صباح الخير يامصر...

[Salwa]

فى موضوع حدث فى مثل هذا اليوم ...(( الفقرة تستغرق اقل من ثلاث دقائق ))..

شاهدنا احداث غريبة بعض الشئ ...

ياسر عرفات بدأ نشاطه السياسى ....

البرتغال معرفش ايه ؟؟

وافتتح ...افتتح....افتتح....كالعادة ..

ولن اعلق على ما يحدث كل يوم ..............لكن ؟؟؟

لماذا فى تلفزيوننا المصرى .........كان اهم الا حداث فى مثل هذا اليوم من سنوات كثيرة عديدة ............هو :

ان اليوم يوافق ذكرى ميلاد الرئيس الفرنسى (( اللى مات وشبع موت )) جورج بومبيدو ؟

يعنى ايه ذكرى ميلاده ؟؟؟

طيب لو قالوا ذكرى وفاته .....حنقول ناس وفية وافتكرت ان هذا الرجل مات فى مثل هذا اليوم ..؟؟؟...مع ان ده مش اهم احداثنا فى الثلاث دقائق دول ؟؟؟

لكن ؟؟

احنا مالنا ومال عيد ميلاده ؟؟؟

ويعنى ايه يوافق ذكرى الاحتفال بيوم ميلاده ؟؟؟

خلاص ؟؟؟ مفيش اى احداث فى تاريخ مصر غير ذكرى ميلاد بومبيدو ؟؟؟

تلاقى حتى الفرنسيين نفسهم لم يقولوا هذا فى اهم احداث اليوم ...!!!!

شئ يدعوللضحك .......شئ يدعو للابتسام فعلا ...

لم ارى مثلا فى هذا البرنامج (( اللى بدون اى طعم ))....فى يوم يوافق حرق قطار الصعيد ...من يقول ......ذكرى حرق القطار ؟؟؟ ولم ارى رجال الاطفاء الشجعان ؟؟

احتمال علشان حرقوهم هم كمان ؟؟؟

لم ارى من يقول ........اليوم ذكرى زلزال هز مصر وقتل المئات بفعل الزلزال وبفعل تصدع المنازل من قلة الصيانة ومن الفقر ...

كل البرنامج.....(( افتتح ...افتتح ...افتتح ...)) حتى لما غيروا .........جه الأخ الشقيق من الأخوة العرب برضه يفتتح ...

لو تسألونى ماهى مهمة اى مسئول ؟؟ اقول لكم .......يفتتح.

يعنى يا (( يفتتح )) يايجيبولنا ...اعياد ميلاد الأموات الأجانب ؟؟؟؟

واضح انهم بيضعوا فى الفقرة دى اول حاجة تيجى قدامهم ولا حتى بيكلفوا خاطرهم يفكروا ثلاث دقائق ؟؟؟....

طيب ما يقولوا .....الميثاق والكتاب الأخضر ؟؟؟....والا الانتماء ؟؟؟ والا اى حاجة يقدر (( ميفهمهاش )) اى حد ؟؟؟

والا مثلا يعنى يقولوا ........اليوم من سنوات كثيرة مضت قررنا القضاء عليكم حثيثا حثيثا بدون الم .... عن طريق اطعامكم طعام مسموم ؟؟؟ يؤدى للوجوم ؟؟؟ والبلادة ؟؟؟

والبحث عن الذات ...........ماهى برضه قريبة من انكار الذات (( لأن محدش حايبقى حاسس بنفسه )) ..اذن قررنا اطعامكم طعام يؤدى الى التوهان ...والكعبلة والجرى بلا هدف ...بسيقان لا تستطيع حملكم ...وغيره وغيره يعنى ..

ماهى مواضيعنا كثيرة ....

مفروض يغيروا اسم الفقرة الى :...ابتسم من فضلك ..

[bentmasria]

صدقتى والله يا مدام سلوى

واصبحت حقا المهزلة الاعلامية الصباحية المصريه

هب هب فوق تحت

هب هب الفلاحين والدودة

هب هب عيد ميلاد شارل ديجول

وهلم جره

والمشكله

انها طلعت لبره

بقت الفضيحة الاعلامية

تحياتى وطنى العزيز

[se_ Elsyed]

الإعلام المصري الحكومي مازال يُدار بعقلية الموظف الحكومي حفيد الكاتب المصري المقرفص أبد الدهر ..

فلا إبداع ولا تطوير ولا فِكر ... وده واضح جداً جداً في نشراتنا الإخبارية الهزيلة ... ومازاد الطين بلة هو إنشاء قناة إخبارية متخصصة عبيطة ماحدش بيقولها صلي عالنبي أو إنتي فين ..

وأساساً أساساً التليفزيون والجرايد الحكومية معموله عشان فخامة جناي رئيس الجمهورية والسيدة حرمه وأبناءه من بعده ..

بالمناسبة الريس النهاردة رايح يفتتح كوبري سُوهاج ... آه والله ..

[شاعرالرومانسية]

اية بس يا سلوى ...انتى دايما كدة تظلمى الناس ..

يا امى بومبيدو دة رجل مهم جدا بالنسبة للتاريخ المصرى الحديث ( مش حديث قوى يعنى ...) اصل دة ياستى جدة كان جندى فى الحملة الفرنسية على مصر :excl:

وطبعا لازم نثبت للعالم اننا معندناش عقدة اضطهاد وبننسى الاساءة .. وقلبنا قلب خساية ولا بيهمنا حاجة،،،،،،،،،،

شفتى ازاى كنتى ظالمة الناس ..

التيبين دولهم :D

[Sherief AbdelWahab]

فيه حاجة تفقع:

يوم زي أول امبارح ، شهد وفاة الإمام محمد عبده ، وميلاد علي مصطفى مشرفة عالم الذرة الشهير ، وجورجيو أرماني مصمم الأزياء الشهير ، والممثل الأمريكي الكبير من أصل منغولي يول براينر .. ومع ذلك تجد جنباً إلى جنب مع تلك الأحداث افتتاح للسيد الرئيس والسيدة قرينته!

لا تعليق..

خلص الكلام