ممنوع

[هشام الجنيدى]

ممنوع :blush:

مش هوه ده طريق حلما؟

هوه اكيد مش هما قالو فاوله ينبوع؟!

طب ليه على جنب الطريق

يفطه كبيره معلقه

مرسوم عليها دايره زى المشنقه

وسهم بيشير للرجوع؟!!!

يعنى ايه؟ يعنى نرجع؟!

ايوه نرجع!!!!

هوه ليه كل اما نلقى

بعد ما نتعب ونشقى

باب امل ونروح ليه

نلقاه اتقفل نخبّط عليه

نسمع ندا من جوه بيقول الدخول ممنوع؟؟!!!!!

ممنوع يا طير تعلى لفوق ممنوع !

ممنوع يا بحر الموج يثور ممنوع!

ممنوع يا شمس تنورى

ممنوع بامر من الغيوم

ممنوع يا نوم .......

تزور عيون الليل وهوه بتلالى فى سماه بدل نجومه دموع!!!

اهل البلد

بيقولو كل ما يتولد .....مولود جديد

معناه امل ...موجود اكيد

علشان كده زاد العدد

والكل قاعد ينتظر يجى الامل .......

فى بكا ودمع وصوت نحيب مسموع....

كبر الولد وقعد معانا ينتظر ...

وراسه اللى كانت فى السما ..

صارت مطاطيه كما ...

فرع قرّب ينكسر...

حاسين بقهر

حاسين كان الانتظار اليوم بدهر

ونعمل ايه ؟؟!!

ونهارنا قرّب يندثر

والضلمه جيّه تضمنا ومفيش شموع؟؟!!

الحل اهوو..........................

صرخه ضّوت بعدها عم السكات ...............

اصل اللى قالها كان عجوز ....قالها ومات

ولاحد فاهم اصده ايه .....؟

ولا حد شاف الحل اللى قال عليه....

غير هوه بس !!

وللاسف مات العجوز!!

مات مالالم مات مالندم ؟؟

يمكن يجوز؟

ويمكن كمان زى اما قالو ..........

انه مات مالجوع..................................!!!!! :lol: !!!!!

[bentmasria]

ممنوع يازهرة تفتحى

ممنوع يافرحة تطرحى

ف البيت شموع

حتى الوليد اما اتولد

قالوا ده املك يابلد

داب م الخضوع

ممنوع نصدق حلمنا

حنلاقى باب بيصدنا

وسطور عذاب بتلمنا

ويا الدموع

طب ماتخنقنا كلنا

وصراخنا يشبه صمتنا

من مم ونووووووووووووع

ممنوع يا دهر نبتسم

ولا حتى بكره يترسم

فى عيون رضيع

دى حكاية باين اصلها

وتاريخها زى فصلها

وضلام ونوح

ممنوع يا شمس تنورى

ممنوع بامر من الغيوم

تلالى جوه الليل نجوم

مم............نوووووووع

هشام الجنيدى ماشاء الله عليك

رائع وجميل ومعبر وكمان مستفز

خليتنى اكتب عامية بس ما تتريقش

ربنا يوفقك ويسعدك يارب

[شاعرالرومانسية]

المبدع ،،، هشام الجنيدى

دعنى بداية أن أغير مصطلح " شعر عامى متشائم جدا" ... الى " شعر عامى متشائم جدا جدا جدا..."

بس بجد من أحلى ما قرأت فى الفترة الاخيرة ... لان الفكرة فيه جديدة ومتنوعة بين العاطفى ( والذى يصل للقارىء من قرائته للجزء الاول ) والوطنى ( المستشف من الجزء الثانى )... ولكن تأتى النهاية لتجمع بين الحالتين فى قالب واحد

الفكرة كما قلت جميلة ... واستخدامك للجمل والتعبيرات غاية فى الاتقان ..

بس حاسس - من وجه نظرى - ان الموسيقى فيى مش مظبوطة شوية .. ودة يمكن لان الشعر العامى قد يسمع أفضل من أن يقرأ

فكل كاتب وله اسلوبة للتعبير عن كتاباته

ولكن فى النهاية ... لا يبقى لنا الا ان نرفع لك القبعة على تللك الفكرة الجميلة وهذا الاحساس الرائع

فتقبل منى جزيل شكرى ،،، ولقلمك كل التقدير

[ebnelganoup]

أخى الغالى هشام دائما مبدع ونقى ودائما ننتظرك

لنقرأ لك أجمل وأروع الكلمات بالنسبه للايقاع كما

قال أخى شاعر الرومانسيه كان محتاج منك تركيز اكثر

انت ليه بتستعجل راجع ونظم براحتك لاننا عايزينك

الأفضل والأقوى لانك مننا وعلينا يا شاعريا كبييييييييييييييير أوى أوى اوى

وانا لسه عند رأييى انت افضل من كتب الرباعيه بعد جاهين وانت مش مصدقنى

وقلت ان محدش يقدر ينافس جاهين وانا مقولتش كده انا قلت من بعد جاهين

ارجع لرباعية الارض أرضك يا اديب وقارن بينك وبين ايا من الرباعيات التى كتبت

بعد صلاح جاهين وانت تعلم قدر نفسك كما اعلم قدرك وانا بعيد كل البعد عن المجاملات

انا دايما بعبر عن احساسى انا وعلى قدر انفعالى بالنص ..... وانا بكتب رباعيات وبنشرها

فى جريدة الغد ومعى بعض الأصدقاء ممن ينشرون اعمالهم ايضا بالغد وانا اعتقد انك لو كتبت

سياسه ح يكونلك مكان معانا حتى لو تاخر قليلا عرفت انى مبعرفش اجامل واللا لسه برضه

مش مصدق انك شاعر كبييييييير

دمت لنا يا اعز الناس

ابـن الجـنــوب

[soooo]

استاذي القدير

انا قعدت متنح لمدة ربع ساعة تقريبا بعد ما قريت كلامك ده ..

وقريتها مره واتنين وتاته واربعه ..

يمكن عجبتني الحاله ككل ..

يمكن عجبني قدرتك على توصيل المعنى اللي انت عايز توصله ..

او اللي اعتقد انك عايز توصله ..

الحل اهوو..........................

صرخه ضّوت بعدها عم السكات ...............

اصل اللى قالها كان عجوز ....قالها ومات

ولاحد فاهم اصده ايه .....؟

ولا حد شاف الحل اللى قال عليه....

غير هوه بس !!

وللاسف مات العجوز!!

مات مالالم مات مالندم ؟؟

يمكن يجوز؟

ويمكن كمان زى اما قالو ..........

انه مات مالجوع..................................!!!!! :D !!!!!

<{POST_SNAPBACK}>

هل هو ده الحل اللي انت تقصده ؟؟

هل قصدك ان الحل لحالة المنع العام .. هو الموت ..

زي ما مات الراجل العجوز

اعذرني لو ما كنتش فهمت كويس .. بس انا صعيدي ولسه ريحة البنج مالعملية في مناخيري

يمكن ده مأثر علي

:D

بصراحه عجبتني حالة التشاؤم بتاعتك دي ..

مش كده وبس

لأ

انا شايف انها افضل ما كتب عن الحالة اللي بنعيشها من منع وقمع وتحريم وفرض

بجد والله انا باحبك جدا جدا موووووووووووت يا استاااااااذي

[هشام الجنيدى]

اخوانى الاعزاء ..............شكرااااااااااااااا

شكرا على كل شىء

اختنا العزيزه بنت مصريه انا مفرحان جدا جدا جدا ان كلماتى قدرت تستفز كلماتك وانتى على فكره بتكتبى عاميه حلو بس يمكن علشان مش لونك الاساسى فانتى دايما بتبصى له على انه نمره اتنين بالنسبه ليكى بس صدقينى الفنان لوحه كبيره متكونه من الوان كتير نقدر نقول ان كل لون فيها على حده جميل بس اللوحه مليانه الوان جنب بعضها نقدر نقول غيه فى الجمال

اخى شاعر الرومانسيه انا بشكرك جدا وبقولك ان انا معاك فى ان العاميه المسموعه بيبان فيها الوزن والموسيقى احسن من انها تنكتب لان انا لما كتبت دى كنت حاسس لما قريتهاعلى اصحابى انها سلسه بس لمااديتها لواحد صاحبى يقراها حس انها تقيله شويه

اخى العزيز ابن الجنوب انا مش عارف اقولك ايه ولا ايه ولا ايه بس شوف انا فرحان فعلا جدا بان فى شخص بيقدرنى زيك ومقتنع بيا بالشكل ده

اما موضوع الكتابه السياسيه فانا لا اعتبر نفسى شاعر سياسى لان الشعر شعر مشاعر وشعور اما بحس ان كلمه السياسه دى سجن اخترعه اللى بيتضايق من الشعر اللى بينقد افعال خاطئه فى الوطن والبلد يعنى بحس انه اخدها بمبدا العند وبس

شكرا على ثقتك الغاليه

اخى الذى غاب كثيرا سوووووووو فرحت جدا ان تكون عودتك من خلال ردك الجميل واطراءك العاطر لكلماتى المتواضعه ويزود من فرحتى كمان انك بتعتبرنى استاذ وانا لا اتستطيع تحمل تلك المسؤليه وحدى (رحم الله امرىء عرف قدر نفسه )

شكرااااااااااااااا لكم جميعا واتمنى منكم دوام الثقه :D

تم تعديل 8 أغسطس 2005 بواسطة هشام الجنيدى

[مى محمد]

لست أدرى لماذا تذكرت قصيدة الممنوعات للرائع احمد فؤاد نجم عندما قرأت قصيدتك الرائعة ايضا..

و كل يوم فى حبك تزيد الممنوعات

و كل يوم بحبك..اكتر من اللى فات

ابداعك يعجز الكلام عن التعبير عنه....و الفكر و القلب يهفوان دائما لقراءة المزيد من اعمالك....فلا تجعلنا ننتظر كثيرا :D

[shahd]

سلمت اناملك اخي الفاضل حقا مبدع متميز في كل حالاتك

[هشام الجنيدى]

سعدت بمرورك يا اخت مى واتمنى انا ايضا ان اكتب اليومين دول لانى بصراحه مش متعود اكتب فى الصيف .......

مش عارف ليه .............. :ninja:

ودى اول قصيده صيفى اكتبها حياتى :D

وربنا يسهل ........ :blink:

الاخت شهد سلمتى لنا من كل سوء

وشكرااااااااااااااا :wub:

[ENG. BEHAIRY]

ممنـــوع يا طـــير تعلى لفــوق ممـنـوع !

ممنوع يا بحــــر الموج يثـــور ممنـوع !

ممنوع يا مشاعل النور تقيدى ممـنوع !

ممنوع يا رايات الخير ترفرفى ممنوع !

ممنــوع ياقــلم تقـــول لنـا

إحنا فين فكرنا ؟؟

دا الزرعـة صـفره معفنة

هو دوت أكلنا !!

والميه واقفــة فى حينا

تشكى البؤس لربنا

أخى المبدع / هشام

تســـميه متشـــائم جدًا .. وأســميه متفائـل جـدًا

فى قاع البحار تســـتقر اغلى الدرر والجواهـر

وفى الشـــدائد والمحـن تظــهر معـــادن الناس

يقــــول الله تعالى ( فَإِنَّ مَعَ الْعُسْــــرِ يُسْــــراً،

إِنَّ مَعَ الْعُسْرِ يُسْراً ) الإنشــــراح 5 ، 6

، ففى شـــدة الكرب خرجت لنا كلمات هشــــام

لقد وصـفت فأجـدت ..وعـبرت فأثرت ، وبكـيت

فأبــكيت .. . ... دمــت بارعًــا ورائعًـــا

إنها رسـالة أهل الفــكر والعلـم والفضل فى إثارة وقيادة الأمم وإحياء الشعوب

[أنـفـــال]

ليست الأشياء دائما ًكما تبدو....!

تلك هي فلسفة الرمز...

الالتصاق بالواقع ليس تشاؤماً..

و لمس الحقيقة بلا قفاز قد يكون مؤلماً.. أو قاتلاً.. كما حدث للعجوز ..

فربما لمس الحقيقة...!

أحسنت .. إلى حد جميل..

دمت بخير.

أنفال

[هشام الجنيدى]

ضاقت ولما استحكمت حلقاتها فرجت ........ وكنت اظنها لا تفرج.

اخى الفاضل الباشمهندس بحيرى شكرا لمرورك الكريم وتعليقك الذى اثرى صفحتى :wub:

اختى العزيزه انفال شكرا جزيلا على مرورك ومن زمان وانا افتقد حضوركهنا ولكن حمد الله على السلامه .....

:)