الحياد التام أو الموت الزؤام

[se_ Elsyed]

خرجت علينا أبواق الحزب الحاكم تقول وتهلل بإنه سيكون هناك جو من الحياد التام الإعلامي للتحدث عن المرشحين العشرة المتقدمين للإنتخابات الرئاسية ..

وبصراحة نحن نلمس ذلك تماماً وعن قُرب وما حدش يقدر يقول غير كده ..

وعشان كده فقد قام الرئيس القائد - حفظه الله - بتغيير جميع القيادات الصحفية الموجودة للصحف القومية الوطنية المهلبية وجاء بأستف جديد نيويز كلهم حيوية وهمه عالية وكان هدفه من ذلك القضاء على شلة المطبلاتية والمزمرتية من أمثال سماره أبو زمارة والإبراهيمين نافع وسعده ...

وبصراحة وجدنا جيل جديد مستنسخ يفوق بمراحل تلك الثُلة التي ذهبت إلى مزبلة التاريخ وعلى سبيل المثال طلع لنا واحد إسمه ممتاز القط في الأخبار .. وده قط سيامي ملظلظ ومتربي على الغالي وشارب الصنعة من الأساس وبيفقعنا كل مقال ومقال ليُثبت حياديته التامة ومنها مقال " حمال هموم " الذي أدهش الجميع بإسلوبه الصحفي الراقي والألفاظ المُنتقاه بعناية مثل طشة الملوخية ومحشي البتنجان اللي الرئيس محروم منهم من كثر الهموم اللي شايلها ..

ولا يا عيني على الأهرام المحايده تماماً في موضوع الإنتخابات وكل كام يوم تقوم رزعانه ملحق من 16 صفحة بتتكلم عن إنجازات الريس وحلاوة الريس وجمال الريس ..

ولا الجمهورية واللي بتعمله من الهجوم وعض أي واحد يتكلم كلمه عن الريس وإنجازاته ...

ولا القنوات التليفزيونية الحكومية اللي لحد دلوقت ما شوفناش فيها خيال واحد من المرشحين - إلا الريس طبعاً - وكإنهم مجموعة من اليهود يرشحون أنفسهم أمام الريس ..

ولا أخبار الزيارات المكوكية للمحافظات التي يقوم بها الريس لإفتتاح المشروعات الجديدة والمحاور والطرق العلوية والسفلية ...

ولا عناوين المبايعات اليومية في الجرايد من عينة ...

12 مليون من أتباع الطرق الصوفية يبايعون الرئيس القائد لفترة رئاسة جديدة ..

4 مليون عامل في مجال النسيج يبايعون الأخ القائد صاحب الضربة الجوانية ..

3 مليون طالب في كي جي وان يبايعونك يا مبارك يا نصير المبلولين ..

10 مليون شاب من شباب الجامعات بيقولوا للريس سر على بركة الله وأديها فترة خامسة ..

لدرجة إني حاسس إن عدد سكان مصر قرب يبقى مليار نسمه ..

أظن ما فيش بعد كده حياد .. وبصراحة بقى الواحد يقولها وهو مطمئن وحاطط في بطنة بطيخه صيفة مسممه وأخر حلاوه بإننا من كثر الحياد أصبحنا ولا سويسرا في زمانها ...

[احمد سعد]

يقول الشاعر نجيب سرور

البحر بيضحك ليه

وانا نازله ادلع املا القلل

البحر غضبان ما بيضحكش

أصل الحكاية ما تضحكش

البحر جرحه ما بيدبلش

وجرحنا ولا عمره دبل

مساكين بنضحك من البلوة

زي الديوك و الروح حلوة

سارقاها من السكين حموة

و لسة جوا القلب أمل

قللنا فخارها إناوي

بتقول حكاوي و غناوي

يا قلة الذل أنا ناوي

ما شرب و لو في المية عسل

والبحر بيضحك ليه … ليه

وانا نازلة ادلع املا القلل

ياما ملينا وملينا

لغيرنا وعطشنا ساقينا

صابرين وبحر ما يروينا

شايلين بدال العلة علل

والبحر بيضحك ليه … ليه

[echo_eg]

قمة العدالة و المساواة و النزاهة :)

الدعاية المفروض تبداء من يوم الاربعاء :blush:

لواى حد عدى على كوبرى اكتوبر و بالتحديد وانت داخل على رمسيس هيلقى بوستر ولا نجوم السنيما :) اتعلق لمبارك يوم الثلاثاء :wub:

ولكن السؤال هل هو بطولة فيلم لسيادة الرئيس ام انها من ضمن الدعاية و دة لو بوستر فيلم يبقى لاذم احية على مدى ذكائة لانة فكر فى هذة الفكرة لسداد ديون مصر من ايراد فيلمة ودا يبقى اول رئيس يمثل و مش بعيد يبقى فى الفيلم غنوة

حلوة ودا من باب زيادة دخل الفيلم و اهو كلو بيغنى و دا مش بعيد من بعدما مسك شريف صبرى مخرج روبى المعروف حملة الدعاية ولك ان تتخيل يا سيدى. :lol:

وبينى وبينك مهو الفيلم احنا عيشنو من زمان و الجديد بتاعة تغير الدستور و الانتخابات واهو الكل بيتفرج و النهاية معروفة و سلملى على روبى وشعار الحملة وكل ما اقولة اة يقولى هو لا لا يعنى لا. :D

[se_ Elsyed]

ممكن توضح يا أحمد إيه علاقة القلل بموضوعي .. إلا بقى لو كنت عايز تكسر ورايا قُله ؟ :blush:

[احمد سعد]

عايز اوضحلك ياسيد سيد أننا في الهم سواء

كلنا يتجرع من نفس الكأس

كلنا ضحايا حب مصر

كلنا نرفض الدل والهوان

انا عايز اوصل فكرة ان الانتخاب الدي يحدث امامي الآن جاء على غير ما تصورت

وأصبح كالرسم على الماء

فلا داعي لطرح هدا الموضع لأننا نعرف مسبقا من سيربح

يجب أن ان نتحدث الان على خطة عمل وطني ثوري تتوحد فيه جميع الجبهات كي لا يضحك أحد علينا مرة أخرى