أشعار بالمصرية الحديثة مسابقة حب مصر

[bentmasria]

1

قاعد لوعد السما سهران و مستنظره

و عاجبنى ضوء القمر لكن غريب منظره

يمكن نجوم السما تقدر تفكرنى

القلب مش محتاج لحد يفكره

2

عديت غريب مضطهد و الغنوة غنوة نوح

زى كل الأنبيا متصاب بداء البوح

بص لى نظرة حب يمكن تطهرنى

و الطهر مش فى البدن الطهر طهر الروح

3

مستغربك حتى القمر والبحر و خطوط الرصيف

مستغرباك الاغنيات طعم الرغيف

مستغرباك اللهفة فى عيون البنات

حتى كلام الحب فى الغربة سخيف

4

منيش حزنان و لا خايف و لا غرقان فى بحر الام

و لامحتاج لصوت دافى يطمنى و لو بكلام

و لا قلبك حيفرق لما يحضنى

ما تلمسنيش و ماتجيش تانى فى الاحلام

5

باين عليك طيب و ح تغنى

لو تبتدى قلبك ح يفهمنى

باين عليك فيك م الملايكة كتير

و من البشر فيك حاجه ح تخونى

6

بين السعادة و العذاب فى 1000غنوة

سعات تلاقى فى الزحام نفسك فى خلوة

الفرق بين الجنة ايه و النار

مساحة الاختيار و صبية حلوة

7

عصفورة جت م القمر تعشقنى كام ساعة

و تحى اللى اتقتل جوايا بشجاعة

بصيت لقيت فى عنيها كل اللى بحلم به

ملعون ابو الاحلام لو تبقى شماعة

8

ينى و بينك سور يا عصفورة

و حرس بحر شطوطه مسحورة

بينى وبينك العشق خلانى

عديت كما الابطال ف أسطورة

9

أحزن ده حزنك نبى

فى طوفان عنيك مركبى

عدت لجنتها

لقت الملاك اجنبى

10

يا حبيبتى يا أخر برج مراقبة ف خانة اليك

انا جايلك رغم الحزن و رغم الجرح و رغم الشك

انا جايلك شايل حلم بيحلم بيكى

اتاريكى فى قلبى و قلبى عليه الرك

11

حدوته بنت الإيه عجبانى ضحكتها

وكلامها وقت الدلع بصتها شهقتها

و عاجبنى فيها الشجن و الدمع و الاحزان

بركان مشاعر حرقنى لما بحت لها

12

أقتل وقاتل و حارب و ادخل الحواديت

أحرق ودمر و خرب ديتها عود كبريت

الدنيا غابة كبيرة وانت سيدها

بدايتها لو تختلف نهايتها فى التوابيت

13

ليه الصليب كان خشب و التمن فضه

و الحلم ليه معجزة مش شغلة تتقضى

أحلم وما يهمكش م الاحلام

الدنيا متنظمة ..أحراش ...غابات فوضى

14

مش فكرة لو انك جميلة و بعشقك

أو ان لما تحبى قلبى يحن لك

انا بعشقك رغم الزحام والضلمة و الخنقة

وعشان سعات لما يخاف القلب يبص لك

15

القلب اخضر و العيون فزدقى

اجمل من الحواديت اذ تصدقى

ما تبعديش قلبك يتوه منى

ما تقربيش كمان اخاف تغرقى

16

لما الشيطان قال لأ

ربك عطاله الحق

و لا قال ده لازم يعتقل

و لا جه الملايكة ونزلوا دق

17

شلة نجوم فى السما بتغنى حواليكى

و كمان عيون القمر بتبص ف عنيكى

أنا قلتلك ما تكلميش حد ف غيابى

لو حتى كان م السما يبقى اترمى بيكى

18

تقدر تكون ولا ما تقدرشى

قلبك كما العصافير ما تحزنشى

ح تعود اكيد و اكيد كمان ح تكون

زى اللى عدى البحر وقلبه ما اتهانشى

19

دايما يا قلبى بتخسر الاحلام

و الحلم يبدا ورا و ما ينتهيش قدام

علشانك اخضر برئ مرسوم بحنية

و الخير بيكسب بس فى الافلام

20

قلبك خلاص ح يخططوه

و يجيبو جيش من عندهم و يقسموه

تقدر تهاجر أو تحارب أو توافق

أو تموت و ده up to you

21

أبدأ لواحدك لأ ما تبدأشى

عدى بعنيك البحر ما تخافشى

تغرق يجوز و تعدى مش معجزة

الفكرة هى ازاى ما تندمشى

22

وطن جميل مبتسم عايش ف أسطورة

و رجاله عشاق و شعرا و حكومته عصفورة

و الخير بيهجم كل يوم هجمه

يا قوادين اختشوا مش هى دى الصورة

23

أترسمت الأحزان على قلبك سكات

كل يوم بخيانه ولحد الممات

دوس على الاوجاع و كمل خطوك

شنطة الاحزان مالتها الزكريات

24

بتبان ف عنيكى حجات و حجات ما تبانش

القلب اللى بيعرف يعشق ابدا ما يخنش

خليك موضوعى و اتكلم عن حاجه فاهمها

القلب اللى بيعرف يعشق ابدا ما يخنش

25

ساعت الهزيمة و ارتكاز الالم

لو صوروك لازم تبان مبتسم

فارد عنيك و بتحكى عن بكرة

و انك بطل علشان بطولته اتهزم

26

القلب لو يقدر يفوت ح يفوت

لو يخلى قلبك م الاغنيات ح يموت

أنت النبى دمعك فوق الصليب عيبه

أحسن كلام يتقال سكوت

27

القلب مش محتاج سواد أكتر

كلن ما يكبر حلمنا يصغر

ح أفضل معاك و ح أغنى للعشاق

و العشق ما يعرفش خط أحمر

28

قلبك مسافر لما بعد المستحيل

لساه بيقدر يبتسم لساه جميل

قلبك ملاك خلاك نبى

بس النهار مش عبقرى و الليل طويل

29

ا

لسه المطر ما غسلش وشك يا غريب

و رافضه بنت الايه تقول انك حبيب

قلبك المليان ضجيج ما بيتسمعش

و كلامك المليان حنين طالع مريب

30

بالى * و ليالى الفوضى و العشاق

و تاريخ بيعرف يغازل جغرافية الأشياء

و نهار بيرسم ضحكة ملونه و فرحه

و انا جوة قلبك يا سمرة تصدقى مشتاق

*جزيرة بالى أندونيسيا

31

هناك العشق ما بيحتجش للترتيب

و نور الشعر بيظهر فجأة ويغيب

و تلقى الانبيا واقفين على الناصية

و بنت بترسم الجنه فى كف حبيب

32

هناك قلبك ح يتكلم وما يخافشى

و تاخد ناس ف حضن عنيك ما تندمشى

تبطل ترجمة عقلك و تلوينه

و تعشق ناس بتعشق او ما تعشقشى

33

هناك عرفاك و حتى ريحة القهوة

و تقدر تدخل التواريخ على سهوة

تلاقى الناس ملايكة بتشتهى حبك

لكن بينك و بين العرش 100فجوة

33

هناك احلام ما جتش لحد بالمرة

تلاقى الشمس عاشقه عنيك و مش حرة

تفرب من شفايفك.... قال

عشان تبقى بلون بشرتك سمرة

34

راسمك تقوب فوق الجدار

ونهار بيسرح ع المدار

راسمك اغانى طيبة و مطرة و شجر

رسمانى ليه ف لحظة حصار؟؟؟؟؟

36

قلبك يا بنت الايه غاوينى

أكبر من الدنيا و ملينى

أحساس كبير بالأمل و الضحك و الافراح

و بخاف عليك يتكسر اكمنه صينى

38

مرسومة أحزانك على قلبى

و انا قلبى ما بيحزنشى و يخبى

باح بكل الحزن للعصافير

الكل قال ان الهوى ذنبى

39

سلام يا أمة الهوى غلاب

وقلبك جمع الاحباب

سلام يا أمة غريب وجدى

ودون بابك كتير ابواب

40

سلام بالراحة بتكلم على ماهلى

ح أعدى عشان عنيكى بلاد و تستهلى

واجيلك زى او مرة باكى حتى ما اعرفكيش

و قلبك يبتسم تانى و يندهلى

41

علشان تكون على مستو الموال

بطل تحب و تكره و مشاعر الاطفال

احكم على الدنيا و من غير نرفزة

تلقى يهوذا ويسوع اتنين من الابطال

43

يا بلاد بتعدى على الحواديت من غير ما تبص

انا جاى لحدك لكن قلبك مش بيحس

يا بلاد نساية و منسيه و مليانه انين

أنا مين؟ و الحزن ازاى عمل يترص

44

ايوة راجعلك اهوه حسينى

طعم المنفى فى حلقى بوسينى

شايل حمل زنوب انا عارف

بس بحبك ............ بتحبينى ؟؟؟؟؟؟

ما بعد الرباعيات

إستحار القلب فيكى

مش لاقيكى

رغم أنك بين أديا

السبب ضحكة عنيكى؟؟

و لا تكشيرة عنيا؟؟؟

هو إيه أصل العبارة؟

العلاقة بين عنيكى و الحضارة

مش شطارة

دايما يحاربو لحد أخر عسكرى

أشمعنى يعنى العسكرى

كان يعنى أخر عسكرى قاتل ابوهم؟؟!!

ما يحربوا مرة لحد أخر حاجه تانية

إفرشى الاحزان برقه

كل احزانك مشقه

هى ايوة زى لأه

44

أنت اللى ملكت القلب و لو

أسرح ف عنيك الكون يحلو

و أغنى لقلبك يفهمنى

بتفاهم زى الطير فى الجو

45

لما قلبك يوجعك ما تقولش اه

لما ايدك تترعش رعشة حياة

لما صوتك يتحبس و تدارى خوفك

تبقى عاشق قلبه مجروح او الاه

46

سهران لوحدك و الوشوش حوليك كتير

الناس بتضحك كلها و حزنك كبير

و البسمه اصعب من شتيمة ابن ياسر للنبى

البسمة اصعب من ركوع قائد أسير

47

لسة السيحارة بتحرقك وقت الكتابة

لسه فنجان قهوتك مليان كأبه

لسة مستنى البشر تبقى بشر

الدنيا مش للشعرا يا ابنى الدنيا غابه

48

لسه قادرة ترفرفى زى الملاك

و انا قلبى لسه لا راح هنا و لا جه هناك

كل الذنوب متعلقة فى رقابتى انا

و الخوف محاوط بسمتى و حبك هلاك

49

مكتوب نموت و نغنى للعايشين اغانى مفرحه

و انا مش ممثل عبقرى انا جثه جوة المشرحه

قالو لى غنى او ناخد قلبك الميت رهين

مرهون لمين يا قلب غاوى المسرحه

50

ح أقولك ايه عن قلبى ما انتى تعرفيه

و بابه غير كل البيبان و يو هاف أ كى

ح اقول بحبك بعشقك اى لاف عنيكى

قلبى بيهوى النوم فى قلبك و يفل فرى

51

متجمعة الاحزان و متكاترة

كل القلوب مكسورة من فترة

هى الحياة مش حلوة بالشكل ده

و لا الاسى جوة البشر فطرة

52

مكتوب يا واد ولا مهوش مكتوب

قلبك يطول البنت و تطولها يا حبوب

او تفترق عنها و تبطل تصدق

ان انت كنت بتتحرق وتدوب

53

عشرين سنة برمموا فى القلب ما بينفعش

عشرين سنه بيرسموا لى الجنة ما بتطلعش

عشرين سنة بينى وبين ضحكتك

السكة لو سكتك اطلع ولو ما ارجعش

54

و أرجع و أقولك يا سمرا سمارة

يا أخر ميراث التاريخ و الحضارة

راجعلك راجعلك و لو فى التابوت

ولائى لعنيكى خلاصة العبارة

55

مهاجر مهاجر صحيح بس بيكى

و عايش فى حزنك و قلقان عليكى

مهاجر و فاكر جميع الغناوى

مهاجر لحبك من الغربه فيكى

انا شايفة ان الشاعر ده لخص احزانى ف حروفه

وقال كلام فعلا متميز

سمحت لنفسى اختارها ليكم

وافتح باب المساجلات

فى حبك يامصر

يللى يا شعراء المحاورات

وصاحب اجمل قصيدة

هديته الكبيره عندنا ان شاء الله

يوم الانتخاب

تورتاية كبيره

عليهااااااااااااااااااااا...........ايه تفتكروا؟؟؟؟؟!!!!!!!!!!!!

[يوسف المصري]

يسلم ذوق "بنت مصرية" ... كلمات رائعة حقًّا تقطر حكمة وتنبض شبابًا وتفوح منها رائحة الطفولة !!

جذبني هذا الخليط الإنساني العجيب فاخترت زهرتين (عفوًا : مقطعين) من هذه الباقة النادرة وترجمتهما إلى اللغة الألمانية. وآمل ألا تكون ترجمتي قللت من قيمة "غذاء ملكات النحل" كثيرًا .

انا بحلم ككل الشعرا بجنة لسه ما اتدخلتش

و بحلم زى كل الناس بعيلة و بيت فى حجم العش

و بحلم بدين يمنع اى نوع م القتل

و رب يحبنا اكتر و ما يهددش

فطب معلش طب معلش طب معلش طب معلش

و يا طيبة طيب انا الغلطان و ما بنكرش

لا انا طالب تحبينى ولا طالب تسامحينى

انا طالب تخلى الجاى ما يغلطش

Ich träume, als alle Dichter, im Paradies noch unberührt.

Und träume, als alle Leute, in Familie und heim auch wenn es ein Nest ist.

Und träume in Religion jeder Art von ermorden, verbieten.

und Gott liebt uns mehr und macht keine trügerische Erpressung!!

Ich entschuldige mich .. Ich entschuldige mich

Oh „Gutes“ OK, Ich bin Die Verfehlung und ich bestreiten nichts!!

Mein Anliegen: „Nicht dass du mich liebst oder mir Verzeihest“!!

Das Anliegen ist: lass nicht bitte Die Nächsten die selben Verfehlung machen !!

[يوسف المصري]

أعتذر ـمقدمًاـ عن التكرار .ولكن لأن الموقع لا يدعم اللغة الألمانية ؛فقد أعدت كتابة الكلمات نفسها على طريقة اللغة الإنجليزية

Ich traeume, als alle Dichter, im Paradies noch unberuehrt.

Und traeume, als alle Leute, in Familie und heim auch wenn es ein Nest ist.

Und traeume in Religion jeder Art von ermorden, verbieten.

und Gott liebt uns mehr und macht keine truegerische Erpressung!!

Ich entschuldige mich..Ich entschuldige mich

Oh „Gutes“ OK, Ich bin Die Verfehlung und ich bestreiten nichts!!

Mein Anliegen: „Nicht dass du mich liebst oder mir Verzeihest“!!

Das Anliegen ist: lass nicht bitte Die Naechsten die selben Verfehlung machen !!