انا رئيس الجمهورية ........... القادم

[محب فى الله]

مش للدرجة دى ....بس تعالى نتخيل ...يا عم انت حتدفع حاجة من جيبك؟ الحلم ده على حسابى ....غمض عينيك شوية واحلم انك بقيت رئيس الجمهورية ... متقولش ازاى .. مش مهم ... زورت الانتخابات ... او قلت للناس انتخبونى احسن ارمى نفسى من فوق البرج فصعبت عليهم قاموا انتخبوك .. او يكون لك واحد صاحبك امريكاوى بتكلمه على الياهوو وقال لبوش انك ولد عترة ومجدع ورجولة وكفاءة وانك من بتوع العولمة والعوالم والنظام العالمى الجديد لنج .. ومش من اللى بيصلوا الفجر جماعة...فوافق بوش انك تقعد على...الكرسى ..

المهم انك بقيت دلوقتى رئيس الجمهورية ....

مين قدك يا عم ... حتاكل طعمية مقلية بزيت فرنساوى وربنا حيتوب عليك من طعمية ابو هويدا المقلية بزيت العربيات....

وحتتعالج من انيميا الفول .. الفول الجديد بقه يا عم من غير سوس ..وابقى قابلنى لو لقيت اى مسمار فى العيش ... حتاكل عيش من ابو الرغيف بربع جنيه...سخن وطازة وطرى ..تخيل ..طرى مش ذى العيش اللى انت كنت بتاكله وانت بتشرب كباية ميه ورا كل لقمة علشان تنزل لا لا العيش ابو شلن ده اللى انت كنت بتجيبه من الفرن وعقبال متوصل بيه البيت يسلجم ويقفع ويعرقص ... وتعاقب عليه دوليا لأنه اصبح من اسلحة الدمار الشامل....لا انسى الكلام ده خالص

الاوضاع حتتغير خالص ياعم ... دا انت ربنا حيكرمك خالص والله العظيم .....

طب بص دى ... حتاكل لحمة... متبرقش اوى كدة ... مش عارف يعنى ايه لحمة؟

( همة حيقولولك ) وبعدين انته مش كنت بتسمع وانت قاعد على القهوة وحاطط رجل على رجل وصباعك طالع من الجزمة انهم حيستوردوا حاجة كدة من السودان واثيوبيا...آه فاكر ؟ اهى هى دى اللحمة....لا لا مش اللى انته كنت بتاكلها فى العيد بتاعت العيد دى اسمها كرشة...متفضحناش بقه الله يسترك ...

وحيبقى فيه كنكاكى ..متسألش .. دى فراخ يعنى حتودع عم لطفى الفرارجى اللى كان بيعين لك رجلين الفراخ وانته كنت بتقول له عشان الكلب وكان ساعات يفوت لك حتتين قنصة على حتتين كبدة من بتوع الزباين اللى بستحموا بصابون اجنبى ..

وحتشرب السيجارة كلها مرة واحدة .. يعنى مفيش تخميس ...وبعدين دى سجاير ستراكى سترايك من بتاعت الست مارى منيب.. جو تانى

بس لما يخدوك علشان تحلف اليمين ... ياعم دا غير يمين الطلاق اللى انته مصدره فى كل حدوتة تحكيها ... اصحى معايا الله ينجيك ... لما تروح تحلف اليمين اوعى تروح بالبدلة بتاعت جوازك ..انته عارف... دى بقت مكيفة الهواء من كل ناحية ..العربى جوز ام بطة عنده بدلة اخوه باعتهالو من بلاد بره ابقى استلفها منه وإقضى مصلحتك وبعدين رجعهاله ... ماهى الجيران لبعضها امال ايه...

و وحياة رحمة امك يا شيخ متروح بالجزمة بتاعتك ... عشان خاطرى ابقى اشتريلك جوز جزمة من بيع المصنوعات دى رخيصة هناك .... لأن الحدوة اللى انته مركبها فى كعب الجزمة بتعمل صوت .... قلق برضه .. وبعدين ممكن الجهاز يصفر عليك تبقى حكاية... فاهم ؟... اول يوم بس وبعدين همه بعد كدة حيتصرفولك فى جوزين جزم مستوردين عشان تقابل بيهم اصحابك بتوع الدول التانية ....

جزمة حلوة وبدلة حلوة واكل حلو .... حاجة على كيفك .. وحتنام على سرير عليه مراتب .. المراتب دى بقه جواها قطن ... ايوة قطن ... والله العظيم قطن .. ايوه تمام زى القطن اللى انته جبته من الاجزخانة للوله حودة ابنك لما الواد شحته ابن ام بيسة لزقه بالطوبة فى نافوخه فتحهاله وجريت بيه على المستشفى قالولك هات لنا قطن وشاش وميكروكروم وصبغة يود وبلاستر وسرنجة وحقنة تيتانوس وكيس دم واقطع تذكرة بخمسة جنيه من شباك العلاج المجانى .... ايوه هو ده القطن .. فهمت ؟

حتحلم احلام نضيفة على السرير دا يا عم الحاج ... افرد طولك ... متخافش رجليك مش حتطلع برة الاوضة .... انته مش فى بيتكم دلوقتى ..افرد افرد ...غمض عينيك كده .. غمض ... ايه؟ ... انته نمت ؟ اصحى يا عم ... اصحى ... الباب بيخبط ... الحق .. موظفين الكهربا على الباب ... الحق دول جايين يشيلوا العداد علشان بقالك 3 شهور مدفعتش الفاتورة ....‍!

[وليد صفوت]

الحق يا سكوب أنت و س س :wub: :sad: :o

فى منافس جديد هنا فى خفة الدم و التلقائية فى السرد , بسم الله ما شاء الله عليه :o

محب فى الله ,....... الأول برحب بيك وسط أكبر منتدى ثقافى مصرى , وأرجو تكون بتقضى وقت جميل و مفيد هنا ,....

و بصراحة المقالة الخفيفة اللى انت كتبتها , كانت من ألذ و أجمل المقالات اللى قريتها منذ زمن يعنى :lol:

الف تحية و الف مرحب بيك :blush:

[الأفوكاتو]

مرحبا بالأخ محب فى الله.

مقالك يضع إبتسامة على وجوهنا العابسة, الغاضبة.

تحياتى.

[Scorpion]

منافس مين يا عم فايولين ...انا شخصيآ عمري ما دخلت منافسات مع اساتذة .. و الفاضل محب مش بس استاذ .. ده صاحب كرسي كمان ...

أحسنت في تقديم نفسك للمحاورات يا أستاذ محب .. و في انتظار المزيد ...

تحياتي ....

[مى محمد]

المحب فى الله.....

اهلا ومرحبا بك فى بيتك و بيت المصريين....

اصحى يا عم ... اصحى ... الباب بيخبط ... الحق .. موظفين الكهربا على الباب ... الحق دول جايين يشيلوا العداد علشان بقالك 3 شهور مدفعتش الفاتورة ....‍!

:D :D :D :D :D

مقالتك اكثر من رائعة...

بارك الله فيك و فى موهبتك و نحن فى انتظار المزيد من احلامك

[ebnelganoup]

الأخ العزيز المحب فى الله اولا مرحبا بك بمنتدى محاورات المصريين

واسمح لى ان اعبر لك عن اعجابى الشديد باسلوبك الساخر ويكفى

ان تعلم اننى قارىء جيد للصحف المصريه واستطيع ان اؤكد لك وللجميع

ان مقالك يستحق النشر فورا لما يتضمنه من نقد لاذع وسرد ثرى ومتنوع

وكانك تجلدنا جميعا وتجلد نفسك ايضا بسياط كلماتك وتعبر بصدق عما بداخلنا

من غضب وسخط لما نحن فيه ونحن نرى المهزله الكبرى مهزلة الترشيح

لقهر وقتل المصريين بلا رحمه ....... اشكرك جزيل الشكر لاهتمامك ولانتمائك

ولى رجاء من مشرفى باب انتخابات الرئاسه برجاء تثبيت مقالة الأخ الفاضل

لأهميتها القصوى لنا فى مواجهة انصار المزيد من القهر والظلم والفقر والاستبداد

دمت لنا اخى الغالى

وفى انتظار المزيد والمزيد من قلمك الساخر

دمت بكل خير

ابـن الجـنــوب

[محب فى الله]

الأخ العزيز المحب فى الله اولا مرحبا بك بمنتدى محاورات المصريين

  واسمح لى ان اعبر لك عن اعجابى الشديد باسلوبك الساخر ويكفى

ان تعلم اننى قارىء جيد للصحف المصريه واستطيع ان اؤكد لك وللجميع

ان مقالك يستحق النشر فورا لما يتضمنه من نقد لاذع وسرد ثرى ومتنوع

وكانك تجلدنا جميعا وتجلد نفسك ايضا بسياط كلماتك وتعبر بصدق عما بداخلنا

من غضب وسخط لما نحن فيه ونحن نرى المهزله الكبرى مهزلة الترشيح

لقهر وقتل المصريين بلا رحمه ....... اشكرك جزيل الشكر لاهتمامك ولانتمائك

  ولى رجاء من مشرفى باب انتخابات الرئاسه برجاء تثبيت مقالة الأخ الفاضل

لأهميتها القصوى لنا فى مواجهة انصار المزيد من القهر والظلم والفقر والاستبداد

  دمت لنا اخى الغالى

وفى انتظار المزيد والمزيد من قلمك الساخر

  دمت بكل خير

  ابـن الجـنــوب

<{POST_SNAPBACK}>

شكرا جزيلا للأفاضل الذين قاموا بمشاركتى تلك الصرخات

ويسعدنى كثيرا التواصل معكم ومشاركتكم الآمال والآلام .

السطرين اللى فوق دول لمحبى الفصحى ..... عشان محدش يزعل

اما انت بقى ياعم اسكوربيون .... انا كنت فاكر انى جاى المنتدى ده وجايب الديب من ديله لكن لما قريت موضوعاتك بصيت على الديب لقيته صرصار كنيش :D

اكيد طبعا العين متعلاش عن الحاجب ..... حاجب انا بفهم فى الاصول :D

[Folana]

[color=blue]المحب فى الله .............كلامك هادف ومعبر ..وبالرغم من ان الجميع وصفوه بخفة الدم الا انى شايفة انك خنقتنى ...وفكرتنى بالواقع الاسود اللى بنعيشه ....لكن انت صحتنا من النوم فجاءة كده على بتوع الكهربا ..واللى شالوا العداد من زمان خلاص...احنا عايزين نعرف باقى الحلم ....يعنى بعد الجزم والبدل واللحمة والذى منه ...ياترى حنعمل ايه ؟....وايه مصير اولادنا ..تفتكر نبدأ نجهزهم من دلوقت برضه ...لتولى المنصب ويكملوا الحلم بعدنا :D

[shawshank]

محب في الله ، جميل مقالك جدا

قرأت حاجة ظريفة على البي بي سي ذكرتني بما كتبت:

المناضلون في طوابير الخبز والمحشورون في المواصلات (اتوبيسات الغلابة وليست المكيفة)، وخاصة النساء اللاتي تتعرضن لابشع الانتهاكات، وكل الحالمين بكيلو لحمة اثيوبي او هندى، وجميع الموظفين الذين تمر عليهم الاعياد والمناسبات بالغم والنكد بدلا من الفرح والسرور بسبب الغلاء الطاحن، واخيرا باسم البطون الخاوية التى تحلم بالشبع ولو بالعيش الحاف. باسم كل هؤلاء وغيرهم نؤيدك يا مبارك.

محمد عبدالهادى - القليوبية مصر

نؤيد مبارك باسم العاطلين عن العمل وسكان المقابر واكثر من تسعة ملايين عانس فاتهم قطار الزواج. باسم آلاف الاطفال المشردين فى الشوارع (بالمناسبة اصبحوا في عهده شباب وفتيات شوارع ومنهن حوامل متسكعات ومن لا يصدقني فليذهب الى ميادين القاهرة ليرى بعينيه) وباسم الآلاف من مرضى الفشل الكلوي والكبد الوبائي والسرطان وباسم المنتحرين بعد ان اسودت الدنيا في وجوههم وسدت سبل العيش الكريم. باسم كل هؤلاء نؤيد مبارك.

ابراهيم السيد عطا الله - القاهرة

الوصلة

تم تعديل 9 أغسطس 2005 بواسطة shawshank

[nolimits2000]

السلام عليكم

أستاذى الكبير المحب فى الله ضحكتنى و أنا ماكانش ليا نفس أضحك .

أشكرك كل الشكر لأنك رسمت البسمة على شفايفى

شكرا لك أخى الفاضل و أتمنى منك المزيد

[الطيار المصرى]

اهلا اهلا بالعضو الجديد و الاخ العزيز و الاستاذ الكبير المحب في الله.............

صدقني مقال رائع رائع رائع...............

و فكرة جديدة و جميلة..........

مقال جميل .....خفيف.......محزن......و مؤلم.........

علي الرغم من السخرية الواضحة في كلماتك.......الي انها سخرية مريرة..........

تعبر عن واقع اليييييييييييييييييييييم........و امرنا لله........هانضطر نستحمل لغاية ما اللي قاعد علي كنبة الحكم ما ينكشح.........و يجي بداله حد........ينسينا الايام دي........

من حقي احلم ...........و لا ايه........؟؟؟؟؟؟؟؟؟؟؟؟

ارحب بك مرة اخري اخي المحب في الله...........

بارك الله فيك و في موهبتك............

شكرا.........

[shahd]

موضوع اكثر من رائع واسلوب ظريف سلمت اناملك اخي