جبت مجموع كبير جدا في الثانويه ...و بعدين؟؟؟؟؟؟؟؟

[VOLTA]

أنا جبت مجموع كبير في الثانويه يدخلني أي كليه أتمناها .... لكن المشكله أني عمري ما فكرت في الكليه اللي أنا عايزها لأني كنت خايف ماجيبش مجموعها و أتصدم .... فدلوقتي أنا مش عارف أنا عايز أدخل أيه .... الناس بتقول طب و صيدله لكن أنا حاسس أني هكرهها خصوصا أني طول عمري بكره الأحياء و الكيميا ... أنا بحب الفيزيا و الرياضيات و الكمبوتر بس كل ما افكر في الهندسه أو علوم كمبيوتر أو حاسبات و معلومات أستخسر المجموع الكبير اللي أنا جايبه.....و بعدين التاس بتقول أن أي حاجه بتاعة كمبيوتر خلاص مبقاش ليها مستقبل لأن بتوع الكمبيوتر بقو كتير أوي .....و أنا مش عارف أيه الحاجه اللي ليها مستقبل و الحاجه اللي ملهاش..... أنا عايزكو تساعدوني في أختيار كليه و تقولولي ازاي أخترتو كلياتكم .... و عايز أعرف أذا دخلت حاجه أنا بكرهها زي الطب مثلا هل ممكن برضه أتفوق و ألاقي نفسي فيها؟؟؟؟؟

و شكرا ليكم مقدما

[مهيب]

عمر الحب أو الكره ماكان عامل مؤثر كبير فى النجاح ... يعنى مش شرط تدخل كلية انت بتحبها علشان تنجح فيها ... حاول تفكر انت نفسك تشتغل ايه و سيبك من موضوع المجموع و استخساره و الكلام ده لأن الكليات كلها تساوت دلوقتى ... انا اعرف ناس بتشتغل فى مجال الكمبيوتر اللى انت بتقول ان مالوش مستقبل و بياخدوا مرتبات أكبر من مرتب وزير الصحة ذات نفسه ... لأنهم ببساطة نجحوا فى شغلهم

فكر انت عاوز تشتغل ايه و ادخل الكلية اللى توصلك للشغل ده ... لأن مرحلة الكلية طالت أم قصرت هى مرحلة مؤقتة ...

[سقراط المصري]

الفاضل VOLTA

ماتستخسرش المجموع وادخل في علوم الكمبيوتر.

اللي بيقولك بتوع الكمبيوتر غرقوا الدنيا غلطانيين لان الحاسب الالى من العلوم المستقبليه.

سقراط

[VOLTA]

شكرا علي الردود يا جماعه ماتتصوروش أنتو ساعدتوني قد أيه