صورة قديمه من شارع عادي

[ahmedrefat]

للشاعر هيثم الحاج علي

من ديوان صورة قديمه من شارع عادي

صورة قديمه من شارع عادي

( 1 )

البنت اللي بتلبس حلو

وتبص من البلكونــه

وهي مسرحه شعرهــا

تتفرج علي أولاد الشارع

لما بيلعبوا كـــــــــــــــوره

وتفصص كل غسيل الجيران

المنشور تحتيها

كانت بتحاول تعرف

مين من أولاد الشارع

حيجاول يغمز لها

لكن

لما بابص عليها

بالاقي

جوه عينها

فاترينه لمحل قديم

فاترينة قديمة

ومع انها تحفة

مش لاقية حد يبص عليها

( 2)

احصا

الولد

اللي علي طول واقف عالناحية

لازق ضهره ف عامود النور

كان بيحاول دايما

انه يعد سلوك الكهربا من فوقه

واحد.....

اتنين........

تلاته................

فتعدي البنت الحلوة

قبل ما يكمل عد

فيبص لها

ويعد معاها اهتزازات خطاويها

واحد ..اتنين

واحد...اتنين

وعمره ما بيكمل عد

دلوقتي بس ها يعرف

ليه دايما

كان يسقط

في الاحصا

3

نظرية

علي باب الجامع

كان قاعد يقرا الجرنان

ويطلع من دقنه البيضا المنكوشه

نظرية جديده

4

عسكري

عسكري كان واقف يحرس سفارة امريكا

كان صاحي وواعي جدا جدا

عارف كل اللي عليه

وأتأكدت أنه مصحح جدا

لما سألته ,

من فضلك فين سفارة امريكا

قال ما أعرفش

5

ركن قديم

البنت

اللي رميتها ف ركن الدرج

أحيانا بتفوت من تحت الشباك

وتسلم

فابتسم بسمه مالها من معني

وانا مديها ضهري

6

صوت

صوت موتوسيكل معدي من تحت الشباك

والتليفزيون بيذيع نشرة أخبار

متعادة تسع مرات

وجارتنا بتتخانق مع جوزها ف نص الليل

وقطة صغيرة جدا بتنونو

ولوري معدي صوته بيغطي عليها

لكن

لو سندس صحيت من سابع نومه

وزامت زومة خفيفة

من عارف ليه

من ممكن اسمع صوت تاني

7

واحد

قابل واحد

فبقوا اتنين

نكتة قديمة

لكنها

كل يوم بتكرر

8

رصيف

أنا

وانت

ماشيين عالرصيف

باصين قدامنا

يمكن مش شايفين حاجة

لكن ف السيما

كان الول بيحاول يمسك ايد البنت

حاولت...

لكني ما قدرتش

يمكن أكون نسيت ايديا عالشماعة

أو

حتي

محتاج أغير ايدي

اللي بتشحت سلامات الناس

علشان اقدر أمسك ايديك

9

عسكري تاني

وقفني

وطلب مني سجارة

فكرني بحديث

( عابر سبيل أو مسافر )

لما انقطع

بصيت ف عينه

ولقيت فاترينة جديدة

عليها تراب

وأزازها بيتكسر

وعربية كارو

أنا اللي شاددها

ساعتها

سبت العلبة وطلعت اجري

تم تعديل 29 أغسطس 2005 بواسطة ahmedrefat

[بنت شعنونة]

تحفة فنية...

واسمحلي...

ورقة...

ورقة قديمة

مكتوبة بخط جميل

مرمية على بوفيه سفرة

في بيت عتيق

مليانة احاسيس وصور

ل وشوش و حواري كمان

الخط جميل

لكن المكان كله تراب؟

شكله مهجور

قربت اقرا الورقة

لكن يا خسارة

شوية هوا مروا.. فطارت من الشباك!

هذا ما شعرته عندما قرات كلامك..

عجبني جدا جدااااااا

وحروفك صغيرة وانيقة

تحففففففففففففففة بجد :D