حضن بلادى ( نشيد لأطفال مصر )

[emadiab]

حضن بلادى

حادى بادى ماخدش الا دى

الف واطوف الدنيا بحالها

و ارجع تانى لحضن بلادى

جدى وجدك كان فلاح

رغم شقاه عايش مرتاح

ما دام بيكفيه قلب الوادى

حادى بادى ماخدش الا دى

واد يا مجاهد لازم تعقل

حتفوتها لمين لما حترحل

دى حبيبتك عليك بتنادى

ازاى تحلم بالمستقبل

و تتمنى انه يكون اجمل

و انت ملكش جذور او ماضى

حادى بادى ماخدش الا دى

صوتها فى قلبك كان بيقول

مهما البعد ما بيننا يطول

انا برده اولى بولادى

دق بقوة على ابوابها

ارجع ليها وحب ترابها

تلاقيها فاتحة الأيادى

حادى بادى ماخدش الا دى

الف واطوف الدنيا بحالها

وارجع تانى لحضن بلادى

[ebnelganoup]

الله ينور يا عمده ايه الجمال والتمكن ده متتصورش فرحتى بيك قد ايه لانى عاشق لشعر العاميه والزجل الجميل

اللى حاسس انك بارع فيه بس اياك تعمل زينا وتكسل ندعوك للاستمرار دائما يا عمده وربنا يوفقك ويعينك

يا عمده وكل الشكر للاخت الغاليه شهد التى اهدتنا شاعر مميز وقوى اجبرنى شخصيا ان انتظر كل جديد يطرحه

دمت لنا فارسا مبدعا

دمت بكل خير

ابـن الجـنــوب

[bentmasria]

حادى بادى ماخدش الا دى

مبارك علينا شاعر واعد

وقلم نابض بحب مصر

جميل احساسك ياعماد بل اكثر من رائع

اتمنى تسجلها بصوتك وتسمعها تانى

وقوللى حتلاحظ ايه :)

ربنا يوفقك ومنتظرين الجديد

[emadiab]

عزيزى ابن الجنوب عزيزتى بنت مصية شكلى حفضل اشكركم من دلوقتى لعشر سنين قدام

طبعا انا حاسس قدام كلامكم الجميل بالإحراج و المسئولية الكبيرة اللى حتحملها الفترة الجاية وخصوصا انى مش قادر اكتب حاجة جديدة رغم انى عندى افكار كويسة

لعلمك يا استاذ ابن الجنوب الشكر وصل للأستاذة شهد مباشرة

و بالنسبة لتسجيل النشيد يا بنت مصرية هو فعلا اتسجل بصوت واحد اسمه احمد السيد و اتلحن بلحنين مختلفين و كان فى موقع شبابى لكن انا مش قادر احصل على لنك التحميل عشان احتفظ بيه لكن ححاول اجيبه و احطه هنا عشان تستمعمتعوا بيه

[emadiab]

للأسف انا مش قادر احصل على الملف بتاع النشيد لكنى حصلت على اللنك

http://www.shababytv.com/multimedia/sho3ra2/7ady-bady.rm

[مى محمد]

رائع يا عماد....القصيدة ممتعة الى اقصى حد...ولكن.....

لى بعض الملاحظات على الوزن فى بعض الابيات وهذه العيوب يمكن تلافيها اذا ما اتبعت نصيحة بنت مصرية وقمت بقراءة القصيدة بصوت عالى و ستلاحظ الكسر فى الوزن....

هذا البيت على سبيل المثال......ما دام بيكفيه قلب الوادى ستلاحظ ان وزنه لا يتفق مع البيت الذي يسبقه

ولكن ملاحظاتى تلك لن تؤثر على جودة الفكرة والتعبير....قصيدتك اكثر من رائعة....و نحن فى انتظار المزيد :)

[emadiab]

شكرا على ردك يا مى و على ملاحظتك اللى اسعدتنى جدا و فعلا البيت ده كان مضايقنى قوى لكن بعد ما خلصت القصيدة ونشرتها كان صعب ارجع افكر فى تعديلها