كل ما تريد معرفته عن (كندا)

[ايهاب سالم]

صور صلاة عيد الفطر الماضي في تورونتو

[أختكم المصرية]

السلام عليكم و رحمة الله و بركاته

اهلا اهلا اهلا استاذ ايهاب المنتدى فعلا منور بيك

انت كنت فين دة انت الى خلتنا نتحمس لموضوع كندا انت و استاذ هادى و استاذ و وجدى

يبقى كدة تحمسنا و تمشى

ياريت بقى تحكى لنا قصتك من ساعة ما وصلت كندا لحد دلوقتى و ايه السبب الى غيبك عن المنتدى كل دة

و ياريت لو تعرف اخبار عن استاذ وجدى و استاذ هادى و اخت جيهان واخت نانسى و زوجها تطمنا عليهم

احنا فعلا ارتبطنا بيهم جدا انا وكتير من الاعضاء و كتير فعلا بيسال عليهم

استاذ المصرى اهلا بيك انت فعلا منور المنتدى بخدماتك ربنا يكرمك

كيفك ياخت سوزان عاملة ايه انتى و ياسمين و دعاء ان شاء الله تكونوا بخير

[yasmin]

الاستاذ ايهاب جزاك الله كل خير عن هذه الصور الاكثر من رائعه عن عيد الفطر التى توضح مدى تماسك المسلمين ووحدتهم ادامها الله عليهم . وعن مدى احترام الحكومه الكنديه للمسلمين . التى يفتقدها كثير من المسلمين فى بلادهم . كما توضج مدى الامان الذى يحظى به المسلمون هناك . وجمال الاستاد هناك ومحطه المترو على فكره احنا عندنا زيهم كمان؟ كما توضح هذه الصور على براعه المصور ودقه الكاميرا ال سونى على مااتذكر التى معاك ........... ما شاء الله؟؟؟؟؟؟؟ :blush2: :ninja:

وبصبح على اخواتى كلهم جميعا

تم تعديل 9 ديسمبر 2007 بواسطة yasmin

[دعاء]

:blink:

الحقيقة لم تسعنى فرحتى عندما فتحت المنتدى ووجدت مشاركة الاستاذ ايهاب بعد فترة انقطاع طويلة وكالعادة لم تكن مشاركة عادية بل كانت مدعومة بالصور ومش اى صور دى صور للصلاه والمصلين يعنى احساس روحانى مفيش بعد كده فالف الف الف الف حمد الله على السلامة يا استاذ ايهاب والف شكر على على هذه المداخلة المتميزة كالعادة من قبلك ويارب تكون مشاركنا دايما بآرائك ووجهات نظرك الجديرة بالاحترام والتقدير واهلا وسهلا بك من جديد بين اخوانك واخواتك اعضاء المنتدى الكرام

وصباح الفل على كل اخوانى واخواتى ويوم موفق للجميع بإذن الله

[دعاء]

السلام عليكم ورحمة الله وبركاته

الأخت دعاء شكرا جدا على معلوماتك المهمة التي ساهمت بها إلى كل الأعضاء في هذا المنتدى الرائع

وربنا يكون معاك في كل خطوة...أما بعد أنا أيضا"مقدم هجرة إلى كيبك وأنا في انتظار إجراء المقابلة في أي لحظة

وكان الكلام الذي حضرتك شرحتيه عن الأسئلة التي من الممكن أن يطرحوها في المقابلة شيء في غاية الأهمية حيث يستطيع الشخص أن يركز تفكيره في إطار معين ..مثلا...

لكن...ياريت ولو سمحت حضرتك أن تشرحي لي أجوبة هذه الأسئلة وقدرتك على إقناعهم في الرد الصحيح لكل سؤال

طبعا"هذا من ضمن تجربتك الشخصية؟؟؟

وبما يخص الشخص الثاني (الزوجة أو الزوج ) أيضا"ماهي الأسئلة التي تطرح عليه.

ولك كل الشكر وأرجو أن لا أكون من المزعجين؟؟؟

و جزاكى الله كل خير

\ibrajad .

ملاحظة:هذا ايميلي يمكن أن ترسلي لي الجواب على هذا العنوان ibrajad@hotmail.com

اخى الفاضل : الاستاذ ibra

انا فضلت الاجابة على هذا الموضوع تكون عامة من اجل الافادة الجماعية

كنت عايزة اعرف هل حضرتك متابع اجراءات الهجرة مع محامى معين ولا مع السفارة مباشرة ؟

لان اللى بتابع مع محامى لما ييجى جواب السفارة بتاريخ المقابلة بيعطيك معاه عناوين وتليفونات لاشخاص عندهم خبرة بالمقابلات بتروح لايهم بشرح لك جو المقابلة والاسئلة المقترحة والاجابة عليها وكمان ملازم تديك معلومات عن كندا وكيبيك بالتحديد ( معلومات جغرافية واقتصادية وصحية والمناخ وهكذا ...... )

ويقوللك كمان المفروض تلبس ايه وتكون قاعد ازاى وانا شخصيا عملت كده

ولكن طبعا المهم انك تكون واثق من نفسك جدا ومن قدراتك ودراساتك وكمان تظهر ثقتك الكبيرة بالبلد اللى انت عايز تهاجر له وانك مستعد لكل الاحتمالات اذا لم تجد عمل يكون دايما فيه خطة بديلة زى العمل فى اى حاجة متاحة حتى تكتسب اللغة والخبرة الكندية وان ده عادى ومعندكش اى مشكلة وتؤكد انك رايح علشان تشتغل وتنجح وتعمل مستقبل ليك ولاولادك وهكذا

وانا مازلت مستعدة لزيادة التفاصيل فى حدود خبرتى الشخصية لاى شخص يحتاج لها

واى خدمة

:blink:

[دعاء]

:blink:

ارجوكم يا جماعة انا عايزة اى حد يفيدنى فى موضوع معادلة شهادتى هنا فى مصر يا ترى ينفع ولا لازم لما اوصل كندا مع العلم ان معايا ليسانس اداب من جامعة القاهرة قسم المكتبات والوثائق وتقنية المعلومات

انا فى انتظار الرد على احر من الجمر وشكرا لكم جميعا

bv:-

[madzoro]

بسم الله الحمن الرحيم

حبيت اشكر كل من ساهم في اثراء هذا البنك بكل المعلومات المفيدة ويارب يكون في ميزان حسناتكم

يا ريت تستاضيوفني معاكم في هذا الصرح :blink:

وارجو الافادة في بعض الاستفسارات

أخوكم مديح اللبودي

مهندس معماري

[suzanne]

اشكرك تاني يا استاذ المصري على نصايحك و على استعدادك لمساعدتنا و ربنا يوفقك، اعتقد ان اجازات الكريسماس قربت و حتخدوا اجازة بس مش عارفة حتروحوا فين في الجو الصعب ده!!!!!

استاذ ايهاب الصور جميلة جدا، بس الصور فاكرتني بالكاميرا بتعتنا اللي اتسرقت في مصر و لما بافتكر الكاميرا اللى اتسرقت بافتكر الموبايل اللى اتسرق، انا باقترح ان حضرتك تقرا سورة الفلق على الكاميرا.

اختنا المصرية انا مبسوطة انك ما بقتيش حزينة و انا الحمد الله كويسة.

[دعاء]

:blink:

انا حبيت امسى على الجميع ويارب تكونوا كلكم بخير ( اختى المصرية - سوزان - ياسمين - استاذ ايهاب - استاذ المصرى وكل من يشارك فى المنتدى سواء بالاستفسار او الرد على الاستفسار )

واحب ارحب بالاستاذ مديح كعضو جديد واهلا بيك بين اخوانك واخواتك باقى اعضاء النتدى

bv:-

[دعاء]

اختى المصرية

صحيح كنت عايزة اطمن عملتى ايه فى موضوع المحامى يا ترى وصلتوا لقرار نهائى فى الموضوع ده ولا لسة ؟

على العموم اى كان القرار اتمنى ان يكون فى الصالح ان شاء الله

وان شاء الله ربنا ييسر لكم المشوار القادم

وبالتوفيق

[أختكم المصرية]

السلام عليكم

اهلا بكل اعضاء المنتدى و ان شاء الله يكون الجميع بخير

انا يا اخت دعاء استقريت انا و زوجى على الاستمرار مع المحامى لان الموضوع فعلا محتاج مصاريف كتير فبدل ما الفلوس تضيع علينا نكمل احسن

ان شاء الله هنروح بكرة نديله الاوراق المطلوبة عشان يبتدى يمشى فى الاجراءات

و هنبتدى رحلة الدراسة مع الفرنساوى فى بداية شهر 1 و دعواتك

و التوفيق من عند الله

[yasmin]

الى اختى المصريه ربنا يوفقك ويكرمك لان مشوار الهجره طويل وانا سعيده انك غيرتى اسمك عقبال ما تغيريه انشاء الله الى الكنديه السعيده ...

والى الاستاذ ايهاب رجاء زى ما طلبت منك اختى المصريه انك تحكى تجربتك لانى اعتقد انها احدث تجربه هجره ولك منا كل دعاء بمزيد من التوفيق

تم تعديل 9 ديسمبر 2007 بواسطة yasmin

[حسام يوسف]

السلام عليكم

الف مبروك أختنا المصرية

مبروك على تغيير الاسم

ويارب معنوياتك تكون احسن

وربنا يوفقك ويوفقنا ف الهجرة

بالمناسبة الفرنساوى مش مستحيل

وانا مشيت بشكل كويس لحد المستوىالسادس

يعنى نص نص

بس انشاءالله انتى تبقى أحسن

وانا هدورك على حاجات ظريفة اتعليم الفرنسية عندى ف البيت

واشوف طريقة ابعتهالك

وأى حد عايزها انا تحت امركم

يارب طلعنا م البلد دى

[madzoro]

مبروك لكل من حقق حلمه بالهجرة ويارب تكون بدايته موفقة ويحقق مراده ان شاء الله

عقبال الباقي wst::

لو في حد من الاخوة والاخوات عنده فكرة عن مجال الهندسة في كندا وخصوصا المعمارية

يعني مهندس معماري او ليه صديق مهندس كده يعني......

يفدني بفرص العمل في المجال ده في كندا و ما هي الترتيبات اللازمة قبل الهجرة ... استعدادات مثلا

وايه انسب مدن للعمل في الاستشارات الهندسية .....

وشكرا

[madzoro]

شكرا للاخت دعاء على كرم الضيافة

ان شاء الله يوفقك و تنولي مرادك

[walidsm]

هل الدراسة بالجامعات هناك بتكون بدعم كامل او جزئي من الحكومة و اي مهاجر يمكنه الدراسة (ما بعد البكالوريوس) بمؤهله الحاصل عليه من مصر على طول و لا في شروط معينة اي لابد من حصوله على IELTS او TOEFL اثناء تواجده هناك و هل ممكن الواحد يقدر يشتغل و يذاكر بسهولة ؟؟ معلهش طولت عليكم بالاسئلة لكن اعتقد انها تدينا تصور اكبر عن الحياة هناك و ازاي نتكيف معاه بسرعة و سهولة و شكراً مقدماً .

الاستاذ احمد

الدراسة بالجامعات في كندا يعتبر فيها دعم اذا قارنت المصاريف اللي بتدفعها بصفتك كمهاجر والمصاريف اللي بيدفعها الدارس الاجنبي من خارج كندا حتلاقي انت بتدفع اقل من النص. لكن في طرق انك تقدر تاخد بيها فلوس منها:

- المنح الدراسية ودي في مجال الهندسة بتكون كتيرة (معنديش فكرة عن باقي المجالات).

- القرض والمنحة. وده اي مهاجر او كندي على السواء يقدر ياخدو وده بيكون من الحكومة وتقدر تخدو مرة واحدة في حياتك ولمدة معينة حسب دراستك في كل مرحلة من مراحل الدراسة ( المقصود بمراحل الدراسة هو مثلا الدراسة الجامعية العادية ودي بتعتبر مرحلة ودراسة الماجستير وده بيعتبر مرحلة ودراسة الدكتوراه وده بيعتبر مرحلة).

- كمان طبعا تقدر تشتغل وانت بتدرس وسهولة الموضوع اوصعوبته بيرجع الى قدرات كل انسان و صبره.

مفيش شروط محددة لان كل جامعة ليه نظام مختلف في القبول و طبعا من ضمنهم شرط اللغة. في جامعات بتعمل امتحان داخلي للغة وفي جامعات بتكتفي بالتويفل وفي جامعات بتطلب انك تثبت انك درست او اشتغلت مدة معينة في مجتمع انجلوفون لمدة معينة زي انك تكون خريج مدرسة لغات مثلا. وكل جامعة بتعمل تقييم لشهادتك بنفسها ومبتعترفش بتقييم اي جامعة تانية حتى لو من كندا وبناء على خبرتك وتقديراتك ومدة دراستك ومدة خبرتك بيحددولك اذا كنت محتاج كورسات مكملة والا لأ. دي شوية لينكات لجامعات في مونتريال ومنهم تقدر تعرف شروط كل جامعة ومصاريفها كمان وبالتوفيق.

http://www.mcgill.ca/prospective/

http://www.concordia.ca/

ودول فرنساوي

http://www.umontreal.ca/english/

http://www.etudier.uqam.ca/

تم تعديل 10 ديسمبر 2007 بواسطة walidsm

[ايهاب سالم]

اهلا اهلا اهلا استاذ ايهاب المنتدى فعلا منور بيك

منور بوجودك يا اخت مصريه

انت كنت فين دة انت الى خلتنا نتحمس لموضوع كندا انت و استاذ هادى و استاذ و وجدى

الأنتقال من قطر الى كندا شئ مش سهل و ما يتطلبه ذلك من إنهاء متعلقات حياه كامله و تأسيس حياه جديده يجعل من الصعب توفير وقت للدخول و الكتابه في المنتدى .. عذرا

يبقى كدة تحمسنا و تمشى

و الله أنا حاليا و بعد 4 شهور من الحياه هنا بأحمسكم أكتر و اكتر .. لكن خللي بالك كل واحد بيحكي عن تجربته الشخصيه

ياريت بقى تحكى لنا قصتك من ساعة ما وصلت كندا لحد دلوقتى و ايه السبب الى غيبك عن المنتدى كل دة

تابعينا في المشاركات القادمه

و ياريت لو تعرف اخبار عن استاذ وجدى و استاذ هادى و اخت جيهان واخت نانسى و زوجها تطمنا عليهم

أنا لم أتشرف بمعرفة أ / وجدي شخصيا .. لكن طبعا كنت تواق لمعرفة هادي و سألت عليه أخوه هنا في تورونتو تعرفت عليهم في هذا الموضوع و كانوا قد غادروا الإمارات و أستقروا في تورونتو في يناير الماضي و كان هادي في إستقبالهم و قام معاهم بكل حركات الجدعنه اللي في الدنيا .. ثم قام هؤلاء الأصدقاء بدورهم بإستقبال نانسي و أسامه و سكنوهم جنبهم في نفس العماره و نفس الدور حتى و ساعدوهم على الإستقرار زي ما هادي عمل معاهم بالضبط

المهم لما قابلتهم و سألت على الأخوه هادي و نانسي و أسامه .. قالوا لي إن هادي رجع مصر بعد حصوله على الجنسيه و نانسي و أسامه لم يتأقلموا مع الحياه هنا و رجعوا هما كمان مصر بعد شهور قليله .. بس ده كل اللي أعرفه عن الموضوع ده و ربنا يوفقهم في إختيارهم

تم تعديل 10 ديسمبر 2007 بواسطة ايهاب سالم

[walidsm]

السلام عليكم ورحمة الله وبركاته

بعد اذنك طبعا كنت عاوزة اسال سؤال تانى : لو حبيت استثمر الوقت اللى فاضل لينا هنا فى مصر ( ولو انى لست اعلم بالتحديد هيكون قد ايه ) هل ممكن اقوم بمعادلة شهادتى هنا فى مصر ؟ ولا ماينفعش ؟ وان كان ينفع ايه الجهة الى ممكن تساعدنى ؟ واسفة جدا على الاطالة لكن الموضوع مهم جدا بالنسبة لى

مدام دعاء

اذا كنتي ناوية تدرسي في الجامعة فدا تقدري تقدمي عليه وانتي في مصر من على النت وتبعتي اوراقك وكل حاجة ممكن بالتالي تكسبي وقت التقييم لاوراقك وممكن تاجلي الامتحان لعاية لما تيجي وهما حيعملوكي على انك طالب من الخارج وحيقولولك ان المصاريف كتيره جدا بس ميهمكيش لما تيجي كندا ان شاء الله وتستلمي كارت الاقامة ساعتها حيخفضولك المصاريف وحيعاملوكي زي اي كندي. انظري المداخلة السابقة للينكات. اما بالنسبة لمعادلة الحكومة فدي متقدريش تعمليها الا لما يمون معاكي كارت الاقامة يعني لما تكوني في كندا ان شاء الله وبالتوفيق.

[madzoro]

ازيك يا باشمهندس وليد و عساى ان تكون بالف صحة و سلامة

ارجوا ان تفيدني بالرد على مداخلتي السابقة بخصوص مجال العمارة في كندا

[ايهاب سالم]

الاخوه الأعزاء

هاحاول أحكي عن تجربتي في مشاركات متفرقه كلما يسمح الوقت بذلك و يا رب تكون فيها فايده للجميع

وصلت تورونتو بمفردي يوم 19 أغسطس الماضي على الخطوط اليونانيه عبر أثينا و أستغرقت الرحله 12 ساعه

فضلت أسيب زوجتي و اولادي في مصر لحد ما أرتب الاوضاع و يحصلوني بعدها

عند ضابطه الجوازات لم أكذب و ذكرت أنني خارج كندا منذ 3 سنوات

لم تواجهني أي مشاكل عند ضابط الهجره و لكنه قال لي أنه لكي تحتفظ بالإقامه فيجب عليك أن تقيم السنتين القادمتين في كندا و هو ما كنت أعلمه و لا يسبب لي أي قلق لأنه طبيعي و من غير المنتظر أن أعود زياره الى مصر قبل سنتين

لم يفتحوا لي أي شنطه في الجمارك .. سألوني فقط معاك حاجه .. قلت لأ .. قالوا لي مع السلامه

إصطحبني صديق من المطار الي فندق في مسيساجا كان قد حجز لي فيه إسبوعين .. الأسبوع ب 500 دولار

طبعا عانيت من إختلال الساعه البيولوجيه في الاول .. و كنت بأنام بالنهار و بأصحى بالليل و حاجات كده

و لذلك ألتقطت اللقطات التاليه لشروق الشمس على بحيرة أونتاريو من نافذة غرفة الفندق في أول ليله لي .. و اللي المفروض أني كنت أنام فيها قتيل من التعب .. لكن طبعا كان دماغي شايف إننا بالنهار .. يبقى أنام ليه

تم تعديل 10 ديسمبر 2007 بواسطة ايهاب سالم