المغتربين و انتخابات الرئاسة

[osaimi]

طب المره اللي فاتت واضحك علينا ، هيعملوا ايه فينا الانتخابات القادمة ، خلاص 2011 قربت ولازم نشتغل عالموضوع ده ، مش عاوزين نفضل كم مهمل

يجب عدم إهمال هذا الموضوع الهام جدا ، ليس هناك مسلمات فى انتخاب رئيس مصر القادم ، لازم كل واحد يدافع عن حقه فى إعطاء صوته

[se_ Elsyed]

أنا اللي باجيبه لنفسي وضغطي بيرتفع كل ما أقرأ الحاجات دي

بيقول لك بقى يا سيدي عشان الإنتخابات البرلمانية العراقية اللي ستُجرى في 17 مارس الحالي ... قررت الحكومة العراقية فتح 6 مراكز إقتراع في مصر للاجئين العراقيين .. 2 في القاهرة و2 في الأسكندرية والباقيان في أمكان تجمع الجالية العراقية

وهذا شيء أبسط ما يكون من حقوق المواطنة التي تتشدقا بها حكومتنا ليل نهار ..

والظاهرة إن مواطنتهم غير مواطتنا

ولا أدرى ما هو الأعجاز في توفير مراكز إنتخابية للمصريين بالخارج .. إلا إذا كان تخوف مبارك من كُره المغتربين له لإنه السبب الأول لشحطتهم عند اللي يسووا واللي ما يسواش هو سبب ذلك

وأعلم تماماً إن حتى اللي جوه البلد مش واخد حقه الأنتخابي ويتم أرهابهم وتكميم أفواههم .. فشايف واحد واقف في أخر الصف هايقول لي : مش لما يوفروا جوه يبقوا يوفروا بره ؟

لكن كل أما أشوف وأتابع عمليات أنتخابية في البلاد الأخرى .. مش هاقول أوروبا ولا أمريكا .. أتحسر والله

حتى الهند

ولا أستهين بها والله

لكن عندما نعلم يا سادة إن 600 مليون هندي يعيشون تحت خط الفقر ويكادوا يكونوا جهلاء وأميون .. ولكن مع ذلك الحكومات الهندية المتعاقبة بتكون حريصه على كسب ودهم لقوتهم الأنتخابية وتحرص على أن تذهب إليهم بدلاً من أن يأتوا هم لها ...

فعلى سبيل المثال ... هناك مدن وقُرى كاملة تكاد تكون في الاحراش والغابات ويصعب الوصول إليها بالوسائل العادية فتضطر الحكومة إلى أنها تاخذ جهاز الأقتراع الأشبة بالكيبورد وهو أختراع هندي كامل .. تأخذه إليهم عن طريق ركوب الأفيال لكي تٌسهل لهم عملية الأنتخاب ...

وعندما نعلم أن الإنتخابات البرلمانية العراقية ستُجرى تحت رقابة 78 الف مُراقب

78 ألف

تخيلوا ؟؟؟؟؟؟؟

إنما الحكومة العوره بتاعتنا لما تيجي سيرة مراقبين .. يقول لك التدخل الاجنبي والأستقلال ومقدرات الوطن وغحنا عندنا أنتخابات زي الفل - عشان بنستخدم فيها برسيل -

لأ والنبي حوش الأستقلال وعدم التدخل في قرارتنا

واللي ما يعرفهوش أو عارفين ويستهبلوا ... إن حتى أنتخابات أمريكا نفسها بتُجرى تحت أشراف مراقبين دوليين .. لإن ده شرف لأي دولة أن يتقال عليها إن عندها انتخابات حُره نزيهه

لكن تقول لمين وتعيد لمين طالما كلنا ساكتين ومطنشين ...

-----------------

عاوز أقترح حاجه ...

أنا بأعترف الأول إن ماليش في الفيس بوك خالص ... مش بأعرف أستخدمه ..

فأرجو ممن لديهم خبرة إنهم يعملوا موقع بإسم المغتربين للمطالبة بحقنا في الإنتخاب .. فنحن لا نقل عن 7 مليون مغترب مصري في بلاد الله لخق الله .... ونعمل جميعاً على أنتشار هذا الموقع لتوصيل صوتنا للي ما يتسموش ... وأتعهد أمامكم بتحمُل أي تكاليف ناتجه عن ذلك ...

بس حد يظبط لنا موقع حلو كده ... ويتعاقد مع الحاج جوجل وأخواته لنشر هذا الموقع ... ونوصل صوتنا لجميع الجرايد .. على الأقل نبقى عملنا اللي علينا ..

ومنتظر من أصحاب الخبرة ضربة البداية ... على الأقل عشان نرضي ضميرنا قدام ربنا لما يسألنا عن سبب سلبيتنا ..

[أحمد سيف]

موجوده يا أبو الأسيان ... وآدي اللينك بتاعها

http://www.facebook.com/group.php?gid=3340...7.3437757845..1

المهم حد من المسؤولين عندنا يكون بيدخل على الفيس بوك علشان يعرف رأي الشعب الحقيقي فيه وفي النظام اللي بيتبعه. والأهم بعد ما يعرف يختشي على دمه ويسيب الكرسي.

[myusername]

مش عارف... بس استشعر بالمبالغة.. و يمكن بفتكر "لسه بدرى قوى".. لما بقعد اقرا حاجات زى كده.

انا مش قصدى احباط ولا حاجة.. بس يعنى هيستفيد ايه المغتربين لما يدوا اصواتهم؟ و كام مغترب هيفضى نفسه علشان يدى صوته؟

اعتقد ان فيه حاجات قد تكون اهم شوية.. من موضوع الحق الانتخابى.. لان اصلا ما بُنِىَ على باطل فهو باطل..

[fatfouta]

سنة 99 تقريبا كان فيه انتخابات رئاسية امريكية.....وكنت انا بشتغل فى شركة كبيرة وكان معايا فى المكتب واحدة امريكية وواحدة تانى مصرية بس مولودة وكانت عايشة فى امريكا......يعنى مصرية امريكية

فى يوم جم قالولى بصى يا فتفوتة احنا بكرة هنعملك هاند اوفر لشغلنا لمده يوم قلتلهم ليه؟؟ ردت عليا الامريكية وقلتلى هنروح السفارة عشان ننتخب

سكتت طبعا واتكتمت وقولت يا حلاوة يا ولاد شوف بلدهم عاوزة رايهم حتى وهما برا

ومن ساعة ماتغربت وانا بفكر فى الموضوع ده واقول ليه انا مادليش بصوتى هو مش من حقى يعنى اختار؟؟

والاحساس ده بيجيلى فى اى فترة انتخابات فى مصر بحس انهم مستغنيين عننا وعن اصواتنا

وممكن يكونوا خايفين فعلا من المغتربين لاسباب كتيرة جداااا يطول شرحها

او النزاهة مثلا فى بعض السفارات.......امال اذاى يغشونا

بس موضوع الفيس بوك ده اليومين دول يخوف والله.......خدوا بالكوا عشان الحكومة مالية الفيس بوك ومتخفيين برضو :ph34r:

[Ambitious]

ودى من الحاجات اللى بيطالب بيها دكتور محمدالبرادعى ..

لو إتفقتم على جروب وعملتوه بقواعد كويسة ممكن تحاولوا تنشروه عن طريق جروب حملة ترشيح البرادعى .. ممكن تلاقوا استجابة ودعم كويسين ..

جروب حملة دعم البرادعى

http://www.facebook.com/group.php?gid=3340...6565&ref=ts

[pink rose]

موجوده يا أبو الأسيان ... وآدي اللينك بتاعها

http://www.facebook.com/group.php?gid=3340...7.3437757845..1

المهم حد من المسؤولين عندنا يكون بيدخل على الفيس بوك علشان يعرف رأي الشعب الحقيقي فيه وفي النظام اللي بيتبعه. والأهم بعد ما يعرف يختشي على دمه ويسيب الكرسي.

عدد اعضاء الجروب قليل جدا يا باشمهندس لازم يبقى في انتشار للجروب عشان اكبر عدد من المغتربين ينضم و نقدر نتكلم و نطالب بحقنا

[أحمد سيف]

موجوده يا أبو الأسيان ... وآدي اللينك بتاعها

http://www.facebook.com/group.php?gid=3340...7.3437757845..1

المهم حد من المسؤولين عندنا يكون بيدخل على الفيس بوك علشان يعرف رأي الشعب الحقيقي فيه وفي النظام اللي بيتبعه. والأهم بعد ما يعرف يختشي على دمه ويسيب الكرسي.

عدد اعضاء الجروب قليل جدا يا باشمهندس لازم يبقى في انتشار للجروب عشان اكبر عدد من المغتربين ينضم و نقدر نتكلم و نطالب بحقنا

ماهي كل الجروبز بتبتدي صغيره وبعدين الناس بتسمع عنها وبتنضم اليها فبتكبر.

لو كل واحد مننا انضمّ لهذه المجموعة ودعا أصحابه ومعارفه للانضمام اليها هتنموا بسرعة كبيرة.

أحسن ما يكون عندنا عشرين جروب لنفس الهدف كل واحده فيها ثلاثين ولا أربعين عضو.

على فكره حملة الدكتور البرادعي تجاوز عدد المنضمين ليها 150 ألف بعد ما كان 90 ألف من اسبوعين تقريبا.

وطبعا كل ما الجروب تكبر كل ما الخوف من حصول مضايقات لأعضائها يقل ... ماهو مش معقول هيعتقلوا نص الشعب علشان مشتركين في جروبات الفيس بوك ... شكلهم هيبقى وحش أوي.

[sarmar]

ياخوانا انتم بتتعبوا نفسكم ومفكرين ان راينا عند الحكومة لة اهمية ؟؟؟؟ نتايج الانتخابات بتكون متربطة ومتجهزة من الاول واللى عايزين يعملوة بيعملوة رغم انف 80 مليون مصرى وياحسرتنا ان اللى بيخرب فى الانتخابات هما ايضا مصريين منتزعى الضمير

الاخت فتفوتة بتتكلم صح لان عندهم فى امريكا بيهتموا بالانسان وبيهتموا براى هذا الانسان حتى ولو كان من اولاد الشوارع فهو صاحب لهذة البلد مثلى مثلة ولة حق فاكرين كلمة حق هههه مازلت عندهم لها مكانة قوية هى التى تجعل المرشح يذهب اليك فى عقر دارك ويتعرف على مشاكلك

وفاكرين الصدق نعم يامداد فتفوتة عندهم المرشح اذا وعد اوفى وصدق فى وعدة بس بشرط عدم اخلالة بواجبات واصول القانون طبعا هذة الكلمات اللى هى الصدق والحق والمصطلحات القديمة جدا ليس لها مفعول عندنا

لانة لو المرشح صادق ويريد خدم البلد فهو سوف يذهب الينا كمغتربين وفى اى مكان هاجرنا الية ويتشوق الى ان ندلى بصوتنا لكن هو هدفة من الترشيح شىء اخر ومختلف جدا وفى النهاية مش فارقة معاه

اعرفوها واضحة كالشمس وبدون تسمية الى اى حزب لان حزبى الوحيد هو الغالية مصر مصر فقط اذا جرت الانتخابات كما حدث من قبل وعدم اكتراث الدولة بمواطنيها خاصة المعدمين والمهاجرين للخارج فاعتبر ان كل المرشحين هم عبدة مشتاق وسلم لى ع الانتخابات

[Ambitious]

هو فعلا العدد قليل عشان كده لقيت لكم الجروب ده وفيه ناس مشتركة فيه من حملة البرادعى منهم عبد الرحمن يوسف

http://www.facebook.com/group.php?v=wall&a...id=193739034947

[Sherief AbdelWahab]

لماذا لم يطالب مخلوق واحد في الميديا المصرية بهذا الحق المشروع لمصريي الاغتراب بالتصويت انتخابياً؟ أم أن المثقفين مثلهم مثل الحكومة و"الحزب" لا يعرفون المغترب إلا لأجل "المصاري"؟

خلص الكلام

[doha]

عدم وجود حق انتخابي للمغترب هو احد ( النعم ) الي مغرقانا بره ومش حاسين ..

في الانتخابات الرئاسية الماضية كانت الاسماء المرشحه للانتخاب السيد الرئيس وايمن نور ونعمان جمعه ( على مااذكر كان اسمه كده ) وصباحي ( بتاع الطربوش ) وكام اسم تانيين مش فكراهم طبعا ..

رسيت طبعا على واحد من ثلاثه مبارك ولا نور ولا جمعه ..

يومها فكرت .. ياترى لو صوت لواحد من دول ونجح وانا اصلا مش مقتنعه بيه مش دي تبقى شهاده زور ؟

هل ينفع ادخل واقول صوتي ان ولا واحد وعيدوا الانتخابات مع مرشحين جدد ؟؟ للاسف الخيار ده غير متاح ..

ساعتها بس حمدت ربنا على الموقف الي حصلي قبلها بكام سنة لما رحت اطلع بطاقة انتخابية وقالوا لي كل سنة وانتي طيبة تعالي على شهر 12 لما نفتح باب القيد .. حمدت ربنا ان معنديش بطاقه ..

زوجي بقى كان من المغضوب عليهم ولا الضالين الي عنده بطاقة انتخابية .. وبيني وبينكم خفنا من الاشاعه الي طلعت وقتها ان الي مش هينتخب هيدفع غرامه 100 جنيه .. ولان الاشاعه كانت مؤكده في وسائل الاعلام حتى ان في سيارات كانت بتجوب القرى بميكرفونات ان ياعالم انتخبوا ..

زوجي راح على اساس هيحصل زي المرة الي فاتت لما راح ينتخب قريب له في مجلس الشعب واتفاجأ بان اسمه مش في القوائم الانتخابيه واضطر ينتخب باسم واحد قريبه ( ميت ) هم الاثنين اسمهم محمد وهم الاثنين لهم نفس لقب العائلة والفرق ان جوزي الصاحي اسمه مش في القائمة وقريبة الئم منه ولحق يقيد نفسه فيها .. قال ان ملقيتش اسمي المرة دي مش هنتخب وكفى الله المؤمنين القتال ..

المهم راح زوجي انتخب .. شكله لقي اسمه لانه لما رجع سالته انتخبت قالي ايوه .. مين قال مبارك طبعا .. مش عارفه هو اتبرمج على كده ولا مبارك حظة حلو ولا عشان هو عارفه ناجح ناجح .. الله اعلم ..

يوم ظهور النتيجه بليل واول ماعرفنا ان مبارك نجح بعدها بدقائق سمعنا دوشة في الشارع بما يشبه الزفه .. طلعنا في البلكونه نشوف ايه لقينا عربية نص نقل ماشيه بمكيروفونات وفيها ( صييت ) عمال يغني ( ونجحت .. يامبارك .. ونجحت ) وكأنه شمتان ولا ايه ..

كان في زفة بجد وشباب عماله تطبل وتهيص ( وترقص كمان ) ..

بيني وبينكم .. عجبتني الزفة .. ووقفت اتفرج ..

ومن ساعتها .. مازلت بتفرج ..

[عادل أبوزيد]

يعود هذا الموضوع إلى خمس سنوات مضت و مع الحراك السياسى الذى صاحب ظهور البرادعى على الساحة ، فالموضوع كما لو كان وليد الساعة.

ما سبق كان إستهلالا لابد منه

من ضمن الشروط السبعة التى وضعها البرادعى فى تقديمه للجمعية المصرية للتغيير :

مشاركة المغتربين فى الإنتخابات - التصويت بالرقم القومى - رقابة قضائية و دولية على الإنتخابات

الحراك السياسى الحالي يدعو الجميع لممارسة المواطنة.

[عصام أبوالفتح]

أعتقد يا أستاذ عادل ان الوقت قد حان لتحرك اكبر من التدوين .. والفكرة التى طرحها س س لعمل جروب على الفيس بوك ممتازة وبالفعل هى موجودة لكنها تطالب فقط بالحق فى الانتخاب والتصويت .

ما يشغل تفكيرى الآن هو الحقوق السياسية للمغتربين المصريين بشكل عام وأهمها ما يلى

1- الحق فى استخراج بطاقة انتخابية أو التصويت بجواز السفر فى السفارة المصرية بأى بلد فى العالم

2- الحق فى التمثيل النيابى لمجلس الشعب وهذا يتطلب وجود انتخابات لمرشحين شعبيين لتمثيل كل جالية مصرية بكل بلد توجد بها سفارة مصرية على ان يكون الحضور للجلسات شخصياً او عن طريق الفيديو كونفرانس.

3- الحق فى الترشح للرئاسة بشرط تمثيل الجالية فى مجلس الشعب لدورة على الاقل مع عدم ازدواج الجنسية له ولاقاربه من الدرجة الاولى

4- الحق فى تمثيل الاحزاب السياسية المختلفة وتكوينها أو الالتحاق بها خارج مصر

ما رأيكم ان نتبنى إنشاء قناة للمحاورات على الفيس بوك تطالب بهذه الحقوق السياسية كلها دفعة واحدة ؟

هذه محاولة منى تحتاج لمشاركتنا جميعاً

حملة المغتربين المصريين للمطالبة بحقوقهم السياسية

[Alshiekh]

هو فعلا العدد قليل عشان كده لقيت لكم الجروب ده وفيه ناس مشتركة فيه من حملة البرادعى منهم عبد الرحمن يوسف

http://www.facebook.com/group.php?v=wall&a...id=193739034947

أعتقد يا أستاذ عادل ان الوقت قد حان لتحرك اكبر من التدوين .. والفكرة التى طرحها س س لعمل جروب على الفيس بوك ممتازة وبالفعل هى موجودة لكنها تطالب فقط بالحق فى الانتخاب والتصويت .

ما يشغل تفكيرى الآن هو الحقوق السياسية للمغتربين المصريين بشكل عام وأهمها ما يلى

1- الحق فى استخراج بطاقة انتخابية أو التصويت بجواز السفر فى السفارة المصرية بأى بلد فى العالم

2- الحق فى التمثيل النيابى لمجلس الشعب وهذا يتطلب وجود انتخابات لمرشحين شعبيين لتمثيل كل جالية مصرية بكل بلد توجد بها سفارة مصرية على ان يكون الحضور للجلسات شخصياً او عن طريق الفيديو كونفرانس.

3- الحق فى الترشح للرئاسة بشرط تمثيل الجالية فى مجلس الشعب لدورة على الاقل مع عدم ازدواج الجنسية له ولاقاربه من الدرجة الاولى

4- الحق فى تمثيل الاحزاب السياسية المختلفة وتكوينها أو الالتحاق بها خارج مصر

ما رأيكم ان نتبنى إنشاء قناة للمحاورات على الفيس بوك تطالب بهذه الحقوق السياسية كلها دفعة واحدة ؟

هذه محاولة منى تحتاج لمشاركتنا جميعاً

حملة المغتربين المصريين للمطالبة بحقوقهم السياسية

أ. عصام

جميل ان يكون هناك دعوة للمكالبة بحق المغترب وغير المغترب فى عملية الاقتراع والتصويت.

لكن لى وجهة نظر فى هذا الموضوع ، لماذا لانوحد جهودنا فى جروب واحد بدلا من تعدد الجروب ، نحن لسنا احزاب ذوى اتجاهات مختلفة ، بل كلنا نعانى من اهدار نفس الحق ، ومطلبنا واحد الا وهو استرداد هذا الحق.

تحياتى

[عصام أبوالفتح]

الأخ محمد .. Ask High