مشرد ملقى على جانب الطريق نصف عريان

[Abood]

اخوتى الاعزاء

حدث لى هذا الموضوع ثلاث مرات فى مدة قليلة ولا أعرف اذا اصبحت هذه ظاهره ام ماذا

انا من سكان مدينة 6 اكتوبر واثناء سيرى بالسيارة بأحد المناطق الجديدة بها (غرب سوميد) معظمها اراضى فضاء إلا من بعض فيلل هنا او هناك

المهم لاحظت وجود شئ اسود مرمى على جانب الطريق قلت يمكن بواقى بناء ولا حاجة لكنى بسرعة اوقفت السيارة ورجعت للوراء لما الحاجة دى اتحركت وشفت حركتها فى المراية

لاقيته راجل نصف عريان ماليه التراب وباين عليه العطش ووشه ممدد على الاسفلت الساخن فى هذه الايام

قعدت ازق فيه علشان افوقه مافيش فايدة

جت عربية تانية وقفت جنبى وقالو لى انت خبطته ولا ايه!!!!

حلفت انه ماحصلش من هنا لهنا حالته صعبت علينا كلنا.......... وفوقناه وجبناله ميه يشربها

وبعد ماشرب سألناه رايح فين وجاى منين .... ماردش وشاور على جيبه .... لاقينا فى جيبه ورقه مكتوب عليها المنصورة

واحد اداله عشرين جنيه وانا وصلته لأقرب ميكروباص رايح رمسيس علشان يرجع المنصورة واثناء وجوده معايا اسأله مهما اسأله مابيردش عليا

حصل الموضوع ده مع اخ ليا بنفس الطريقة

ياترى حد حصله كده ولا لأ

ولا الناس دى غلبانة بجد وانا اللى ظالمهم

[# الساحر #]

الناس اللي انتا شايفها دي ناس طبيعية

تعبت نفسيا و لم ينتبه اليهم و لم ينتبهوا هم لانفسهم حتى وصلوا لمرحلة أنهم أشتد بهم التعب النفسي حتى تحول لمرض نفسي و اصبحوا على حالهم هذا

و على فكرة الناس دي مش قليلة دول كتير .

[هادي]

يا استاذ عبود

ما حدث لحضرتك في منطقة نائية

حدث لي في وسط العاصمة

في عز الظهر

تحت كوبري الجلاء

على بعد خطوات من صيدلية الاسعاف بشارع رمسيس

وخطوات من تقاطع 26 يوليو

في يوم شتوي شديد البروده

كنت ماشي على رجلي رايح في اتجاه دار القضاء العالي

وفوجئت على الرصيف

تحت الكوبري

بطانية قذرة جدا

وطبعا الريحة مش عاوز اتكلم عليها

مشيت جنبها عادي

لكن لاحظت ان البطانية بتتحرك !!!

وقفت

ورجعت خطوتين

وبصيت من تاني

لقيت البطانية خارج من تحتها رجل طفل مش باين لونها

مش باين لونها الاصلي من كتر طبقات التراب و الجلخ اللي مغطيها

وفجأة

البطانية انزاحت عن اربعة وجوه

لاربعة اطفال

مابين 8-12 سنة

كانوا ينامون على الرصيف

في هذا البرد القارص

ويلتحفون هذه البطانية

هل تتخيل ما يمكن ان يتعرض له هؤلاء في ليل القاهرة

ومع الشمامين

ومع اللواطيين

ومع معلمين التسول

ومع .. ومع ... ومع

وهل تتخيل ما يمرون به من عذاب لو وقعوا في يد شرطة الاحداث

قل لي بالله عليك

ماذا تفعل لو كنت مكاني ؟

وسلامتكم

[ابو صلاح]

يا أستاذ عبود احب احيك جدا على موقفك الأيجابى مع هذا الرجل وهذا التصرف ان دل على شئ يدل على شخصيتك الأيجابية والمرؤة التى تتمتع بها

انا فعلا بشوف ناس نايمة فى الشوارع وخاصة تحت الكبارى وعلى كبارى المشاة ومنظرهم بشع

وساعات كتير ببقا نفسى اساعدهم بس ما بلاقيش طريقة اساعدهم بيها

بس مش عارف الناس دى ضحية لأنهى نظام ولية انتشرو كتير أوى كدة واللى بيحصل دة مسئولية مين

وياريت اللى عارف يقولى

[الأفوكاتو]

أرجوا من المقيمين بالمحروسة, و تقابلهم مثل هذه االحالات, أن يلتقطوا لها صور, ليتم نشرها فى الصحف المستقلة, و صحف المعارضة, تحت العنوان الشهير الذى كانت جريدة الجمهور المصرى الناطقة بإسم حزب " مصر الفتاة" تضعه مع مثل هذه الصور أثناء" العهد الملكى البائد" الآتى:

" رعايـــــــــــــــــــــــــاك يــا مـــــــــــــــــــــولاى "

[بنت شعنونة]

فعلا احيييييييك على موقفك..

انا شفت كتييييييييييييييييير جدااااااااا جدااااااااااا

وشفتما هوا اصعب من دا

تحت بيتي عربة تين شوكي واحد شاب بيبيع فيها كل يوم يجي يوقف تحت البيت يجي ساعة كدا

مرة اخت زوجي سالته انت بتبيع تين ليه

راح بص بحزن وقالها

انا "كنت" طالب ازهري...

لكن سبته

قالتله ليه؟ ما حاولتش تدي دروس لغة عربية

قالها اديت لكن مش بتأكل عيش

-يعني التين احسن؟

- بكتيييييييييييييييييييير...."ولكن بنبرة حزن"

- طب وفي الشتا؟

- ب ابيع فاكهة واهي بتفرج....

ايه رايك في النموذج دا؟؟؟؟؟؟؟؟؟ :(

منتهى الحزن

اعتقد انه ناااااااااااااااااس كتيييييييييييير من المجتمع تبلدت ووصلت للمرحلة اللي بقوااسمهم فيها

حـــــــــــــــــــــيــــــــــــــــــوانـــــــــــــــــــــــــات ...........

عشان يكونوا افظع من الحيوانات المفترسة!

[Abood]

شكرا للأخوة على ردودهم

المشكلة ان الراجل كان فى منطقة غير آهلة بالسكان يعنى وجوده عليه علامات استفهام كبيرة وكان موجود فى عز الظهر والشمس كانت حارقة واللى حسيت بيه بعد كده انه كان عامل نفسه مغمى عليه ومستحمل انه يحط جسمه على الاسفلت المولع ....... الاحساس ده زاد لما اخ ليا قال لى انه شاف نفس الحكاية فى حى من احياء 6 اكتوبر برضه

اما بالنسبة للمشردين اللى بنشوفهم على الارصفة فدول موجودين على طول

تحياتى

[أسد]

لدي القصة الأفظع والأشد قسوة ....

منذ ثلاثة أسابيع كنت متوقف على جانب الطريق في شارع شريف وأجلس داخل سيارتي منتظراً والمنطقة بها عدد من البنوك وتوجد بها عدد من رجال الشرطة تتدرج رتبهم من جندي إلى نقيب ...

شد إنتباهي صراخ فتاة صرخة شديدة ..

نظرت فوجدت فتاتين شابتين مذعورتين من مشهد أمامهم ..

ألا وهو سيدة تسير في منتثف الشارع ..

وهي عارية تماماً ... (كما ولدتها أمها)

وتسير رافعة يديها إلى أعلى حاملة فيها ملابسها على ما أظن ...

الغريب أن مشهد تلك السيدة لم يلفت إنتباه الناس (اللهم إلا الفتاة التي فزعت من هذا المشهد) ...

شعرت بانزعاج شديد .. وناديت على النقيب الذي كان واقفاً على الرصيف بالقرب مني ..

وقلت له .. إنظر .. ماهذا ..

قال لي بهدوء تام .. وكأن الأمر طبيعي ..

دي وليه مجنونه ,,,,

قلت له ولماذا تترك هكذا ... قال لي بمنتهى اللا مبالاة ..

حنعمل لها إيه يعني .. دي مجنونة ....

ونظر لي نظرة تعني .. وإنت مالك إنت ...

ثم تركني وأشاح بوجهة إلى الجهة الأخرى ..

منذ تلك اللحظة .. وأنا أشعر بأذى نفسي ..

[se_ Elsyed]

بس مش عارف الناس دى ضحية لأنهى نظام ولية انتشرو كتير أوى كدة واللى بيحصل دة مسئولية مين

وياريت اللى عارف يقول

هما أنتشروا حضرتك لإن الدولة عملت ثورة إدارية في مستشفى الأمراض النفسية الرئيسية بمصر وهي مستشفى العباسية ...

فبعد ريحة الفساد ما فاحت من داخل المستشفى اللي أرتكبت فيها كل الموبقات لدرجة إن التمرجية الفاسقين اللي مش لاقي أوصاف أوصفهم بها وحرام نشبههم بالحيوانات عشان ده ظلم للحيوانات بصراحة لإن عمر ما حيوان بيأذى أخوه .. وعمر ما حيوان بيخون ويبيع ضميره ... كان شوة الحُثالة دول بيلموا الصيع والمقاطيع ويدخلوهم بالليل المستشفى عشان يعتدوا جنسياً على المرضى النفسيين من النساء وياخدوا طبعاً منهم الفيزيتا الأول...

حد شاف كده في الدنيا أو في كوكب تاني أو حتى في فيلم خيال علمي من بتوع هوليوود ؟ وهل توصل درجة الدنائة وإنعدام الأخلاق إنك تستغل غياب عقل هؤلاء الفئة من البشر الذين سيدخلون الجنة بغير حساب لإنهم أشبه بالحيوان الذي يتصرف بالفطرة وغير مسئول عن تصرفاته تقوم بدل ما تعطف عليهم وتحسسهم بالحنان يقوموا ينتهكوا أدميتهم كده

لا حول ولا قوة إلا بالله

أما الشغل الكبير بقى فكان بيعمله أطباء المستشفى المحترمين اللي حالفين القسم فكانوا بيتواطؤا مع مجرمين بيدعوا الجنون وبيقبضوا منهم مرتبات منتظمة وبيسجلوهم على إنهم نُزلاء في المستشفى في حين إنهم بيمارسوا حياتهم العادية خارجها .. ومنهم الولد اللي ضرب الأتوبيس السياحي بتاع التحرير في التسعينيات ..

فالدولة مشكورة وضبت المستشفى وخليتها 5 نجوم .. وقامت بكل حنان برمي المرضى خارجها .. وقالت " اللي هايدفع راح يقعد .. واللي ما يدفعش يمشي " ................... تسقيفه أومال ...

وعاش مبارك نصير المجانين ...

تعرفوا يا جماعة عشان كل اللي بيحصل ده تحت سمع وبصر مبارك .. هو الوحيد في العالم كله اللي ما يقدرش يفتح بؤه ويتكلم عن إخواننا المعتقلين في سجن أبو غريب سواء من النساء أو الرجال .. ولا يقدر يفتح بؤه ويتكلم عن جوانتانامو ... لإنه هو نفسه مثال وقدوة للعالم في هذه المجالات ووصل الأمر إن أمريكا بقت تستعين بمبارك ونظامه في إنتزاع إعترافات المقبوض عليهم في قضايا الإرهاب للسمعة المدوية اللي أخدها في العالم كله .. وطبعاً بالأرقام الرسمية من منظمات محايدة تماماً وجدنا ان مصر مبارك تحتل مرتبة متقدمة في الفساد الإداري والتخلف والظلم ...

شفتوه لما كان رايح يفتتح مستشفى في الإسكندرية منذ عدة أيام وراح يسلم على مريض نايم على السرير وبيضحك معاه ويقول له " يا ترى إنت عيان بحق وحقيق ولا ممُثل " ............. دي كارثة ومصيبة والمفروض يبكي عليها مش يضحك ..

ده يدل على إنه أدارجي وعارف اللي حواليه بيعملوا إيه لما بيروح يزور مكان ويقوموا مأجرين له كومبارس يعملوا حركات قدامه وهو مبسوط بكده وعجباه اللعبه دي ..

مبارك سبب كل البلاء .. وهو راعي ومسئول عن رعيته ... وأي مسئول مهما كان لا يعرف ما يدور في شوارع بلده التي يحكمها منذ ربع قرن يبقى أحسن له يهاجر دولة تانية ويسيب الحكم لناس بيتقوا ربنا وعندهم ضمير ....

حاشا لله أن أطلب من السيد الرئيس إنه يتعطف ويتكرم وينزل الشارع المصري ولو مُتخفي حتى عشان يعرف اللي بيدور فيه .. ولكن هانزل تحت شويه وأسأل الحرامية والهليبة رؤساء الأحياء والمحليات والمحافظين .. كام مرة الواحد منهم بيسيب مكتبة المُكيف وبينزل الشارع يتفقد أحوال الناس ويشوف النظام عامل إيه ويرى بعينه مثل تلك الحالات لبشر لا ذنب لهم إلا إنهم ذهبت عقولهم تحت أي ظرف من الظروف ومنها الظروف اللي إتسبب فيها مبارك وحكمه الظالم على مدار 24 عام ؟

طبعاً هايقولوا عليه مجنون يوم ما أطلب من سيادة اللواء المحافظ أو اللواء رئيس الحي إنه يحن علينا وينزل الشارع .. الراجل مش فاضي ووراه رشاوي وصفقات وبلاوي زرقا تمنعه من ذلك وهو هايقطع نفسه ولا هايقطع نفسه ...

عشان كده يوم ما نشوف مثال حي زي أحمد رشدي – ربنا يدي له الصحة – ونلاقيه وهو وزير واقف في الشارع بنفسه ومكهرب كل التنابلة اللي حوالية نقوم نستغرب ونقول هي الدنيا جرى فيها إيه ؟ هي الموازين إتعدلت ولا إيه الحكاية ؟ لكن ما بنلحقش نكمل كلامنا ويقوم مبارك شايله قوام قوام عشان ما ينقلش عدوى النزاهة والشرف لبقية المسئولين .. فعندما تكون فاسداً لا تطيق أي شخص شريف حواليك ...