كل ما تريد معرفته عن (كندا)

[الحازم حسن]

انا كمان معزومة على المحشي ولا ايه انا بموت في المحشي ومبعؤفش اعمله ولا عندي وقت

اما المحشى فطبعا حناكلة مع بعض ان شاء الله بس شدوا حيلكم انتو واحجزوا التذاكر وانا ابدا اقور الكوسه

المكالمة قلبت في الآخر جو بقالة ليه كده :)

[DEE]

السلام عليكم

نورت ياجيهان الحبوبه برجعتك واهتمامك بالرد انا فعلا عماله اخد جوله علشان اجمع كل الأفكار ونكون رأى ان شاء الله

اعملوا حسابى فى المحشى :unsure:

يانانسى مافيش مشاكل ولا حاجه وتوصلى بالسلامه ان شاء الله انتى واسامه وهانيه جرءه عاليه جدا انك تروحى كيبك ومافيش فرنساوى

بصراحه خطوه خايفه اخطيها .... بالرغم ان جيهان ووجدى يشجعوا فى التفكير فيها ....

انا عضوه معاكم يا وجدى ان شاء الله بس اتوصوا بينا شويه فى السعر

ايهاب ما بلاش البيات الشتوى انت لسه مارحتش كندا ....

صاحب القعده دى كلها هادى على رأى جيهان... انا حجزت عندكم ولا الأماكن خلصت ؟ :)

تم تعديل 14 ديسمبر 2006 بواسطة DEE

[اسامة]

الى جميع السدة وجدى وهادى وسندريلا ودى و جيهان حياتى

انا عاوز اقولكم انا القرار تقريبا شبة اتحسم امس لصالح مونتريال - انا بصراحة محتاجكم جدا

و شكرا

[DEE]

اسامه اعقلها وتوكل طالما الأستعداد والراحه النفسيه موجوده اعقلوها وتوكلوا كنت اتمنى ان يكون عندى نفس هذه الجراءه مونتريال تحتاج هذه الجرءه فعلا ان شاء الله موفقين...

حقيقى انا اول مره امر على باقى مواضيع المنتدى وبها اليوم مواضيع لا أدرى ماذا اقول عنها غير حسبى الله ونعم الوكيل ان كان موضوع اولاد الشوارع او تعذيب الشرطه المصريه ....

انا دلوقتى عرفت ليه نانسى واسامه مستعجلين لكنى كنت اتصور اشياء كلها بسيطه عن ما قراءته

دلوقتى بقولك يا أسامه مش شايف ان يناير بعيد شويه ما تقدروش تقربوا الميعاد اكثر .....

الله معكم يا أهلنا واحبابنا وجيرانا وطفولتنا وذكرياتنا واصحابنا الى فى مصر وعجبنى جدا رأى هادى فى موضوع اولاد الشوارع واتمنى ان يتحقق يوما ويكون لنا فيه جميعا بصمه ان شاء الله

[ابن الصعيد]

الاخوة الاعزاء

قرأت عن ولاية مانيتوباmanitoba ووجدتها ولاية رخيصة وهادية

وبها قليل من العرب وعدد سكانها اقل وكمان الضرائب اقل

ولكن السؤال لماذا لا تستقطب المهاجرين طالما هى بهذه المميزات

ولماذا تستقطبهم تورونتوا

ارجو التوضيح

وشكرا

[ايهاب سالم]

الاخوة الاعزاء

قرأت عن ولاية مانيتوباmanitoba ووجدتها ولاية رخيصة وهادية

وبها قليل من العرب وعدد سكانها اقل وكمان الضرائب اقل

ولكن السؤال لماذا لا تستقطب المهاجرين طالما هى بهذه المميزات

ولماذا تستقطبهم تورونتوا

ارجو التوضيح

وشكرا

شوف الفيديو ده .. هتعرف ليه

[nancyezat]

جيهان انتي هتقوري الكوسا من اول مانحجز ليه امال لو هتعملي فتة هتبدأي فيها من امتى !!! عموما ماشي المهم يكون الاكل استوى على مانوصل .

الاستاذ الحازم حسن انت هتقطع علينا ولا ايه ايه المشكلة يعني لما تقلب بقالة ولا انت عينك في المحشي ومكسوف عموما ياجماعة جيهان كريمة جدا واكيد هترحب با حد عايز يتغدا معانا بس المهم تقولو قبلها بشهر يادوب يعني .

الاخت العزيزة دي : دي فرصة سعيدة اوي واتمنالك التوفيق ان شاء الله انتي كمان وياريت تقوليلنا وانتي جاية عشان لو في نصيب وكنا هناك ممكن نتقابل وعلى العموم احنا مع بعض في المنتدى , وحاجة تانية انا الحمد لله الفرنساوي مش ضايع عندي انا عملت الانترفيو بالفرنساوي وباخد كورسات بس برضه مش اوي يعني المهم ان الواحد يكون بيحب اللغة ويقدر يستوعبها بسرعة واكيد مع العشرة الواحد بعد كدا هيتقنها .

[الحازم حسن]

الاستاذ الحازم حسن انت هتقطع علينا ولا ايه ايه المشكلة يعني لما تقلب بقالة ولا انت عينك في المحشي ومكسوف

لا والله انا بكره المحشي جداً أنا أساسا مبكرهش غير حاجتين في حياتي إسرائيل والمحشي ... دا أنا حتى ممكن أتعاطى مخدرات لكن مكلش صباع محشي واحد اللهم إلا محشي ورق العنب

بالتوفيق أن شاء الله في كندا يا مدام نانسي وابقي سلمي لنا على مدام جيهان

[lonly in cold night]

السلام عليكم يا شباب

انا من حوالى 3 سنين كنت ابتديت امشي في حوار الهجرة لكندا و بعدين ظروف الحياه و العمل لهتنى عنه

بس من ساعة ما ابتديت اسافر للدول الاجنبية - من واقع ظروف عملى و اللى حاوضحها بعد شويه - و حسيت اد ايه احترام الدول التانيه لمواطنيها الموضوع زقزق تاني في دماغي

و كان ختامها لما قريت الموضوع ده و انا في كوريا في اخر سفريه

الموضوع لسع جدا

ايهاب مشكورا في بداية المداخلات قال ان احنا لازم نحدد الهدف من الهجرة

انا بالنسبه لي عندى اتنين انترنت كافيه و شركة استيراد منتجات كمبيوتر و شركة تسويق

بس للاسف انا مش حاسس بالادميه فى التعامل و كذلك عدم الامان

لان كل يوم بيطلع شوية تعقيدات على شوية قوانين

ناهيك عن ان كل واحد دلوقتى فتح له نت كافيه او هما بيسموه كده

و كل واحد معاه قرشين بقى بيستورد كمبيوترات

المهم علشان ما طولش عليكم انا غرضى من الهجرة انى اتعامل معاملة ادمية و اني ما افضلش قلقان على مستقبل الولاد

يعنى اعيش عيشة كريمة مش لازم ابقى غني بس ما احسش انى لو تعبت بكره ممكن ابيع اللى ورايا و اللى قدامي علشان اتعالج لان التامين الصحي ما بيغطيش اصحاب الاعمال في مصر ( ودي ابسط حاجه )

السؤال دلوقتى للاخوه اللى في كندا

هل في استطاعتى انى افتح مشروع مشابه فى كندا؟

يعنى انترنت كافيه و شركة استيراد و تصدير مستلزمات كمبيوتر ؟

[DEE]

نانسى ...ايوه يا عم يا فرنساوى انت.... ربنا يوفقكم ان شاء الله .

ايهاب... عارفه اشوف الفيديوبتاعmanitoba محظور مش عارفه ليه ياريت تقول لنا اختصار عن موضوع الفيديو .

الأخ لونلى ... ما شاء الله اولادك زى القمر ربنا يخليهم لك ان شاء الله اخوانا فى كندا يردوا عليك

الى اقدر اساعدك فيه اعطيك تفاصيل المحامى بتاعنا لأنه ثقه والحمد لله لأن فى محامين كثير نصابين فى هذا الموضوع .. وسأرسل لك تفاصيله على الخاص ... اوتأخذ حتى تفاصيل محامى نانسى واسامه عتقد انه كويس لأنهم خلصوا اوراقهم عموما ربنا يوفقك ...

[lonly in cold night]

الاخت دي

شكراً جدا على اهتمامك

ملخص فيلم الفيديو و اللى اقنعنى انى استحاله اهوب ناحية المدينه دي

واحد مالى دورق شاى سخن و الدخان بيطلع منه

و هوب بعد ما قلب الدورق تقليبتين رمى السائل اللى جواه فى الهوا فوق

و مجرد السائل ما خرج من الدورق بقى عباره عن تللللللج

اللهم احفظنا

[DEE]

لونلى.... شكرا على ردك على فيلم الفيديو ....حبقى اودى اللحمه والفراخ هناك علشان اوفر الثلاجه

تم تعديل 15 ديسمبر 2006 بواسطة DEE

[Gihan]

الاخ Lonly in cold night

ردا على اسءلتك من وجهة نظر مونتريالية

هل في استطاعتى انى افتح مشروع مشابه فى كندا؟ طبعا ممكن تعمل اى حاجة انت عايزها والحكومة بتقدم تسهيلات لاصحاب بعض المشروعات

المشكلة هى ان انترنت كافية مش حينفع لان اللانترنت فى البيوت منتشر جدا وبيرخص مع زيادة عدد الشركات اللى بتتنافس على الزباين

اما استيراد الكمبيوتر فممكن يكون فكرة احسن برغم ان هنا المنافسة شديدة جدا بين الشركات الكبيرة زى (Dell HP IBM (LENOVO

ودة بيضرب الاسعار وبيخلى نسبة الربح قليلة جدا فى المجال دة

لكن طبعا انت الادرى بمنتجاتك وعموما ممكن تعمل دراسة للسوق على النت وتشوف بنفسك

ادى 2 سايت لمحلات الكترونيات كبيرة فى كندا

http://www.futureshop.ca/marketing/_midnig.../splashpage.asp

http://www.staples.ca/ENG/Catalog/stap_home.asp

اما بالنسبة للادمية فهى دى لب الموضوع وعشان كده انا اعتقد ان كندا من احسن البلاد للعيشة

الحازم حسن

فيه حد فى الدنيا مايحبش المحشى؟؟؟؟؟؟ :lol:

عموما الدعوة مفتوحة لكل الاخوة على المحاورات (وابقى اعمل مكرونة فرن للحازم حسن)

DEE

هيه فين السقعة داحنا السنه دى بنضرب ارقام قياسية فى درجة الحرارة العالية 10 امبارح ومافيش فتفوتة تلج على الارض بركاتكم يا نانسي واسامة جاييين وجايبين الدفا

[lonly in cold night]

الاخت جيهان

شكرا على وجهة النظر المونترياليه

الموقعين اللى دخلت عليهم لاقيت ان الاسعار غاليه جدا

عندك فكره ممكن الاقى فين نسب الجمارك؟

[Siwa]

اولا، الف الف الف مبروك يامدام نانسي ويا استاذ اسامة. إن شاء الله تنوروا كندا كلها. والله يسامحك يا استاذ إيهاب ، كدة بردة تشوة سمعة مانيتوبا. اولا، كندا كلها برد. ثانيا، مانيتوبا دية مقاطعة لطيفة جدا واهلها ودوديين وبيحبة يساعدة الناس الجداد. ثالثا، انا بقالي اكتر من 3 سنين هنا ولسة مانشفتش من البرد. صحيح مانيتوبا ابرد من غيرها في جنوب كندا، لكن بقالنا سنتين الحمد لله عندنا شتاء معتدل احسن من مدن كندية كتير. وكمان الجو هنا جميل جدا في الصيف. بس المحك في اختيارك للمقاطعة اللي تعيش فيها، هو إنك تلاقي شغل كويس فيها. لكن الجو هتتعود علية. يعني لو لقيت مثلا شغل كويس في تورنتو وشغل كويس في مانيتوبا وبنفس المرتب هاقلك تعال مانيتوبا. لية!!! لإن الحياة ارخص واهدى وعلى الاقل هيتبقى معاك فلوس تزور باقي كندا وتستمتع بجمالة. :lol:

[wagdi]

الاخت جيهان

شكرا على وجهة النظر المونترياليه

الموقعين اللى دخلت عليهم لاقيت ان الاسعار غاليه جدا

عندك فكره ممكن الاقى فين نسب الجمارك؟

الفاضل الي وحده في الليلة البرد....

الجودة هنا غير مصر تماماً...أنا مش خبير في الموضوع ده بس كمستهلك أقدر أقولك بكل ثقة إن إلى هنا حاجة وإلى بيتباع في مصر حاجة تانية...مش عارف ليه مع إن كله صيني....

حاجة تانية بس مهمة لازم تحطها في إعتبارك بالنسبة للأسعار....هنا كل حاجة بتشتريها ممكن ترجعها لو مش عجباك وتاخد فلوسك...ثانياً إيجار الأماكن وتجهيزها ودعايتها بيكلف جامد...ثالثاً في مصر إنت ممكن تجيب واحد يقف يبيع بربعميت جنيه في الشهر...هنا بياخد 30 ألف دولار في السنة وممكن كمان نسبة....ناهيك عن التأمينات والضرائب والرسوم وأتعاب المحاسبين والمحاميين والذي منه... الشاهد إن خدمات ما قبل وما بعد البيع والoverheads غير وبيخلي هامش الربح صغير جداً...

بالنسبة لضوابط الإستيراد والتصدير ممكن تشوف الموقع ده...

http://www.cbsc.org/servlet/ContentServer?...=GuideInfoGuide

الفاضلة جيهان...

إيه أخبار الرابطة؟:)

طب أنا عندي إقتراح حلو... حددوا ميعاد وأختاروا أي مكان... وأنا اروح اقعد وأحط علم مصر على الترابيزة...واي حد من الأخوة في مونتريال عايز يجي يتفضل...نقعد نشرب واحد لاتيه (كلنا في واحد ضغطاً للنفقات :lol: ) ونشوف ممكن نعمل إيه...

[DEE]

السلام عليكم

جيهان الحبوبه... الحمد لله على تحسن الجو دى بشره خير انا كنت بتكلم على مانيتوبا والمايه الى فى البراد تتجمد قبل ان تقع فى الأرض :)

الأخت سيوه... كويس انك هناك علشان تعطينا معلومات اكثر عنها لو سمحتى مميزاتها وعيوبها ومدارسها وما الى ذلك لو سمح وقتك :lol:

اسامه ونانسى رسوا على حاجه ياله عقبالنا احنا كمان لما نرسى على مدينه ان شاء الله ...

الأخ وجدى ... انا معكم فى الرابطه دى حتى لو مش فى مونتريال

تم تعديل 16 ديسمبر 2006 بواسطة DEE

[ابن الصعيد]

الاخ سيوة

كلمنا عن تجربتك بمانيتوبا

اية اخبار الاسعار عندكم

واهم شئ الجالية العربية

والطقس عندكم

واخبار الشغل هل

لان مانيتوبا مناسبة لمجالى

وهل بتختلف عن اونتاريو بالضرائب والمساعدة لللاطفال

انا سمعت انهم بيدوا الطفل الواحد حوالى400 دولار كندى بالشهر

وسمعت ان الضرائب اقل ولكن لازم تدفع 50 دولار على الفرد شهريا تامين صحى فهل الكلام دة صحيح

وهل هناك طيران من مصر الى مانيتوبا بالرومانية اوحتى مصر للطيران

كفاية كدة

وشكرا على الرد مقدما

[مصر هذا العصر]

هلا شباب كيف حالكم انا يحيكم على المشاركات الرائعة وديما ان شاء الله

ممكن اطلب طلب

ياريت حد بيعتلى اللينك بتاع تقييم النقاط اون لاين بحيث لو حبيت اشوف مدى انا هاخد كام نقطة؟ انا سمعت انهم بيردو عليك فى خلال 24 ساعة ؟؟؟

انا متأكد انه كان مكتوب فى المشاركات السابقة بس انا دورت عليه مش قادر اجمعه

وشكرا

[DEE]

السلام عليكم

جيهان الحبوبه... الحمد لله على تحسن الجو دى بشره خير انا كنت بتكلم على مانيتوبا والمايه الى فى البراد تتجمد قبل ان تقع فى الأرض :P

الأخت سيوه... كويس انك هناك علشان تعطينا معلومات اكثر عنها لو سمحتى مميزاتها وعيوبها ومدارسها وما الى ذلك لو سمح وقتك :blink:

اسامه ونانسى رسوا على حاجه ياله عقبالنا احنا كمان لما نرسى على مدينه ان شاء الله ...

الأخ وجدى ... انا معكم فى الرابطه دى حتى لو مش فى مونتريال

انا اسفه جدا سيوه لم اكن اعرف بأنك سيده كتبت الأخ ثم عدلت مشاركتى فرصه سعيده جدا ومنتظرين ردك