كل ما تريد معرفته عن (كندا)

[ايهاب سالم]

بالنسبه لاستاذ ايهاب انا طبعا فريت قصتك بتفاصيلها من ساعة ماوصلت بس واضح انك خلاص لقيت شغل الحمد لله طيب موضحتش لقيت شغل بسهوله وللا كان صعب اخت وقت اد ايه هل لقيت علطول فى تخصصك وللا برده احتجت تشتغل فى اى حاجه تانيه وهل لما بقيت على ارض الواقع لقيت ان المرتبات كويسه علشان الواحد يعيش مستريح وللا حياه صعبه وطبعا مقصدش تحويش

أنا داخل النهارده احكي موضوع الشغل بالتفصيل :)

وكان ايه رد فعل الاولاد على موضوع الانتقال لمكان تانى ميعرفوش فيه حد مع العلم انهم كان اكيد ليهم اصدقاء وحياه فى المكان اللى كانوا فيه الاول

أنا بعد ما أخلص موضوع الشغل هأتكلم عن النواحي المعنويه و من ضمنها موضوع الأطفال و رعاية الدوله و المجتمع لهم .. لكن أحب أطمئنك إن الأطفال هنا في كندا هم أسعد ناس .. دي بلدهم فعلا .. مش مصر ... و أكيد مش الخليج .. بلد الواحد مش بلد جنسية والده .. هيا البلد اللي يهتم به و يرعاه .. بإختصار هو ده المكان اللي يستاهل ولادك .. و يستاهلوه ولادك ..

صحيح سيد ايهاب مكملتش اهم نقطة وهي البحث عن عمل ياتري انت عملت بحث وقدمت قبل الذهاب لكندا ولا لما رحت هناك وايه هي طريقة بحثك وهل كان بسهولة او بصعوبة وايه هي انواع الوظائف اللي ممكن يشتغلها اي شخص جديد لحين الاستقرار ارجو الافادة.

تابعي المشاركه القادمه .. تحياتي

[ايهاب سالم]

أتكلم في هذه المشاركه عن موضوع العمل

طبعا أنا سأتكلم عن تجربتي الشخصيه .. لذلك فمن الضروري أن أعرفكم على مؤهلاتي العلميه و المهنيه

أنا حاصل على بكالوريوس هندسه .. شعبة كهرباء .. قسم هندسة و علوم الحاسبات الإلكترونيه .. تقدير إمتياز .. ثالث الدفعه .. بفضل الله و توفيقه

بعد التخرج و الجيش إلتحقت ببرنامج تدريبي مكثف في مركز المعلومات و دعم إتخاذ القرار بمجلس الوزراء إسمه

Software Skills Development Program .. هذا البرنامج كان ممول من برنامج الأمم المتحده للتنميه United Nations Development Program و كان الهدف المعلن منه خلق جيل من الشباب المبدعين في مجال البرمجه بحيث تتحول مصر الى قوه إقليميه في مجال صناعة البرمجيات مثل الهند

طبعا الهدف الأول إتحقق و هو جيل الشباب و الهدف الثاني لم يتحقق و هو إننا نصبح مثل الهند في صناعة البرمجيات .. لأن مفيش سيستم

إتخرجنا و إشتغلنا في شركات مصريه عدة شهور و بعدين عرفنا إن لا فيها هند و لا باكستان و إن مفيش فايده في البلد دي ..فكل واحد شاف له بلد سافر لها .. المعظم راح الخليج و أنا منهم و البعض كان أذكى مننا و إختار أمريكا و فكر لبعيد شويه و عرف إن الدنيا مش فلوس و بس .. و البعض اللي كان لسه عنده امل يعمل حاجه للبلد إستنى في مصر .. لكن بعدها بسنوات معظمهم سافر برضه

المقدمه السابقه رأيت أنها لا بد منها حتى نعلم مدى الخساره التي نخسرها عندما تربي بلدنا و تصرف على تعليم أجيال من الشباب الذين يصبحون بعد ذلك تروس في ماكينة إقتصاد دول أخرى لم تصرف عليهم أي شئ و إنما أخذتهم على الجاهز في عز سنين شبابهم و عطائهم و خبرتهم .. عشان عندهم نظام

على رأي برايز .. العيب مش فينا .. العيب في النظام

البحث عن عمل هنا بالنسبه للوظائف المهنيه يتم عن طريق الإنترنت .. أما البحث عن الوظائف العاديه أو كما يسمونها entry-level jobs أو casual jobs فيكون عن طريق جرائد مجانيه للتوظيف توجد في أكشاك على الرصيف

السؤال المنطقي .. لماذا لا أبحث عن عمل في كندا على النت و أنا ما زلت في مصر أو الخليج و لا أترك وظيفتي إلا بعد الحصول على وظيفه هناك

للأسف هذا غير ممكن .. لماذا ؟

لأن أصحاب الأعمال هنا بعد قراءة السيره الذاتيه لطالب الوظيفه على أحد مواقع التوظيف يتصلون به تليفونيا لعمل مقابله على التليفون و إذا كانت النتيجه إيجابيه يطلبون مقابله شخصيه و طبعا كل هذا لا يمكن حدوثه الا إذا كنت في كندا بنفسك .. لذلك فلو وضعت سيرتك الذاتيه على موقع من مواقع التوظيف الكنديه و أنت خارج كندا و رأها أحد ال employers و كانت مؤهلاتك مناسبه للوظيفه و لم يجد رقم تليفون يتصل بك عليه أو راسلك على البريد الإلكتروني و طلب منك رقم تليفونك .. فتقول له معلش أنا خارج كندا .... سيقوم بإستبعاد سيرتك الذاتيه من ضمن المرشحين للوظيفه و تكون بذلك خسرت فرصه وظيفه لأنه لن يلتفت لسيرتك الذاتيه مره أخرى على الموقع حتى لو وصلت كندا و حدثتها لأنه لن يدخل عليها مره أخرى

تم تعديل 29 ديسمبر 2007 بواسطة ايهاب سالم

[ايهاب سالم]

في كندا هناك وظائف تسمى

Regulated Occupations

و هي الوظائف التي تحتاج معادلات للشهادات و تراخيص لمزاولة المهنه من هيئات حكوميه أو نقابيه و هذه لن أتكلم عنها لأنها ليست حالتي و لأنها تختلف إختلاف كبير من مهنه لأخرى

العمل في مجالي و هو مجال تكنولوجيا المعلومات .. لا يحتاج معادلات و لا تراخيص لأنه ليس من النوع السابق ذكره و لكنه على الجانب الأخر يحتاج الى مذاكره و إجتياز أمتحانات للحصول على Professional Certificates في مجالك ليمكنك إقناع من تتقدم للشغل عنده أنك فعلا تجيد ما هو مكتوب في سيرتك الذاتيه

و كنت قد أعددت نفسي قبل الهجره الى كندا و إجتزت عدة إمتحانات و حصلت على شهادات لتدعم سيرتي الذاتيه

بعد الإستقرار ووصول الزوجه و الأولاد و فرش الشقه و شراء سياره بدأت في أول خطوه و هي تعديل السيره الذاتيه بحيث تكون متوافقه مع المواصفات الكنديه

و يمكنك معرفة ذلك بالدخول على أشهر موقعين من مواقع التوظيف الكنديه و هم

http://www.workopolis.com

www.monster.ca

و قراءة الإرشادات و النصائح التي تتعلق بطريقة كتابة السيره الذاتيه

ثانيا : قمت بإتباع نصيحة من سبقوني من أصدقائي و يعملون في نفس مجالي بحذف أي شئ من سيرتي الذاتيه يشير الى أو يمكن الإستنتاج منه على أنني من منطقة الشرق الأوسط

قمت بحذف بلد الحصول على المؤهل (مصر ) أو البلد الذي كنت أعمل به (قطر) .... يعني أكتب أني حاصل على بكالوريوس كذا تخصص كذا تقدير كذا .. بدون ذكر إسم الجامعه أو البلد

أذكر أني كنت أعمل في وظيفة كذا و مسؤلياتي كانت كذا و كذا و المشاريع التي شاركت فيها كانت كذا و كذا و لكن لا أذكر إسم الجهه أو البلد

ليه كل ده ؟

عشان تتلافى أي إنطباعات سلبيه أوليه ممكنه عند قراءة السيره الذاتيه و لأن الهدف إنك بس توصل لمقابله شخصيه .. و لو ده حصل و كان الواحد فعلا قوي في مجاله يبقى إحتمال توفيق ربنا كبير

لكن مش الواحد يخسر فرصة الوظيفه من الاول لأن الناس هنا عندها إنطباعات سلبيه عن الشرق الأوسط و اللي جايين منه

يعني إدي لنفسك فرصه و حاول تشيل من السيره الذاتيه أي حاجه ممكن تعطي و احد تاني يقل عنك في المؤهلات و الخبره فرصه أكبر منك

لو وصلت للمقابله الشخصيه و أقنعت صاحب العمل بمؤهلاتك و خبرتك مش هيبص ساعتها لجنسيتك الأصليه أو الجامعه اللي حصلت منها على المؤهل لكن لو ذكرتهم من الأول في سيرتك الذاتيه ممكن ميتصلش بيك خالص لأنه مش واثق في المنطقه بتاعتنا و في تعليمها و في الخبره المكتسبه فيها

أرجو أن اكون قد وصلت الفكره لأن بعض الناس بتفهم ده على أنه تنكر لبلدك أو أصلك .. لأ يا سيدي أجلهم بس شويه لحد ما توصل المقابله الشخصيه

أيضا من الحاجات اللي إشتغلت عليها كويس قبل الهجره بسنوات .. الإنجليزي .. لأن طبيعة شغلنا بتكون team work أكتر منها شغل فردي و نص اليوم بيكون في إجتماعات و تواصل مع باقي أفراد الفريق و ال communication skills مهمه جدا و التي من عناصرها اللغه و ممكن جدا تخسر الوظيفه حتى لو مؤهلاتك ممتازة لو الإنجليزي بتاعك تعبان أو الأكسنت عندك تقيله لأنك هتشتت ذهن المتلقي

إتبعت طريقه مختلفه لتنمية لغتي الإنجليزيه قبل السفر بسنوات و هي تأجير أفلام أمريكيه DVD و أشوفها على ال laptop بسماعات الهيدفون مع إختيار ال

english subtitles مش العربي .. ده بيخليك تفهم العاميه الإنجليزيه أو ال slang لإنك بتسمع الجمله و بتشوفها مكتوبه باللإنجليزي مش مترجمه عربي .

وجدت نفسي بعد كده و انا في كندا بأستخدم تعبيرات جاهزة من الأفلام تلقائيا أثناء حديثي و الأكسنت أصبحت خفيفه خالص و الحمد لله كذا واحد أقابلهم هنا مبيكونش مصدق إني جاي كندا جديد و الظاهر ده كان عامل إيجابي في صالحي عند عمل مقابلات شخصيه على التليفون أو شخصيا

تم تعديل 29 ديسمبر 2007 بواسطة ايهاب سالم

[ايهاب سالم]

بعد تعديل السيره الذاتيه قمت بوضعها على الموقعين السابق ذكرهم

و هنا يجب أن أشير الى غلطه كبيره وقعت فيها في الأول و نبهني لها صديق هنا .. في الأول كنت أدخل على الموقعين و أعمل بحث على الوظائف ثم أقوم بعمل apply على الوظائف التي تناسبني و أرفق السيره الذاتيه معها .. بهذه الطريقه السيره الذاتيه تصل فقط لل employer الذي قمت بالتقديم على الوظيفه المعروضه منه و هذا خطأ

الصح أن أفعل ذلك ولكن قبلها يجب أن كنت أقوم بعمل posting my resume على الموقع لأني علمت بعدها أن هناك عشرات من شركات التوظيف الصغيره و الكبيره recruiters تقوم بتصفح هاذين الموقعين و البحث عن السير الذاتيه ال posted و تقوم بالإتصال بالناس و ترشيحهم للوظائف

و لأن هناك employers لا يعلنون عن الوظائف التي يحتاجونها أصلا و لكن يدخلون على الموقعين و يتصفحون السير الذاتيه و يتصلون بطالبي الوظائف و هذا ما حدث معي تماما

بعد مرور أسبوعين على تقديمي على أكثر من وظيفه .. لم يتصل بي احد .. إتصلت بصديقي و قال لي

"معقول عملت posting لسيرتك الذاتيه من أسبوعين ولا واحد إتصل بيك "

قلت له "لأ أنا عملت apply على الوظائف اللي وجدتها مناسبه لي .. معملتش posting "

نبهني للخطأ .. ولله الحمد تلقيت أول إتصال تليفوني من recruiter بعد وضعي للسيره الذاتيه بيوم

قمت بعدها و لمدة شهر بعمل مقابلات شخصيه مع recruiters و employers و لم أصل مع أحد فيهم الى مرحلة نهائيه

حتى تلقيت في يوم إتصال هاتفي مع recruiter و بعد interview سريع على التليفون طلب من الحضور الى مقر الشركه في وسط تورونتو حالا و معي أصول شهاداتي و شهادات الخبره و أي recommendation letter من أي former employer و كمان طلب مني 3 references داخل كندا و الحمد لله كان عندي ثلاث أصدقاء يعملون في شركات سوفت وير كنديه وضعت أسمائهم و سارت المقابله الشخصيه على خير ما يرام .. حتى قال لي .. أوكى مستر / سالم

it seems that your skills are best fit for the job

قلت له عظيم

قال لي .. r u willing to relocate ?

قلت ماشي .. واي نوت .. بس فين (أنا فاكره بيتكلم داخل ال GTA )

قال لي edmonton ..

إتصدمت و معرفتش أتكلم .. دي في ألبرتا .. يعني من أقصى الشرق لأقصى الغرب و جوها أبرد من تورونتو بكتير

لما وجدني متردد أفصح لي عن ال employer هو شركة IBM و هي لمن لا يعلم شركه أمريكيه عملاقه

لما وجدني لسه متردد

قالي لي The offer is 45$/hour

وجدت نفسي محتار لأن الشركه عالميه و مفيد جدا أن أضع في سيرتي الذاتيه أني أشتغلت في IBM كأول وظيفه لي في كندا و الراتب مغري جدا .. لكن النقله صعبه و مكلفه .. خاصة بعد أن وقعت عقد إيجار لمدة سنه و إشتريت سياره و فرشت شقتي بالكامل و أولادي إلتحقوا بالمدارس و كل أصدقائي في تورونتو

و تصفية كل هذه الأمور به خساره ماديه و معنويه و بدايه من جديد

طلبت مهله للتفكير .. قالي إنهم عندهم مشروع كبير و مستعجلين و لازم أكون في إدمنتون بعد أسبوع بالكتير أو أعتذر حالا عشان يتصلوا بحد غيري

قلت له خلاص موافق .. قال لي إنه سيرسل لهم في إدمنتون ليرسلوا لي العقد بالفاكس أوقعه و يرسله لهم و أجهز نفسي و أسافر بعد أسبوع أو عشر أيام بالكتير

كان الكلام ده يوم الجمعه أخر النهار و لظروف عطلة نهاية الأسبوع كان سيبدأ هذا الإجراء يوم الأثنين صباحا

أنا قلت أستغل السبت و الأحد في التفكير أكتر .. إستشرت أصدقائي .. قالوا لي إنت حر .. لكن بلاش إدمنتون .. بردها قاسي و ملكش أصحاب هناك .. إدي نفسك فرصه أكتر في تورونتو

إستطلعت عن جو إدمنتون في مواقع الطقس لقيت كلامهم صح و مش درجه أو درجتين .. يعني على سبيل المثال و انا باكتب حاليا درجة الحراره في تورونتو +3 و في إدمنتون -17 ..

المهم .. قلت خلاص .. الأرزاق على الله .. بلاها إدمنتون .. بلاها IBM .. إحنا بتوعك يا تورونتو

سبحان الله ... يوم الأثنين الصبح و أنا لسه متردد أتصل و الا لأ بال recruiter أعتذر له .. تلقيت إتصال هاتفي من سكرتيره في شركه إستشارات في مجال تكنولوجيا المعلومات ..

مستر / سالم ..

نعمين

حضرتك عندك

Technical interview over the phone today at 5PM, prepare yourself

يعني أذاكر و أحضر نفسي

طب مين فين ليه .. مفيش .. باي مع السلامه

قعدت أذاكر و أجهز نفسي .. الساعه 5 بالضبط ... و الله و لا دقيقه تأخير .. تلقيت إتصال من مستر / س .. أهلا و سهلا ... و الراجل عمل معايا إنترفيو لمدة 40 دقيقه على التليفون .. يمين شمال .. شمال يمين .. طلع روحي .. و في الأخر قال لي

أوكي مستر سالم .. نايس تاكين تو يو .. ثانكس فور يور تايم .. أبريشييت ذات .. ويل كال يو باك

طبعا أنا دمي إتحرق .. بعد ده كله .. باي مع السلامه كده .. بمنتهى البساطه

بعدها بعشر دقائق رن التليفون مره تانيه .. مستر / س برضه .. قال لي ممكن نشوفك بكره في الشركه .. الساعه كذا في العنوان الفلاني في downtown toronto

هتقابل مستر / ص (واحد تاني غيره) .

قلت يا بركة الله

ذهبت في الميعاد .. سألت على مستر / ص .. جالي واحد قالي عنده مييتينج بس طول شويه و هأقعد معاك لحد ما يخلص .. أنا مستر / ع

ماشي يا سيدي

و بدأنا نفس المشوار اللي حصل على التليفون مع مستر ص من جديد و يمين شمال لمدة نص ساعه و بعدين ..

متشكرين جدا يا مستر سالم خليك معانا شويه .. زمان مستر ص خلص المييتينج و هييجي يقابلك ..

تخب تشرب خاجه

أه .. لو سمحت إزازة بيره مشبره مع سندوتش كلب ساخن (هوت دوج ) .. ما الواحد برضه لازم ينسجم مع المجتمع المحيط

خلصونا يا أخوانا .. دي ماكنتش شغلانه

شويه و دخل مستر ص و سوري مستر / سالم على التأخير

و لا يهمك يا خواجه .. يالا شوط

يمين شمال .. شمال يمين ..

و بعدين .. ثانك يو سو ماتش مستر سالم .. أنا خلصت معاك خلاص .. بس هاتشاور بره شويه مع مستر / ع .. و هأرجعلك

بعد شويه رجعلي ...

مستر سالم .. إحنا مقتنعين بيك جدا .. بس ال President عايز يشوفك ..و هو عنده مييتينج .. دقائق و هيكون معاك

المهم جه البريزدنت و ده قعد معايا بتاع 10 دقائق بس (عملي كشف هيئه) و كان كلامه في نواحي عامه مش فنيه

و بعدين

طبعا .. ثانك يو سو ماتش مستر سالم .. إنتظرنا دقائق قليله من فضلك

هنتشاور إحنا التلاته بره و نرجع لك

المهم في النهايه .. رجعولي ب offer ووجدته مناسب .. صحيح أقل بكتير من عرض إدمنتون لكن كله يهون عشان خاطر مصر .. قصدي تورونتو ..

وقعت العقد و أبتديت معاهم من أول نوفمبر الماضي

و الحمد لله إنتهيت من أول مشروع لي و هيطلع production الأسبوع القادم و إستلمت بالفعل مشروعي الثاني

هذا كله بفضل الله و دعاء الوالدين و هي في النهايه أرزاق وليس لنا فيها حيله إلا بالإجتهاد و الأخذ بالأسباب

و بالتوفيق لكم جميعا

تم تعديل 29 ديسمبر 2007 بواسطة ايهاب سالم

[ahmed essam]

اخى ايهاب لك من الله كل توفيق ومن نجاح الى اخر ولكل مجتهد نصيب...................... الله معك :) تم تعديل 29 ديسمبر 2007 بواسطة ahmed essam

[دعاء]

:)

الاستاذ الفاضل ايهاب :

بارك الله فيك على هذا الكم من المعلومات واحييك على المجهود المبذول ، واحييك اكثر على الاستعداد خاصة فى اللغة قبل السفر لان ده شئ مهم جدا لان اللغة فى نظرى هى البوابة الاولى للدخول للمجتمع الكندى وليس المؤهل او التخصص او الكفاءة

وعلى هذا فان الاستثمار الجيد للوقت المتبقى ( للذين مقدمين للهجرة ولم تنتهى كل الاجراءات بعد ) هو اتقان اللغة سواء الانجليزية او الفرنسية او الاثنين معا

وادعوا الله استاذ ايهاب ليكون الحظ حليفك دائما وكل من هم حديثو الهجرة الى العزيزة كندا

وفقكم الله

[Nile Bird]

الأخ إيهاب

تحية طيبة وبعد

أولا ألف شكر على المعلومات القيمة التى تثرى بها المنتدى الذى يعتبر بحق مرجع كامل متكامل لكل من يفكر فى الهجرة الى كندا فلم تتركوا موضوعا سواء مادى أو معنوى أو إجتماعى إلا وتم مناقشته فأى شخص يقرأ هذه الصفحات قبل السفر لكندا فإنه سوف يكون عنده كم هائل من المعلومات عما يحدث هناك وكيفية حل المشاكل والتعامل مع المجتمع الجديد والإنخراط فيه بسرعة

بس عندى إستفسار لو سمحت

حضرتك تكلمت من واقع خبرتك الشخصية عن كيفة البحث عن عمل للمهندسين فهل ممكن تعرفنا نوعية الأعمال المتاحة لدون المهندسين يعنى نقول واحد معاه ليسانس إنجليزى ومعاه إعتماد كمترجم معتمد من شبكة المترجمين العرب (المجمع اللغوى للمترجمين المحترفين) ويعمل بوظيفة سكرتير تنفيذى بالكويت وحاليا بيدرس دورة أوراكل Developer لما يجى كندا ممكن يعمل إيه وما هى الفرص الوظيفية له هناك ومعدل الراتب

وهل هذا الشخص لما يجى كندا ممكن يعمل بهذه الشهادات ومنهم الأوراكل لما يخلص الدورة وياخد الشهادة ولا يجب عليه ان يغير ال career اللى هو فيه وذلك بدراسة شئ أخر من جديد ( قصدى الحصول على درجة جامعية فى تخصص اخر - بكالوريوس جديد)

طبعا أنا أعرف ان المهندس والدكتور والصيدلى فرصته جيدة بكندا فما هى فرص الباقى ؟؟؟؟؟؟

مرة آخرى وفقك الله لما فيه الخير لك وللأمه الإسلامية

برجاء الإفادة

شكراً

[عم الطيب]

شكرا علي المجهود الرائع .....................

[ايهاب سالم]

الأخ إيهاب

حضرتك تكلمت من واقع خبرتك الشخصية عن كيفة البحث عن عمل للمهندسين فهل ممكن تعرفنا نوعية الأعمال المتاحة لدون المهندسين يعنى نقول واحد معاه ليسانس إنجليزى ومعاه إعتماد كمترجم معتمد من شبكة المترجمين العرب (المجمع اللغوى للمترجمين المحترفين) ويعمل بوظيفة سكرتير تنفيذى بالكويت وحاليا بيدرس دورة أوراكل Developer لما يجى كندا ممكن يعمل إيه وما هى الفرص الوظيفية له هناك ومعدل الراتب

وهل هذا الشخص لما يجى كندا ممكن يعمل بهذه الشهادات ومنهم الأوراكل لما يخلص الدورة وياخد الشهادة ولا يجب عليه ان يغير ال career اللى هو فيه وذلك بدراسة شئ أخر من جديد ( قصدى الحصول على درجة جامعية فى تخصص اخر - بكالوريوس جديد)

أنا صحيح مهندس و لكني لا أعمل كمهندس .. و لو كنت أريد أن أعمل كمهندس في كندا كنت سأحتاج الى تصاريح و معادلات شهادات و هم كبير

ممكن جدا تعمل مبرمج أوراكل زي ما بتدرس حاليا .. بس محتاج يكون عندك خبره عمليه في المجال مش مجرد دوره و شهاده

[daliaothman]

:)

طبعا مش عارفه اشكرك ازاى يا استاذ ايهاب على وقتك ومجهودك فى انك تنقلنا قصتك بالتفصيل ده لاننا فعلا محتاجين لكده واحنا فى انتظار المزيد

[ahmed_saleh]

أنا صحيح مهندس و لكني لا أعمل كمهندس .. و لو كنت أريد أن أعمل كمهندس في كندا كنت سأحتاج الى تصاريح و معادلات شهادات و هم كبير

ممكن جدا تعمل مبرمج أوراكل زي ما بتدرس حاليا .. بس محتاج يكون عندك خبره عمليه في المجال مش مجرد دوره و شهاده

يا عم ايهاب كيف اخبارك

و اول حاجة احب اشكرك على وقتك و مجهودك الرائع و لو تكرمت استمر الى نهاية المشوار الموفق باذن الله مع دعواتنا للجميع بالتوفبق

على فكرة انا ابو زمل مهندس كهرباء برضه بس تخصص قوى فحبيت اسألك ايه نظامنا في الليلة دي

يعني من خلال ما تراه امامك بالسوق الكندي لينا مستقبل عندك و لا نوزن بره و ما هي النصيحة او الواجب عمله الان بفترة ما قبل الوصول الى كندا فيما يخص التأهيل للعمل هناك ؟؟؟؟؟

انا سمعت عن credential assessment لشهادة البكالوريوس من خلال PEO او WES او Engineers Canada للبدء بالمعادلة (علماً باني مقدم الهجرة على اونتاريو تورونتو) او استخدام النتيجة كمستند لضابط الهجرة لتسهيل الاجراءات و زي ما انت شايف معلوماتي ملخبطة شوية و محتاج شوية تنظيم ، ايه راي سعادتك و راي الاخوة و الاخوات اللي عنده تجربة مماثلة ياريت يفيدنا و جزاكم جميعا الله خيراً

:)

تم تعديل 31 ديسمبر 2007 بواسطة ahmed_saleh

[Lunalola]

الاخوة الاعزاء

اولا كل عام وانتم بخير بمناسبة السنة الجديدة الميلادية والهجرية وياريت اليوم نقضي الليلة في قيام الليل بدلا من احتفالات راس السنة لاننا مسلمين ,

ثانيا انا بشكر كل الاعضاء المشاركين في هذا الموضوع لانه مجهود اكثر من رائع .

بالنسبة لي انا خلصت كل المراحل واخذت الفيزا وفي انتظار اتخاذ القرار للوقت المناسب للسفر ولا اخفي عليكم انا في حيرة كبيرة من امري :) واريد النصيحة من الاخوة المقيمين في كندا , وحيرتي الوحيدة سببها بناتي حيث ان لدي ابنتان 5 سنوات وسنتان وانا خايفة عليهم جدا من اللي بسمعه من الناس اللي عايشين برا وبالذات العيال اللي بيطلبه لاهلهم البوليس واللي عايشين بحرية اكتر من اللازم , طبعا هتقولولي قدمتي على الهجرة ليه من الاساس طالما انتي خايفة , هقولكم انا لما قدمت على الهجرة كان لسا عندي بنتي الكبيرة بس وكانت وقتها صغيرة :) مكنتش حاسة بالموقف اللي انا فيه دلوقتي . وفي نفس الوقت عارفة ان التعليم والصحة والحياة كلها انظف واحسن كتير , ياريت حد يفيدني في حيرتي دي بالذات الاخ ايهاب سالم لانه عنده بنت 7 سنين وعنده اصحاب كتير هناك يقولينا طريقة التربية اللي بيتبعوها وهل فعلا نفعت ولا لأ .

انا عارفة اني تقلت عليكم بالذات انها اول مرة اخش المنتدى بس هارفة برضه انكم اهل الكرم ومش هتبخله عليا بالنصيحة .

وبعد الرد على اهم نقطه تحيرني سيكون هناك اسئلة اكثر واكثر ياريت تستحملوني.

[ايهاب سالم]

يا عم ايهاب كيف اخبارك

و اول حاجة احب اشكرك على وقتك و مجهودك الرائع و لو تكرمت استمر الى نهاية المشوار الموفق باذن الله مع دعواتنا للجميع بالتوفبق

على فكرة انا ابو زمل مهندس كهرباء برضه بس تخصص قوى فحبيت اسألك ايه نظامنا في الليلة دي

يعني من خلال ما تراه امامك بالسوق الكندي لينا مستقبل عندك و لا نوزن بره و ما هي النصيحة او الواجب عمله الان بفترة ما قبل الوصول الى كندا فيما يخص التأهيل للعمل هناك ؟؟؟؟؟

انا سمعت عن credential assessment لشهادة البكالوريوس من خلال PEO او WES او Engineers Canada للبدء بالمعادلة (علماً باني مقدم الهجرة على اونتاريو تورونتو) او استخدام النتيجة كمستند لضابط الهجرة لتسهيل الاجراءات و زي ما انت شايف معلوماتي ملخبطة شوية و محتاج شوية تنظيم ، ايه راي سعادتك

يا أحمد باشا أنا إنقطعت علاقتي بمزاولة مهنة الهندسه منذ تخرجي .. أنا أعمل في مجال تكنولوجيا المعلومات

و يمكنك و يمكن لأي أحد العمل في هذا المجال إذا إمتلك المهارات و الخبره اللازمه و لا يحتاج معادلات و لا تصاريح و لا دياولوا و دخله أعلى من دخل المهندسين

لذلك فأنا أعتذر عن عدم إفادتك بمعلومات بخصوص سؤالك لأنها غير متوفره عندي

و لكن في عصر الإنترنت لا يوجد صعوبه في الحصول على أي معلومه .. شوية بحث بس و هتوصل لكل اللي عايز تعرفه

ياريت حد يفيدني في حيرتي دي بالذات الاخ ايهاب سالم لانه عنده بنت 7 سنين وعنده اصحاب كتير هناك يقولينا طريقة التربية اللي بيتبعوها وهل فعلا نفعت ولا لأ

للأسف لست أنا الشخص المناسب للإجابه على هذا السؤال لأني ما زلت حديث العهد بكندا

حضرتك محتاجه إفاده من شخص مقيم في كندا منذ سنوات و أبناءه في مرحلة المراهقه أو تعدوها

[مصري اسكندراني]

السلام عليكم و رحمة اللة الاخت دعاء شكرا على اهتمامك والرد على احنا مقدمين على الهجرة الفدرالية و قد تم ا عفائنا من المقابلة فهل سيطلب بعد ذلك الايلتس ام المديكال انا مصرية ومقيمة فى ابوظبى وقدمنا الاوراق من ابوظبى

الاخت:RASHA AHMAD

وعليكــم السـلام ورحمة الله وبركاتـه..

كل عام وانتم بخير بمناسبة 2008

انا مصري اعمل في دبي وانوي البدا قريبا في اجراءات الهجرة ومن خلال بحثي عرفت ان التقديم يكون عن طريق ارسال خطاب الي مكتب الهجرة في لندن بالنسبة للمقيمين في دول الخليج

ولكني قرات رسالتك وعرفت منها انكي قدمتي الاوراق في ابو ظبي

ارجو توضيح هذة النقطة وكتابة عنوان مكان التقديم ورقم الهاتف ان امكن

ولكي جزيل الشكر والامتنان

[دعاء]

الاخوة الاعزاء

اولا كل عام وانتم بخير بمناسبة السنة الجديدة الميلادية والهجرية وياريت اليوم نقضي الليلة في قيام الليل بدلا من احتفالات راس السنة لاننا مسلمين ,

ثانيا انا بشكر كل الاعضاء المشاركين في هذا الموضوع لانه مجهود اكثر من رائع .

بالنسبة لي انا خلصت كل المراحل واخذت الفيزا وفي انتظار اتخاذ القرار للوقت المناسب للسفر ولا اخفي عليكم انا في حيرة كبيرة من امري :closedeyes: واريد النصيحة من الاخوة المقيمين في كندا , وحيرتي الوحيدة سببها بناتي حيث ان لدي ابنتان 5 سنوات وسنتان وانا خايفة عليهم جدا من اللي بسمعه من الناس اللي عايشين برا وبالذات العيال اللي بيطلبه لاهلهم البوليس واللي عايشين بحرية اكتر من اللازم , طبعا هتقولولي قدمتي على الهجرة ليه من الاساس طالما انتي خايفة , هقولكم انا لما قدمت على الهجرة كان لسا عندي بنتي الكبيرة بس وكانت وقتها صغيرة :closedeyes: مكنتش حاسة بالموقف اللي انا فيه دلوقتي . وفي نفس الوقت عارفة ان التعليم والصحة والحياة كلها انظف واحسن كتير , ياريت حد يفيدني في حيرتي دي بالذات الاخ ايهاب سالم لانه عنده بنت 7 سنين وعنده اصحاب كتير هناك يقولينا طريقة التربية اللي بيتبعوها وهل فعلا نفعت ولا لأ .

انا عارفة اني تقلت عليكم بالذات انها اول مرة اخش المنتدى بس هارفة برضه انكم اهل الكرم ومش هتبخله عليا بالنصيحة .

وبعد الرد على اهم نقطه تحيرني سيكون هناك اسئلة اكثر واكثر ياريت تستحملوني.

:closedeyes:

الاخت الفاضلة lunalola :

بداية انت وصلتى لمرحلة كل اللى مقدم على الهجرة دلوقتى بيحلم بيها وانا فى انتظار الكشف الطبى ويا عالم هيتم امتى - واحب اعرفك ان انا عندى 3 بنات ( 6 سنين - 4 سنين - وسنة ونص ) وفكرت كتير زيك كده ازاى البنات هايعيشوا فى مجتمع غريب وبعيد كل البعد عن المجتمع الشرقى بتاعنا وهاحاول انقل لك بعض افكارى عن الموضوع وارجوا ان انا ماكونش متفائلة زيادة عن اللزوم :

- البنات لسة فى سن صغير وممكن انت توجهيهم وتابعيهم كويس جوة البيت وبرة البيت كمان لحد ما تزرعى فيهم اسس وقواعد معينة يكبروا عليها ومن صغرهم يعرفوا ايه هو الصح واللى مسموح وايه هو الغلط والحرام وقد يكون مشاهدتهم للغلط قدام عنيهم كفيل انهم يحتقروه اكتر من مجرد الكلام عليه

- الاستمرارية والاصرار على اللغة العربية داخل البيت ومتابعة دروس لتحفيظ القرآن وتعليم اللغة العربية واللى عرفت ان فى مدارس متخصصة فى الموضوع ده فى عطلة نهاية الاسبوع من الاخوة الافاضل فى كندا

- الاهتمام جيدا بكيان الاسرة والدفء العاطفى والاحتواء والترفيه الاسرى وعدم البحث الهستيرى عن المادة فقط ودايما يكون قدام عنيكوا ان قرار الهجرة من الاساس علشان الاولاد علشان يعيشوا فى مجتمع نظيف بعيد عن الامراض المترتبة على التلوث والزحمة وعلشان يحظوا بالتعليم اللى فعلا هايوصلهم للنجاح مش التعليم اللى هو تحصيل حاصل وخلاص وكمان الرعاية الصحية الفائقة اللى منعدمة فى بلدنا

- خلاصة القول حوطوا عليهم من غير حابسة خرجوهم للمجتمع واخرجوا معاهم متعوهم واستمتعوا معاهم من غير تنشنة ولا تزمت طالما الاساس موجود وهو العقيدة والدين اولا والعادات والتقاليد ثانيا والمرونة فى التعامل ثالثا وارجوا للجميع الهداية ان شاء الله

اسفة انى طولت عليكى بس حسيت انى بكلم نفسى قبل ما اكلمك واختى الفاضلة لا تخافى ولا تقنطى من رحمة الله هذه فرصة ممتازة غير متاحة للآخرين فربنا يكرمكم للاستفادة بكل مميزاتها ان شاء الله والابتعاد قدر الامكان عن السلبيات والاخطاء ولك منى كل تقدير واحترام

وبالمناسبة ممكن تذكرى لنا ما هى خطواتك السابقة للهجرة وبدات امتى لحد ما وصلتى للفيزا ؟ ومقدمة على هجرة لكيبيك ولا كندا الفيدرال ؟ وشكرا

:rolleyes:

[Lunalola]

الاخ ايهاب شكرا على اهتمامك وردك وانا عارفة انك حديث العهد في كندا بس كنت حابة اعرف وجهة نظرك في الاستقرار هناك وخبرة اصدقائك اللي بقالهم فترة في كندا ,

الاخت دعاء بشكرك جدا جدا على الكلام الجميل دا انا عندي نفس افكارك بس اللي مخوفني وياريت مكنش هنقلك احساسي دا ان الكلام دا يكون بس كلام يعني منقدرش ننفذه هناك وعموما كله على الله واهم حاجة ان الواحد يكون نيته الصح واكيد ربنا مش هيسيبنا وان شاء الله لما اوصل لقرار نهائي اكيد هقولك .

بالنسبة ليا انا مقدمة كيبيك وهقولك المراحل بالتفصيل قريب ان شاء الله بس عموما الوقت من اول التقديم لغاية الفيزا تقريبا 3 سنين وشوية .

[مصري اسكندراني]

السلام عليكم

[Ghost]

شكرا يا ايهاب على جهدك و اسهابك في توصيل المعلومة

مرة اخرى شكرا

[daliaothman]

:)

انتوا فين ياجماعه انا مش واخده ان المنتدى يكون فاضى كده وبالايام كمان لعل المانع خير

بالنسبه لاستاذ ايهاب

انا متاكده انك اكيد مشغول جدا بس مكملتش كلام عن الولاد والنواحى المعنويه اكيد مش متخيل فى كام واحد مستنيين باقى كلامك

بالنسبه لجيهان واستاذ وجدى واستاذ وليد

انتوا فين كل ده مش بتظهروا خالص ليه عودتونا على مواضيعكم الجميله واخبار رابطة المصريين ايه؟

[مصري اسكندراني]

السلام عليكم ورحمة الله وبركاته

اخواني واخواتي اعضاء وعضوات هذا المنتدي الرائع

ارحب بالجميع واشكركم علي عملكم ومساهماتكم الرائعة

لي استفسار عن موضوع الهجرة وارجو من يعرف منكم اي معلومة او اجابة عن سوالي الا يبخل بها عني

انا مقيم في الامارات واود البدا في اجراءات الهجرة الي كندا بدون محامي وكنت قدا قرات في اولي صفحات المنتدي اني من الفروض ان اتقدم بطلبي لمكتب الهجرة في لندن ولكني من خلال تتبعي لمشاركات الاعضاء عرفت ان البعض منهم مثل الاخت رشا احمد قد قدمت طلب الهجرة في ابو ظبي

فرجاء من كل من لديه معلومة حديثة عن هذة الجزئية ان يوضح لي الاتي

اولا:اذا كان التقديم لمقيمي دولة الامارات يكون في ابو ظبي فما هو اسم المكان المختص بذلك وما عنوانه ورقم الهاتف

ثانيا:اذا كان التقديم في مكتب لندن فهل لابد من مراسلة المكتب اولا وارسال ال سي في وانتظار الابليكيشن وبع ذلك تعبئتها وارسالها مع الفييز او من الممكن طبع الابليكيشن من موقع الهجرة وارسالها الي مكتب لندن مباشرة وذلك اذ كنت متاكد من ان مجموع نقاطي من الممكن ان يوهلني باذ المولي عز وجل للقبول

ارجو الرد سريعا ان امكن

جزاكم الله خيرا وجعل كل ما تبزلونه من جهد في ميزان حسناتكم وحقا فان خير الناس انفعهم للناس