أسئلة عويصة

[abla]

يدور هذا الحوار بين ام وطفلها

الطفل : ماما ممكن اعرف ليه الشجر لونه اخضر والسما زرقا ... هو مافيش الوان تانية

الام : روح اسال بابا

الطفل : بابا ....

الاب محدثا نفسه " الولد بيجيب الاسئلة الغريبة دي منين ؟؟؟؟ "

الاب يجيب الابن : ربنا عايز كده ياحبيبي

الطفل : ازاي يعني ؟؟؟

الاب : هو ايه اللى ازاي

الطفل : ازاي ربنا عايز كده يعني

الاب : عايز كده يعني عايز كده ... اجري العب في اوضتك

الطفل يخرج من الحجرة وعلى وجهه علامات استفهام غامضة

حوار آخر بين طفله وامها

الطفلة : ماما انا جيت منين

الام وقد احمرت خجلا : لقيناك قدام جامع

الطفلة مستغربة : يعني انا مش بنتكم !!!!!

انا جيت منين ؟؟؟ ربنا فين ؟؟؟ يعني ايه جنة ونار ؟؟؟ من منا لم يواجه بمثل هذه الاسئلة  وغيرها وغيرها من الاسئلة الكثيرة العويصة التي يعتبرها البعض لماضه من الطفل وتطاول يستحق عليه الاسكات الفوري  ويعتبرها البعض غريبة ولا يجد البعض الآخر لها اجابات مبسطة يفهمها الطفل او يجيبه باجابات غير مقنعة او تدخل في حكم الكذب ويفاجأ الطفل بعد ذلك بإجابات اخري غير ماقاله الابوين فيحدث مالايحمد عقباه ويفقد الطفل الثقة في مصدره الاول للمعرفة ويبدأ في تكوين مصادر اخري يلتمس عندها الاجابة التي يريدها !!!!!

... كيف يواجه الآباء والامهات هذه النوعيات وغيرها من الاسئلة التي تخطر على بال الطفل الصغير او الذي بدأ في طور البلوغ .... هل استعد الوالدين وتسلحوا بقدر من الاسئلة المشابهة وحاولوا بقدر الامكان الاجابة عليها ... هل نحن مؤهلون فعلا لمثل هذه المواقف ... مامدي الصراحة الواجب توافرها عند الاجابة على اسئلة الابناء ... هل وهل ... اسئلة كثيرة  تحتاج منا لوقفة ومحاولة للاجابة عليها

[هشام عبد الوهاب]

اولا  احيى الدكتوره  عبله  على الفكره الحلوه جدا جدا

و هاحكيلكم على كام موقف كده و قولوا بقى هاتعملوا فيهم ايه

تخيل نفسك داخل بيتكم ..لا بيك ولا عليك ... و بتدور على المدام ..لقيت باب الحجره  مقفول  و بنتك واقف ادامه .... و بتقولك  

رايح فين يا بابا .....طبعا هاتقولها داخل اغير هدومى ....راحت ردت عليك بسخريه  ..هاتلبس  البيجاما ...طبعا انت هاتقولها ايوه  ..راحت قايلالك ببرأه  بس ماما  هى كمان بتغير هدومها و   مايصحش تدخل عليها و هى بتغير  .... طبعا  هاتفتكر انك اتزنقت   ..

استنى   لسه بدرى قوى على الزنقه

المهم انك هاتبقى دبلوماسى و تقولها  فعلا يا حبيبتى ماخدتش بالى

--------------------------------------------------

بالليل  بقى يا استاذ ...سعادتك قاعد فى امانة الله بتتفرج على فيلم عربى و الاستاذه الصغيره جايه جرى  تقولك

بابا  بابا  : انا نيمت العروسه بتاعتى جنب العروسه الراجل  امبارح  و مالقيتش نونا جنبهم الصبح .......  سؤال خبيث قوى  مش كده ......... هو مش حضرتك قولتلى  انك انت و ماما لما نمتم فى سرير واحد  انا  جيت فى بطن ماما  ...طيب ادى العروسه  بطنها فاضيه  و الاوضه مافيهاش نونا ....... الحق نفسك بقى يا حلو هاتعمل ايه فى الزنقه دى

طبعا ماما هاتقولها  ماهى يا حبيبتى دى عروسه لعبه  .... و انت هاتتشاهد علشان ماما لحقتك

انما لسه  اصبر شويه التقل جاى ورا .........

يا سلاام ..يعنى علشان هى لعبه  طيب ايه الفرق  .....الفرق يا حبيبتى ان ماعندهاش روح يعنى مش بتتنفس ولا بتاكل وتشرب........الحمد لله   - دا انت طبعا  - قلتلك  اتقل   لسه ...لسه بدرى

يا ماما  انتى بتقوليلى كلام غلط ..علشان بابا بينام جنبى و مابيبقاش عندى نونا  وانا باكل و باشرب  ..... يا نهار ابيض  حاول تتصرف بسرعه-----

طبعا  هاتبدأ سعادتك تشرح نظرية النسبيه ودارون  و تتكلم عن النحله و العسل و الرحيق و ازاى ربنا خلق النحله علشان تنقل الرحيق من  بابا بتاع النحل لماما بتاعت النحل ........ و بعد ما وشك يحمر و يخضر و نفسك يتقطع  و تتشاهدلك اد 3 او 4 مرات  ........المهم  ان طبعا  الاموره  هاتسكت شويه لأنها مش فاهمه حاجه ..لكن  الحق بقى القنبله  ..عارف قالتلى ايه بعد كل ده

يا بابا يا حبيبى  ليه كل  الكلام ده ما تقولى انك انت وماما زوجين  زى ما ربنا خلق كل زوجين

و انكم  ......  حذفت للرقابه ... و خلاص . مش عيب يعنى دى حاجه ربنا قايل عليها

. . . . . . . . . .  . .  عرق عرق عرق  

حد يلحقنى بكوبايه ميه مثلجه

[abla]

امسك ياسيدي كوباية المية الساقعة دي وهدي نفسك واشربها علشان تعرف تفكر في الاجابة ... فعلا موقف عويص والرد فيه صعب ... طيب ماقلتلناش اتصرفت ازاي ؟؟؟؟

[هشام عبد الوهاب]

انا عاوز ردوكم انتم .....تفتكروا  نشرب الميه و لا نعمل ايه

نسيت اقولكم .....

بعد الكلمتين اللى قالتهم وجهت كلامها للعروسه : يالا  يا بيبو نروح نلعب .... وبصوت اقرب للهمس ....:: دول فاكرينى عبيطه  ..ال    بابا النحله بينقل الرحيق  و النبى ده كلام

[NonSuperior]

انا هارد بسؤال واحد ... ممكن اعرف سعادتك بتقعدى مع مين بعد الضهر :( يانهار اسود .. انت بتتكلم بجد يا هشام ولا دى خيالات كوميديا سوداء .. ميه ساقعه ايه اللى عاوزها بعد كل ده :) ده انا حاسه انى لو اندلق على جرررررررردل ميه ساقعه بالكامل مش هاحس الاحساس اللى حسيته وانا باقرا الكلام ده !! :( :( حسبى الله ونعم الوكيل ..

[هشام عبد الوهاب]

انا عاوز ردود افعال .....الموقف ده حصل فعلا مع احد الاصدقاء و طبعا شوية تحابيش ماتضرش

يعنى هانتصرف ازاى .. نعمل ايه ... ما تردوا  ...يا بابا  ...يا ماما

هانكدب ولا ندارى و بعدين ناخد الكوبايه او الجردل ولا نعمل ايه

[NonSuperior]

ماهو يا هشام ده يتوقف على الاسئله التى انسالت و الكلام اللى اتقال :) وانا الصراحه مش باقول كده عشان اعرف :) الجواب باين من عنوانه :) بس انا فعلا عندى سؤال للآنسه الصغيره اللى بتسال الاسئله المحرجه دى .. يعنى حيث انها عارفه كل حاجه "والله اعلم ايه اللى هى تعرفه فعلا" بتسال ليه؟  يعنى فعلا هو ده السؤال اللى جه على بالى اما قريت كلامك :) يعنى اما هى جايبه المواضيع من الآخر بتسال عشان عارفه ان دى اسئله محرجه لاهلها مثلا ولا عشان تختبرهم هيقولوا الحقيقه ولا لأ :) بس فى كل الاحوال طبعا لازم ارد انما مره اخرى ده يعتمد على نوعية الكلام اللى هيطلع لى فى البخت :)

على فكره .. متهيالى مفيهاش حاجه لو قلت لها ان المواضيع دى محرجه "بالنسبه لى على الاقل ان ماكانش بالنسبه لها :)" ويا ريت نتكلم فيها بهدوء كده وبما يناسب سنها :) اظن حيث ان فيه فى دماغها افكار يبقى لابد ان تناقش بما يصلح هذه الافكار و فى نفس الوقت لا يتعارض مع المرحله العمريه :)

(Edited by NonSuperior at 1:05 am on Nov. 21, 2001)

[om youssef]

السلام عليكم

انا عندي ولدين ربنا يخليهم و يبارك فيهم

الاول عنده 11 سنة و الثاني عنده 9 سنوات

الاثنين بيسألوني اسئلة صعبة جدا جدا لكن الحقيقة انا جريئة جدا معاهم و صريحة جدا ايضا

بس  انا عندي حيوانات اليفة في البيت ساعدوني جدا علي الرد  علي الاسئلة الصعبه

اول حاجة كان عندي دود قز و كان الاولاد متابعين المواضيع كلها من اول الدودة لغاية الفراشة و بعدين البيض

و كل سؤال كنت بتسئله منهم كنت بجاوب عليه بالتشبيه بدود القز

وبعدين جبنا سلاحف   و هكذا

المهم في الموضوع ان الاولاد اصبحوا بيثقوا فية  و كل الاسئلة المحيرة بقوا يسألوني و اجاوب عليها ببساطة

طبعا الابن الكبير بيفهم اكثر من الصغير لكن هناك ثقة بيني و بينهم و افتكر ان ده اسلوب سليم في التربية لأن المعلومة لما تيجي من الاب او الام دايما بتكون صحيحة و افضل من المعلومات اللي بتيجي من الاصحاب

ديه تجربتي يمكن  ما تناسبش ناس تانية لكنها نجحت مع اولادي

واشكر دود القز  لانه  فتح الحوار مع اولادي

سلام

[هشام عبد الوهاب]

يا سلام يا ام يوسف .....كلام فعلا جميل ......صح كده  عشره من عشره

شايفين الردود ....من غير ميه ساقعه ولا جردل ......برافوووووووو

[semsemah2000]

انا مع ام يوسف و لو ان بناتى لسه ما وصلوش للمرحله دى لكن حكايه ربنا و ازاى بيشوفنا من غير ما نشوفه ... أخدتهم من ايدهم وو قفتهم بره باب الشقه و بصيت عليهم من العين السحريه و قلت لهم هم بيعملوا ايه و مين اللى بيخبط و سألتهم انتوا شايفينى قالوا لأ قلت لهم بس انا شايفاكوا ...... و هم اقتنعوا و قالوا لى يبقى اكيد ربنا بيبص علينا من النجوم صح يا ماما قلت لهم ايووووووووووه كده ميه ميه ....الموضوع مش سهل و لازم لما يسألوا نرد علشان ما يدوروش بره على حد يجاوب لهم الأسئله العويصه و بالتحابيش اياها

[NonSuperior]

انا معنديش اى اعتراض على وجاهة الكلام :) بس مش فاهمه ايه اللى فرق دود القز عن النحل اللى هشام قال عنه  فى اول رساله :) اعتقد اما الابناء يسالوا آباءهم من غير ما يكون عندهم افكار مسبقه بيكون الموضوع اسهل وبيكون الحل زى ما تفضلت الاخت ام يوسف وقالت على موضوع الحيوانات الاليفه .. انما المشكله ان المثل فى رسالة هشام كان عن بنت فيه فى دماغها افكرا معينه هى الى بتفرض نفسها للمناقشه .. مش هينفع اقول لها نجيب من الاول و نبص على دودة القز :)

[om youssef]

السلام عليكم

الي الاخت نونا

اعتقد ان البنت اللي بتسأل اسئلة بالشكل ده... اما انها سمعت الكلام ده من بنات كبار او سمعته من شغالة مثلا... و في الحالة ديه يجب عمل غسيل مخ مستعجل لها بواسطة الام ثم اعادة بناء المعلومات من جديد بطريقة صحيحة... لأنها من الواضح انها عاوزة تفتح الموضوع مع اهلها ... او عاوزة حد  يؤكد لها ان ما سمعته صحيح.. و ده من حقها علي اهلها...

ابني الصغير سألني ... هو لما حنموت و نروح عند ربنا ممكن نسأله كل الاسئلة اللي احنا عاوزينها؟

قلت له ان ربنا اعطانا القرآن الكريم  و اننا لو قرأناه و فهمناه كويس حنلاقي كل الاجابات اللي احنا عاوزينها

ابني الكبير اول ما دخل المدرسة  هذه السنة  استغرب من التغيرات الجسمانية اللي حصلت للبنات اللي معاه في الفصل و طبعا اول مارجع من المدرسة بدأ يسأل اسئلة كثيرة عن هذه التغيرات

و طبعا شرحت له كل حاجة و انه ربما السنه القادمة ان شاء الله ... هو كمان حيتغير و يكبر و يطلع له شنب و هكذا

الكسوف مش مطلوب مع الابناء لأن كل حاجة في الحياة بتحصل بطريقة طبيعية... و الغموض مش مطلوب

سلام

[NonSuperior]

اخيرا حد فهمنى :) باهزر يا جماعه :) انا اقصد بس ام يوسف فهمت انا ليه قلت هاسال البنت هى بتعد مع مين .. اصل اكيد فيه حد هو اللى بيتكلم معاها ولازم نعرف ابناءنا ايه مصادر معلوماتهم .. المشكله بس فى مناقشة ما وصل اليها من معلومات وموضوع تاكيده او نفيه او توضيحه .. ربنا يستر ..

[abla]

الاخوة الافاضل مساء الفل ... ردودكم كلها جميلة ... من الضروري ان تتحقق الام  ومعها الاب من مصادر معلومات ابناءهم ... ومن اللزم ان يكون البوين هما المصدر الاول والاساسي لمعرفة اي معلومة ... وهذا يتطلب قدر من الصراحة من جانب الابوين مع قدرة على توصيل المعلومة بطريقة مبسطة وسهلة وليس فيها اي افتعال لاي شئ سواء اندهاش او اي رد فعل ... بل يجب ان تؤخذ الامور ببساطة شديدة ... ومن الضروري ايضا مناقشة الطفل فيما يعرف ومعرفة مصدر معلوماته تمهيدا لتصحيح اي خطأ قد يكون موجودا في المعلومة او مصدرها