ستة أيام تضحية ليست قليلة على بلدنا مصر

[se_ Elsyed]

منذ فترة طويلة لا سيرة ولا كلام إلا عن ضرورة التغيير والإصلاح والأمنيات بأن يرى الجميع شيء إسمه تداول السُلطة في مصرنا الحبيبة ( أنا شخصياً عندي 33 سنة ومن ساعة ما وعيت على الدنيا وكنت في 6 إبتدائي سنة 81 وأنا ليل ونهار مش شايف إلا صورة مبارك أمامي .. وبصراحة نفسي أشوف غيره قبل ما أموت أو أطلع معاش .. أظن ده حقي لإنهم درسوا لنا غلط في التربية القومية إن إحنا جمهورية مش ملكية أو سُلطانيه - السُلطانييييييييييييييييييييييية .. أحمدك يارب )

لذلك يا إخواني إذا تسلل اليأس في نفوسنا ومصمصنا شفايفنا وقولنا ما فيش فايدة يا صفية والراجل كسبان كسبان سواء روحنا أو ما روحناش .. يبقى بكل بساطة نستاهل اللي يجرى لنا .. ومبارك له كل الحق في أن يفعل بنا ما يريد ..

إذا كانت الفرصة جت لحد عندنا عشان نغيره ونخلعه ... أنا فرحت جداً لما عرفت إن التصويت سيكون بالبطاقة الإنتخابية في الدائرة التي يُقيم فيها المواطن ... يعني الموضوع عايز شوية تعب والواحد يعرف هو مُسجل في أنهي دايرة ويكون مستعد ليوم 7/9 وياخد بعضه هو وعائلته ويروحوا يقولوا لأ لمبارك وينتخبوا أي حد غيره ... والله العظيم حتى لو طلع أسؤ فعمره ما هاييجي أسوء من حكم 24 عام تدهورت فيها أحوال بلدنا لحد ما بقت زي ما أحنا شايفين ..

يا جماعة الحزب الوطني بيدعي ربنا ليل نهار إن الشعب المصري ييأس من حياته وينطفيء لديه أخر ضوء لأي أمل في التغيير وبالتالي يعزفوا عن الذهاب إلى صناديق الإقتراع ويتركوا الساحة لآفاقي الحزب الوطني وسلة المنتفعين الذين يُعدوا على الأصابع وبالتالي تكون المحصلة النهائية هي فوزهم بالإنتخابات بنسة 99.9 % .... وأساساً بتلاقي اللي راحوا إنتخبوا هم بضع مئات ( زي ما حصل يوم الإستفتاء على تعديل المادة 76 )

وممكن يبقى فيه سؤال .... طب إذا قولنا لأ لمبارك .. يبقى نقول نعم لمين ؟

يا عم عندك 9 آخرين ومنهم من لديه بعض البرامج مُقنعة إلى حد كبير ومنهم من وضع جدول زمني لتولي السُلطة ومنهم من وعد بتغيير الدستور تغييراً كاملاً ... وعلى الأقل الحكم هايكون مدني لإن ليس من بينهم عسكري إلا مبارك ..

ومن الخطأ أن نحكم على فشل التجربة قبل أن تبدأ ونقول إن فلان خبرته السياسية قليلة أو إن الأخر لا يفهم في السياسة .. فهناك شيء إسمه أهل الخبرة والمستشارين .. وياما شوفنا رؤساء كانوا ممثلين أو رجال اعمال أو شخصيات عامة ومع ذلك نجحوا تماماً في قيادة بلادهم..

مرة أخرى أقول بإن من لهم حق الترشيح حوالي 30 مليون وأنا متأكد إن غالبيتهم معارضون لمبارك وسياساته لافاشلة التي أغرقت لابلاد .. وبالتالي دورنا كمثقفين هو أن نوعي الناخبين فيما يجب أن يفعلوه في هذا اليوم ولا أقول إننا نقف في الميادين العام ونخطب في الناس ولكن على الأقل أوعي عائلتي وزملائي في العمل وأصدقائي ونحثهم على إختيار التغيير ...

مش مجرد كلام .. مصر أمانة في عنقنا .. وإذا فرطنا في تلك الأمانة فليس لنا حق البُكاء عليها حتى ...

[ابو صلاح]

كلام كبير أوى يا سى السيد ومش أول كلام اعجب بية ليك ، وعايز أقولك ان انا متابع اعمالك ومقالاتك من أول ما اشتركت فى المنتدى ، ولأنى معجب بتفكيرك وبكلامك اللى زى العسل وبأرائك فدة اللى هيخلينى اسئلك السؤال دة

انت واثق فى مين تديلو صوتك يا سى السيد علاشان يبقا ريس لمصر لمدة 6 سنين ؟

[se_ Elsyed]

كلام كبير أوى يا سى السيد ومش أول كلام اعجب بية ليك ، وعايز أقولك ان انا متابع اعمالك ومقالاتك من أول ما اشتركت فى المنتدى ، ولأنى معجب بتفكيرك وبكلامك اللى زى العسل وبأرائك فدة اللى هيخلينى اسئلك السؤال دة

انت واثق فى مين تديلو صوتك يا سى السيد علاشان يبقا ريس لمصر لمدة 6 سنين  ؟

<{POST_SNAPBACK}>

يا عم الله يبارك فيك ..

مقالات إيه ومجلدات إيه يا سيدي .. أنا لا أكتب إلا ما أحس به .. يطلع مقال يطلع صينية بطاطس .. أهم حاجة إني ما شوفش حاجة غلط وما قولش عليها أو حاجة صح ولا أُشيد بها

انت واثق فى مين تديلو صوتك يا سى السيد علاشان يبقا ريس لمصر لمدة 6 سنين  ؟

من غير ما حد يفهمني غلط أو يقول إن ده توجيه فكري للباقين ..

أنا شخصياً أُويد أيمن نور .. وأهم سبب لذلك هو إنه بيمثل جيل الشباب اللي محجور على أحلامهم واللي مهمشين تماماً في هذا الوطن مع إنهم يمثلون الأمل والأغلبية على فكره مصطفى الفقي بيهاجم أيمن نور لإن عنده 42 سنة وبيقوله إنه إتسرع وكان المفروض يصبر شويه .... شوفت الخيبة القوية ؟

حاجة غريبة جداً في مصر يعني إحنا الأغلبية وإحنا أصحاب البلد ومستقبلها ومع ذلك يا جدع تلاقي كل القيادات ستين سنة وإنت طالع .. حتى من بين المُرشحين للرئاسة من هم فوق السبعين زي نُعمان جمعه .. وجدو الصباحي اللي عنده حاجة وتسعين ... وما ننساش مبارك اللي عنده 78 ولسه بيتلكم عن القيادة والعبور للمستقبل

وأيمن نور الوحيد اللي إتكلم عن تايم فريم لتنفيذ برنامجه ... والوحيد اللي نطقها وقال إنه لو فاز هايقعد في الحكم 24 شهر إلى أن يتم تعديلات دستورية جذرية وتتبعها إنتخابات رئاسية آخرى .

[ابو صلاح]

ومن متابعتى متابعتى لمقالاتك :D أو شانيات البطاطس بتاعتك انك عايش فى السعودية دلوقتى ، هاتيجى مصر علاشان تنتخب ، ولا ينفع تبعت صوتك من هناك

ولو هتيجى مصر ما تنسنيش بصنية فراخ بالبطاطس عشان بحبها أوى :D

[se_ Elsyed]

للأسف عشان ظروف مدارس الأولاد ما ينفعش أكون في مصر في شهر 9 وأنا لسه راجع من حوالي إسبوعين ..

أما عن تصويت المغتربين خارج مصر .. فالتصويت فعلاً متاح لنا من خلال سفارتنا

ولكنه تصويت بالصوت الحياني .. يعني بنجمع بعض ونروح السفارة المصرية ونقعد نصوت على حالنا .. وكل واحد بيرقع صوت حياني على الأحوال اللي إحنا وصلنا لها ...

بس بابا سفوت اللاشريف وعدنا إنه هايتعطف علينا ويمنحا شرف التصويت الفعلي في إنتخابات الرئاسة سنة 2011 و2017 اللي برضوا هاينزل فيها الرئيس مبارك - أطال الله بقاءه - كمرشح عن الحزب الوطني ...

[se_ Elsyed]

أتمنى من كل قلبي أن تتحرك الحركات المعارضة الغير حزبية كحركة كفاية والإخوان المسلمين والحركات التي تنادي بالتغيير وأن يُحسنوا إختيار بديلاً جيد لمبارك الذي إستنفذ كل ما في جعبته ....