كل ما تريد معرفته عن (كندا)

[مصرية والنعم]

السلام عليكم ورحمة الله وبركاته

انا وصلت في مرحلة الهجرة لكندا الي مرحلة الكشف الطبي أرسلوا لي من كندا ورقة تفيد بأرسال الكشف الطبي ومصاريف الفيزا

هل بعد ارسال الكشف الطبي بعد انتهائه وان شاء الله يكون كويس(دعواتكم) ومصاريف الفيزا كده خلا يكون ضمان لقبول الطلب وطلب الباسبور لطبع الفيزا.

او كما هو مكتوب في الورق انه ليس بشرط ان كان الكشف الطبي سليم ان يضمن لنا الموافقة عالفيزا وان لا قدر الله تم رفض طلب الهجرة بعد النتيجة الطبية السليمة هل يعيدوا ارسال مصاريف الفيزا التي ارسلناها .

أو اطمئن انه بمجرد طلبهم لهذه الاشياء وكلها سليمة معناها مجرد وقت لطبع الفيزا.

أرجو الافادة ممن لديهم خبرة او معرفة..

وعليكم السلام ورحمة اللة وبركاتة

حبيببتى مصرية مغتربة

انا كمان نفس حالتك طلبوا الكشف الطبى وارسال ومصاريف الفيزا وتم ارسالهم فى شهر نوفمبر 2007 لكن عند سؤال المحامى بتاعى

قال فى خلال 6 شهور لانهم كمان بيتاكدوا من الصحيفة الجنائية

دة كل المعلومات اللى عندى يارب حد يفيدنا من اللى عندهم خبرة ومروا بنفس الاجراءات

كل عام وانتى بالف خير

[ايهاب سالم]

نكمل

كنا قد إنتهينا عند تأجير الشقه

نقطه مهمه قد تكون غير معلومه لناس كتير

هو إن الشقه ليس بها غساله و غير مسموح بتركيب غساله أتوماتيكيه أو حتى عاديه

و هذا هو الحال في 95 % من الشقق و لكن طبعا هناك ناس يقومون بتسريب غساله عاديه صغيره ليلا بعد إنصراف بواب و مدير المبنى و العاملون على نظافته

و هذا حل لا أعتبره حل جيد لما للغساله العاديه من مشاكل و تعب في الغسيل و لعدم وجود مناشر لنشر الغسيل بعدها

إذن ما هو البديل ؟

البديل هو أنه في كل عماره يوجد غرفة غسيل كبيره مشتركه بها عدد كافي من الغسالات الأتوماتيكيه و المجففات تعمل بالعمله و بها وسائل ترفيه مثل تليفزيون و مجلات و جرائد و كراسي للإنتظار .. تحمل غسيلك في عربه صغير ه على عجلات و تضعه في الغساله و تختار البروجرام ثم بعد ذلك تضعه في المجفف و كل شئ تمام

بعض الناس يجد هذا المفهوم غريب و غير مقبول و البعض الأخر يفهم أن لكل مجتمع نظامه الذي يختلف عن عن المجتمع الذي نشا فيه

أيضا كل العمارات أبوابها مغلقه تماما في وجه الغرباء .. و كل السكان معهم مفاتيح للباب الخارجي .. و إذا جاء لك ضيف .. يتكلم معك من الإنتركوم و المكالمه ترن على تليفون المنزل العادي و إذا أردت فتح الباب تضغط على زر 9 في التليفون

أيضا كل العمارات بها نظام إنذار ضد الحريق موصول مباشرة بأقرب مركز إطفاء .. يعني لو حصل حريق .. ال sensors تحس و تشغل الإنذار (مزعج جدا .. يصحي الميت) و المطافي تعرف بالحريق دون ان يتصل أحد من السكان

كل ماذكرته هنا موجود في كل العمارات .. بقوة القانون و ليست رفاهيه

في كل العمارات .. فى المدخل الرئيسي للعمارة .. هناك صندوق أحمر صغير مقفول مكتوب عليه انه خاص بالمطافئ .. به معلومات عن العمارة و خريطة للأدوار و توزيع الشقق و المنافذ .. و هكذا

عندما يدق جرس الإنذار .. فإنه يوجد سماعات داخل كل شقة .. يرن صوت يصحى القتيل ..

المفروض .. بمجرد سماع جرس الإنذار .. المفروض التوجه الى منافذ الخروج و السلالم .. و عدم استخدام المصاعد لأنها ممكن تتعطل .. ثم التوجه الى خارج العمارة ..

مره جرس الإنذار رن في العماره المقابله لينا

و نزلت أتفرج

أول ما يمكن ان تلاحظه من المنظر العام هو النظام .. الدقة .. بشكل مذهل .. كل واحد يعرف دوره بدقة شديدة جدا جدا ..

و متدربين عليها كثيرا و دائما .. حتى بدون وجود حرائق ليكونوا مستعدين

كانت هناك قوات من الشرطة .. قوات من الإسعاف .. قوات من المطافئ .. و رغم ان هذه القوات تنتمى الى ادارات مختلفة كما ترون .. الا انهم جميعا .. يعملون بدقة و انسجام و تناغم و تكامل

الشرطة .. كان هناك حوالى 5 أو 6 سيارات ..

شرطة .. تقوم بتنظيم المرور .. شرطة .. تضع اقماع حمراء حول سيارات المطافئ .. شرطى يقف فى مدخل العمارة .. ليمنع اى محاولات لدخول العمارة .. سيارة شرطة سدت الشارع الجانبى الملاصق للعمارة لمنع المرور فيه .. سيارة شرطة اخرى سدت اخر الشارع من الجهة الآخرى أيضا لمنع المرور فيه .. و ذلك لأعطاء القوات المختلفة الأخرى حرية الحركة فى ذلك الشارع ..

الإسعاف .. حوالى 3 سيارات اسعاف .. سيارتين عاديتين .. و سيارة اسعاف "اوتوبيس" .. فى حالة وجود اعداد كبيرة مطلوب اسعافها ..

المطافئ .. حوالى اربع أو خمس سيارات اطفاء .. اتخذت مواقعها حول العمارة .. و انطلق منها رجال الإطفاء

هذه القوات .. تصل غالبا فى خلال عشرة دقائق الى 15 دقيقة .. و ذلك أن القانون هنا يجبرك اذا ما سمعت صوت سارينة الشرطة أو المطافئ أو الإسعاف .. أن تركن على اليمين (مش توسع الطريق ) تركن و تقف تماما في الإتجاهين .. لأن سيارة المطافي من حقها أن تسير عكس الإتجاه للوصول في أقل وقت ممكن

و عدم اللإلتزام بذلك يعني سحب الرخصه و ربما سجن

السؤال الذى يطرح نفسه .. أو الإسئلة التى تطرح نفسها ..

ما هو شعورك كمواطن عندما تجد هذه الرعاية و هذا الإهتمام ؟

الن يشعرك هذا بقيمتك كإنسان ؟

الن يجعلك هذا راضيا عن الأموال التى تدفعها فى الضرائب ؟

الن تشعر ان ما تدفعه فى الضرائب يعود عليك فعلا ؟

نراكم بعد الفاصل

تم تعديل 22 ديسمبر 2007 بواسطة ايهاب سالم

[ايهاب سالم]

بعد توقيع عقد الإيجار .. إتصلت بزوجتي عشان تيجي هي و الأولاد

و كنا قد إتفقنا على أن أشتري أنا الإحتياجات الأساسيه التي أحتاجها قبل وصولهم و تأجيل الباقي لتختاره هي معي حسب ذوقها لأنه بيتها

و كانت إحتياجاتي هي

مرتبه أضعها على الأرض مؤقتا (جميع الشقق هنا أرضها باركيه ..)

مكتب و كرسي لزوم القراءة و إستعمال الكمبيوتر و تحضير السي في

تليفزيون و دش و دي في دي للترفيه و مشاهدة مباريات الأهلي ;)

المرتبه إشتريتها من هنا

Sleep Country

و يمكنك الدخول لمشاهدة الأسعار و الإختيارات المتاحه

لموضوع المرتبه قصه طريفه

عند دخولي المحل ... جاء sales man لمساعدتي و دار الحوار كالتالي

(لاحظ الأدب في حوار البائع و إستعماله كلمة سيدي دائما و هو الطبيعي هنا حتى لو داخل تشتري حاجه بدولار)

can I help you Sir

نعم عاوز مرتبه

which size

كينج

OK , may i ask , how do you sleep sir

أنا إذبهليت .. يعني أيه بأنام إزاي .. بأنام زي البني أدمين

Sorry sir , i mean on your back , your side or your stomack , sir

و هي تفرق

sure

و طلع إن فيه مرتبه .. درجة طراوتها تناسب كل وضع من الأوضاع

يعني لو بتنام على جنبك محتاج مرتبه طريه softer ... لو بتنام على ظهرك محتاج مرتبه ناشفه شويه firmer أو اللي بنسميها عندنا مرتبه طبيه .. عشان تحافظ على العمود الفقري من التقوس

و لو بتنام على بطنك يبقى محتاج تبطل النومه الوحشه دي أصلا

حبيت أعمل ناصح عليه و قلتله طب لو واحد بينام بطريقه مختلفه عن مراته .. يعملوه أيه .. يجيبوا مرتبه تناسب مين فيهم

قاللي بسيطه عندنا مراتب مقسومه نصين .. كل نص يناسب طريقة نوم مختلفه

زي كده

و على رأي المثل

كل واحد ينام ع (النص) اللي يريحه

دلوقتي

بعد إذنكم النهارده السبت .. يعني الويك إند

و درجة الحراره رائعه .. 4 مئويه .. فوق الصفر

الناس مش مصدقه نفسها من الفرحه .. درجة حراره غير طبيعيه تماما في هذا الوقت من السنه

و بكره هتوصل 5 بحالهم

أخرج بقى أعوم شويه في بحيرة طبريه .. قصدي أونتاريو

نراكم بعد الفاصل

تم تعديل 22 ديسمبر 2007 بواسطة ايهاب سالم

[عبدالخالق عباس]

مشكور وجزاك الله كل خير اخ مزاميزو

[totti]

يا جماعة ارجوكم حد ير عليا انتوا مبردوش عليا لية؟؟؟؟؟؟؟؟ ;)

[totti]

ياجماعة انا كريم اللى محتار ما بين كندا والنمسا ارجوكم حد يرد عليا

[ايهاب سالم]

بعد الإنتقال الى الشقه

بدأت خطوات الحصول على رخصة القياده

رخصة قيادة السياره في كندا من سلطة المقاطعات و ليس سلطة الحكومه الفيدراليه

رخصة قيادة السياره الخاصه في مقاطعة أونتاريو حيث أعيش لها ثلاث درجات G1 ثم G2 ثم G

للحصول على رخصه أول درجه و هي G1 يلزمك إجتياز إمتحان تحريري بعد مذاكرة كتاب إسمه Driver's Handbook

يباع في المكتبات و في مراكز إمتحان القياده و توجد نسخه منه على الإنترنت في هذا الموقع

http://www.mto.gov.on.ca/english/dandv/dri...ook/index.shtml

يمكنك إختيار الإمتحان على الكمبيوتر أو على الورق

بعد إجتيازك إمتحان G1 يصبح من حقك قيادة سياره و لكن بشروط صعبه يجعل منها مهمه مستحيله

منها أنه يجب أن يجلس بجانبك شخص معه رخصه G حاصل عليها منذ 4 سنوات و لا تستطيع القياده من بعد غروب الشمس حتى الشروق و حاجات كتير

الخلاصه إن الدرجه دي معموله للشباب الصغير اللي لسه متعلم القياده جديد عشان والده يجلس بجانبه أثناء القياده

بعد حصولك على G1 إذا كان معك رخصه من بلد ثانيه مضى عليها عامين على الأقل يمكنك التقدم مباشرة الى إمتحان G2

إما إذا لم يكن معك أي رخصه مسبقا فيجب عليك الإنتظار سنه حتى يمكنك التقدم الى إمتحان G2

إمتحان G2 هو إمتحان عملي فعلي في الشارع

و قيادة السياره هنا مش هزار و القوانين صارمه جدا

لذلك فمقاطعة اونتاريو تحتفظ بالمركز الأول في معدلات الأمان في امريكا الشماليه كلها و ليس كندا فقط

[Automatic]

;) السلام عليكم انا دى اول مرة اخش فيها المنتدى دة وانا لقيتة بالصدفة كنت بدور على الهجرة الى كندا على موقع جوجل والموقع دة فتح معايا المهم انا ابدا عارفكم بنفسى انا اسمى كريم 18 سنة من طنطا وانا فى كلية الاداب الفرقة التانية قسم اجتماع الحقيقة انا عندى مشكلة وكنت عاوز اخد رايكم انا من زمان بحلم بالسفر والهجرة قبل كدة كنت عاوز اروح امريكا بس دلوقتى غير ت رايى لما عرفت معلومات اكتر عن كندا ولقيت انها متفرقش عن امريكا كتر الا فى الطقس البارد جدا وكمان انخفاض الاجور بنسبة بسيطة عن امريكا انا عموما بحب اللغة الانجليزية وانا بعرف اتكلم بيها كويس جدا وعلى فكرة اهلى كانوا مقدمين هجرة لامريكا من 20 سنة فاتوا ايام ما كانت امريكا فى عزها بس الورق اترفض المهم عشان مطولش عليكوا انا فى واحد قريبى مهاجر من زمان للنمسا بقالة 12 سنة ومتجوز قالى انة ممكن يسافرنة معاة للنمسا ويشغلنى هناك بعد ما اخلص وهو جد فى كلامة هو اصلا شغال فى شركة اعلانات كبيرة هناك المشكلة الحقيقة اللى بتواجهنى ان انا بقيت مشتت مش عارف اهاجر لكندا اللى حعرف اتعامل مع شعبها واللى انا متعلم لغتها وبتقنها كويس واللى حسس انى مبسوط لو رحتها بس فى نفس الوقت انا معرفش حد هناك وهقابل مشكل كتير فى الاقامة والشغل وكدة ولا اروح النمسا واتعلم اللغة الالمانية (الخنقة) واحاول اندمج مع المجتمع واستحمل شعبها الخنيق هناك واة قرايبى حيبقوا مهمونين الوضع عليا شوية واكيد انشاء اللة حلاقى شغل هناك وهما حيسعدونى واشتغل اى شغلانة مش مهم الصراحة انا محتار ومش عارف اعمل اية انا ناقصلى سنتين واخلص دراسة ومش عاوز اقعد حاطط ايدى على خدى واستنى الشغل او اشتغل فى سنترال ولا فى كافتريا واخد فى الاخر فلوس قليلة جدا متعملش حاجة فى الزمن دة زى ما كل الشباب بيعمل انا بردة كنت عاوز اسال على لعيبة كورة القدم فى كندا بياخدوا مرتب كويس ولا لا انا عارف ان اللعبة ملهاش شعبية هناك كبيرة زى هنا بس انا عاوز اعرف اية الاوضاع فى كندا بخصوص اللعبة دى انا لاجت ليكوا انتوا بالذات عشان انتوا قاعدين فى كندا وتقدروا تساعدوينى وبجد اتمنى ان انتوا تساعدونى وتردوا عليا انا اسف لو كنت طولت فى رسالتى دة اميلى لو فى حد فيكوا حب يكلمنى ويفهمنى الوضع TOTTI_K2000@YAHOO.COMوانا بردة ان شاء اللة حتابع المنتدى يوميا واتمنى انى الاقى ردود منكم شكرا

اسمع يا كريم, انا ماعرفش حاجة عالنمسا لاكن انا عايش في كندا من قبل ما انتا اتولدت وببساطة كده كندا فيها فرص شغل كتير و الى بيجتهد يقدر يعيش مرتاح او احسن من مرتاح. المهم انك تركز و تعرف بالظبط انت عايز تهاجر ليه. ايه بالظبط الي اىتا بتحلم بيه. أحنا كلنا بنى ادمين وفي مننا المأدبين و مننا الحقره, سواء في كندا او في مصر. طبعنا بيختلف شويه لكن في النهايه احنا كلنا زي بعض.

اما عن العالم بتوع اونتاريو فاوحش معامله هيا معاملتهم. مش حقول قلالات الادب لكن طريقتهم بتسد النفس وانا عشت معاهم 15 سنه.

[Automatic]

السلام عليكم

فعلا استاذ اوتوماتيك، الهجرة الى كندا تعد الاسهل و الارخص كمان. دول اوروبا تضع شروطا شبة تعجيزية لهجرة العرب اليها و بعض الدول تطلب توافر مبالغ مهولة لراغب الهجرة ، التي ان توافرت مع احد لن يفكر في الهجرة من الاساس.

شكرا على نصحيتك بخصوص السيارة، انا اعتقد ان كندا كلها لازم فيها سيارة، انا مش متخيله ان الاطفال ممكن يروحوا المدرسة الصبح بدري في التلج و درجة الحرارة اللى تحت الصفر بكتير، و يقوفوا يستنوا المواصلات حتي لو خمس دقايق. تحمل البرد بيكون بالتعود و اولادنا مش متعودين على البرد الجامد بما بالك بالتلج. انا ولادي بالذات بيمرضوا من اقل حاجة. بس انا سمعت ان السيارات مش غالية اوي و السيارات المستعملة متوفرة ،و لكن الغالي هو التأمين زي ما حضرتك بتقول.

فعلا جميل ان حضرتك ما عشتش غير في كندا ، و بتعرف تكتب و تقرا عربي. حضرتك مصري مولود في كندا؟

انا لي اصدقاء مصريين عايشين في دول اجنبية اولادهم ما يعرفوش ينطقوا عربي.

وعليكم السلام و رحمه الله و بركاته

لا يا سوزان ده انا ماسبتش مصر الا لم كن عندي 22 سنه لاكن للاسف مبتكلمش عربي الا لم انزل مصر زياره

انا نسيت اجاوب سؤالك الولاني, انا عايش في Vancouver بقالي كم سنه.

تم تعديل 23 ديسمبر 2007 بواسطة Automatic

[دعاء]

;)

صباح الخير على كل اعضاء المنتدى الكرام فى مصر والخليج وطبعا كندا

اتمنى ان يكون الجميع قضى عيد سعيد مع الاهل والاصدقاء وخسارة العيد خلص والاجازة خلصت ورجعت دوامة الحياه من تانى فدعواتى للجميع بالتوفيق

احب ابلغكوا اخبارى :

انا حصلت على رقم ملفى فى السفارة الكندية فى مصر (رقم الملف بعد المقابلة الشخصية) وعرفت من الموقع انهم بداوا بدراسة ملفى 16 - 10 - 2007 ونحن الان فى فترة انتظار خطاب الكشف الطبى فارجوا من الجميع الدعاء لى بتقصير الفترة الزمنية قدر الامكان وشكرا لكم جميعا

استاذ ايهاب :

مازلنا متابعين سرد تجربتك الشخصية عن كندا وكل مرة ننتهى من القراءة نتشوق لقراءة المزيد فشكرا لك على وقتك الثمين الذى يجعلنا عايشين معاك فى جو نظيف حتى لو دقائق من الزمن وبالتوفيق دائما

[مزاميزو]

السلام عليكم ورحمة الله وبركاته

سلامي وتحياتي لكل أعضاء المنتدى

للأخت دعاء

أنا عايز أسألك أنت اللي رحتي السفارة تقدمي الملف بتاع الفيزا ولا المحامي هو اللي قام بالواجب عشان أنا عرفت إن مقابلتك كانت في يونيو 2007 وده فترة كبيرة جدا على فتح الملف لأن مقابلتي كانت 19 - نوفمبر-2007 وأنا قدمت الورق في السفارة بنفسي يوم 29-نوفمبر-2007 والملف اتفتح بتاريخ 12 - ديسمبر -2007 وياريت نتابع مع بعض عشان احنا تقريبا ماشيين في توقيت قريب من بعض ..... فرق شهرين بس

وأنا لقيت الفترة الزمنية التقريبية للمقدمين كيبيك إن بنسبة 80% في فترة من 5 إلى 9 شهور حتى إنهاء الإجراءات والحصول على الفيزا ودا اللي حصل في الفترة من أكتوبر 2006 إلى سبتمبر 2007 والمعلومة على مسئولية الموقع الحكومي مش المحامي ..... يعني مش بالضرورة يكون نفس الفترة لينا .... بس دا قراءة للمتوقع

والسلام ختام

[Nile Bird]

بالنسبة لي أنا تعاقدت معاه كأعزب ب 2000 دولار أمريكي سنة 2005 دفعت 1000 عند التعاقد و 1000 بعد النجاح في المقابلة بس الحقيقة هو ما سبنيش بعد كده ... هو جهز الابليكشن وترجم الورق تاني اللي اتاخد مني في المقابلة والرسوم دي شاملة ترجمة الورق للفرنسية واعداد المقابلة حيث أن مكتبه مسئول عن ملفات كيبيك بس .... بس أنا مش عارف بالضبط بياخد كام من المتزوجين واللي أعرفه انه رفع رسوم المكتب وهاكلمه و اتكد من المصاريف حاليا كام وهابعتلك والحمد لله احنا 4 من المكتب عنده نجحنا في فترة المقابلات اللي ابتدت من 18 أكتوبر إلى 25 نوفمبر 2007 وهو بصراحة ساعدني في الاعداد كويس لأني سافرت الكويت من يوليو 2006 حتى نهاية أكتوبر 2007 .... أخدت كورس واحد هناك بس ما كانش عاجبني فسبت المركز ما عنه كان أحسن مركز هناك والمدرسين فرنسيين بس مستواهم مش قد كده يعني ممكن تقولي الفترة بتاعة الكويت كلها ما ذاكرتش فرنساوي خالص ورجعت قبل المقابلة بأسبوعين واداني الخلاصة اللي اقولها بس أنا كان مستواي قبل ما اسافر كان كويس وكنت باخد مع مدرسة فرنسية في البيت عندها وهي كانت بدرس في المركز الفرنسي ودا ساعدني كتير عشان ما تفتكريش اني كنت بطيخة بالاضافة انه كان معايا DELF A1,A2

الأخ مزاميرو

تحية طيبة

ممكن حضرتك تعرفنى كم كلفك من الوقت والفلوس للحصول على دورات اللغة الفرنسية حتى تحصل على شهادة DELF A1,A2 وهل هذه الشهادات كافية لإجتياز المقابلة وتفى كإثبات لإتقان اللغة

عرفت من مداخلة حضرتك إنك كنت فى الكويت وأخذت كورس واحد فقط ممكن أعرف إسم هذا المركز لأننى أيضا فى الكويت وسألت على كورسات الفرنسى هنا فى المركز الثقافى الفرنسى وأخبرونى أننى حتى أستطيع دخول إمتحان الشهادة فى اللغة الفرنسية يلزمنى على الأقل 7 مستويات وكل مستوى شهر ونصف ويتكلف 100 دينار

ولكن من مداخلة حضرتك قلت أنك حتى نهاية أكتوبر 2007 لم تأخذ إلا كورس واحد فى الكويت وكملت فى مصر ؟

فهل ممكن تعرفنى كم كورس أخذت لتحصل على الشهادات اللى ذكرتها ومدتها كانت كام وأيضا التكلفة كلها كام ؟

برجاء الإفادة

شكرا

[الكميائى]

بسم الله الرحمن الرحيم

اولى مشاركتى

موضوع اكثر من رائع جدا جدا

كنت ببحث فى جوجل وظهر المنتدى

الكل اتكلمعن معادله شهادت طب وصيدله وهندسه

طيب علوم مفيش لها مكان

انا عارف ان عددهم قليل وكلامهم اقل

بس اتمنىان يفيدنى اى عضو

Faculty of Science

chemistry

BIOCHEMISTRY

or medical lab

[ايهاب سالم]

استاذ ايهاب :

مازلنا متابعين سرد تجربتك الشخصية عن كندا وكل مرة ننتهى من القراءة نتشوق لقراءة المزيد فشكرا لك على وقتك الثمين الذى يجعلنا عايشين معاك فى جو نظيف حتى لو دقائق من الزمن وبالتوفيق دائما

:P

شكرا يا مدام / دعاء

كلك ذوق و ادب

نكمل

موضوع رخصة القياده

نجحت من أول مره في إمتحان G1 و إخترت تأديته على الكمبيوتر عن الورق لأن في هذا ميزه ..

وهو أنك تعلم بعد إنتقالك من السؤال إذا كانت إجابتك خطأ أم صواب قبل الإنتقال الى السؤال التالي .. و يخبرك الكمبيوتر بالإجابه الصحيحه .. و بذلك يمكنك معرفة عدد الأجابات الخاطئه التي وقعت فيها بعد كل سؤال و يمكنك تقدير موقفك قبل الإستمرار .. لأنه معروف من البدايه أنهم 40 سؤال مسموح لك حتى 8 إجابات خاطئه

أما على الورق فأنت لا تعلم أي شئ حتى تسلم ورقة الإجابه الى الموظف ..

بعد إجتيازي إمتحان G1 و لأن معي رخصتين قياده من مصر و قطر مضى عليهم أكثر من سنتين يصبح من حقي التقدم لإمتحان G2 مباشرة و هذا ما حدث

رسبت أول مره في إمتحان G2 و نجحت تاني مره و لهذا قصه مفيده

قلت من قبل أن مقاطعة أونتاريو متشدده جدا في قواعد القياده و هدفها هو أن تصبح طرقها

The safest roads in north america

و هو ما تحقق بالفعل و ما يريدون المحافظه عليه .. بعد أن كانوا في المركز الثامن سنة 1994

إضغط هنا لمعرفة المزيد

أحد القواعد المنصوص عليها في كتاب القياده .. هو أنه عند توقف أتوبيس مدرسه و أنواره flashing مما يعني أنه بينزل أو بيركب أطفال .. يجب ان تتوقف السيارات بعده بمسافة عشرين متر و لا تتحرك حتى يطفئ أنواره

أنا على حظي العاثر كان إمتحاني في وقت خروج المدارس و حدثت هذه الحاله معي .. و لم اتوقف .. لماذا ؟ .. لأني كنت ماشي السياره في الجهه المقابله من الشارع

يعني الشارع حارتين رايح و حارتين جاي و الأتوبيس متوقف على أقصى اليمين بينزل التلاميذ و المفروض إن التلاميذ بينزلوا من باب الأتوبيس على الرصيف و أنا ماشي في أقصى اليمين من الجهه الأخرى .. أنا كنت عارف القاعده .. لكن للأسف كنت فاكر إنها للسيارات القادمه خلف الأتوبيس في نفس الإتجاه و ليس للإتجاه الأخر

طبعا أول ما إجتزت مسافة ال 20 متر و قبل ما أوصل لأني أكون موازي للأتوبيس الناحيه التانيه .. الممتحن الجالس بجواري داس على الفرامل الموجوده أمامه و قالي .. مبروك يا مستر / سالم .. إنت ساقط .. you failed to stop for a school bus

بس يا خواجه ده الناحيه التانيه و أنا بعيد عنه خالص .. طبعا مفيش فايده .. القانون قانون و مفيش هزار

طبعا أنا كنت محتاج الرخصه جدا لأن زوجتي و أولادي كانوا واصلين تاني يوم الإمتحان من مصر و لأني كنت إشتريت سياره فعلا من قبلها بيومين و كانت مركونه عند ال dealer و كنت فاكر إن هأنجح من اول مره بسهوله و أخد الرخصه و أروح أستلمها .. ده انا بأسوق من 15 سنه .. لكن قدر الله و ماشاء فعل

المهم تقدمت للإمتحان مره ثانيه و نجحت و الحمد لله

تم تعديل 23 ديسمبر 2007 بواسطة ايهاب سالم

[rasha ahmed]

السلام عليكم جميع المشاركين في المنتدى اود ان اشكر الاختsuzane على المعلومات المفيدة ويارت احنا كمان ما يطلبوش منا الا يلتس كما اشكرالاخت yasmin بس احنا وصلنا رقم الملف ثم خطاب بأنة تم اعفائنا من المقابلة وانة سيتم الانتهاء من فحص الاوراق فى 2009

[yasmin]

السلام عليكم ورحمه الله و بركاته

كل عام و انتم بخير لكم جميعا

الاخت رشا كنت عايزة اسألك سؤال؟ انتى ازاى اخدتى اعفاء من المقابله الشخصيه بعد تقديمك للملف بشهرين مش همه لازم يقرروا بعد دراسه المستندات بتاعتك الاول؟ وهل انتى قدمتى اى اوراق تخصك مع الابليكيشن؟حسب قرائتى لموقع الهجرة انهم النظام الجديد انل تقدمى ابليكيشن الاول و الفيز و بعد فترة يطلبوا المستندات المطلوبة.

الاستاذ/ ايهاب اود ان اشكرك على المعلومات العظيمةو المفيده بجد بجد اسلوبك شيق جدا و احنا فى انتظار بقية الحكاية

[أختكم المصرية]

كل عام و انتم جميعا بخير

يارب واحد يكون قضى عيد مبارك و سعيد

استاذ ايهاب

شكرا جدا على سردك و اهتمامك بالتفاصيل احنا فعلا متشوقين للمزيد

[ايهاب سالم]

بعد الكلام عن رخصة القياده .. ربما يكون من الأفضل الكلام عن وسائل المواصلات العامه .. وللكلام عن وسائل المواصلات العامه يلزم التعرف على طبيعة التقسيم الإداري لكندا

مثلما يعرف الكثيرون .. كندا دوله هائلة المساحه . ثاني أكبر بلد في العالم .. بعد روسيا ..

Largest Countries in the World

كل هذه المساحه الهائله مقسمه الى 10 مقاطعات provinces .. مثل الولايه عند أمريكا أو المحافظه عندنا و ثلاث أقاليم territories

و هذه هي المقاطعات و الأقاليم الكنديه الثلاثة عشر

و تقسم كل مقاطعه الى مناطق regions و كل منطقه تحتوي على مدن cities و towns

مقاطعة أونتاريو هي أهم و اكبر المقاطعات الكنديه .. و أقصد أكبر من حيث عدد السكان و حجم الإقتصاد الذي يرتبط إرتباط وثيق بحركة التجاره البينيه مع أمريكا

عاصمة أونتاريو هي مدينة تورونتو و هي أكبر و أهم مدينه كنديه .. هي مركز المال و الأعمال .. بمعنى أصح نيويورك كندا .. المركز التجاري و العاصمة الإقتصاديه لكندا

مع توسع تورونتو مساحة عبر السنين و إزدياد عدد سكانها تم تقسيمها إداريا الى مدن صغيره ليسهل إدارتها و أصبح يطلق على المنطقه كلها ..

تورونتو الكبرى أو Greater Toronto Area or GTA

مثلما توضح هذه الخريطه

عادة.. الناس تعمل في وسط مدينة تورونتو و لكنها تسكن في المناطق المحيطه بها ضمن تورونتو الكبرى و الموضحه بالخريطه

و يعتمدون في إنتقالهم على وسائل المواصلات و التي هي فعاله و سريعه و منتظمه و أدميه

كل مدينه في GTA لها نظام مواصلاتها transit system

في مدينة تورونتو يوجد TTC

و يتكون من خطوط مترو أنفاق و باصات و street cars أو تروماي

في مدينة مسيساجا غرب تورونتو حيث أقيم يوجد Mississauga Transit

هناك أيضا و سيلة مواصلات عظيمه جدا لا ترتبط بمدينه محدده لأنها تخدم GTA كلها .. أستعملها يوميا في الذهاب و العوده من عملي في وسط مدينة تورونتو

هي Go Transit

و تتكون من خطوط قطارات و باصات تربط شرق و غرب و شمال تورونتو الكبرى بوسط المدينه .. مفيش جنوب لأن الجنوب بحيرة أونتاريو

ميعاد الباصات و القطارت هنا معروف بالدقيقه و يمكنك بالدخول على الموقع .. معرفة متى يصل خط الباص الذي تريده الى المحطه التي تركب من عندها

كما يمكنك إستعمال خاصية Online Trip Planner

تعطيه خطوط رحلتك .. من و إلى و متى و هو يعطيك تخطيط الرحله و مواعيد وسائل مواصلاتك

الباصات هنا تنحني للركاب .. أه و الله .. الصعود من الباب الأمامي و النزول من الخلفي ..

إذا كان الراكب عجوز أو سيده معها عربة أطفال .. يضغط السائق على زر فينحني الباص من جهة الباب الأمامي الأيمن فقط حتى يصل لمستوى الرصيف .. فيمكن للركاب الصعود بسهوله

أما لو كان الراكب على كرسي متحرك يخرج لوح ألي من الباب الأمامي و يرتكز على الرصيف ليصبح مطلع ramp up يصعد عليه الكرسي المتحرك و راكبه ثم يقوم السائق من مكانه ليطوي المقاعد الاماميه ليسمح بمساحه كافيه للكرسي للوقوف .. و حكاية الكرسي المتحرك دي شفتها اكثر من مره في الفتره اللي كنت أركب فيها الباصات قبل شرائي سياره

طبعا كل وسائل المواصلات مدفأه شتاء و مكيفه صيفا

هأقول ايه و الا ايه ..

أنا مثلا أستقل ال go train يوميا الى العمل .. ميعاد القطار الثامنه و سبع دقائق أسكن في عماره مواجهه للمحطه .. أنزل قبل دقيقتين من ميعاد القطار .. يصل القطار و يتحرك في ميعاده .. أصل إلى المحطه المركزيه بعد 20 دقيقه و أنا مرتاح .. لا تعبان في السواقه و لا الزحمه و أرجع بنفس الطريقه .. كل يوم أصل بيتي في نفس الدقيقه

و عشان لازم المشاركه لا تخلو من صور

التالي صوره مأخوذه داخل الباص .. في المقعد الخلفي

كنا راجعين في يوم من كرنفال للأطفال و ركب معانا في نفس الباص باتمان و سوبرمان مره واحده

طلبت منهم يتصوروا مع أولادي كريم و نورهان .. و لأن أهل أونتاريو ذوق و مؤدبين

رحبوا جدا و كانت هذه الصوره

أستأذنكم عشان عندي شغل الصبح

نراكم بعد الفاصل

[مزاميزو]

الأخ العزيز Nile Bird

أنا أخدت كورس واحد فقط لأول مستوى في المركز الثقافي بالقاهرة وبعدها أخدت مع مدرسة فرنسية في البيت عندها كانت الحصة ساعتين ب 120 جنيه احسب انت حصتين في الأسبوع من شهر ديسمبر 2005 حتى نهاية يونيو 2006 وخلال هذه الفترة أخدت DELF A1,A2 من مصر قبل ما أسافر الكويت

أما بالنسبة أنها تكفي لإجتياز موضوع اللغة في المقابلة دا صحيح حتى لو لبخت شوية بس حسب القوانين الجديدة لازم DELF B1 والمعلومة من الل عملي المقابلة في القاهرة أما موضوع اني كملت لما رجعت أنت فهمتني غلط أنا كان قصدي المحامي بتاعي عملي إعداد للمقابلة ودا طبعا كان بالفرنساوي لأني رجعت مصر قبل المقابلة بأسبوعين فقط ولك أن تتخيل واحد بقاله أكتر من سنة ما شافش الفرنساوي غير في الكورس الل أخدته في الكويت

أنا يا عم أخدت كورس في الكويت في Intitut Voltaire وتليفونهم 5319734 ودا في الجابرية بعد مستشفى هادي لو أنت في الاتجاه من الكويت للفحاحيل كان الكورس 40 ساعة متقسم على 3 شهور ب 120 دينار وممكن أبعتلك رقم مدرس هناك في المركز لو أنت عايز تاخد برة المركز هو فرنسي من أصل عربي وما بيعرفش يتكلم ولا كلمة عربي

أما موضوع 7 مستويات دا لأكل العيش أنت من حقك تدخل الإمتحان حتى لو متعرفش ولا كلمة فرنساوي بس تدفع رسوم الإمتحان وأعتقد 7 مستويات دا عشان A2 وأنت لازم تاخد B1 حسب القوانين الجديدة ..........

أرجو اني اكون اديتك الفايدة

[Nile Bird]

الأخ العزيز Nile Bird

أنا أخدت كورس واحد فقط لأول مستوى في المركز الثقافي بالقاهرة وبعدها أخدت مع مدرسة فرنسية في البيت عندها كانت الحصة ساعتين ب 120 جنيه احسب انت حصتين في الأسبوع من شهر ديسمبر 2005 حتى نهاية يونيو 2006 وخلال هذه الفترة أخدت DELF A1,A2 من مصر قبل ما أسافر الكويت

أما بالنسبة أنها تكفي لإجتياز موضوع اللغة في المقابلة دا صحيح حتى لو لبخت شوية بس حسب القوانين الجديدة لازم DELF B1 والمعلومة من الل عملي المقابلة في القاهرة أما موضوع اني كملت لما رجعت أنت فهمتني غلط أنا كان قصدي المحامي بتاعي عملي إعداد للمقابلة ودا طبعا كان بالفرنساوي لأني رجعت مصر قبل المقابلة بأسبوعين فقط ولك أن تتخيل واحد بقاله أكتر من سنة ما شافش الفرنساوي غير في الكورس الل أخدته في الكويت

أنا يا عم أخدت كورس في الكويت في Intitut Voltaire وتليفونهم 5319734 ودا في الجابرية بعد مستشفى هادي لو أنت في الاتجاه من الكويت للفحاحيل كان الكورس 40 ساعة متقسم على 3 شهور ب 120 دينار وممكن أبعتلك رقم مدرس هناك في المركز لو أنت عايز تاخد برة المركز هو فرنسي من أصل عربي وما بيعرفش يتكلم ولا كلمة عربي

أما موضوع 7 مستويات دا لأكل العيش أنت من حقك تدخل الإمتحان حتى لو متعرفش ولا كلمة فرنساوي بس تدفع رسوم الإمتحان وأعتقد 7 مستويات دا عشان A2 وأنت لازم تاخد B1 حسب القوانين الجديدة ..........

أرجو اني اكون اديتك الفايدة

الأخ مزاميرو

بداية ألف شكر على ردك

معنى كلامك أنك لتحصل على الشهادات DELF A1,A2 استغرق حوالى 7 شهور حوالى 112 ساعة دراسية

بس حضرتك بتقول إن القوانين الجديدة بتطلب DELF B1 ولكن اللى عرفته من مداخلة سابقة لحضرتك هو إن اللى بيقدم على هجرة لكيبك مش بيطلبوا منه شهادة لغة وإنما فائدة الشهادة هى إنها ممكن تعفيه من المقابلة وتعزز موقفة وأن كل المطلوب هو أن يصل الى مستوى فى اللغة يعديه المقابلة فقط وأن الهجرة لكيبك لا تتطلب شهادة لغة كما تطلب الهجرة الفيدرال التى تطلب الأيلتس

فهل فى القوانين الجديدة أصبحت الهجرة لكيبك هى الأخرى تطلب شهادة لغة فرنسية أم ماذا؟

وبالنسبة ل Institute Voltaire الموجود بالكويت حضرتك قلت إنك أخدت فيه كورس والشرح مكانش عاجبك ممكن توضح النقطة دى شوية يعنى ازاى الشرح فيه مش تمام ولا إيه؟

وياريت ترسلى رقم المدرس الفرنسى اللى حضرتك بتقول عليه وكم تتوقع تكون تكاليفه وهل الدراسة معه ممكن تكون أفضل من المركز

وحتى الحصول على شهادة DELF B1 كم يلزمنى من المستويات بحكم ان حضرتك عارفه ممكن تعرفنى هو حسابه بيكون بالمستوى ولا بالساعة وبكام؟

أسف على الإطالة وشكرا على الإفادة