عقلى هيس فخلانى ريس

[ابو صلاح]

من كام يوم كدة واحد استشارنى فى موضوع احلام اليقظة ، وفعلا رضيت علية وأديتو أستشارة مجانية فى الموضوع

بس خلانى ارجع بدماغى وافتكر حالات التهيس :D اللى كنت بهيسها ، والحالة هى انى بتخيل نفسى رئيس جمهورية كل ماتصبنى حالة عدم رضا عن المجتمع اللى انا عايش فية

يعنى مثلا الحاجات اللى انا عملتها وانا ريس ( واخدين بالكو حالة التهيس جاتلى ) :D

يعنى فى مجال التعليم

1 - خليت الأطفال والطلبة الصغيرين يحبو التعليم ، وخلتهم يعرفو هما بيتعلمو لية وماخلتش التعليم عملية روتينية وعقاب لابد منة

2 - اهتمت بمواهب الأطفال وعينت ناس تكتشف المواهب دى )

3 - خليت التعليم يربى الأطفال على الأخلاق ، ده حتى فى الأمتحانات الواد يبقا جامب الواد فى اللجنة ومش عارف يجاوب على السؤال ومافيش مراقب فى اللجنة لكن ما بيغشش من اللى جانبو علاشان هو متربى ( شفتو الضمير بتاع العيال الصغيرة ياريت نتعلم منهم) :D

4 - لغيت مكتب التنسيق ونسفتو بدناميت ، وخليت كل طالب يخش الكلية اللى تناسب ميولة بعد اتمام المرحلة الثانوية العامة الممتعة اللى ما كنش فيها اى قلق ولا توتر :D

دة اللى انا فاكر انى حلمت بى فى مجال التعليم

فى مجال الحرية السياسية

1 - لغيت التشريفة بتاعتى ( على اساس ان انا رئيس الجمهورية اوعو تنسو ) وبتاعت الوزرا بتوعى علاشان احس بمشاكل الناس وابقا واحد منهم مش واحد عايش فى القمر

2 - اى حد ممكن يجى يكلمنى فى اى وقت لأن بيتى فى وسط البلد وبيتى بسيط جدا ، دة حتى انا بروح الشغل بالمترو ( شفتو البساطة) :D

3 - كان الشعار الرسمى للبلد< الدين للة والوطن للجميع> ، فدة اللى خلا مافيش تعصب ولا أرهاب

4 - اى حد من الشعب يقول رأيو فى اى مجال وممكن يقترح خطة والوزارة تمشى عليها بعد درستها ، فدة اللى خلا الناس تشارك بجد فى السياسة من غير ما تشعر

يعنى دة اللى هيستو فى مجال السياسة

فى الشئون الداخلية

1 - نضفت البلد جامد وخليت الشوارع مافهاش اى بلاعات والطريق يتلحس كدة من النظافة والنظام

2 - هديت كل المناطق العشوائية زى امبابة وبولاق والمطرية ..... الخ وبنيت مدن جديدة فى الصحراء بعد تجهيزها وخلتها تمام علاشان انقل الناس اللى فى المناطق دى لهناك

فى ناس هتسئلنى لية الأذة دة :D ، لو فكرت شويا ، هتلاقى اللى انا عاملتو دة عمل بطولى لأن المناطق العشوائية يخرج منها كل ما هو سئ من تطرف دينى وقلة أدب ( دة انت تلاقى واد فى حارة ما تمش 3 سنين وبيسب الدين ) طاب اتعلم من مين، دة غير الدوشة ، فأنا قولت مافيش حل غير انى اشيلها

هتسئلونى برضو بعد ماهديت المناطق دى عملت فيها اية ، هقولك يا سيدى المناطق اللى جامب النيل خلتها مناطق زراعية ( علاشان ناكل من خير بلادنا وما نستوردش الأكل من برة ولا حد يزلنا :)

والمناطق البعيدة عن النيل ، اسستها من أول وجديد بطريقة هندسية مدروسة ، والشوارع بعيدة عن بعض بحيث تسمح بمرور السيارات ودوريات البوليس على مدار 24 ساعة

3 - الناس بقت متحضرة والنظافة فى كل مكان ( شفت الخيال الأجتماعى )

4 - الناس بقت تحب الشرطة وبتحترمهم على الأخر مش علاشان خايفة منها لاحسن تلفقلها تهمة ولا تديها بالقلم، لأ علاشان هما ناس بيسهرو على أمن المواطن وبيحمو الشعب لما بيمشو فى مظاهرة سلمية

*( المظاهرات السلمية بقا شئ يحدث يوميا او كل ما قرار من الوزارة مايعجبهمش )

فى مجال الأخلاقيات

1 - أول حاجة عملتها قفلت كل محلات الخمرة اللى فى البلد

2 - قبضت على كل تجار المخدرات ( لأن القبض على تجار المخدرات شئ مش صعب لأن بمجرد انك تقبض على المدمن وتديلو قفين وتسئلو انت جبت المخدرات دى منين هيقولك وبعد كدة تقبض على قالك علية وعلى اللى بعدو وهكذا الى الراس الكبيرة ) مش محتاجة ذكاء يعنى :D فى خلال سنة كنت مخلص على تجار المخدرات كلهم ،

3 - خليت السياحة عندنا ركيزتها الأساسية هى التعرف على حضارتنا وليس على مسخرتنا ، بقا شارع جامعة الدول العربية أسم على مسمى مش تجمع للعاهرات بأسم السياحة

4 -خليت الشعب المصرى بقا عاندو كرامة حتى لو كانت على حساب لقمة عيشو مش علاشان يلقت زبون عربى من قدام فندق ولا سيما يزل نفسو

يعنى دى الحاجات اللى فاكرها من تهيساتى ولو افتكرت حاجة تانى مش هاعيزها عليكم :D

شروط التهيس لمن يهوى التهيس

لازم التهيس يكون نابع من النخاشيش بمعنى ان يكون الموضوع حاسو بجد وشاف المضاد لية على الحقيقة وشكرا

[الأفوكاتو]

الأخ ما سلاه

سوف أنتخبك رئيسا للجمهورية:

لو حققت كل هذه الأحلام الوردية الجميلة.

تم تعديل 24 أغسطس 2005 بواسطة الأفوكاتو

[ابو صلاح]

وانا قبلتك كمواطن فى عهدى :) ووعد منى انى هوفى بعهودى على قد ما أقدر وماتنساش ان انا فى حالة تهيس :D