والذين يحترفون ويتقنون أداء أكثر من وظيفة فيه

ولك أن تراجع بنفسك مواقع التوظيف لترى كيف أن شكرات الحاسب تطلب مهارات متنوعة في هؤلاء ليس من السهل توفرها في شخص واحد لو اخذنا في الاعتبار طبيعة التوظيف في بلدنا وبلاد الخليج .. فلن تجد " بسهولة " مدير شبكات و معاه سيسكو و شهادات مايكروسوف وف نفس الوقت عقده في يونكس و برمجة مواقع النت مثلا

وانا في انتظارك يا زعيم

ولابس الترنج ونافخ البالونات مع الواد زناتي

===================

استاذنا " واحد تايه "

انا معاك على طول يا سيدي الدوق و اسمعك بقوة خمسة على خمسة بمقياس ريختر

:P

بس ساعات باغطس غطسين لزوم أكل العيش والله

دعواتك

====================

عمي الكبير الخديوي " وجدي " باشا

احترامات افنظم

اسامه باشا ييجي عندك او ينزل عندي

اسامه باشا ده لينا كلنا

ومش معقول هنمسك ف بعض عشان اول زبون

ربنا كبير

ومحدش بينام من غير عشى

انا بارمي شباكي على اخويا ايهاب واخويا ابو إياد .. وادينا بنهدي النفوس :wub:

وكله برزقه

ربك مبينساش حد ياعزيزي الارشيدوق

========================

عزيزتي الاخت DEE

وان كنت مش فاهم " دي " اختصار ايه بالضبط .. لكن مرحب بيك يا الف مرحب

انت تنوري كندا مع الاستاذ والبنات ونشيلك فوق راسنا وجوه عيونا

اعذريني هو سؤالك محتاج ايضاح شوية

قصدي مثلا هل سؤالك عن سكن مستديم أم سكن مؤقت لمدة اسبوعين مثلا

وبعدين حركة التفاف (لف وارجع تاني) من بتوع علاء ولي الدين وراجعين لبلاد الخليج بسرعه !!

معلش انا اصلي احب استوضح قبل الاجابة

ولو ممكن استعين بصديق .. يبقى هاتصل على اخويا زوهيري (collect call)

ملحوظة :

حكاية انك ترجعي الخليج و الدولة تحط لك مبلغ شهري للاطفال في حسابك دي مش قانونية

سيبك من حكاوي ايهاب لحسن باين عليه مذاكر كتاب كندا بالمقلوب

mfb:

دي كلها محاولات غير قانونية

وبيمسكوها عاجلا او آجلا وفيها غرامه كبيره

والبركة في الحكومة الالكترونية ، يعني كل ملفاتك مفتوحه على بعضها ومسيرهم يعرفوا الغلط ده في يوم

انا بس باهدي النفوس

==================================

يا استاذ اسامه ويا مدام نانسي

هو مجرد اعلان

والاختيار لكما

عندنا في تورنتو بعون الله استقبال في المطار مع غدى وعشى مجانا اول يومين (اصلنا مش بنفطر ) :P

واسعارنا لا تقبل المنافسة ، ونتحدى

لدينا اسعار خيالية في النوم مثلا

تنام واقف بسبعه دولار

تنام على كرسي تلاتاشر دولار

تنام وتصحى بالتناوب كل نص ساعه .. تلاته دولار

وشفشق ميه بلاستيك هديه لكل معتمر .. قصدي مهاجر

عندنا تلات عيال بيعملوا "شو " ولا تقول لي عزب شو ولا هنيدي كماننا ولا عدوية

استعراضات بهلوانية قبل العشا وبعد العشا وفوق ظهرك أثناء نومك كمان

يعني تنسى سمير الاسكندراني وسمير غانم ،و سمير صبري بتاع زمان

و تنسى ميكي وسمير و تان تان كمان

تلات عيال تربية ايدي يا محترم والتذكرة بنص دولار كرامة لسيدي " ابو تونتو " ومقامه الغالي

ده مش معناتوه اغراء انكوا تسيبوا مونتريال لا سمح الله

لأ لأ لأ

مش انا

ده مجرد جر رجل بس

وتطبيق آليات السوق الحر والمنافسة المفتوحة

اشوفك ف يناير يا اسامه

على مِسدات بقى هه

;)

سلام مؤقت

تم تعديل 13 ديسمبر 2006 بواسطة هادي

[ايهاب سالم]

ايهاب باشا

عارف والله ان فيه ناس بتاخد في مجال الـ IT مرتبات كبيرة (وان كانت حدوتة فوق الـ 100 الف دي واسعه حبتين)

:P

لكن راح اعديها عشان خاطر عيونك

ولك أن تراجع بنفسك مواقع التوظيف لترى كيف أن شكرات الحاسب تطلب مهارات متنوعة في هؤلاء ليس من السهل توفرها في شخص واحد لو اخذنا في الاعتبار طبيعة التوظيف في بلدنا وبلاد الخليج .. فلن تجد " بسهولة " مدير شبكات و معاه سيسكو و شهادات مايكروسوف وف نفس الوقت عقده في يونكس و برمجة مواقع النت مثلا

معلم هادي

مش واسعه و الله يا هادي يا أخويا .. أصل صاحبي ده مش طبيعي كده زي البشر .. ده واهب نفسه للشغل .. مش متجوز و مش ناوي يتجوز (حسب كلامه) ووقته كله شغل و مذاكره و إمتحانات و شهادات .. هأقولك الحاجات اللي أعرف إنه بيشتغلها ومعاه شهادات معتمده فيها

unix administration

oracle database administration

network and security manager

certified project managment proffesional PMP

دول اللي أعرفهم .. و معاه شهادات من أوراكل و سيسكو و سن و ميكروسوفت .. و دول شوفة عيني .. متعلقين ع الحيط في شقته في تورونتو

ملحوظة :

حكاية انك ترجعي الخليج و الدولة تحط لك مبلغ شهري للاطفال في حسابك دي مش قانونية

سيبك من حكاوي ايهاب لحسن باين عليه مذاكر كتاب كندا بالمقلوب

يا عمنا بتشوط فيا ليه بس

الله يسامحك

( عقلي الباطن : ما انا كنت مرتاح و باتفرج من بعيد لبعيد .. ايه اللي رجعني أشارك) :wub:

أنا قلت إنها قانوني :wub:

ما هو طبعا واضح إنها مش قانوني .. لكن دي مش شغلتي .. أنا جاوبت الأخت على أد السؤال

ما احنا عارفين ان فيه حاجات مش قانونيه و غلط كتير و الناس بتعملها .. في اللي بيعدي و فيه الللي بيتقفش

و الله العظيم واحد زميلي في العمل ليه صاحب لسه راجع من كندا من شهر و معاه الجواز و مكانش مقيم هناك

محامي ضبط له الأوضاع و راح على إمتحان الجنسيه و ضرب الجواز و رجع

هتقولي مستحيل و ده كان زمان .. هأقولك المستحيل ليس أهلاويا :P

عايز تخصيص أكتر

الحاله اللي اتكلمت عليها للأخت / dee لواحد فلسطيني مواليد قطر .. هاجر كندا و إتجوز كنديه و خلف منها ولد و بنت و بعدين إنفصلوا بالتراضي و أخد الولاد و رجع يعيش في قطر

و هيا لم تبلغ الحكومه بذلك عشان تستمر في قبض المساعده الحكوميه لهم و هم غير مقيمين في كندا و لم يعودوا اليها من 3 سنوات

هو اللي قال لي كده ... بيكدب عليا بقى ده مش ذنبي

أنا قلت اللي أعرفه

بس كده ..

ما ينوب المخلص الا تقطيع هدومه

أنا داخل البيات الشتوي تاني

هتلاقيني هناك mfb:

تم تعديل 13 ديسمبر 2006 بواسطة ايهاب سالم

[DEE]

عزيزتي الاخت DEE

وان كنت مش فاهم " دي " اختصار ايه بالضبط .. لكن مرحب بيك يا الف مرحب

انت تنوري كندا مع الاستاذ والبنات ونشيلك فوق راسنا وجوه عيونا

اعذريني هو سؤالك محتاج ايضاح شوية

قصدي مثلا هل سؤالك عن سكن مستديم أم سكن مؤقت لمدة اسبوعين مثلا

وبعدين حركة التفاف (لف وارجع تاني) من بتوع علاء ولي الدين وراجعين لبلاد الخليج بسرعه !!

معلش انا اصلي احب استوضح قبل الاجابة

ولو ممكن استعين بصديق .. يبقى هاتصل على اخويا زوهيري (collect call)

ملحوظة :

حكاية انك ترجعي الخليج و الدولة تحط لك مبلغ شهري للاطفال في حسابك دي مش قانونية

سيبك من حكاوي ايهاب لحسن باين عليه مذاكر كتاب كندا بالمقلوب

:wub:

دي كلها محاولات غير قانونية

وبيمسكوها عاجلا او آجلا وفيها غرامه كبيره

والبركة في الحكومة الالكترونية ، يعني كل ملفاتك مفتوحه على بعضها ومسيرهم يعرفوا الغلط ده في يوم

انا بس باهدي النفوس

السلام عليكم جميعا

ايوه كده نورتوا الموضوع بنشاطتكم الجميله والله زمان ... هادى جيهان وجدى ايهاب

هادى .... بالنسبه لموضوع (دى) ده سر شويبس mfb:

شوفت بقى ان مشاركاتى كانت غير مرئيه لأنى قلت اننا هنعمل لاندج على شهر مايو وعلى فكره ده ضرورى لأن التأشيرات تنتهى فى شهر 6 ... فى امور لازم ننهيها قبل سفرنا ان انتهت ان شاء الله يكون الاستقرار الدائم بكندا وان تأخرت سيكون الرجوع الى الخليج مره أخرى كله لم يفصل فيه بعد .....

يا سيدى هدفنا ليس اللجوء الى اى شىء غير قانونى ولكنه كان استفسار هل من حقوق الأطفال هذا المبلغ بمجرد دخولهم كندا حتى لو خرجوا بره تانى ام ماذا والأخ ايهاب لم يقصر ورد على حسب معلومات وما تقلقش النفوس هاديه :wub:

فأجلا او عاجلا سيكون الأستقرار النهائى بكندا ولكن لم تنصحونى بأى مدينه ونقولى مدينه كده على زوقكم

سلامى لكم جميعا

[nancyezat]

الاخوة هادي ووجدي ,

ربنا يخليكم احنا مش عايزين مشاكل من اولها , متتخانقوش مع بعض وحبو بعض , احنا ان شاء الله غالبا هنكون في مونتريال بس دا لسا مش قرار نهائي ممكن يكون في تورونتو .

وبعدين ياهادي انا اول ماقريت الرد بتاعك بتاع الغدا والعشا قلت الحمدد لله المصريين لسا بخير ولما كملت وقريات من غير فطار وباقي الكلام فهمت انه بس جر رجل زي ماانت قلت , احبطتني اتني قلت كويس هنعيش سفلقة على حد لغاية منلاقي شغل يعني حوالي 6 شهور بس كدا على ماتفرج بس يللا مفيش نصيب شكلنا هنروح مونتريال.

جيهان متقلقيش هعزمك على اللي انتي قلتي عليه ولو اني مش عارفة دا ايه بس هعديهالك انتي من اولها هتكلميني فرنساوي وتحسسيني بالنقص دا مكنش كابوتشينو شربنا سوا , بس انا هعديها عشان انا بحبك .

هخلص شوية شغل وارجع اسالكم على كام حاجة كدا

باي دلوقتي

[Gihan]

الاخ هادى وصاحب القعدة دى كلها

ماتسيبك انت من تورونتو وتعزل مونتريال واهو تبقى لمة حلوة وفى نفس الوقت نقضى على المنافسة داحنا عندنا Mont-Tremblant في الشتاء للتزحلق على الجليد و سباق العربيات Formule1 و jazz festival في الصيف يعنى حتهيص اوى

وبعدين انا ووجدى خلاص علقنا العوليقات ونصبنا الخيمة على Pont Champlain لاستقبال نانسي واسامة وحجزنا الراجل اللى بيقلد عمرو دياب والمشاريب كمان

==========

اسامة

اية ابنى انتى حتغير رايك وتروح على تورونتو عشان عشوة مش كفاية زوهيري راح مننا طب دانا حاعملكوا محشي من اللى باعملة فى الاعياد فقط (ايوة يا وجدى انت طبعا معزوم )

وموضوع الشو برضة يتقدر علية دى العيال هنا تفرح قوى لاحياء السهرات اجيبلكوا ابنى وشلة العيال صحابة يغنولكم عربى مكسر يجنن

على فكرة كنت عايزة اقولك ان شهر يناير برغم انة في عز الشتاء فية ميزة ان المحلات بتعمل تخفيضات كبيرة لان بعد جنون الشراء بتاع كريسماس وكل الناس اللى اشتروا حاجات الشتاء بالمحلات بتبقي بتنش ومحتاجين الناس تشترى البضاعة اللى موجودة وطبعا دة ممتاز لان فى الاول لازم تشتروا البلاطى والبوت واللذى منة لكم وللاولاد

===========

نانسي

لا يا نانسي يا حبيبتى لازم تشدى حيلك معانا فى الفرنساوى انا عايزايكى فى اول نزولة ليكى فى مصر يكون لسانك اتعوج خالص وماتقوليش غيرmerci لما الشيال فى المطار يطلب منك اجرتة بالدولار

=========

DEE

هو دة سؤال برضة مونتريال طبعا احسن مكان لا بجد هى ممتازة صحيح لكن لازم تتعلمى فرنساوى عشان تعيشي كويس فيها وعلى فكرة الحكومة بتدى المهاجرين الجداد الحق فى دروس لغة لمدة سنة يعنى اللى عندة استعداد بيتعلم ببلاش

انا باعمل اوقات شغل كمتطوعة فى موسسة لمساعدة المهاجريين الجدد وباقابل مهاجرين من بلاد كتير بيجوا من غير فرنساوى ولا حتى انجليزى لكن بياخدوا دروس و بيتعلموا بصراحة حاجة جميلة لما باشوف جرءاتهم و تصميمهم

لو اخدتى كدة كام يوم اجازة وتفرغتى لقراية الموضوع دة من اولة حتلاقي معلومات كتير عن مونتريال وتورونتو و فانكوفر

==========

لكل الاخوة اللى بيناقشوا موضوع الشغل فى مجالIT

انا حاقولكم وجهة نظرى بما انى اشتغلت فى المجال دة لمدة 13 سنة عند IBM

اولا مليان ناس بتدور على شغل فى IT ودة معناة ان الشركات تنقى وتختار على مزاجها والشهادات والcertifications مهمة طبعا لكن الاهم هى الخبرة وعدد السنين وطبعا references ومع دة كلة بيدخل عامل الحظ و المعارف networking ودة لان الdevelopers &system admin الشاطرين بيتعرفوا وبيقدروا من خلال سمعتهم يغيروا شغل من شركة للتانية مع زيادة فى المرتب او على الاقل يعملوا negociation مع شركتهم لانها حتخاف تخسرهم

اما موضوع ال 100الف فدة طبعا ممكن جدا لكن بشرط ان الواحد مايعدش ساعات شغلة يعنى واحد زى صاحب ايهاب ولازم يكون عندة خبرة معينة فى تخصص مافيش منة كتير وفى الحالة دى بيعمل negociation زى ما هو عايز

انا اعرف واحد كدة متخصص في data back-up solutions و بيكسب ماشاء اللة اكتر من 100الف بس طبعا دة كلة بييجى بعد سنين من الشغل والخبرة (الكندية)والكورسات المستمرة

فية كمان طريقة تانية وهى ان الواحد يشتغل فى بيع enterprise solutions وفى الحالة دى بيبقى جزء كبير من دخلةcommission يعنى لو باع كويس ياكل ملبن وخصوصا فى الشركات الكبيرة لكن برضة فية منافسة جامدة جدا والنجاح محتاج خبرة وذكاء وحظ

خلاصة الموضوع ان مافيش حاجة سهلة لكن فية فرص نجاح للى يشتغل ويتعب ويتعلم بذكاء

واللى لقاء جديد :P :D

[wagdi]

صباح الخير يا كندا....

الأخت جيهان...حمد الله على السلامة....

فين الضريبة على الكابوتشينو إلى بتقولي شربتيه في مصر؟؟ هه؟؟؟

فاكرين من كام صفحة كدة لما قولنا عايزين نلم الأخوة المصريين في مونتريال....إيه رأيكم....لسة مستسحمسين؟؟؟ وأهو عندنا زباين جاييين جدد ممكن نتمرن عليهم... يعني نشوف إيه إلى ممكن نعمله مثلاً للوافدين الجدد ونطبقه عليهم...وبعدين تبقى إسطمبة...مثلاً يعني...

نشوف لو ممكن نعمل موقع يلمنا... اي حاجة...

ياريت لو نقدر نبتدي نمشي في الموضوع ده قبل نهاية السنة...

ونلم الشمل...

ونلم إشتراكات...

ونغتني....

ونهرب......:P

[Gihan]

اللة يسلمك يا وجدى انت كمان صاحى من لنجمة وجريى على المحاورات

طبعا لسة متحمسة للفكرة وخصوصا بعد ماشفت مصر داحنا حيبقى عندنا زباين كتير الناس كلها عايزة تهرب

بس حنستنى شوية على موضوع الهروب بالاشتراكات لحد ما الشباب ده كلة يلاقى شغل ويعمل فلوس وبعدين بقى نهيص

حابعتلك على الخاص e-mail عشان نبدا موضوع رابطة المصريين في كيبيك

سلام

[nancyezat]

بص بقى ياوجدي باشا انا موافقة تتمرنه فينا اول مانيجي بس طبعا دا هيعفينا من الاشتراك ولا ايه ؟ وبعدين خليك حنين شويا زي جيجي كد استنى على الناس لما تشتغل وتعمل قرشينات كوسة قصدي سنتات كويسة وبعد كدا ياسيدي ابقى لم الاشتراكات زي ماانت عايز وعموما متقلقش خلاص انا بالنسبة ليا هدفعلك اشتراك سنة مقدم المهم تبداو الفكرة وانا واسامة معاكم ان شاء الله بقلبنا وبكل ماتحتاجوه من سنت لدولار بحاله .

هانيا بتسلم عليكي ياجيجي اوي وعدينا من كام يوم قدام المكان اللي اتقابلنا فيه وقالت لاسامة يابابا مش هنا قابلنا طنط جيهان .انا كمان معزومة على المحشي ولا ايه انا بموت في المحشي ومبعؤفش اعمله ولا عندي وقت

[Gihan]

بص بقى ياوجدي باشا انا موافقة تتمرنه فينا اول مانيجي بس طبعا دا هيعفينا من الاشتراك ولا ايه ؟ وبعدين خليك حنين شويا زي جيجي كد استنى على الناس لما تشتغل وتعمل قرشينات كوسة قصدي سنتات كويسة وبعد كدا ياسيدي ابقى لم الاشتراكات زي ماانت عايز وعموما متقلقش خلاص انا بالنسبة ليا هدفعلك اشتراك سنة مقدم المهم تبداو الفكرة وانا واسامة معاكم ان شاء الله بقلبنا وبكل ماتحتاجوه من سنت لدولار بحاله .

هانيا بتسلم عليكي ياجيجي اوي وعدينا من كام يوم قدام المكان اللي اتقابلنا فيه وقالت لاسامة يابابا مش هنا قابلنا طنط جيهان .انا كمان معزومة على المحشي ولا ايه انا بموت في المحشي ومبعؤفش اعمله ولا عندي وقت

يا حياة قلبى يا هانية

فيها الخير يا حبيبتى وفاكرة طنتها جيجي بوسيهالي وقوليلها انى مستنياها واهو كلها كام اسبوع واقعد العب معاها للصبح

اما المحشى فطبعا حناكلة مع بعض ان شاء الله بس شدوا حيلكم انتو واحجزوا التذاكر وانا ابدا اقور الكوسه