عايز نصيحة أخوية عن فرصة سفر بالسعودية

[عمر المختار]

السلام عليكم جميعا..

أنا بالبلدى عايز أتفك معاكم وتفكروا معايا ونفيد بعضنا ....

انا موظف حكومى وأعمل فى أخصائى اجتماعى بقالى 16 سنة وعمرى 40 سنة وعندى ولدين فى الابتدائى ومعنديش عمل اضافى ولا اعرف غير وظيفتى ولا دروس ولا يحزنون وزوجتى ست بيت واجمالى دخلى الشهرى 2300 جنيه لو أضفت المكافأة .ومعلومة تانية الضرائب واجراءات الاجازة والكشف والأوراق بتكلف على المدرس حوالى 9000 جنيه ع السنة الواحدة وكمان عمولة للمكتب 4000 جنية وللعلم انا عايش فى ارياف ومفيش فكرة لعمل مشروع وفكرت كتير وملقتش فيه فايده...قدامى فرصة للسفر لمدرسة أهلية بالسعودية وبالتحديد فى محافظة الخرج ...الراتب 2600 ريال السكن والانتقالات والتأمين والتأشيرة على المدرسة ..تأمين صحى لولدين والزوجة فى العام الثانى .. بدل سكن 2500 عازب 8000 متزوج ..من حقى ادخل ابن واحد مجانى فى المدارس والثانى بنص المصاريف.التذكرة ذهاب لأول مرة على أنا وبعد كدا تذكرة واحدة لى ذهاب عودة عليهم الدوام صباحى من 7 ص إلى 1.5 ظهرا ..ايه رأيكم مستاهلة بهدلة وبعد عن عيلتى وغربة !!؟؟؟؟ علما بإنى حجيت وعملت عمرة علشان محدش يقول روح وعلى الاقل حج واعمل عمرة انا بقول الصراحة علشان مضحكش على نفسى ..ولا هى مش بتتحسب كدا.!؟؟؟..يعنى ساعات ناس تقول سافر ياعم لان معظم عروض المدرسين كدا وربنا هيفتحها عليك لأن البلد هنا حالها واقف وانى مليش غير وظيفة والعيال بتكبر..انما يمكن يتفتحلك باب رزق هناك والسعى مطلوب وكدا..وفيه رأى أخر يقولى بلاش تسافر على العرض دا ولا اللى زيه ولو مفيش أحسن يبقى متسفرش ..بلاش قلة قيمة..هتروح تتبهدل وتسيب مرتب مش بطال هنا وهتسيب عيالك وهتدفع ضرايب ومعاشات وعمولة وكشوفات وهتروح هناك كأنك متخرج جديد وهيطلع روحك من الشغل وهضطر تشوف شغل تانى يا إما مش هتبقى مش جايبه همها ولو حصل ولقيت شغل هتتبهدل وسنك ميسمحش للتجربة دى...هو دا الموضوع وارجو المشاركة لنفيد ونستفيد ونفكر مع بعض ..ولكم منى خالص تحياتى

تم تعديل 8 أبريل 2015 بواسطة علاء جادو

[mo7amedrady]

بالنسبه للراتب المعروض عليك انا شايفه قليل شوف هتصرف منه كام ريال اكل ومتطلباتك وهيتبقي كام ولو نفترض هيتبقي 1500 ريال يعني حوالي 2800 جنيه بيتك بقا زوجتك واولادك مصاريفهم كام اعتقد كده الباقي ميستهلش للغربه يااما لازم عمل اضافي بعد المدرسه لحد ماتظبط امورك وتجيب الزوجه والاولاد وبرضوا تستمر في العمل الاضافي

[المخنوق دائما]

أولا:

راتب 2600 ريال لايكفي لشاب عازب فضلا عن أسره من 4 أفراد
أقل راتب تقدر تعيش بيه هو 3000 اساسي 750 بدل سكن 300 بدل انتقال بإجمالي 4050 ريال وده الحد الأدنى
ثانياً:
سنك غير مناسب لتجربة الغربه على هذا الراتب
ودي نصيحه من واحد مسافر بقاله 7 سنين

تم تعديل 11 أبريل 2015 بواسطة المخنوق دائما

[Mohamed-ok]

السلام عليكم

اخي الفاضل انا في نفس سنك ولكني خضت التجربة هذه وبقالي هنا الان سنتين .......... وشوف اية اللي حصل

اولا : في سننا ده من الصعب انك تتأقلم بسهولة هنا , ولاننا لنا خبرة بالحياة فستفهم من اول يوم تيجي هنا ويوقفوك في المطار ساعات علشان ياخدوا بصمة عينك .. هتشعر بمعنى كلمة الغربة ومعنى كلمة مواطن او مقيم.

ثانيا : الحياة هنا غالية جدا , يكفي ان اقول لك ان السعودي مبيكفهوش 10 الاف في الشهر , والمبلغ اللي بتقول علية ده ميكفيش فرد بمفرده هنا , وفي ناس بتيجي ب الفين ريال فقط .. وبيكفوه وزيادة .. كيف ؟ لانه بيبقى جي على 2000 ريال + العمولة فقد تكون العمولة الشهرية تصل الى 2000 وحتى 10000 شهريا ولكن هذه في مهن اخرى مثل مندوب المبيعات او البائعين في كل المجالات وبعد فترة من العمل لا تقل عن عام , اما وظيفة مدرس فطبعا الراتب ده بيدهولك صاحب المدرسة الاهلية وهو عارف انه مش هيكفيك .. ولكنه ايضا يعلم انك هتدي دروس خصوصية يمكن ان توفرلك 2000 اخرى شهريا , ولكن انتبه.............. الدروس هنا ممنوعة والناس هنا ممكن تخليك تدي دروس لولادهم وبعدين يبلغوا عنك اخر السنة ويلبسوك في مشكلة كبيرة تنتهي بترحيلك ... واصحاب النفوس السيئة دية هتلقيهم في كل حتة . وايضا علشان تدي دروس لازم تكون ليك شعبية في مدرستك واثبت كفائة وده مبيجيش الا بعد سنة او اثنين على الاقل .

ثالثا : بالنسبة لابنائك في مصر فهنا المشكلة الكبيرة , لانك اقصى ما يمكن ان تحوله لهم شهريا هو 1500 ريال ( مع العلم انك لو مرضت فسوف تصرف كثير جدا قد يصل ل 500 ريال في نزلة برد جامدة.. لان التامين الطبي ده شكلي يعني بيدفعولك مثلا 20 ريال من تكلفة الدواء والدوا هنا غالي جدا اضعاف ثمنه في مصر )

طبعا 1500 ريال ( 3000 ) مصري دول مش هيكفي عيالك في مصر .. لية ؟ لانك لو انت معاهم هتعرف تمسك البيت و2500 هيكفوك , لكن لو انت مش معاهم هيصرفوا اكثر وزجتك مش هتعرف توفر لوحدها ومش هيكفيهم3000 جنية , بجانب مشاكل صحية ستحدث للابناء وللزوجة نتيجة لنفسيتهم نظرا لتركك لهم , هذا الى جانب انخفاض ملحوظ في مستواهم الدراسي خاصة في السنة الاولى من سفرك ,

رابعا : الزيارة السنوية لمصر .. وهنا ستكون مشكلة كبيرة لك مع هذا الراتب فلا تفرح ان المدرسة ستوفر لك تذكرة السفر , المهم من اين ستجد المال اللازم لشراء هدايا لاولادك وزوجتك واهلك ؟ ايضا العودة بعد فترة بعد عن اولادك تلزمك بان تدخل عليهم البهجة وتسفرهم للمصيف مثلا او الملاهي وايضا الكثير من الملابس الجديدة والخروج ووووووو الكثير ... كل ده بفلوس وبفلوس كتيرة جدا ... اعتقد لا يكفيك 10000 جنية لكي تحقق كل ده ...... فمن اين ستاتي بهذا المال؟ ام ستذهب مصر في الاجازة ايد ورا وايد اقدام ؟

الخلاصة اخي الفاضل ارضى بوضعك الان في مصر وحاول ان تحسن دخلك باي طريقة في مصر حتى لو انك ستنتقل للعمل في القاهرة مثلا لكي تعمل في مدرسة خاصةو تعطي دروس وتذهب لبيتك في محافظتك يومي الخميس والجمعة والسبت وستحقق دخل اكبر بكثير من سفرك وغربتك , او حاول ان تجد فرصة عمل بالمملكة ولكن بمبلغ لا يقل عن 4000 ريالاو السفر الى دوله اخرى مثل الامارات وبدخل افضل .

طبعا كل ما ذكرتة سابقا هو عن تجربة شخصية وقد تكون تجربة اي اخ فاضل هنا افضل مني وايضا قد تكون تجربتك هنا افضل مني ... ولكني نقلت لك الحقيقة التي رايتها من سفري بكل امانة وصدق وارجو ان اكون افدتك .

تحياتي وتقديري

تم تعديل 19 مايو 2015 بواسطة Mohamed-ok