72 ساعة فى كندا وزيارة امريكا

[Prof.Samo]

افتح هذا الموضوع لعدة اسباب

هو مشاركة لموضوعى الأصلى من البر الثانى - والذى كتبته منذ عامين على امل استكماله بعد فترة قد تطول او تقصر

ربما كانت حسنات اريدها ان تذهب لروح والدى رحمة الله عليه والذى تحل ذكراه الثانية هذه الأيام
ربما استفاد منه انسان - فيدعوا لوالدى بالرحمة
ربما هى محاولة لنقل ما رأيت - ربما هى تجربة - ولو قصيرة - تساعد انسان فى البدايات
وربما هى رؤية لفترة قصيرة جدا بصورة مختلفة
ربما استكمله واستكمل الرحلة يوما ما - وربما كان مدونة صغيرة لذكريات اختلطت فيها لحظات تحقيق الأحلام بالدموع
وأخيرا ربما هى محاولة للخروج من الأحزان
الرجاء فقط .... هو ان تدعوا لوالدى الحبيب رحمه الله بالرحمة والمغفرة وان يسكنه الله فسيح جناته .... انه على ما يشاء قدير .
ربما لأن العد التنازلى بدأ وأريد ان اتابع مع الجميع - عسي الله ان ييسر لنا كل عسير

بسم الله
والصلاة والسلام على رسول الله (صلى الله عليه وسلم )
جلست استمع لصوت المضيفة وهى تلقى تعليمات ربط الأحزمة بالطائرة واستعدال المقاعد بأنجليزية ذات لكنة فرنسية ، وبجوارى زوجتى تتطلع لمطار بيرسون من شباك الطائرة وهى تستعد للتحرك ، ثم نظرت الى فابتسمت ابتسامة خفيفة مشوبه بالحزن - فربتت على كتفى وقالت لى : الحمد لله على كل حال .
أطلقت زفرة حارة - وحمدت الله رب العالمين .
اغلقت عينى والطائرة تنهب الأرض نهبا وهى تنطلق مقلعة إلى مطار شارل ديجول .... لأتذكر هذا المشوار من اوله ..... مشوار طويل .

بداية فأننى يجب ان اشكر كل من ساهم بكلمة فى هذا منتدى المطاريد ومنتدى محاورات المصريين

ظللت لأكثر من 3 سنوات اسافر واعود مع العديد من الشخصيات الرائعة فى هذين المنتديين
شاركت العديدين افراحهم واتراحهم .
تعرفت على الشهيد بأمر الله طارق عبد اللطيف رحمه الله واسكنه فسيح جناته ، اول من هنأنى بوصول الفايل نمبر الأول .
كونت صداقات لم اتوقع ابدا ان تظهر فى حياتى بعد هذه الفترة من العمر
فالأهداء للجميع ، من سافر ، ومن هاجر ، ومن هو فى الطريق للهجرة .... لكم جميعا اتمنى لكم خالص التوفيق
ولكم جميعا خالص الدعوات بأن تنالوا اكثر مما تتمنون .... فأنتم بإذن الله تستحقون الأفضل
بداية فالشكر موصول للأخت العزيزة وصديقة زوجتى - د.انى راحلة - فهى التى ساعدتنا فى الوصول إلى المطاريد
وكانت تقريبا المرة الأولى فى حياتى التى اشارك فيها فى منتدى .
والشكر موصول للأعزاء - مع حفظ الألقاب (زناتى - إكسيلانس - غريب - هيما -سمية صالح - شيرى - أمل - مو - نوبدى - إيهاب سالم - قناوى - طارق سلامة - عربى - الرفاعى - بريكانديان - الأهلاوى الأصيل- ) فقد كانوا خير معين فى بداية الرحلة ... ولا انسى ابدا افضالهم ومساندتهم .... ربنا يوفقهم يارب .
ولرفقاء الدرب من مجموعة (اللى مقدمين بعد 28 فبراير ) لهم خالص الشكر والتقدير .... لجميع من ساهم ومن تقاطعت معهم ايام واشهر وسنوات مرت ، تشاركنا الحلم .... تمنياتى لكم جميعا ان تحققوا اجمل الأمنيات

لم افكر ابدا فى الهجرة طوال سنوات الدراسة .
كان التفكير فقط - كيف سأحقق أحلامى فى مصر - ومصر تستحق
حتى التفكير فى السفر للخليج - الذى كان اصدقائى يلحون على فيه - لم اضعة فى حسباتى .
كنت ارى ان مصر افضل من الخليج ، خاصة وانا ارى فعلا انه يمكن تحقيق ذاتك فى مصر ، يبقى ليه السفر
تخرجت واديت الخدمة العسكرية وخرجت لأكمل دراساتى العليا واحلامى تنصب على العمل فى مصر
افتح مكتب هندسى وادرس للطلاب فى تخصصى .... واملك بيتا فى مصر اعيش فيه وابنى نفسى
تكوين النفس والكفاح للوصول للهدف فى بلدك أمل جميل ، ومتعة رائعة
العمل والكفاح والتعلم كلها امور لو اخذها الإنسان بحب واستمتاع سيشعر بمعانى الحياة
قابلت اصدقاء لى فى فترة التجنيد اتفقوا معى على المبدأ .... واتفقنا على الإجتماع دوريا كل يوم خميس
لنؤكد لأنفسنا على هذه القاعدة .... وان البلد دى أحسن من غيرها مليون مرة .
التحقت ببرنامج الماجستير بأحد اعرق الجامعات ، وعملت معيدا صباحا ، وبأحد المكاتب المشهورة لأحد اساتذتى مساءا .... حياة اراها مرضية لشاب فى بداية حياته .
انهيت سنة تمهيدى الماجستير بتقدير ومركز متقدم على قسمى ، ورأيت حفاوة من اساتذتى شجعتنى على العمل مباشرة فى تجهيز رسالتى ، ولأننى شاب والشباب يملك الطموح ... فكان سؤالى الأول للأستاذ المشرف
- د. ××××× ، ايه رأى حضرتك فى الموضوع .
- ممتاز ... فعلا موضوع احنا محتاجينة وقريب من السوق
- انا بأفكر ان الموضوع دا بعد ما يخلص اهدية لشركات المقاولات الكبيرة فى مصر
- د.×××× : اه ... طيب .... ان شاء الله .
- انا حاسس انك مش متحمس يا دكتور .
- شوف يا سامو يابنى اهم حاجة ان الرسالة تليق بالقسم ومكتبة الجامعة !!!
- مفجوعا - مكتبة الجامعة ايه يا دكتور - انا عايز انفذ اللى انا باعمله دا .
- ان شاء الله ، لما ييجى وقتها يحلها الحلال
وكانت حالة الدراسة (Case Study) التى ابحث عنها يجب ان اسافر للخارج لتزداد الرسالة قيمة ، ولأقارنها بالحالة التى ادرسها فى داخل مصر ... وشاء القدر ان يسافر والدى - رحمة الله عليه إلى احد الدول الأوروبية لظروف عمله .... فأكد لى انه يجب ان اتى اليه لعمل ال (Case Study) تحمست طبعا جدا خاصة واننى كنت استعد للسفر له لزيارته وامى بطبيعة الحال ، فقلت فرصة اضرب عصفورين بحجر .
وهنا كانت الصدمة .....
وللحديث بقية ان شاء الله ....

بعد رحلة الأراضى الأوربية اتخلفت الإتجاهات وبدأت التفكير فى الدراسة فى الخارج

خلصت الماستر بحمد الله وكان اول حاجة فكرت فيها بعد كدا .... شكلنا هنمشى ، عايزين نكمل برة ، خصوصا
وان شلة يوم الخميس بتاعة الجيش - او رفقة السلاح زى ما كنا بنقول - بدات تقل
الأمارات بدات تفتح ابوابها على مصارعيها مع عملية سحب غير عادية لمهندسى لمصر
بس دماغى ماكنتش فى دولة عربية .... خصوصا وانى كنت لسه شايف مصر لسه فيها أمل
وبدأت البحث .... كان فى قدامى اتجاهين ... اتجاه الدراسة فى اوروبا ، واتجاه الهجرة
اتجاه الدراسة فى اوروبا كان نصيحة من استاذى وصديقى المشرف بأن اتجه لبرنامج نوفيك
http://www.nuffic.nl/en
وبالفعل راسلت جامعات واساتذة ولقيت رسائل مشجعة .... قلت جميل على بركة الله
لكن لقيت ان القبول بعد سنة ونص من التقديم تقريبا ... ودا اصابنى بالإحباط شوية
هنا ظهرت فكرة كندا ....
إعلان فى جريدة الأهرام لأحد مكاتب الهجرة بمصر الجديدة - والمقابلة مجانا
قلت اروح اشوف الوضع ايه ... قريت عن كندا شوية ، وكان ليا استاذنا رحمة الله عليه د.محمود الشيمى
كان معاه الجنسية الكندية - وكان دائما ، رحمة الله عليه - يدخل المحاضرة وهو حاطط دبوس عليه علم كندا
وكان لما يتكلم عن كندا يتكلم كأنه بيتكلم عن محبوبة ، قبلها بيوم رحتله واتكلمت معاه ... لكن للأمانة لم اكن افكر فى كندا ... كانت دماغى اوروبا -ودراسة بس ، قالى طيب ما انت لو عايز اوروبا روجح كندا وخد شهادة من هناك .... واطلع بعد كدا على اوروبا ... وقد كان
رحت لعمنا بتاع مكتب الهجرة ... وكان الهجرة كيبيك - للأمانة ساعتها ماكنتش اعرف ان فيه هجرة فيدرال اساسا - وبدأ يشرح انه ممكن يخليك تعدى من المقابلة فى ثوانى وان كورس الفرنساوى هو اللى بيعمله ، وانه بيعرف يعمل كل حاجة وان الأوفيسرز صحابه .... حسيت بجو مش مريح ، حتى كان نفسى امشى من نص المقابلة .... بس كنت قاعد مستنيه فى النهاية ، علشان يقول السعر - 23 الف جنية سنة 2003
خرجت من عنده وانا مش مبسوط ... روحت قعدت مع والدى - رحمة الله عليه واسكنه الله فسيح جناته - شوية ... قالى جمد قلبك وادخل الدكتوراه فى مصر ورب هنا رب هناك ، وماحدش عارف هيحصل ايه فى النص .... ربنا يكتبلك اللى فيه الخير ... وقد كان .
كملت فى السكة وانشغلت فى مصر ....
ومصر بكل ما تحمله الكلمة من معان ، اللى عايز يستمتع بيها هيستمتع ، خصوصا فى وقتها
لو عملت لنفسك برنامج فى القاهرة بس ممكن كل اسبوع تروح مكان
دا الى جانب بقية مصر الجميلة
وفى الفترة دى بدأت حركة الإنشاءات تتحرك بقوة فى مصر
ونصيحة من العبد لله .... لما تلاقى حركة الإنشاءات شغالة على قدم وساق فى بلد .... يبقى البلد دى فيها نهضة .
لأن قطاع الإنشاءات - فى رأيى - هو ترمومتر اى مكان ... لما تلاقى اوناش ولوادر بتتحرك يبقى فيه نهضة .
لما تلاقى الدنيا نايمة وفين وفين لما تلاقى لودر ولا ونش .... اعرف ان الدنيا ضايعة .
المشكلة ان النهضة المصطنعة اللى كانت فى مصر فى الوقت دا كانت قايمة على فساد ليس له مثيل فى الدنيا
نظرة بسيطة على ازمة الحديد فى 2007 تخليك تعرف مدى الفساد الرهيب اللى كنا وصلنا ليه .
اما بالنسبة للتعليم العالى فحدث ولا حرج .... وبمنتهى الأمانة أحنا فى النازل من 10 سنين بسرعة الصاروخ .
الأسوأ انك تفكر تفتح بيزنس فى مصر .... البيزنس فى مصر كان للكبار فقط .
واى واحد يعرف مدى المعاناة اللى ممكن يلاقيها مع الضرائب والتأمينات والإيجارات والمصنفات و.... و....
كل دا خلانى على اواخر 2008افكر تانى ، واروح لنفس المحامى تانى .
بس المرة دى قابلنى لوحدى انا والمدام .
وكان الحوار كالتالى :
- ممتاز - حضرتك فى الجامعة ، انا هاسفرك فيدرال .
- يعنى ايه فيدرال .
- هتسافر على المقاطعات الأنجليزية على طول ، والحمد لله وظيفتك فى الليسته .
- طيب ايه المطلوب ؟
- ابدا انا هاخد 3 الاف دولار طول المشوار ، هاجهزلك ورقك وانت تمتحن ايليتس .
- اوك .
- بس ياريت تسيبلنا فلوس دلوقت .
- انا عايز افكر فى الموضوع ... ممكن تدينى فرصة اقلب الموضوع من كل الوجوه .
- مش شرط تسيب مبلغ كبير ... ممكن 3 الاف جنية .
- محتاجين فرصة نفكر بعد اذنك
- طيب سيب الف علشان ابدأ أفتحلك ملف .
الألحاح دا قلقنى تانى وخلانى افكر اصرف نظر خالص ....
فى الوقت دا كانت للمدام صديقتين ، واحدة منهم كانت متحمسة لأمريكا ومشيت فيها والثانية لكندا
بدأنا نفكر فى الموضوع وندور على النت ، وبدأت اوصل لمواقع زى كندا فيزا
وفعلا ناس من كندا فيزا اتصلوا بيا فى رمضان 2008
بالصدفة كلمت صديق لصديق صيدلى مسافر فانكوفر .... قالى انا مقدم نظام قديم - ساعتها ماكنتش اعرف قديم من جديد ، بس اتقبلت فى دراسة وانا مسافر وبجهز الشنط دلوقت .
- مستعجل ليه .
- من ساعة ما رجعت مش عارف اعيش فى مصر ... 9 شهور من العذاب
- مش للدرجة دى ياريس ... ما كلنا عايشين .
- ايوة بس انا فعلا مش قادر ... ان شاء الله اغسل اطباق .
- طيب فهمنى الموضوع .
قعد يشرحلى رحلته وانه اشتغل هناك سنتين فى صيدلية كانو اجمل سنتين فى حياته لكن ما عرفش يمدد الفيزا ورجع مصر وهو مقدم فايل نظام قديم وانه لو استمر سنة كمان كان اخد الجنسية .... المهم قالى على الخطوات .
فى الوقت دا اتصالات لا تنتهى من مكتب المحامى ... لما فى مرة قلتله بص ياريس انا صرفت نظر
لقيته بيقولى ازاى يعنى تصرف نظر .... قلتله خلاااااص مش عايز ، هو بالعافية .
كل دا الوضع بالنسبة لى لسه ما اخدتش القرار لغاية ما حصل حاجتين مهمين جدا ....
وللحديث بقية ان شاء الله

[Prof.Samo]

- قابلت مدير اقليمى لشركة مقاولات كبرى فى مصر قالى الوضع بالنسبة لسوق الإنشاءات مش مبشر بالخير ؟
- ليه يا دكتور .
- موضوع ان جمال مبارك هيمسك متوقع ان تحصل اضطرابات ، كل الشركات الكبيرة بدات تعمل هولد لشغلها
- بس دا هيأثر على مصر جدا
- للأسف كله مستنى انتخابات الرئاسة 2011 ، لو عدت على خير البلد هيحصل فيها ضخ جامد لأموال الإنشاءات إنما لو جمال مسك ماحدش عارف هيحصل ايه .... يعنى هيبقى فيه Hold لكل حاجة .
اللى يركز فى الموضوع دا يلاقى ان مصر كان فيها 3 مشاريع كبيرة .... وللأسف ال3 مشاريع دول هما اللى شغالين دلوقت .
مدينتى - نيو جيزه - وابتون كايرو .... دول المشاريع اللى بنقول عليها Mega projects
طبعا فى مشاريع تانية بالنسبة للإسكان ، بس مش بحجم المشاريع دى ....
دا الى جانب ان مفيش مشاريع مصانع او موانى شغالة فى الوقت الحالى .
الحاجة التانية ان صديقة زوجتى ... د.انى راحلة قالت لها فى منتدى تحفة شارح موضوع الهجرة إلى كندا بدون محامى - المطاريد ، وفيه كمان منتدى محاورات المصريين .
الحاجة الثالثة انى كنت استكفيت من مصر كدا .... حاسس ان مفيش Add Value جديد
شعور رهيب ان ماحدش عايز البلد دى تتصلح ... كله عايزها كدا - الكلام دا قبل الثورة
بدأت ادخل المنتدى واحاول افهم بيشتغل ازاى ، وكانت المواضيع الموجودة واللى اهمها طبعا موضوع العزيز ايهاب سالم ... عمار يا كندا .
شفت مجتمع جميل هنا فى المطاريد ، شفت شخصيات زى زناتى وقناوى واكسيلانس وياسر ومو وراحلة الى المجهول واسكندرانية كنداوية وسمية صالح ، ناس كتير مش عايز انسى حد كلهم بيسعوا انهم يخدموا ويقدموا المعلومة لوجه الله .
ولاقيت ناس تانية فى بقية ابواب المنتدى .... نموذج للمصريين اللى بنحلم بيهم .
استخرت ربنا انا وزوجتى .... وتوكلنا على الله ، كنا نزلنا الأبلكيشن بتاعة شرح كيفية التقديم من موقع الهجرة ....وكيفية ملئ الأبلكيشن وقعدنا نفصصه ونفهمة ، كنت باصحى بدرى اجهز المحاضرات واترجم فى الأبلكيشن .
كان النظام هو ارسال الأبلكيشن إلى نوفاسكوشيا ... هما بيردوا بالموافقة او الرفض خلال شهر ونص ، الموافقة برقم فايل نمبر اول وبعد الرقم دا يتم ارسال الوثائق بالأيلتس فى خلال 4 شهور .... وإلا يعتبر الفايل لاغى .
المشكلة ان اخونا د.قناوى فى الوقت دا كان بيقول لازم نقدم بسرعة لأن الليستة هتتغير على اول شهر مايو 2010 ، وماحدش عارف الوظائف الجديدة ايه ؟!
توكلنا على الله وبعتنا الفايل .... وبعدها بشهر وشوية بالفعل زى ما قال قناوى نزل قانون جديد
ونتيجة لدا الفايل نمبر بقى بعد 5 شهور ... يعنى فى شهر 10 ... طبعا دى بتبقى فرحة كبيرة جدا انك بدأت المشوار .
كنت بدأت اجمع الورق .... وبعتناه مع الأيليتس بحمد الله لكن الثورة كانت قامت والسفارة قفلت وبعتنا الفايل اخر يوم فى الأربع شهور وكان اللى قلنا ان السفارة فتحت الزميلة (شير ) ، وتوكلنا على الله

طيب تعالوا نشوف الورق المطلوب - لا اعتقد انه اتغير :

الأبلكيشن طبعا ودا مهم تملاه بكل دقه وبكل صدق .... احيانا كان بيرجع علشان ناس سابت خانة فاضية بدل كتابة N\A
شهادات الميلاد للأسرة كلها والترجمة من وزارة الصحة - لا ننسى انها لازم تكون بنفس spelling بتاع الباسبور
شهادات التخرج من الكلية (بالأنجليزى) وشهادات الماستر والدكتوراه للزوج والزوجة - ان وجدت - بدون اعتماد من الخارجية .
- قسيمة الزواج مترجمة من وزارة العدل .
- فيش وتشبيه مترجم من وزارة العدل .
- شهادة خبرة مختومة (للمقدم الرئيسي بس ممكن كمان تبعت شهادات المدام ان وجدت ) مع بيزنس كارد لمدير الشركة - عميد الجامعة - وطبعا كل ما يكون المكان حكومى او شركة كبيرة كل ما يكون اكثر مصداقية .
- شهادة الأيليتس اصل بالأسكور المطلوب .
- صورة من جواز السفر .
- مكاتب الترجمة فى حالة الحاجة .... فيه مكتب مشهور جدا جنب السفارة الأمريكية اسمه الناضورى والنحاس ، والورقة كانت ب50 جنيه ، مش عارف غيروا السعر ولا لأ ... وبيختموا على الترجمة والشهادة

بدأت رحلة الإنتظار مع مكتب القاهرة - وكنت شايف اخوتنا د.قناوى ووائل مراد وياسر جعفر وغيرهم متضريين من الأنتظار اللى كان وصل الى 3 سنوات بعد الفايل نمبر الثانى .

والفايل نمبر الثانى - بييجى بعد ارسال الأوراق الى السفارة وبتاخد دور .
طبعا اللى هون رحلة الإنتظار رفقاء الدرب ... بس انا فى النص كنت بدات انسى الموضوع او اشيله من دماغى
مع دخول منتظم على المنتدى وخلاص .
خاصة ان كان واضح ان الإهتمام بالقانون الجديد بعد يونيو 2010
وطبعا كان مكتب القاهرة كان معروف انه انه بطئ
لغاية شهر 10/2011 وفجأة بدأ مكتب القاهرة يتحرك فى النظام القديم ... ود.قناوى -سمى امام الصابرين مع مكتب القاهرة - جاتله الفيزا وسافر .
وبدات الحركة فى المكتب ... وبدأ الجدول الذى صممه م.امل وم.طارق سلامة يشهد الوانا غير الألوان القديمة
وبدأ الشعور بالقلق خاصة وان مكتب القاهرة فى سبيل رغبته فى الإنتهاء من الملفات بدأ بمجزرة استبعاد لزملاء مقربين من القلب .... ويمكن لغاية دلوقت مش عارفين السبب .
فى الفترة دى شفنا حاجات عجيبة فى السفارة .... ونتيجة للسرعة فى انهاء بعض الملفات كانت حالة القلق تزيد
وكنت تقريبا بأدخل على الحالة على الموقع كل يوم ... لأن كلمة ديسجن ميد معناها ان كل حاجة خلصت .
والسؤال اللى بسأله لنفسى هنا ... هل كان الخوف على الحلم ، ام الخوف من الخسارة .... حقيقى مش عارف
المهم لقيت على الموقع ان الملف اتفتح واتراجع بدون اضافة ديسجن ميد ... فوجدت نفسى فى العمل ساجدا لله عز وجل على نعمته ... والحمد لله رب العالمين .
وبفضل الله وجدت ايميل الميديكال مرسلا بعد هذا التاريخ ب26 يوم بالتمام والكمال فشكرت لله عز وجل .
كان مطلوب فيش جديد ومصاريف للاندينج والمديكال وكان معى بالضبط الصديق العزيز هيما
المهم ربنا كرم ... وبدأت التفكير فى المرحلة الجديدة والسؤال ؟
لاندينج ولا استقرار ؟؟!!!!!!
سؤال مهم جدا .... وخصوصا لما بييجى طلب الباسبورات ....الشعور بيختلف
لأن كل اللى كان قبل كدا حمادة .... واللى جاى حمادة تانى خالص

تحديد لاندينج ولا استقرار بيعتمد عليه حاجات كثير

اهمها المدينة اللى هتنزل فيها ..
الوجهة اللى هتتحرك منها
اول ما بييجى الميديكال بيبقى التفكير فى تذاكر الطيران والإقامة المؤقتة
تذاكر الطيران والحجز .... فيه اكثر من موقع
لكن فى رأيى افضلهم وارخصهم هو
http://matrix.itasoftware.com/
دا تخليه الموقع نمره واحد للبحث
مشكلة الموقع انه مافيهوش حجز ... بتطبع الرحلة وبتطلع على اى شركة سياحة ، او وكيل سياحى
لما بتودى الورقة لأى شركة سياحة بيخلصلك الموضوع وممكن ياخد 100 ريال او جنيه زيادة ، على حسب الشركة .
طبعا كل ما تحجز بدرى كل ما يكون السعر افضل ... وكل ما كانت الرحلة ذهاب وعودة كل ما كانت ارخص
الموقع الثانى - فى تقديرى - :
http://www.cheapoair.com/
بيديلك تانى افضل اسعار بعد ماتريكس .... وممكن تحجز منه مباشرة بالكريديت او بال paypal
https://www.paypal.com
ودا موقع امن للدفع على الأنترنت
ييجى موقع اكسبيديا ثالثا فى رأييى
http://www.expedia.ca/
ممكن مقارنة بين خطط ال3 مواقع

افقت على هبوط الطائرة فى مطار شارل ديجول

بصراحة كان اجمل هبوط شفته فى حياتى .... هبوط نموذجى
ماتعرفش انت لسه طاير ولا الطيارة خلاص ماشية على الأرض
ماتلاقيش التجنيح اللى بيحص من بعض الطيارين -
اخر مره كنت نازل الرياض الطيار جابلنا شلل نصفى ، قعد يلف نص ساعة حوالين المطار وبعدين نزل كأن فى بطة بتنزل على الأرض .
كنا هانموت من التعب ... 7 ساعات ونصف تقريبا ... دورنا على الشاشات اللى بتوضح رحلة القاهرة ... المفروض اننا اعمل بوردينج بس لاقيت قدامى اختراع لا يمكن يفوت ....
اساسا انا انطلقت من مطار بيرسون الساعة 6 بتوقيت تورونتو
ووصلنا باريس 11 صباحا ..... ماتعرفش ايه اللى حصل ، بس كنا فى عرض اننا ننام
لقيت منطقة الترانزيت منطقة لونج فاضية فيها شيزلونج مثالى ... قلت للمدام مابدهاش ، انا خلاص مش قادر ... طلعت جواكت اللى كانت معانا واديتها للمدام علشان تعرف تنام وانا قمت ممدد ونايم .... ساعتين .
صحيت ظهرى مكسر بس مش مشكلة ... انا كان نفسى افرد جسمى شوية لأن خلاص جسمى كان تعب من قعدة الطيارة .... تقريبا مالحقناش نرتاح لمدة ال72 ساعة اللى فاتوا ... واللى وصلنى فيهم خبر وفاة الوالد رحمة الله عليه واسكنه فسيح جناتة ... فانقلبت خطة الرحلة رأسا على عقب


صورة من الأنترنت للونج فى مطار شارل دى جول

افقنا بسرعة ، كان الترانزيت 5 ساعات ، وجرينا علشان خاطر نركب الرحلة الثانية

مطار كبير ... وفعلا مش فاكر كنا فى تيرمنال كام .... ركبنا المترو وروحنا للتيرمنال بتاع رحلة القاهرة


كالعادة تفتيش دقيق ... لازم تقلع الجاكت والحزام ، والحذاء لو لابس حذاء كلاسيك
لو معاك اى سوائل حتى لو ميه لازم تفضيها او تشربها او ترميها
البرفانات مسموح ب100 ملى فقط .
ودا فى كل المطارات
المهم وصلنا لصالة انتظار الطائرة .... ماشاء الله المصريين منتشرين فى كل العالم
الطائرة كلها مصريين ... تقريبا مفيش فرنسيين غير مجموعة قليلة ، ويمكن دا علشان الوقت دا كان قبل العيد بيومين .
مفيش نت فى المطار .... ودى نصيحة لأى واحد مسافر ... ياريت تشغل النت على موبايلك خصوصا لو معاك سمارت فون .... موضوع النت دا مهم جدا جدا جدا جدا .
المطار جميل والسوق الحرة ممتازة ... لو ليك نفس تشترى هتشترى ... بس للأسف الواحد ماكنش له نفس يشترى حاجة خااااالص
ركبنا الطيارة استعدادا لتكملة رحلة العودة ... وانا لازلت اشعر بحالة الألم الشديد لرحيل الوالد رحمة الله عليه .

تم تعديل 15 أكتوبر 2014 بواسطة Prof.Samo

[Prof.Samo]

مع حجز التذاكر بتفكر فى الإقامة سواء فى تورنتو او كالجارى او اى مكان
اول مكان تدخل عليه وتشوف اسعار الإقامة هو بوكينج
http://www.booking.com/
موقع ممتاز واسعارة مناسبة جدا لكل المستويات
وفيه ميزة الإلغاء المجانى حتى قبل الوصول بيوم ... وبكدا تبقى ضامن مكان للنزول
واهم حاجة تشوف كمية الـ(reviews) على الموقع
لازم يكون معاك كريديت كارد علشان تعرف تحجز عليه ... انما الحجز مجانى بتديهم رقم الكارت وهما بيحجزوا الغرفة بدون سحب من الكريديت ... السحب لما توصل الفندق .
للأسف انا كنت حاجز عليه بس فضلت احجز شقة من الموقع دا
https://www.airbnb.com/
موقع ممتاز بس بيسحب الفلوس اول ما تجيلك موافقة على الحجز
بتراسل صاحب او صاحبة الشقة ... وبتقوله انك جاى علشان كذا ... وبيتواصل معاك
وعن طريق الموقع نفسه ... الناس اللى بتتفاعل معاك وانت شايف ان موقعها مناسب
وممكن تلاقيه فى الجنبب على اليمين لما بتختار شقه فى موقع معين يجيبلك الشقق اللى موجودة فى نفس المنطقة وعلى بعد قد ايه
بتختار برضه شقة مناسبة لعدد الأسرة ... بتشوف الموقع المناسب بالنسبة لك خاصة القرب والبعد من الخدمات
واهم حاجة تشوف كمية الـ(reviews) على الموقع ، هل هى كثيرة ولا قليلة وهل الناس بتشتكى ولا لأ
اوقات كثير ناس بتكتب ان الحجز اتلغى لسبب غير معلوم ... طنش الشقق دى
فى اول الموقع بيخيرك بين انك تختار شقة مستقلة ولا shared ولا private room
برضة الشقق اللى تلاقى عليها reviews اقل من 10 طنشها
بس المشكلة انى كنت حاجز 12 يوم وماعرفتش استرد فلوسى ... لأن اساسا صاحبة الشقة مش بتستلم الفلوس غير بعد ما اسافر ، وطبعا لو لغيت الحجز لأى سبب - قبل ما توصل - بتسترد 50% فقط من المبلغ
بس انا كان نفسى اعيش فى عمارة ، الحياة فى شقة غير الحياة فى فندق
ويمكن دا اللى خلانى اخسر ... وارجع واقول قدر الله وماشاء فعل
لو اللى مسافرين عددهم كبير ممكن يروح الموقع دا برضه ممتاز
http://www.viewit.ca/
المواقع دى كلها ليها ابلكيشن على smart phones
وبتساعد طبعا جامد
دا للى نازل فى مدن زى تورنتو وكالجارى ... جرب اى مدينة انت نازلها وشوف طبيعة الشقق وشوف (location) بتعاها وضعة اية .
بالتوفيق للجميع طبعا

بالنسبة للى نازل تورونتو وعامل خطة للأيام اللى هيقعدها فى الأول - لاندينج او استقرار

بتحاول تتمتع طبعا ... وربنا يكتب لمن يصل يارب السعادة والفرحة والحياة الجميلة
للأسف انا هاكتب كنت مخطط ايه ، لكن للأسف انا لم استفيد بالحاجات دى ، ويمكن دفعت ثمنها على النت وما استفتدش بيها
عسى الله ان يجعل حد تانى يستفيد بيها ... فيفرح بيها ويدعي لوالدى ... ويدعيلى
الموقع دا لو نازل تورنتو وطبعا فيه منه ابلكيشن على السمارت فونز
http://www.seetorontonow.com/
الموقع دا ميزته انه ممكن يعملك بلان لليوم ، تروح فين وتيجى منين
ولو اول مرة ... ولو من جوه كندا ... ولو جاى يومين ومروح
بيعمل لك خطه ، والأبلكيشن بيعمل لك الارم (Alarm ) بالوقت واليوم
برضه الموقع دا لا تنساه
http://www.citypass.com/toronto?mv_source=cntower
بيديلك تخفيض كبير جدا على معالم تورنتو بس تحجز من على الأنترنت ويكون الحجز مطبع
لما بتطبع الحجز بتلاقى سيريال نمبر على الورق وفيه اسماء الأسرة
دى تذكرة لأهم 5 معالم من معالم تورنتو
http://www.citypass.com/toronto/toronto-zoo
http://www.citypass.com/toronto/cn-tower
http://www.citypass.com/toronto/ontario-science-centre
والميزة طبعا انك لو زرت كل حاجة من دول لوحدها هتبقى التذكرة أغلى الضعف تقريبا
.... طبعا نيارجرا ماتنسهاش .... وبرضه ماتنساش تدعيلى
اللى معاه قرش محيره يجرب الموقع دا ..... دا للفرجة مش للتخطيط
http://www.niagarahelicopters.com/home.php
انما اللى ناوى يروح عادى ... الموقع دا عليه تخفيض 50% تقريبا
بس برضه تشترى من على النت بالكريديت ، وبرضه لازم تطبع التذاكر
http://www.niagaraparks.com/plan/buy...-packages.html
طبعا اللى يروح اليومين دول هيلاقى اسعار وهمية ..... قمة التخفيضات
تقريبا دى الحاجات اللى انصح بيها اى حد .... يحجزها قبل مايسافر ....
وادعو الله ان لا يكتب على احد ابدا ما حدث لى .... وان يرزقكم الله الخير والفرحة والسعادة دائما

الموقع دا علشان الطقس فى اى مكان فى العالم

http://www.weather.com/weather/right...anada+CAXX0504
يقولك طبيعة اللبس والجو .. والمفاجات
دخل الشهر واليوم لو عايز فى وقت من السنة وهو بيديلك المعلومات الخاصة بالوقت دا
لو عايز تعرف هتلبس ايه فى شهر 7 الجاى فى اى مدينة من دلوقت ... هتلاقية فى الموقع دا
http://www.weather.com/weather/monthly/CAXX0504

قبل ما تسافر .... اتأكد من جوزاتك ... وزن الشنط اتاكد منه قوى (23 كيلو)
هات ميزان ضرورى واوزن الشنط
لازم وضرورى تاخد معاك مشترك بالشكل دا ضرورى جدا جدا (عانيت جدا لأنى نسيت الموضوع دا )
universal adapter plug



تجهز قائمة بالعفش ... طبعا اخواتنا عبد الرحمن الطويل وشير - مع حفظ الألقاب - قاموا بالواجب فى موضوعاتهم .
ورق اللاندينج طبعا ... سواء الورق المكربن او الجديد .
اختنا مدام شير كان ليها نصيحة انك بيدوك ورقه فى الطيارة بتكتب فيها الفلوس اللى معاك ولو معاك جبن .... انا كتبت ان معايا جبن رومى ومحدش بص عليها .... لكن ما تخدش لحم ابدا ايا كانت الأسباب .
ماتكتبش هتقعد قد ايه فى البلد - ودا برضه بناءا على نصيحة الأخت شير - خصوصا لو رايح لاندينج وماشى بدرى .

ماتاخدش معاك سوائل ... وبرضة 100 ملى عطور
حاول تلبس حاجة خفيفة فى رجليك .. وما تلبسش شراب تقيل علشان الدم بيتجمع فى الرجل من القعدة الطويلة ، وياريت تلبس حاجة مفتوحة ... إلا لو كنت رايح فى اشهر الشتا
الصور - وربنا يستر - تاخد معاك الورق دا وانت رايح للمصور
تمنياتى بالتوفيق للجميع ولو افتكرت حاجة هاقولها ان شاء الله

وصلنا الساعة 9:30 بتوقيت تورنتو بعد حوالى 18 ساعة طيران
ومن هنا تبدأ 72 ساعة (Count Down ) >>>>>
- المسافة من بوابة الطيارة للجوزات طويلة .
- الأرضية موكيت رمادى .
- قلبى مقبوض ومعتقد انه من الخطوة الجديدة - ماكنتش اعرف
- الإضاءه بيضاء
- المطار زحمة - فى ناس كثير حواليك .
- معانا فى الطيارة بنت هندية لابسة السارى الهندي البنت جايه لزوجها ومعاها ورق اللاندينج ، البنت ما تعرفش ولا كلمة انجليزى - حتى )what is your name ) ماتعرفهاش .
- ناس كثير واقفة على كاونترات الجوازات .
- بتدخل على اوفيسر (جوازك - ورقة الدخول - بيشوف الفيزا ) بيختم جنبها وبيقلك دائرة الهجرة ورا الجوزات - مكتب زجاجى .
- طابور طويل ، وخمس مكاتب من 16 مكتب لأستقبال المهاجرين شغال .
- شاب لبنانى ومراته واقفين ومعاهم جواز كندى وتقريبا فيه مشكله كبيرة بالنسبة لهم - غالبا سحب جنسية ، لنهم طولوا قوى .
- خدنا ساعة على ما وصلنا للأوفيسر .
- فجأة ظهر شاب - من اصل هندى - موظف ودخل على البنت الهندية اللى مابتعرفش انجليزى وساعدها - والله الهنود جدعان مع بعض ، او هو نصيب البنت دى اللى متعرفش حاجة خالص ، لغاية ما وصلت للأوفيسر واداها شنطة الترحيب .
- شاب مبتسم - من اصل باكستانى - دخل علينا وقلنا مهاجرين جداد - قلتله ان شاء الله - قالى بعربى مكسر - حمد الله على السلامة - وادانا شنطة الترحيب - اللى معرفش فيها ايه لغاية دلوقت - وويلكم تو كندا - ايوا كدا يا شيخ .
- اسرة مصرية فى نص الطابور راحو لأوفيسر - ست - كانت بصراحة متحفزة جدا وكان صوتها عالى ، غالبا بقالهم فترة طويلة برة البلد برضه .
- الولد والبنت اللبنانيين لسه واقفين مع الأوفيسر .
- دخلنا على الأوفيسر بتاعنا ... شبة الأفلام الأمريكية (اللاسلكى على كتفه ، لابس واقى رصاص - معرفش ليه )
- ببرود ، ورق اللاندينج لو سمحتوا ... اتفضل .
- كتابة على الورق - .... اتفضلوا امضوا هنا .
- معانا صور تانية لو دى ماتنفعش ... مفيش رد .
- اوك ... ثانك يو .
- اللبانيين والأسرة المصرية لسه واقفين .
- الطابور اخد ساعة
- اللى فهمته ان فى حالة تدقيق شديد على الدخول ، خاصة للناس اللى بقالها فترات طويلة برة ... ربنا يستر .
- لازم يكون معاك 2 دولار كوين ... او كردت كارد علشان تعرف تجيب عربية للشنط .
- إلى الجمارك ... مسافة برضه ودهليز بس مش طويل قوى .
- لاقينا الناس كلها شنطها مفتوحة والاوفيسر بيدور على ايه ماتعرفش ....
- لازال انقباض القلب موجود .... ولازلت مش عارف ليه .
يتبع

[Prof.Samo]

- دخلنا على الأوفيسر - مهاجرين جداد - ايوة
- وقمنا مطلعين ليستة (to follow ) بتعاة العفش
- اخد الليستة ودخل فى غرفة جانبية ... صورها (رغم اننا كنا مصورنها )
- وكتب شوية حاجات على الكومبيوتر ... وقام مدينا نسخة مختوم عليها ومعاها ورقة مطبوعة .
- مافتحش الشنط ... وشكرا .
- خرجنا بالشنط لقينا اكثر من واحد بيسأل - ليموزين
- كنت عارف تكلفة المشوار للبيت - 60 دولار - السواق (دانيال ) من غانا بقاله 35 سنة فى البلد ، سألته رأيك ايه فى كندا بعد السنين دى كلها قالى دى بلدى وبحبها ، قلتله طيب وغانا قالى بلدى برضه وبحبها لأن فيها اهلى .، بحب الأثنين زى بعض .
المشوار اخد نص ساعة لغاية ما وصلنا للبيت فى شارع فرونت ستريت - كانوا بيعملوا (renovations ) فى الشارع وكان فى زحام شوية .
- وصلنا البيت مقتولين ، المنظر العام من البلكونة رائع والسى ان تاور متألق ، مدخل العمارة كأنك داخل فندق .
- الأسانسير واسع - والعمارة 13 دور .
- البنت صاحبة الشقة سلمتنا الشقة .
- نمت 3 ساعات فقط ...وصحيت وانا مستغرب ، مش مرتاح .
- صليت الفجر ، وحاولت انام معرفتش .
- الساعة 6 الصبح وصلنى خبر وفاة ابى الحبيب رحمة الله عليه ، صدمة من اقسى ما يكون وربنا مايكتبها على حد .
- مش عارفين نعمل ايه ... حالة انهيار وشلل فى التفكير .
- اتصلنا بصاحبة الشقة تيجى تستلمها ، والشنط كانت زى ما هى ، لمينا الشنط واتصلت بدانيال جه فى نص ساعة وعلى مطار بيرسون ..... رايح المطار اعمل ايه مش عارف .
- حالة من الذهول والصدمة عندنا .... ولا حول ولا قوة إلا بالله .
- اعتذر عن الحديث عن هذا اليوم بالتفصيل لأنه كان يوم حزين جدا جدا ، وسبحان الله العظيم ... سبحان من له الدوام .
- لو هتسافر من كندا لأى بلد الضرائب بتبقى كبيرة جدا على التذاكر فخلى بالك .
- طالما فى كندا لازم تحجز من النت ، لأن الحجز من المطارغالى جدا .... بس حجزنا .
- ما عرفتش اغير وجهة تذاكر الذهاب والعودة اللى جيت بيها إلى القاهرة ... فضاعت عليا .
- تذاكر الذهاب والعودة ارخص من ذهاب بس طبعا .
- خالص الشكر للأعزاء مع حفظ الألقاب (اكسيلانس - زناتى - غريب - هيما - احمد (انا وانتو وتورنتو) - أسكندرانية كنداوية - راحلة إلى المجهول - سمية صالح ) لمحاولاتهم المضنية للوصول الينا والوقوف بجانبنا فى هذا المصاب الأليم .
- صعب جدا تجيب خط موبايل ... مش بسهولة مصر خالص .
- الغريب اعمى ولو كان بصير .
- انتهى اليوم ، والرحيل بعد يومين إلى القاهرة .
- مر اليوم .... مهما كان قاسيا .
اليوم التالى :
- لم يكن متاحا إلا عمل السين كارد وحساب البنك
- السين كارد فى شارع كوليج ستريت ، تروح بدرى علشان تخلص بدرى
- بعد ما تخلص جنب السوشيال بنك ار بى اسى ... نصيحة اعمل حساب فيه وما تعملش فى تى دى بنك
- رحنا الحمد لله صلينا العصر جماعة - بالصدفة - فى مسجد تورنتو - من اجمل اللحظات فى الرحلة - احساس الصلاة فى اخر الأرض - جنب داندس اسكوير .
- اليوم التالى : الإنطلاق إلى المطار والعودة ...... بعد اسرع رحلة لاندينج .
قبل ما تسافر - طالما بتعمل plan - ادخل على جوجل مابس

فيه ميزة انك تشوف الشوارع متصورة ... حدد الأماكن اللى هتروحها
السوشيال انشورانس - البنك - السواقة - خطط الرحلة
فيه ميزة ان تورنتو كلها مرفوعة صور على جوجل مابس
ممكن تتفرج على تورنتو كلها وانت قاعد على اللاب
https://maps.google.com/
بص الصور للأسف من 2010 .. بس الدنيا مش هتفرق جامد قوى

دنداس سكوير ... القلب النابض لتورنتو

يوم الرحيل ... الغيوم تحيط بالسى ان تاور ....

[Prof.Samo]

الإنطباعات :
- البلد نموذج للبلد الغربى ، ايام العمل الكل يعمل ، تشعر بماكينات ماشية فى الشارع ، مدخل محطة المترو (Union Station) الناس واقفة اربع طوابير جنب بعض ... زى الدومينو ، كان فى واحدة ست كبيرة مرت من جنبينا ... فى لمح البصر كانت فى اخر الشارع ، اسبرنت قوى جدا
- الأنجليزى الهندي بيختلف بإختلاف المقاطعة الهندية ، موظف البنك - مهاجر من اصل هندى - قالى الهند فيها 65 لغة ؟؟؟ وان احيانا مقاطعة واحدة فى الهند بيكون فيها اكثر من لغة ... بصراحة كنت اول مرة اعرف المعلومة دى .
- بنك RBC مفيش حدود للمبلغ اللى ممكن تعمله ايداع ، فى حين TD بنك لازم تودع 1500 دولار .
- وانا فى ميدان دانداس لقيت محل (قدام المسجد ) بيفك الموبايلات المقفولة - كاتب كدا بالعربى ، بس الغريب انه مش كاتب كدا على اليافطة بالأنجليزى
- قابلت - كندى من اصل تركى - عايش فى البلد من 25 سنة ، بيحب تركيا بجنون ، بقوله كندا احلى ولا تركيا .... قالى تركيا ، لازم تروح مضيق البسفور .... وكان مصر جدا ؟!!! وقالى دا احلى مكان فى الدنيا !!!!.
- موضوع انك تركب المترو والأتوبيس بتذكرة واحدة ودفعنا مرتين- كان عامل لخبطة - لكن فهمناه على اخر الخط .
- اعتقد اللى سافر أوروبا او امريكا قبل كدا سهل يستوعب البلد ومواصلاتها فى فترة قصيرة .
- الطبيعى بتاع الغرب ، الكل فى المترو يا اما بيذاكر او بيقرأ كتاب ، الكبار فى السن ماسكين الكتاب التقليدى ، والشباب غالبا ماسكين الأيباد .
- صعب جدا تحصل على خط موبيل حتى لو بري بيد .
- مطاعم الأكل الحلال كثير جدا وفى كل مكان ... ماتحملش هم .
- المحجبات بيسلموا على بعض فى الشارع او على الأقل بتترسم ابتسامة على الوش .
- سألنا عربى بيشتغل فى محل شاورمة على عنوان - أول ما عرف اننا مصريين زى ما يكون العربى كان واحشه ، شرحلنا الوصفة فى نص ساعة .
- الأسعار ناااااااااار
- حسينا بالجيت لاج فى اول يوم فقط ، بعد كدا ماحسيناش بيه ، ماعرفش دا من الإرهاق ، ولا من الأخبار الصعبة ... الخلاصة اننا ما شعرناش بالجيت لاج بالقوة اللى الناس بتتكلم عليها .
- معظم الناس متعاونين جدا خاصة لو سألت حد فى الشارع عن اتجاه او طريق .
- التاكسيات غالية جدا .
- المترو والأتوبيس متوفرين وسهل تحفظ الطرق والإتجاهات بتاعتهم .
- القطار اللى بيطلع من محطة يونيون ستيشن اسمه (Go Train ) ودا بيودى تقريبا لكل المدن فى اونتاريو
- الناس بتحب الكلاب جدا ، وكثير جدا بتلاقى واحد او واحده بيفسح كلبين بتوعه .
- حسيت ان الأطفال قليلين مش عارف ليه ... يمكن علشان كان وقت مدارس .
- السنجاب بيمشى عادى فى الشارع ، حاولنا نصورة لكن كان سريع جدا .
- كان نفسى اروح بحيرة انتاريو ، لكن الظروف كانت صعب تخلى الواحد يستمتع باى حاجة ، ورغم انها كانت قريبة جدا .... الحمد لله على كل حال .
......
اعتقد لغاية هنا وانتهت اسرع رحلة لاندينج فى رأييى ... حاولنا نعمل اللى نقدر عليه ، كنا نتمنى انها تكون افضل من كدا بكثير ومايحصلش ما حدث من مصاب اليم ، فقط ان ندعو الله ان يجعل فيها الخير ان كان فيها الخير ، اللى جاى بعد كدا ايه ... الله اعلم ... واللى ربنا عايزه هيكون ، مالناش غير اننا نقول يارب وفقنا كلنا
... وييسرلنا كل عسير يارب ويرفع مقته وغضبه عنا ، وان يرحم ابى رحمة واسعة وان يسكنه الله فسيح جناته انه قادر على كل شئ .
وبغذن الله اى تطورات هارصدها هنا فى المغارة دى ، وكمان اى سؤال من اى حد من الأخوة الأفاضل هاجاوب عليه فى حدود علمى .
والف شكر لكل من تقدم بالعزاء ، جعله الله فى ميزان حسناتكم ... وبارك لكم فى اهلكم اجمعين .
تحياتى
اونتاريو ليك

[Prof.Samo]

كان القرار بأن السفر مباشرة يحمل الكثير من العواقب وان الموضوع محتاج تحليل وفترة انتظار لاكثر من سبب

وكما ان السفر مباشرة له عيوبه - فالأنتظار ايضا له عيوبه

السفر مباشرة فيه ميزة مهمة جدا - انك بتدخل فى اجواء الأستعداد ، خصوصا لو كنت مسافر مع دفعة (مجموعة كانت تنتظر السفر والهجرة وبتستغل فترة الإنتظار فى تحضير اكثر من خطة )

لما بتنتظر وبتقعد تحسب الحسابات رجلك بتتقل وبتخاف - خصوصا وانت بتتابع المراحل الصعبة لاصدقاءك وبدايتهم فى بلد المهجر

بس خلينا نتكلم بصراحة - قرار الهجرة اساسا مش سهل ابدا

وخطواته من اول يوم بتبعت الفايل بتبقى مش سهلة

معظم المهاجرين لكندا بالذات فى مجال سكيلد وركر اقل واحد فيهم عنده اربع سنين خبرة ، طبعا فيه اللى عنده 10 -15 سنة

معنى دا انه عمل كاريره خلاص - دا غير الزوجة والأولاد اللى القرار بيأثر عليهم بصورة خطيرة

كل دا بيخلى الخطوة - واحتمالية الندم بعدها - متوقعة ومش سهلة

اذا الحل بيبقى انك لازم تبقى مرتب نفسك ولازم تبقى عارف انت عايز ايه

لازم تبقى مجهز بلان بى ودى وزى كمان ولازم تبقى محدد كويس امتى المشوار انتهى على كدا ومتكملش - او تكمل وانت عارف ان الهدف خلاص اتحدد فى الجنسية بس

وامتى يبقى فيه هدف تانى واضح وصريح - البلد دى بتاعتى وانا مكمل فيها انا وولادى

تم تعديل 15 أكتوبر 2014 بواسطة Prof.Samo

[AbuZeyad]

موضوع جميل

متابع باهتمام

[Prof.Samo]

موضوع جميل

متابع باهتمام

يا اهلا يا ابو زياد

[batman]

تسجيل متابعة واعجاب

في انتظار الحلقة الجديدة :hi:

[mora joee]

بعتذر يا جماعه بس انا لسه مشتركه دلوقتي و سبب اشتراكي اني عايزه اسال عن حاجه بخصوص الناس اللي سافرت امريكا و كده بس انا مش عارفه انزل منشور اسال فيه زيكم كده ممكن حد يساعدني !