كل ما تريد معرفته عن (كندا)

[المصـــــــرى]

أم على، الجامعات بتختلف فى شروط قبولها للطلبة، بس أكيد أى جامعة بيكون ليها ويب سايت وبتبقى فيه شروط القبول، وبعدين سهل جدا إنك تبعتى إميل لجامعة معينه وبيردوا مش بيطنشوا، لإنه بزنس بالنسبه ليهم ودخل كبير، إبن حضرتك لإنه أجنبى حيدفع ضعف اللى بيدفعه الكندى أو اللى معاه الأقامة، هنا الفرق الوحيد بين الكندى واللى معاه إقامة فى حق التصويت فى الإنتخابات. فلو إنتوا ناويين على الإقامة هنا يبقى أفضل لو يبدأ الدراسة بعد ما ياخد الإقامة.

أدى لينك كام جامعة فى السريع

جامعة ريجينا فى ساسكاتشوان

http://www.uregina.ca/

جامعة ألبرتا فى ألبرتا

www.ualberta.ca/

جامعة أونتيريو فى أونتيريو

www.ouac.on.ca/

وهلما جرا مونتريال ولندن وفانكوفر، بحث سريع على جوجل وحتلاقى كل الجامعات، تدورى فى الويب بتاع الجامعة على شروط القبول ولو فيه حاجه مش واضحة بتبعتى إميل إستفسار أو فاكس أو إتصال تليفونى.

لاكن محدش يقدر يقول حضرتك شروط القبول ويعممها على كندا كلها، كل واحد يعرف فى حدود المقاطعة أو المدينة اللى عاش فيها، وهنا المقاطعات ليها إستقلالية عن الحكومة الفيدرالية كل واحده ليها حكومة وقوانين حتى بتختلف فى معدل الضرائب ورخص القيادة و قوانين الزواج وحاجات كتير، حتى ممكن تلاقى حكومة مقاطعة ذات إتجاه إشتراكى ومقاطعة تانية رأسمالى، مقاطعة محافظ ومقاطعة ليبرالى، عادى.

وتحت أمرك لو فيه أى حاجه تانية.

تم تعديل 28 نوفمبر 2007 بواسطة المصـــــــرى

[المصـــــــرى]

ألبرتا برضه فيها مهاجرين كتير، حتى فيها أول جامع إتبنى فى شمال أمريكا كلها سنة 1940 وهو جامع الرشيد، المسلمين وصوا هنا من 1920 خصوصا من الشام وفيها تانى وتالت جيل مولودين هنا، نسبة العرب فى إدمينتون عاصمتها من أعلى المعدلات فى كندا ، برضه ألبرتا حاليا بيجيلها هجرة كبيرة جدا من باقى المقاطعات، أنا شفت ناس بالهبل من مونتريال وتورونتوا.

لينك الفيديو ده عامله جامع الرشيد عن المسلمين فى المقاطعة

http://www.youtube.com/watch?v=SMvuk2XqpB0

تم تعديل 28 نوفمبر 2007 بواسطة المصـــــــرى

[المصـــــــرى]

صحيح بمناسبة اللينكات.

الإستخدام الحكومى وإستخدام البنوك والشركات للإنترنت يفوق ما تتخيلوه من حيث المعلومات والخدمات.

يعنى أنا كنت بدفع فاتورة الكهرباء والتليفون والإنترنت من حساب البنك على حسابى فى الشركات دى، نفس الحكاية بالنسبة للضرائب للأفراد أو الشركات كله على النت، وحتى الشركات معظمها بتدفع المرتبات مباشرة على حساب الموظفين، محدش هنا بيمشى وفى جيبه كاش، كلها كروت، حتى لو حتشترى كباية قهوة بالكارت.

وبرضه من على النت فتحت حساب إدخارات جديد على نفس البنك، وممكن أحول فلوس لحد تانى وأنا قاعد فى بيتنا عن طريق النت أو التليفون.

مثلا لو أنا رايح مشوار ومش متأكد من الطريق بستخدم جوجل وبيطلعلى خريطة للمكان وأقرب الطرق وحتاخد وقت منى قد إيه.

ممكن تعرفى الأفلام الجديدة فى نادى الفيديو، ولو عايز أعرف الأفلام المعروضة فى سينما معينة بروح على ويب سايت السينما وبيطلعلى الأفلام المعروضة وتوقيت العرض وممكن أشوف مقتطفات من الفيلم أو قصته إيه وأنا لسه فى البيت، بس لسه مش ممكن تشترى التذكرة من على الويب، لاكن ممكن تحجزى وتشترى تذكرة الطيارة من على الويب.

الكمبيوتر بتاعى شاريه من شركة ديل فى تورونتوا من على النت.

آخر مرة سمعت إنهم بدأو يطعموا علشان الإنفلونزا ،جبت الأماكن اللى بيدو فيها التطعيم ومواعيدها وشروطها وشوية معلومات عن الأنفلونزا من على الويب بتاع وزارة الصحة وطلعت عليهم.

مواعيد الأتوبيس حضرتك، كل محطة أتوبيس عليها رقم، بتطلعى على الويب سايت وتشوفى أرقام الأتوبيسات اللى بتعدى على المحطة وحتعدى الساعة كام، وممكن تشوفى خريطة لخط الأتوبيس وحتعرفى حتوصلى إمتى المكان الفلانى أو أرقام الإتوبيسات اللى بتروح من نقطة ألف لنقطة باء.

معظم المطاعم عندها ويب سايت ممكن تشوفى فيها قائمة الطعام وأسعارها، أخر مطعم عرفته عن طريق النت إسمه "كبسه"، لحم حلال وأكل عربى وأسعاره معقولة جدا.

مواعيد الصلاة للسنه كلها، دى أكيد كلكوا عارفينها، وعنوانين المساجد وأرقام تليفونتها والفاكسات.

وطبعا دليل التليفونات على النت،حتى البوليس على النت، ممكن تشوفى معدل الجريمة فى المنطقة اللى عايشه فيها، كام حادثة سرقة كام مش عارف إيه قبل ما تنقلى على منطقة جديدة.

أنا حضرتك لما نقلت من شقة لشقة، ومن على النت وصلت التليفون على الشقة الجديدة قبل ما أسكن فيها، إديتهم العنوان والتاريخ اللى حنقل فيه هناك وحولت الكهرباء على إسمى وغيرت العنوان فى رخصة القيادة وملفات الحكومة والبنك كله من على النت.ممكن تقدمى على الباسبور من على النت.

مش عارف فاضل إيه، البلد كلها معروضه على النت. :blink:

تم تعديل 28 نوفمبر 2007 بواسطة المصـــــــرى

[أختكم المصرية]

شكرا جدا استاذ المصرى على كل المعلومات دى انت فعلا بتخلينا نتمسك اكتر بموضوع الهجرة

عايزة بس اسالك ايه المهن المتوفرة و دخلها كويس و مش محتاجة معادلة او دراسة ممكن الواحد يبدا بيها مؤقتا لحد ماندرس

[yasmin]

الف الف مليون شكر للاستاذ المصرى على كل هذه المعلومات...الله يبارك لك. والفيدو الرائع وزى ما قالت لك الاخت المصريه الحزينه انت كده بتخلينا نتمسك بالهجره اكتر بس ارجو كتابه توضيح حال المسلمين هناك هل فيه عنصريه ..والمحجبات هناك ممكن يلاقوا شغل بسهوله ونظره الناس ليهم هناك ايه باعتبارك عايش الواقع

[ahmed_saleh]

الف الف مليون شكر للاستاذ المصرى على كل هذه المعلومات...الله يبارك فيك الحقيقة مجهود كبير منك نشكرك عليه جداً و انا سعدت جداً بهذا التواصل سبق و ان سألت سؤال و لم يجب علي احد اتمنى ان تكون الاجابة عندك ان شاء الله فبالنسبة الى مدارس الاولاد سمعنا ان هناك مدارس حكومية مجانية و مدارس خاصة لها مصاريف و مدارس نهاية الاسبوع ايضاً و السؤال هو هل المدارس الحكومية هي الاسوء و يمكن ان تعرض اولادك الى مخاطر المخدرات و الجنس و غيره ام انه لا خوف عليهم و هناك كنترول على مثل هذه الاشياء و شاكر لك مقدماً

[suzanne]

شكرا جزيلا استاذ مصري على كل هذه المعلومات جزاك الله كل خير .

[مصرية والنعم]

الف الف مليون شكر للاستاذ المصرى على كل هذه المعلومات...

[yasmin]

الاستاذ المصرى لم تقول لنا انت فى اى مدينه تعمل الان ومعلش اوعى تطفش من المنتدى بسبب كتر الاسئله انت الاجبته لنفسك ومن وجهه نظرك كم تكلفه المعيشه لاسره تتكون من 4 افراد

[suzanne]

ياسمين انت فين في السعودية

[shoshe]

السلاموا عليكم انا بشكر كل الى سهموا فى المنتدى ده واتمنى انكم تقبلونى بنكم :)

[المصـــــــرى]

أنا كنت عايش فى مدينة صغيرة فى ساسكاتشوان ونقلت من شهر على مدينة إدمينتون فى ولاية ألبرتا.

لو عند حضرتك أربع أولاد الحكومة حتعطيلك حوالى ألفين دولار للأولاد فى الشهر، فى ساكاشوان فيه هنود حمر كتير بيعملوا كده، يخلفوا لغاية ما يجيبوا الدخل اللى عايزينه ويقعدوا فى البيت، بس سمعتهم هباب، مخدرات وخمور وبلطجه وفى الأخر الفلوس مبتوصلش لولادهم وكمان بيشغلوهم فى الدعارة، بس هما مش خطر، هما بس عشان الكنديين ناعمين شوية فواخدين راحتهم.

بالنسبة للدخل بالظبط طبقا للوظيفة فأنا بعت لينك للموقع الحكومى اللى الشركات بتحط فيه الوظائف، حتلاقى المرتب هناك، وحتبحثى بنوع الوظيفة، لإن الدخل بيختلف من ولاية لأخرى لنفس الوظيفة. وحتلاقى كل أنواع الوظائف من دكتور لشغل المطاعم للكمبيوتر، كله.

حتلاقى فى الوظيفة المؤهلات المطلوبة، اللى معاه ثانوية عامة هنا ممكن يشتغل فى سكرتارية أو شغل محاسبة بسيط bookkeeping ، بس برضه حسب الولاية والمدينة، واللى بيعرف إنجليزى غير اللى ميعرفش، على فكرة فيه ناس هنا مش بتعرف لا إنجليزى ولا فرنساوى وعايشين.

ليا واحد صاحبى من الكويت بس بدون، يعنى معندوش جنسية، وإتشحطط من كازخستان لإيران للكويت وبعدين قدم لجوء على كندا، أهو ده حيعلنى، لإنه ممكن يدرس إنجليزى هنا على حساب الحكومة بس مش فى دماغه لإنه بالفعل شغال مبيض مع جماعة عرب، وبيسوق من غير رخصه، لإن إمتحان الرخصة يا إنجليزى يا فرنساوى، حتى حاولت أدخل الإمتحان معاه مترجم مرضوش، قالو ممكن فى تورنتوا ياخد الإمتحان بالعربى بس مفيش فى ساسكاتشوان، المهم عمل حادثة وطبعا معهوش رخصة راح المحكمة ورحت معاه مترجم، القاضى رضى المرة دى أترجمله،العملية صففت على غرامة ألف دولار، بس عادى مقضاش ولا يوم فى الحجز ولا حاجه، بعد ما عمل الحادثة واحده وقفت تطمن عليه، قالها إنه سليم، قالتله أبلغ الإسعاف أو البوليس ، فالواد إتخض وبان عليه إن عامل عمله، وسابها ومشى، هيه شكت العربية تكون مسروقة وبلغت البوليس، البوليس عرف رقمة من العربية لإنها مسجله بإسم والدته، إتصل بيها وسألها وقالتلهم إبنى كان سايقها، طبعا الواد بعد المصيبة جاه عليا على طول، أنا إتصلت بأمه عشان أقولها تقول للبوليس إن العربية إتسرقت، بس كان البوليس كلمها الأول والواد لبسها، نصيبه كده، عادى راحم باعتين المخالفة على البريد عنده على البيت وفيها معاد المحكمة، ولا البوليس شاف الواد، ولا إطلتشله فى القسم وكله بإحترامه وفى الروتين.

وجعت دماغكو أنا بحداويت ملهاش لازمه، أنا حروح أنام عندى شغل بكره.

على فكرة النهاردة درجة الحرارة عشرين تحت الصفر، وده موضوع نبقى نتكلم فيه بعدين.

تم تعديل 29 نوفمبر 2007 بواسطة المصـــــــرى

[المصـــــــرى]

صحيح، بالنسبة لحال المسلمين هنا فهو عال العال، بشوف تلات أربع محجبات كل يوم فى المترو أو الشارع، عادى خالص، حتى مش بيشدوا إنتباه الكنديين، يمكن أنا اللى كنت منبهر أكتر من الكنديين لما جيت هنا إنى أشوفهم فى كل مكان حتى فى الوظائف الحكومية.

فيه هنا برضه مدارس إسلامية لو مش عايز العيال يختلطوا.

بالنسبة للمدارس الحكومية مستواها العلمى لا يختلف كثيرا عن المدارس الأخرى، المستوى الأخلاقى نسبى هنا، لإن البنت أو الواد اللى ليه صاحب أو صاحبه واحده بس يبقى على خلق، وصاحبه هنا زى مراته فى بلدنا والموضوع عائلى ومفيهوش عيب.

الطالبات المسلمات بشوفهم بيمشوا مع بعض ومبشوفش معاهم شباب خالص، وبرضه فيه مدارس إسلامية ومستواها لا يقل عن المدارس الأخرى بل أفضل.

حتى فى المدينة الصغيرة اللى كنت فيها كان فيه مدرسه إسلامية، وحتى كان اللى ميقدرش يدفع الجمعية بتدفعله، العرب فى المدينة دى مستواهم كلهم مرتفع إجتماعيا وإقتصاديا، معظمهم دكاتره ومهندسين وأساتذه جامعة، ومستغربش لو قلتلك إن معظم العرب فيها ليبيين، الحكومة بتبعتهم بعثة يدرسوا ، وبعد ما يخلصوا طب أو ماجستير أو اللى فى نفسهم على حساب الحكومة بيقعدوا هنا، والظاهر النظام هناك مش عايز ناس متعلمه توجع دماغها بيهم. فقاعدين هنا، وناس فى منتهى الأخلاق صراحة. حتى الترب شاريين فيها مقدم، عندنا المدافن بتاعتنا وكلها جاية من التبرعات الخيرية.

بالنسبة للمدينة اللى نقلت فيها، فيها كويسين وفيها وحشين، يعنى كنت بشوف ناس فاطره فى رمضان علنى، وناس بتصلى الفجر فى المسجد،وطبعا لما الواحد يتعرف على الناس من الجامع غير لما يتعرف عليهم من الشارع أو القهوة، يعنى الواحد بيختار طريقة بنفسه بإختيار الصحبة والأمكان اللى بيروحها.

وجعت دماغكو تانى، المرة دى حروح أنام بجد

[أم على]

الأخ العزيز المصرى

كتر الف خيرك وألف ألف شكر معلش أنا أتأخرت فى الدخول وقراءة ردك بس أنت عارف الشغل فى الغربة لايرحم أحد، أحنا إن شاء الله ناويين فعلا ندخله بعد ما نأخذ الإقامة لأنى فى فترة الدكتوراه كنت موفدة على حساب الجامعة لجمع مادة الرسالة من الولايات المتحدة الأمريكية وعارفة أد إيه الدراسة نااااااار فى الدول دى. إن شاء الله سوف أخذ بنصيحتك وأخليه هو بنفسه يدور على التخصص الذى يريده

ألف شكر مرة ثانية ومعلش أستحملنا فى الأسئلة .. القلق بيخلى الواحد عايز يعرف كل حاجة كأنه عايشها... جزى الله خيرا كل من يساهم ويساعد فى هذا الباب

[المصـــــــرى]

لا شكر على واجب أخت أم على، وولا يهمك مفيش تعب خالص، أنا بيندفعلى على كل كلمة طيبة فوق ما أى حد يتصور. :)

[shoshe]

السلاموا عليكم ربنا يجزيك عنا خير يأستاذ المصرى كل الكلام الى انت بتقوله حضرتكك او غيرك متعرفش بيفيد قد اية فى المرحلة الخاصة بالهجرة بيغير حجات فى تفكير الواحد و بيسهل حجات كتير وبخص بالشكر كل من كتب فى المنتدى ده من اول الاستاذ هادى وجدى وايهاب والاستاذ صموئيل والاستاذةجيهان وسندرلا والكل وشكرا

[yasmin]

نعم سوزان انا فى السعوديه فى مدينه الرياض ... امبارح فوجئت بخطاب جاى لينا من high commission يطلب فيه شهاده الجامعه الاصليه الكرتونه وشهاده تقدير المواد بتاعه الجامعه والثانويه العامه لى ولزوجى بالرغم من اننى قلت للمحامى عليها فى الاول بس قالى مش مهم بالرغم المفروض كنا مستنين ورق الميدكال ..... ولكن كله فى وقته ادعوا لنا بالتوفيق :blush2: :

[suzanne]

انا كمان في الرياض يا ياسمين، احنا جينا الرياض بعد جدة علشان كدة انا ما بحبش الرياض خالص و مكتئبة منها جدا و حاسة ان جدة افضل بكتير.

هما طلاباتهم كتير و اجراءاتهم طويلة و عايزين النفس الطويل. احنا بعد ما عملنا الميديكال ب 7 شهور ارسلوا لنا في تجديد صحيفة الاحوال الجنائية و دفع اللانديج فيز ، مع اننا كنا متوقعين الميديكال اخر حاجة و كنا معتقدين انهم حيدونا الفيز خلاص. على رايك كله بوقته المهم ربنا ييسر اللى فيه الخير.

اساذ المصري شكرا كثيرا على مجهودك و كتر الله من امثالك.

الحقيقة موضوع الدين و الاخلاق هو ما يشغل بالنا كثيرا بالنسبة للاولاد ، لانهم حيكبروا في مجتمع فيه الحاجات اللى بالنسبة لنا حرام هي عادي عندهم، كالخمر، صداقة الولاد و البنات، و غيرها. ربنا يستر عليهم. ان شفت نماذج لناس ولادهم اتربوا في الغربة و نسوا الدين و الاخلاق تماما، و اخرين نجحوا في ربط اولادهم بالدين و الاخلاق يمكن اكتر من كثير من المصريين اللى عايشين في مصر، ربنا يوفقنا جميعا في تربية و لادنا و الحفاظ عليهم.

[yasmin]

جزاك الله خير يا سوزان ريحتينى شويه لانى كنت مكتئبة جدا من امبارح ربنا يسهل الاحوال ان شاء الله :blush2: معلش الرياض فى الاول كده عشان انتم لسه جداد على البلد مع الوقت حتتأقلموا ع الوضععععععععع لكن احنا نحسنا خلاص :blink:

اخونا المصرى رمى كلمه وبعد كده راح ينام اه موضوع درجه الحراره ال تحت العشرين ... جالك قلب

[walidsm]

ازيكو كلكو وحشني كلكو. يا رب يوفقوا جميعا لما فيه خيركم لان الهجرة زي اي حاجة في الدنيا بيعوزها البني ادم محتاجة سعي وتوفيق من الله.

هادي: وحشني جدا. اتمنى اسمع اخبارك واتمنى ليك كل خير يارب

المصري: ربنا يكرمك. ما تتصورش انا بقبقى سعيد اد ايه لما بلاقي الناس بتساعد بعضها. حاجة بجد تفرح.

انا الكام يوم اللي جايين عندي شوية وقت ياريت اللي عنده اي استفسارات عن كندا يتفضل. ووالله انا لو عارف مش حتاخر وربنا يعين الجميع ان شاء الله.