تقليعة الحفاضات الورق

[Akrum]

اعتقد ان الموضوع ده محتاج مناقشة ؟ أتكلم فيه برضه ولا اتركه لكن ياسيدات المنتدي ؟؟ :biggrin:

في إنتظار مشاركتكم وللحديث بقية .....

[زيزو]

قصدك الPampers وكده؟

أظن هي من الضروريات...

[NonSuperior]

ماله يعنى انا مش عارفه فين السؤال؟

[Akrum]

والله يا زيزو مسألة ضروري دي محتاجة -إعادة نظر في تحديد ما هو ضروري من غيره في ظل وجود بدائل متوفرة واقل تكلفة ونظرة اقتصادية للموضوع تجد ان هناك الاف الجنيهات تذهب سدي لأجل استخدام تلك الحفاضات الورقية .

ولذلك نحن بصدد مناقشة نمط إستهلاكي فظ في مجتمع متوسط الدخل فيه محدود جدا واعتقد ان السبب وراء هذا هو الوجاهة الإجتماعية التي وصلت بنا حتي لإستخدام البامبرز واللي - صححته - بقولك Pampers رغم مناداتك في مكان اخر بضرورة التحدث بالعربية  :smile:

واول اختلاف هنا معك في هل اصبح ضروري فعلا ام هناك وسائل تقليدية افضل واوفر في مجتمع محدود الدخل وهو واقع -و نحن نتحدث عن الغالبية وليس من هم لديهم قدرة

وسؤال بسيط لو عندك طفل يتم تغيير حفاض ورق له بمتوسط 6 مرات في اليوم علي مدار سنتين كم تكون التكلفة ؟؟

وكم تكون تكلفة البدائل الأخري لنفس الشروط المذكورة ؟؟

ادرك ان ضروريات الحياة هي الماكل والمشرب والملبس - والملبس الذي يقينا البرد والحر ويحمل قيمة وله فترة استخدام لمدة  من الزمن وليس إستخدامه مرة واحدة فقط ...

الأستاذة  نن سوبيريور الموضوع مطروح لمناقشة نمط إستهلاكي واخذنا مثال لسلعة مثل البامبرز وهل ما يتم صرفه في هذا المنتج له بدائل ويمكن الإستفادة بما يصرف عليه في شئ افيد للأسرة من مأكل او مشرب او حتي ملبس ؟

اعتقد اننا نناقش الأولويات بالمقام الأول ؟ا أما إذا قلتي لي فيه ناس توفر من قوتها علشان تلبس اولادها بامبرز - علي وزن اللي بتوفرمن قوتها من اجل كي شعرها كما ذكرت في مداخلة الموضة ؟ فسمحي لي ده يبقي السفه بعينه وهو باب القصيد من الموضوع ؟ ;) ;)

[Soly]

الاخ اكرم

الظاهر ان موضوع البامبرز والحافظات جاى على الجرح عندك ،هو انت عندك اطفال بيلبسوه وتلاقيك بتصوت للمدام كل ما تيجي تغير للبيبي وتقول (يافلوسى ياشقايا ياانى) اصلىانا برضه ليه واحده صحبتى جوزها بيقولها كده برضه

لكن ايه رايك نرجع الكافولة بدل الحفاظات ، وكمان الصابون فى غسل الشعر بدل الشامبو وبلاش المروح فى البيت ونشعل ايدينا فى التهوية

ياباشا فكر فيها كويس انت بتقول ان ده سفه ، طيب لو استعملنا الكافولة اليس تحتاج الى مسحوق غسيل ، ده غير ما تحدثه من التهابات ويلزمه الذهاب للاطباء وشراء الادوية وتعب للام

وحأكون صادقة معاك فى انها لها مصروف كبيرولكن الدنيا بتتقدم زمان حاجة ودلوقتى حاجة تانية ، وممكن  تستعمل حفاظات رخيصة وايضا لاتنتظر الى عمر سنتين حتى توقف استعماله يكفى سنه واحدة .....وكفايه شكوى بقى احسن قطعت قلبى

[NonSuperior]

يا استاذ اكرم :) زى ما قالت سولى مش معنى انه ارخص يبقى هو الخيار الافضل :) ولا هو الخيار الاستراتيجى :) وليه تدفع اكتر اما ممكن تدفع اقل :)

انماانا شايفه ان البامبرز مش نمط استهلاكى سئ فى مجتمع بيتعاطى الكلام فى المحمول :)

وطبعا مش قصدى ان دى حاجه عدله انما الاطفال اولى و مش هنيجى لغاية عندهم و نوفر ونبقى عقلانيين فى الاستهلاك :) بس كلام سولى معقول والله عن ان جايز و الله اعلم يكون البامبرز افضل للاطفال من غيره

وبعدين الواحد يبقى سفيه عشان خاطر اطفاله الصغيرين مقبوله :) انما طبعا يبقى سفيه عشان خاطر المجتمع بيقوله لازم تبقى غندور وواخد بالك من نفسك والا هنسلط عليك سيف العقد النفسيه و الكلكعه يبقى غلطان و ستين غلطان طبعا :) الاصول تحط صباع الروج بس فى الشنطه ;)

ولو حضرتك خطفت رجلك لغاية المنتدى المصرى هتلاقى رجاله كتير زعلانين من ستاتهم عشان منظرهم مش ولا بد :)

بس فيه حاجه احب اوضحها لك يا اخ اكرم :) مش معنى انى اقول ان البنت هتوفر فلوس الاكل عشان تعمل شعرها انى شايفه انها حاجه جميله :) وان كان كل واحد حر فى تحديد اولوياته ;)

انا حبيت بس اقول ان موضوع البنت تلبس ايشارب عشان تدارى شعرها الاكرت ده مش مظبوط اوى :) معلش بأه اسمح لى انت مش بنت عشان تحكم فى الموضوع ده مع كامل احترامى طبعا لمعلوماتك فى كل حاجه :)

[Akrum]

يا نن سوبيريو ذكرت المحمول وانه لا ضرر من استخدام البامبرز بمجتمع يستخدم المحمول !!!

- انا عايز اسألك سؤال هل لديك هاتف نقال وبأمانة شديدة هل تري انه ضروري لدرجة الإستغناء عن التليفون العادي ؟ بالنسبة لي اري انه قد يكون تقليعة جديدة يساعد الإعلان والإعلام علي ترويجه وتشجيع الناس علي استخدامه ويكفي تلك المسابقات التي تعلن عن الملايين لتحث الناس علي استخدامه ويكفي ان تلاحظي سفه البعض في سماع اغاني وخلافه علي المحمول ؟ يا ناس حرام عليكوا - انا بس عايز نشغل عقلنا ونميز ما بين المعقول واللا معقول في تصريفنا للأمور الحياتية

ونرجع تاني لموضوع البامبرز - قالت سولي كلام جميل عن سبل ترشيد الإستهلاك للبامبرز وهذه خطوة رشيدة ولا بأس واعلم انه قد يناسب الطفل لو كان خارج المنزل او للمرأة العاملة او لمن ليس لديها غسالة فول اتوماتيك ولو توفرت - انا لا اطالب بالرجوع للخلف ولكن الإحساس بقيمة المال الذي يهدر في امور يجب ان يقنن الإصراف عليها بقدر الإمكان حتي ولو كنا من المترفين !!!

يا ناس المسألة مش حرمان طفل من بامبرز  - زي مافي إعلان بيقول يعني راح احرم بنتي من بامبرز علشان اوفر قرشين للدلالة علي ان تلك الماركة اغلي ولكنها افضل لانها بالكريمة !!!!:smile:

ولكني اري انه قد لا يتناسب مع البعض من ذوي الدخل المحدود استعماله ويفضل عليه الكافولة القماش خاصة لربات البيوت والحلول جميعها متوفرة ولكن الأسلوب التقليدي يحتاج لجهد واهتمام بنظافة الكوافيل من الأم غير البامبرز  .

الأختلاف في الرأي لا يفسد للود قضية .. وما ارمي إليه وهذا الأهم  هو تشجيع المصنوعات القطنية والتي تعتمد علي زراعة وطنية وتوفير اموالنا فيما يعود بالنفع لمجتمعنا وبدل ما جزء من اموالنا يذهب للخواجة علشان نلبس اولادنا البامبرز وحتي لو قلنا انه صناعة محلية فالماكينات  ولوازم الإنتاج من الخارج والعلامة التجارية ملك لأصحابها ويبقي هامش ضئيل للتجار والقائمين بتلك الصناعة ..

حاولوا تحسبوها معايا ونشوف الأمور رايحة لفين ...

وللحديث بقية ...

[Amira Khaleel]

اعمل ايه لازم اشارك  و اتدخل  انا واحدة ست برضة    ببساطة شديدة لازم نتابع التقدم الفنى لو كان فى مصلحتنا  تعالوا للرجالة   زمان كان لازم منديل ابيض لينوه و عليه الحرف الأول من الإسم  و كان جزء من العياقة   تعالى دلوقت   آخر مرة و انت عندك برد استعملت منديل قماش امتى ؟؟ طبعا ارخص و انضف ميت مرة المناديل الورق     انتم فاكرين الكوافيل القماش  تقع ارخص  ابدا صدقنى    انما شوية بس على الراجل  .. طبعا كلامك مش غلط  بس هو المثال اللى غلط  يعنى انا مثلا اتغاظ جدا من تقليع الشبس و الكراتيه  و كل الزبالة دى   و دى اضرارها كتيرة  حتى الخواجات بيحاولوا يقللوها و يبعدوا عنها انما احنا !!!!!!

اشوف مرات البواب  صدقونى مرات البواب غلبان و ماحبليتهاش اللضى و ابنها رايح جاى جايب الزبالة  دى  بالذمة مش ليا حق البس الكزرونة !!

[Omer Abdelaziz]

لو حاولت غسل الكافولة مرة واحدة  كرجل سوف تكون بعدها مستعدا لدفع كل ماتملك لشراء  Pampers و سوف تدعى كل يوم فى صلاتك لمخترعها

[Akrum]

يا ست اميرة بغض النظر عن كون المثال  صح او غلط ولكنك تتفقي معي علي ان هناك نمط استهلاكي جديد وما اسميه بالسفه الإستهلاكي وذكرنا سابقا

1- استهلاك الحفاظات الورق - اعذروني لانني حساس شويتين تجاهة وهو يشبه بالضبط اللي بيدخن سجائر او شيشة - حيث الإخير بيدفع فلوس في شئ بيحرقة ويضر نفسه وكأنه بيحرق الفلوس نفسها .. كما ان الحفاضات تثير إشمئزازي بطرق تواجدها بمخلفات القمامة  وهي ايضا اهدار لإقتصاديات المصروف المنزلي عند عدم تقنين الإستهلاك ..

2- إستخدام سفيه من البعض للهاتف النقال ونمط جديد من السفه الإستهلاكي في دولة معدودة من الدول الفقيرة .

3- الإقبال علي إستهلاك سلع مستفزة كما ذكرت الأخت اميرة من شيبسي وكراتيه ولبان و...إلخ

وغيرها من اشياء لا تسعفني الذاكرة لحصرها والمقصود هنا ليس الإمتناع عن إستخدام مثل تلك الإشياء ولكن التدبر في إستهلاكها كما ذكرت سولي و تعقيب اميرة والمطلوب منكم كسيدات علي قدر من الوعي الثقافي ان يكون لكم دور في نشر الوعي للحد من هذا السفه الإستهلاكي وان فقة الأولويات بمجتمعات محدودة الدخل يجب ان توجه السيولة لما هو اجدي وانفع كتشجيع اولادنا علي الإدخار وليس الإغراق في سلع إستهلاكية مثل الشيبسي وخلافه وتربية نشأ علي هذا المنوال يستطيع التمييز بين الغث والثمين فيما بعد . وانتن كامهات  لكم دور هام في التربية والتوجيه ..

يا جماعة لو فرضنا إستهلاك بامبرز كما ذكرت سابقا لمدة سنتين بواقع 6 حبات في اليوم ستكون التكلفة تربو علي 2000 جنية بامبرز فقط غير مصروف الطفل من رعايا طبية ومأكل وخلافه .في حين تقل تلك المصروفات بنسبة تربو 70% لو استخدمنا بدائل تقليدية لنفس الفترة  والأمر متروك لكم في تحديد  ما يناسبكم ؟ وهذا الوفر ممكن ان يستخدم في توفير احتياجات اكثر ضرورة للطفل او حتي يتم إدخاره لمستقبل الطفل المقصود ليس التكدير وحرمان اولادنا ولكن ترشيد انماط إستهلاكية مغالاة فيها وللمرة الألف اذكر في مجتمع من محدودي الدخل ؟

وبالنسبة  لمداخلة السيد عمر عبد العزيز لقد سعدت بمداخلتك التي رسمت البسمة علي الوجة ولكني لا ادري  هل كان رأيك هذا عن تجربة ام مجرد فرضية ;)  ;)

[زيزو]

على فكرة انا فاكر وانا صغير غيرت البامبرز لأخي الصغير مرة واحدة والحقيقة انا كرهت عيشتي...

ما بالك بغسل الكافولة؟

[NonSuperior]

دايما فاهمنى غلط يا اكرم :) والله العظيم تلاته ما عندى محمول ولا لك على حلفان وان كنت اقدر اتحمل تكلفته و لكن بامانه شديده انا لا احتاجه :) يبقى اجيبه ليه؟ :) وربنا يخلى لنا التليفون المحطوط :)انت عندك محمول صحيح والا ايه النظام؟ :)

الناس ميولها استهلاكيه ده شئ اكيد :) ولكن البامبرز للاطفال لا غنى عنه :) وانا رحت سألت والدتى امبارح عشان خاطرك انت بس و عرفت ان الكوافيل كانت اتجاه سابق ودلوقتى مع التقدم اصبح البامبرز هو صديق الامهات و البيبيهات :)

بجد بأه انا سالت صديقه ليا لسه جايبه طفله قريب و قالت انها سالت الدكتور و قال ان البامبرز اكثر صحيه من الكوافيل !! يبقى البامبرز ضرورى فعلا مش هزار :)

انا مش بادافع عن البامبرز لانه حاجه جديده و موضه انما بعد ما عرفت انه افضل للاطفال :) انما الاستهلاك للمنظره بس واحنا مش لاقيين ناكل مرفوض طبعا :) وهو فين القطن ده يا حسره؟ :) ماخلاص ده موجود فى كتب التاريخ بس :) الجغرافيا لأ :)

بس اشمعنى الحفاضات اللى فى القمامه بس هى التى تثير اشمئزازك؟ طيب ماهى القمامه ذات نفسها خرجت بكل انواعها من الصناديق :) ولو عديت جنب اى مستشفى هتكره المستشفيات على اللى بترميه من مخلفات على كل دنياك :(

انا رايى يا اكرم ولو مفيهاش رذاله عشان تعرف راى الاخ عمر ده عن تجربه والا افتراضى انك تخوض التجربه بنفسك :)

[Arabisc]

[english]

We are not a poor country .

We are a poor ppl is more like it

Salam All

[Akrum]

يا جماعة الخير

انا اعرف ان الواحد منا يدفع فلوس علشان يأكل او يشرب ولو اسرف زيادة يلومه الناس ان همه علي بطنه ... إلخ

ولكن وصل بنا الأمر حتي اننا ندفع علشان اطفالنا يقضوا حاجتهم  أهي دي بقي التقليعة بعينها

ولما يكون عندك طفل يستهلك كمتوسط 6حبات بتكلفة 50 قرش للحبة يعني 3 جنية في اليوم يعني متوسط 90 جنيه شهريا  بس علشان البيبي والماما يبقوا مبسوطين والمواطن دخله في كام 90 جنيه يا ولداه ... البامبرز ممكن تتفاوت اهميته من اسرة لآخري ويعتمد اساسا علي مدخول تلك الآسرة . ولا اخفي سرا بأنني رزقت بمولوده وحتي الأن اشتري لها البامبرز والدارلينج و...جميع انواع الحفاضات ولكني مضطر وغير مقتنع ليس لبخل او تقطير ولكن هناك بدائل وبنود اهم يمكن ان تصرف فيها الفلوس ... مش ندفع كمان علشان نعملها :biggrin: , ولهذا اري ان يقنن استهلاك البامبرز في المستشفيات واثناء الخروج وعند الضرورة وليس عمال علي بطال وهو ما ارد ان انبه له - انماط استهلاكنا في كل شئ والإبتذال في الصرف عواقبه وخيمة علينا وعلي البلد - ياناس ده الطفل لما يجيلوا إسهال (يعني غلو في الصرف) يؤدي للجفاف والعياذ بالله .. اتمني يكون القصد واضح

زمان واليوم في ناس بتستعمل الكوافيل ومدي صحتها يعتمد علي مجهود واهتمام الأم بالمقام الأول وليس عيب في تلك الوسيلة حتي ولو قال ذلك كبير الأطباء بأن البامبرز افضل واكثر صحية لأنه يستخدم مرة واحدة فقط ولكن غسل الكوافيل وتطهيرها في ظل وجود غسالات اتوماتيك ونصف اتوماتيك وسخانات بقت اعباء التنظيف قليلة ولكننا نحب الطرق السهلة بالطبع !!

[زيزو]

لو الزوجة لا تعمل ممكن تناقشها تستعمل كافولة لكن لو بتعمل يبقى فعلا حرام عليك. هل قمت بشغل البيت من قبل ورأيت ما هو المجهود المبذول؟ فمن يستطيع تحمل مسئولية طفل وبيت وعمل وكوافيل كمان؟

90 جنيه ×12 شهر يعني 1080 جنيه. المهم قبل أن ننجب أطفالا يجب أن تدرك حجم المصاريف المطلوبة فهل ستدفع بعد كام سنة أقل من ألف جنيه مصاريف مدرسة؟

أو هل ستقل المصاريف في الجامعة؟

المفروض أن من ينجب يكون مستعد لذلك أو يأجل الموضوع ده أحسن! أما أن نعتبر البامبرز سفه فأنا لا أتفق معك إطلاقا!

[Akrum]

يا زيزو سبق ان قلت ان الخلاف لا يفسد للود قضية والموضوع مطروح للمناقشة وليس لفرضه فلا تبتاس ولكن اوقفتني بعض ملاحظاتك اللي محتاجة وقفة

1- الكلام للعاملة وغير العاملة من امهاتنا ليه - اقول لك ليه ببساطة لان المرأة العاملة تأخذ اجازة وضع ورعاية طفل ولذلك لو تطوعت وغسلت الكفوله بالغسالة لن يكون هذا القشة التي تقسم ظهر البعير كما تفضلت وانه عبئ بجانب مهام واعمال البيت.

2- اعرفك بنفسي يا زيزو بأني ممن كتب عليهم الإغتراب وهناك انت ملزم بعمل كل شئ لنفسك وتفتقد الجو الأسري والرعاية ولذلك فأنت ملزم ان تنظف وترتب وتكوي احيانا والأهم تطبخ وإلا حياتك ستكون بؤس واكل المطاعم يمرضك  وتكرهة لو استمريت عليه لفترة ولذلك فالمغترب يعلم ويقدر حجم أعمال المنزل عن تجربة وليس كمشاهد والتجربة ليست كتجربة شاب في معسكر صيفي او رحلة ولكن يصاحبها متاعب العمل ومشاكله ... إلخ

3- مبلغ 1080 جبية مصروف بامبرز بالسنة هو مبلغ ضخم لسواد الشعب من محدودي الدخل الذي قد يتراوح دخل الفرد منه بين 1000 و3000 جنية بالسنة يعني نصف او ثلث الدخل بامبرز فقط وبالأخير تقول ان مصروف البامبرز زي مصروف التعليم ياراجل حرام عليك هو البامبرز صار من الأولويات زي التعليم وتسترسل وتقول بأن الناس يجب ان تؤجل الخلفة وتحسبها حتي تتحسن الظروف وكل ده من اجل البامبرز - يعني نحرم الناس من سنة من سنن الحياة علشان مافي فلوس للبامبرز ونقطر عليهم ؟ وبعدين هي امتي اتحسنت ظروف الناس ياراجل ده عمر الزواج تقدم للجنسين وانت ادري وكلها لآسباب إقتصادية وكمان يأجلوا لحد المعاش بقي يجيبوا عيل ولا اثنين واهي مكافأة نهاية الخدمة يجيبوا بيها بامبرز للعيال  :smile:

المقصود الترشيد في إستهلاك الشئ والأمر متروك كل واحد يحسبها زي ما يعجبه ولكن تقول ضروري ولازم نرصد له مصروف زي التعليم -!!!!

علي فكرة في حاجات كثير اهم وضرورية للطفل وأخيرا البامبرز هو احد البدائل المتاحة ولكنه مكلف و هناك بدائل له لذلك تقل درجة الضرورة له ..

اعد التفكير مرة اخري وانظر لغيرك من الناس ولا تحكم من واقع ظروفك والتي قد تكون افضل بكثير ممن سواك...

[عادل أبوزيد]

الأستاذ أكرم

لا أعتقد انك جاد فى هذه المناقشة .. تصورى انك تشاكس فقط  ...  هناك ثمانية عشر رد  أعتقد هذا اكثر من كافى  يبدو انك لم ترزق باطفال بعد   و لقد قمت بناء على مشاكستك هذه بسؤال العديد من العائلات هنا فى مصر فقراء و ميسورى الحال و متوسطى الحال فاجمعوا كلهم  حقيقة على ان ليس هناك بديل لإستخدام البامبرز     لعلك يا سيدى تذكر الأمور قبل اكثر من خمس و ثلاثون عاما حيث لم يكن للكافولة بديل  لكن التطور الطبيعى ادى لظهور  البامبرز و المناديل الورقية و العبوات البلاستيك التى تلقى بعد الإستعمال  بل حتى زجاجات العصائر تلقى بعد الإستعمال  

هناك اشياء كثيرة نستطيع ان نحن اليها من الزمن الجميل  لكن للأسف ليس منها كوافيل الأطفال

اقترح ان تطلب من المنسق اغلاق هذا الموضوع لأنه استنفذ اكثر مما ينبغى من جهد من جمهور المحاورات  و ارجو الا تأخذ الموضوع بطريقة شخصية

[Akrum]

استاذ عادل ابو زيد

اعتقد انك متحامل بعض الشئ ولا ادري ما السبب وراء هذ التحامل ؟ ذكرت في مداخلة لي اني رزقت بطفلة وتظن انني لم ارزق باطفال بعد ولا ادري ما سبب إنكارك هذا ؟

قلت انني اشاكس وهذا ليس محله في مساهماتي ؟

وحددت بأن هذا يكفي من مداخلات اجهدت المتحاورين ولا أدري اكانوا مجبورين علي ان يردوا علي الموضوع ؟ وهل نحن نغلق الموضوعات لما تتجاوز حد معين من التعليقات ؟

وطلبت مني ان اطلب من المنسق لغلق هذا الموضوع ؟ ولا اري ضرورة لذلك والموضوع هنا ومن شاء فليقرأ ومن يرغب عنه فلا بأس ولا ادري اين المشكلة ؟

نتكلم عن نمط استهلاك ومثالنا هنا واضح ؟ وكل واحد ادلي برأيه ؟ فما داعي للهذا الظن والتحامل علي؟ والمسألة ليست ردة حضارية او عودة للزمن الجميل كما تفضلت وليست حرب علي البامبرز ولكن هي نظرة موضوعية لنمط إستهلاكه ليس إلا واعتقد ان الرسالة وصلت؟

[NonSuperior]

يا اكرم الدكتور قال انه افضل للاطفال مش عشان يستخدم مره واحده و انما عشان لا يترك جلد الطفل مبتلا ... بس كده :) انا مش باحب اتكلم زى الاعلانات بس اعمل ايه الامر لله :)

[bansia]

ياجماعة البلد فيها بلاوى كثير تقدروا تبدوا رايكم فيها اما البامبرز فالقادر سيشترية وهو المسوول والفقير المعدم لن يستخدم لا البامبرز ولا الكوافيل وكفاية بقى الريحة الوحشة دى