عن تنشيط باب كندا

[ayad aljumaili]

اي شخص عنده اي استفسار بخصوص الهجرة الى كندا انا مستعد للاجابة لكوني مقيم في كندا وصاحب شركة رسمية للهجرة ومسجلة لدى دائرة الهجرة الكندية

[Prof.Samo]

اعتقد ان الفيسبوك هو احد الروافد الهامة اللى ناس كتير بتاخد معلوماتها منه

[ayad aljumaili]

ممكن بس هل تعرف انه هناك اكثر من ثلاثين نوع من الهجرة الى كندا؟؟؟؟؟

[Prof.Samo]

انواع الهجرة الي كندا كثيرة - منها السهل كاللجوء مثلا - اعتقد ان الجميع يركز على هجرة العمالة الماهرة وهجرة المقاطعات ، هجرة رجال الأعمال قد لا تكون متاحة للجميع

[MZohairy]

مين قال ان اللجوء سهل؟؟؟؟

الموافقه عليك كلاجئ يتطلب اثباتات قويه جدا تثبت ان حياتك معرضه للخطر لاسباب انسانيه

و ده مش موضوع سهل ابداا

[Prof.Samo]

مش لازم على فكرة - اسهل طرق اللجوء هو اللجوء من امريكا مع شوية ورق ومحاضر مترجمة (يمكن فبركتها فى العديد من الدول) وبيدخل البلد

[احمد هيثم]

طيب انا كيميائي و عاوز اهاجر لكندا عاوز اعرف المطلوب ربتاخد وقت قد ايه

[Prof.Samo]

عايز تهاجر على اى نظام ؟!

[mohamedashraf]

انا اعرف ان النظام اتغير.....ممكن تقولنا النظام الجديد ايه لهجرة العمالة المهرة؟؟؟

و هل يشترط تفس درجات الأيلتس؟

[Prof.Samo]

معروف تماما إن هوجة الهجرة شغالة على ودنه في مصر و كل الناس اللي أعرفهم تقريبا عايزين يطفشوا من مصر و طبعا كندا من أكتر البلاد اللي ناس كتير بتحاول تهاجر ليها خاصة إن الشيخ حسين يعقوب قال للّي مش عاجبه, يروح كندا, و بما إني في كندا من فترة, احب أعرف الناس أكتر عن كندا على طريقة القواعد الاربعين المشهورة (أنا مش عارف هم ليه اربعين بس بما إن ده البروتوكول, فأنا هحترمه معرفش ليه برضه)

1. لما تفكر تهاجر لكندا, اسهل طريقة إنك تعرف إذا كان ينفع تهاجر ليها ولا لأ هو الموقع الرسمي للهجرة الكندية. صدقني بلاش تسمع أي كلام من أي حد عشان المصريين بيحبوا يفتوا كتير بأمارة "هو قال لك فين؟؟"
2. نصيحة لو مش عارف تطلع المعلومات من الموقع الرسمي, انصحك تفكر في أي بلد تانية.
3. المحامي اللي هيقولك إنه هياخد أي حاجة و يجبلك الهجرة ده نصاب و ابعد عنه أحسن.
4. بص, أنا عارف إنك عارف إن كندا برد بس متقلقش, الناس عايشة هناك عادي و الحياة ماشية طبيعي جدا.
5. لو إنت مبتعرفش فرنساوي, مظنش إن كام كورس في المركز الفرنسي هيخليك بتعرف تتكلم فرنساوي. خليك في المضمون و قدم على أي مقاطعة غير كيبيك
6. لما تاخد فيزا الهجرة إن شاء الله, حط في دماغك قبل ماتيجي إن الكنديين هنا مش فارق معاهم وصولك قوي و مش هيوزعوا عليك فلوس لما توصل. الانسان المصري بالنسبة لهم شخص عادي زي بقية الجنسيات مش زي ما بيقولوا في مصر.
7. كندا غالية و أي قرش جاي بيه من مصر حافظ عليه كويس و بلاش بعزقة الفلوس على حاجات ملهاش لازمة أول ما توصل. مش معنى إن ال 100 جنيه ملهاش قيمة إن ال 100 دولار زيها.
8. لو سافرت امريكا قبل كده, مش عايزك تفتكر إن كندا زيها و هتكتشف بعد شوية إن فيه فرق كبير بينهم.
9. أنا اعتقد إن أحسن وقت تيجي فيه هو الصيف عشان تاخد تغيرات الجو واحدة واحدة بدل ما تلبس السقعة من أول ضربة لو جيت في الشتا.
10. صدقني عارف إن الشتا بيكون سقعة بس متقلقش, كله بيعدي
11. لما تيجي تفكر تسكن فين, أي حد هتسأله يا اما هيقولك إن أحسن مكان هو المكان اللي ساكن فيه يا اما هيقولك ابعد عن المكان اللي ساكن فيه. أنا لو منك اخد أي حاجة مؤقتة في أي مكان و بعدين ادرس كل الاماكن في المدينة اللي إنت فيها و بعد كده قرر المكان اللي يريحك.
12. لو عايز تعيش في زحمة و دوشة, عليك و على أي مدينة كبيرة زي تورونتو أو مونتريال بس مظنش هتعجبك لو معاك عيال بس في الاخر دي مزاجات.
13. أهم حاجة أول ما توصل إنك تشتغل بسرعة. دي اصعب خطوة و ناس كتير بيجيلها اكتئاب في الفترة الاولى. معلش استحمل الفترة دي و أعمل حسابك من قبل ماتيجي إنك ممكن تشتغل أي حاجة في الاول لغاية ما تظبط أمورك في البلد.
14. أي حاجة هتشتريها في الاول زي موبايل أو انترنت, هتلاقي باقات كتير و الفروقات بينهم مش كتير في السعر, بلاش تاخد أعلى باقة عشان الفرق مش كبير. الحاجات الصغيرة دي بتفرق بعدين صدقني. بلاش تستقل بالارقام القليلة دي عشان بتعد بعد كده.
15. في حاجة اسمها Home sickness. أنا شخصيا مجربتوش بس واضح إنه بيجي لستات كتير أول لما يسيبوا مصر. معرفش إيه سببه بس اعتقد إن حله هو إنك تهيأ نفسك إن كندا مش بلد سهلة و هتتعب في الاول و ممكن تتعب لفترة طويلة نوعا ما.
16. أول ما تلاقي أي شغل امسك فيه حتى لو مش على مزاجك لغاية ما تلاقي حاجة أحسن.
17. معلش هتتعب في المكوى و تنضيف البيت و العربية و الحاجات دي اللي إنت متعودتش تعملها في مصر. انسى الرفاهية بتاعة مصر عشان مش هتنفع هنا لغاية ما تبقى مليونير إن شاء الله.
18. لما تمتحن رخصة السواقة, لازم تعمل حاجة مهمة جدا طول ما إنت ماشي و هي Shoulder Check. البتاعة دي مش موجود منها في مصر بس في كندا بيحبوها قوي. دي اللي لا مؤاخذة بيشوفوا بيها حاجة كده اسمها ال Blind spot. لما تيجي إن شاء الله هيوروهالاك و هتلاقيها اختراع ظريف إن شاء الله.
19. و إنت سايق في الشارع و داخل على تقاطع, متهديش ابوس ايدك. إنت يا اما هتلاقي اشارة (مش عسكري) أو هتلاقي يافطة حمرة اسمها Stop sign. لما تشوف العلامة دي تقف لوحدك كده لغاية ما يجي دورك عشان تعدي التقاطع. ده اختراع ظريف هيعجبك إن شاء الله.
20. هيقولولك كندا كئيبة و مملة و البلد بتنام من بدري بس صدقني لو عايز تعمل أي حاجة في أي وقت, هتلاقي حاجات ممكن تتعمل متأخر بس مفيش نظام المول اللي بيفتح لنص الليل و الكلام ده.
21. وإنت ماشي في الشارع هتلاقي ناس بتبتسم ليك, دي حاجة كويسة و الناس دي مش بتكون عايزة منك حاجة غير إنها بتحييك عشان إنت إنسان طبيعي. أنا عارف إن دي حاجة مش طبيعية بالنسبة ليك بس صدقني دي حاجة عادية جدا. ممكن برضه تحيي الناس بابتسامة بسيطة زيهم و هتلاقي إنها حاجة ظريفة.
22. متقلقش بالنسبة لموضوع الشطافة. اسأل أي مصري تجيب واحدة منين و هتلاقي موديلات كتير و فيه منها سخن و بارد و شغل عالي. متقلقش من الموضوع ده.
23. اكبر غلطة تعملها و إنت في كندا إنك تقارن بين مصر و كندا. الفرق بينهم حوالي كام قرن كده فالمقارنة ظالمة و مالهاش لازمة.
24. توكيل محلات الشاورمة للبنانيين و توكيل الصيدليات للمصريين. مش عارف ليه بس هو كده.
25. لبس مصر التقيل بتاعك ده متجيبوش معاك. أعمل حسابك إنك هتجيب جاكيت محترم من كندا يستحمل لغاية 30 تحت الصفر.
26. هتلاقي ابنك بيسألك هو أنا ليه الوحيد اللي في الفصل بلبس فانلة داخلية, معرفش هترد عليه و تقوله إيه و غالبا دي وسيلة المصريين بيستعملوها عشان يبقوا مميزين بين بقية الناس.
27. طبعا أي مرة تنزل مصر و ترجع هتلاقي نفسك راجع بمنتجات JIL أو قوتونيل معرفش ليه بس واضح إن ده تقليد فرعوني قديم و لسة محافظين عليه لحد دلوقتي.
28. الاتوبيس ليه مواعيد و بيجي في مواعيده مش عارف إزاي و عندك في كذا طريقة عشان تعرف تركب ايه وامتى عشان تروح من أي حتة لأي حتة تانية.
29. إنت محتاج انترنت و حياتك مش هتمشي من غيره. على فكرة السرعات هنا عالية و مفيش الدورية اللي بتطلع عندك في مصر لما تشغل اليوتيوب.
30. طبعا هتتظبط في الضرايب و بلاش تعمل فيها ناصح عشان تتهرب من الضرايب عشان لو اتمسكت مرة, مش هينسوك و هيفتشوا وراك بقية حياتك كل سنة.
31. أنا عارف إن الستات بتحب تجيب حلل و اطباق و حاجات المطبخ معاهم من مصر و هم رايحين كندا. أنا لغاية دلوقتي مش فاهم ليه بس يمكن فيه حنين لمنتجات زهران. جايز برضه.
32. يا عم عارفين إن كندا سقعة في الشتا.
33. مش كل الصحاب جدعان بس هتلاقي صحاب جدعان قوي. حافظ عليهم كويس عشان دول ضهرك في أي وقت و إنت ضهرهم برضه.
34. المصريين اللي في الخليج, موضوع إنك تظبط ورق و تخلع على الخليج لغاية ما تاخد الجنسية اتفقس خلاص. يا تيجي وتقعد زينا يا تاخدها من قصيرها و دور على بلد تانية أحسن تديك بسبور اجنبي غير كندا.
35. كندا هتشيل عيالك على راسها و هتديهم مميزات كويسة بس إنت أعمل حسابك على إنك هيطلع عينك شغل. مفيش شغل بيخلص بالتليفون زي مصر.
36. في الصيف, الدنيا عادي جدا إنها تمطر و المطر مش احتكار لفصل الشتا بس و دي معلومة مهمة خبوها عليك في مصر مش عارف ليه.
37. في فصل الخريف, في ظاهرة طبيعية إنت درستها زمان هتشوفها بعينك و هي سقوط اوراق الشجر. حاجة كده زي ما قال الكتاب و هتتهري و إنت بتلم الورق ده طول الخريف.
38. فيه بط هتلاقيه في البحيرات اللي جوه المدينة اللي إنت عايش فيها, بلاش تفكر في اللي عمله همام في امستردام عشان مش هيحصلك كويس.
39. المصريين في كندا معظمهم شغالين اشغال محترمة. حاول تقدم صورة كويسة عن مصر وإنت في أي مكان شغل و كفاية الفضايح اللي بتعملها مصر كل شوية. مش لازم نأكد للناس هنا إن كل المصريين كده و حاول تفهمهم إن مصر فيها ناس محترمة.
40. احترم كندا و كندا هتحترمك و حافظ عليها و على نظامها و ساعد في تقدمها و بلاش تبص لها على إنها سبوبة. اعتقد إنها بتعاملك كإنسان و دي حاجة غالية قوي مش موجودة في بلاد تانية.

طبعا ده اللي جه على بالي وانا بكتب البوست ده و أكيد فيه حاجات كتير مش على بالي و لو كلمت أي حد تاني ممكن يقولك حاجات تانية خالص بس من الاخر كندا من وجهة نظري بلد محترمة أنا مشفتش منها أي حاجة مش عجباني و موضوع البرد ده الناس عاملة منه قصة كبيرة على الفاضي و هما كام شهر برد و بيعدوا.

منقول من صفحة فادى خير على الفيسبوك

https://www.facebook.com/fkhair/posts/10155065853050029

تم تعديل 21 يناير 2015 بواسطة Prof.Samo

[Prof.Samo]

ودا النظام الجديد وشرحة من اليوتيوب

http://www.youtube.com/watch?v=y5ftuVERusg

[هيشو]

To register for the event you must go to: www.livinginnb.ca A follow-up email with the location of the event will be sent to qualified candidates