هبه رءوف عزت

[محاور]

الدكتورة هبه رؤوف عزت, سمعت عنها كتير, و لكن مهتمتش بصراحة انى اعرف كتير عنها, لان الاخبار المرتبطة بيها بتكون ليها علاقة بالاخوان و الصراع الحالى بينهم و بين من يحكم مصر الآن.

لكن فى رحلة بحثى الحالية عن آخر تصور وصل له العلماء المسلمين عن كيفية استعادة الخلافة, و علاقة نظام الحكم بالاسلام, و غيره من الامور المتعلقة بالدولة الاسلامية, اكتشفت ان الست دى بتقول كلام كبير جدا فى تخصصها.

يا ترى حد قرأ لها؟

انا اخر جيل قرأت له كان جيل خالد محمد خالد و مصطفى محمود و الشيخ الغزالى و الدكتور يوسف القرضاوى و الدكتور حسين مؤنس, و فى آخر القائمة الدكتور على جمعة - و هو راجل بيقول كلام رائع فى الكتب و كلام تانى خالص و متناقض فى التليفزيون!!! يعنى فى الكتب بيشتم عالخديو اسماعيل, و فى التليفزيون بيشكر فيه, و هكذا هو منهج الدكتور على جمعة. :)

لكن لم اهتم بالوصول للكتب الحديثة نسبيا... اللى فى آخر 10 سنين يعنى او اكتر شوية.

و بما انى اكتشفت هبه رؤوف عزت, فأكيد الجامعات فيها دكاترة كتير تانيين كاتبين كلام زى اللوز, بس مدفون داخل مكتبات الجامعات و على الارفف, و محدش فى دماغه...

حد هنا قرأ لهبه رؤوف عزت؟ او اى حد من جيلها, زى عمار على حسن او غيره؟ :)

يا ريت لو فيه اسماء تانية كاتبين ابحاث عن الخلافة الاسلامية, الدولة الاسلامية, المواطنة فى الاسلام, الليبرالية و الاسلام, و اى شىء له علاقة بالاسلام و الدولة من قريب او بعيد, يكتب هنا و يقول و يدلنا. :)

[Alshiekh]

أنا خايف تكون من جيل الملخصات

البحث عن الحقيقة يستلزم الغوص في الإعماق وليس في كتب المعاصرين.

وعلى فكرة لو كانت قراءاتك منحصرة في الأسماء والإتجات التي ذكرتها، فاسمح لي أن أقول أنك لن تقرأ شيئا بعد.

[محاور]

انا من دعاة القرائة فى كافة الاتجاهات, و لكنى ذكرت هذه الاسماء بالذات, لانهم من أسسوا الكثير من المفاهيم لدى.

لكن قرأت لعباس العقاد و محمد عبده و غيرهم من المفكرين البارزين فى فترتنا المعاصرة.

صحيح انى بدور على الحقيقة, و لكن فى نفس الوقت... انا نفسى انى اضع نواة لمفهوم جديد للخلافة الاسلامية و للدولة الاسلامية, و لعلاقة نظام الحكم بالاسلام, و تحديد ماهية الاسلام نفسه و علاقته بالحكم و علاقة الاسلام بالمجتمع, و المواطنة فى الاسلام, الاسلام و غير المسلمين داخل المجتمع, و التعددية فى الاسلام, الصورة المثالية للمجتمع المسلم (او محاولة تصدير صورة مثالية غير واقعية للمجتمع المسلم), اختلاف الفقهاء و وضعه فى نصابه الصحيح, التصنيفات السياسية و تاريخ الفتن فى الاسلام, مفاهيم كتير جدا محتاجة عالم موسوعى زى بتوع زمان علشان يقدر يفهمها كلها و يستوعبها, و انا راجل على باب الله و عقلى على قدى فى الاستيعاب و الفهم.

يعنى انا لغاية فترة قريبة كنت فاكر ان السنة و الشيعة دى تقسيمات عادية و حاجة حلوة انى اقول انى مسلم سنى, حتى وصلت الى قناعة - ربما ستتغير فى حال الوصول لحقائق جديدة - ان السنة و الشيعة و كل هذه التصنيفات هى تصنيفات سياسية لا علاقة للاسلام بها من قريب او بعيد, و انها تصنيفات تعمل على الفرقة و التنازع بين المسلمين و بعضهم.

أفكارى لا تزال فى طور التكوين و التأسيس, و على الارجح هحتاج من 10 ل15 سنة من دلوقتى عقبال ما اقدر اضع تصور أولى للدولة و الخلافة الاسلامية فى شكلها الجديد اللى انا متوقعه - و اللى ارجح انه هيكون اقرب الى شكل الاتحاد الاوروبى حاليا, بحيث ان كل دولة مسلمة لها نظامها السياسى الخاص بها و تحتفظ بثقافتها الخاصة بها, و لها رئيسها او ملكها ابن الدولة نفسها دون تدخل حاكم اجنبى خارجى كما كان الوضع فى الخلافة الاسلامية سابقا, و ان رئيس الاتحاد يتم تغييره كل 6 شهور كما يحدث فى الاتحاد الاوروبى, و انه هيكون كيان اقتصادى و عسكرى واحد, و معيار الاشتراك فيه ان تكون الدولة مسلمة ذات اغلبية مسلمة...

الفكرة اللى انا بفكر فيها هى ابعد من ذلك كمان... و هى ان الاسلام مفيهوش شكل واحد للخلافة, و لكن الاسلام اساسه الجماعة, و ان المسلمين يكونوا متحدين داخل جماعة واحدة او كيان واحد.... لكن شكل الكيان ده ايه بالظبط؟ ده مش موجود فى الاسلام, و ان المسلمين على حسب عصرهم, يقرروا لوحدهم...

لو حضرتك تقدر تدلنى على اى حد اقرأ له علشان افهم اكتر ابعاد الدولة الاسلامية, و تاريخ الدولة الاسلامية, و مدى تأثير الاسلام فى ثقافات الدول و المجتمعات اللى دخلها, و ازاى الاسلام تفاعل مع هذه المجتمعات...

انا يهمنى جدا الجزء التاريخى السليم.. لان فيه محاولات لتصدير صورة مثالية, و انك طالما بتتكلم عن خلافة, يبقى لازم تتكلم عن المدينة الفاضلة او المدينة المثالية, و ده طبعا استهبال رسمى نظمى... لان مفيش دولة مثالية فى العالم, و كون ان الدولة اسلامية مش معناه ان الحاكم مش هيرتكب اخطاء او ان المجتمع مفيهوش امراض و مشاكل...

محاولة تصدير هذه الصورة المثالية عن الخلافة الاسلامية, اعتقد انه اكتر حاجة بتشوش التفكير... فهى اقرب لصورة ذهنية سنيمائية من كونها صورة حقيقية واقعية.

منتظر رد حضرتك و اعتذر عن الاطالة, و لكن الموضوع فعلا كبيــــــــــــــر جدا و فيه اطراف كتير متشابكة, ما بين علم اجتماع و سياسة و اقتصاد و تاريخ و جغرافيا و حاجات تانية كتير. :)

[محاور]

بالمناسبة انا بدور على الكتابات الحديثة, لان يهمنى اقرأ للتصورات الحديثة للخلافة الاسلامية و لشكل المجتمع المسلم...

بمعنى ادق, يهمنى اقرأ لكتاب كتبوا و عاشوا بعد إسقاط الخلافة الاسلامية.

حتى هذه اللحظة لا يوجد تصور واضح و متماسك و كامل لعلاقة الاسلام بالحكم, لان عملية التجديد توقفت من بضع قرون بكل أسف, مما أدى لتوقف التطور الفكرى لعلماء المسلمين.