استفسارات عامة بخصوص السفر والعمل في السعودية

[Senior Designer]

السلام عليكم ورحمة الله وبركاته

أرجو أن تكونوا جميعًا بخير وعافية، وأشكركم على هذا الجهد الرائع والمعلومات القيّمة التي وجدتها في هذا المنتدى ..

وكنت أريد رأيكم واستشاراتكم في حالتي:

في البداية .. أنا طالب جامعي في كلية الطب، وأعمل مصممًا ومبرمجًا منذ فترة طويلة، ودرست إدارة أعمال بصورة جانبية، وأنوي العمل المستقبلي في المجال التصميم وإدارة الأعمال (الطب هواية ^_^)

وأعمل مصممًا في إحدى شركات التسويق والدعاية والإعلان التي قررت التوسّع وفتح أفرع جديدة، وطلب مني مدير الشركة أن أسافر لأكون مديرًا لفرع القصيم ومصممًا بلا شك، وهو متمسك جدًا بهذا الأمر ويريده بأي شكل، وعنده استعداد يعمل أي حاجة علشان ربنا ييسر الموضوع ده.

المهم .. فكرت أني يمكنني السفر واستغلال الفرصة، خاصة إني شايف إني هكسب من خلالها نقاط مستقبلية هامة، وأعود قبل الامتحانات بشهر لتظبيط أوضاعي (وفيه سماحية من ناحية الشركة بخصوص الأمر ده) .. توقّعت أن تقابلني مشكلة بسبب التجنيد لأني مؤجل بشكل مؤقت لأجل الدراسة، فأخبرني بعض الأصدقاء إن الأمر ده مفيهوش مشكلة طالما إني هروح آخد إذن سفر من التجنيد مع كل سفر (وده عادي مش فيه مشكلة عندنا) وإنهم في المطار مش هيسببوا أي مشكلة طالما إن تصريح السفر سليم والتأشيرة (تأشيرة العمل) سليمة.

الخلاصة .. أنا كنت عايز أستفسر عن نقطتين:
1. هل حد يقدر يفيدني في نقطة إنه مفيش مشكلة في الورق والإجراءات بسبب التجنيد أو غيره؟! لأني مش عايز أرتّب نفسي وتطلعلي مشاكل على آخر لحظة .. فأرجو حد يكون عنده معلومة مؤكدة أو يقدر يسأل حد.

2. الشركة طبعًا طلبت مني مرتب مقترح، ده غير إنهم هيوفروا السكن والسيارة، وأنا مش عارف الصراحة نظام الحياة هناك، فكنت محتاج رأيكم في النقطة دي؟ .. إيه الدخل اللي يكون مناسب لحياة فوق متوسطة؟! (بالذات لو فيه أسرة | نظرة مستقبلية)

وانا آسف جدًا جدًا على الإطالة، وشكرًا مقدمًا