كم عمرك ? - ما هي الشريحة السنية للمشاركين ?

[اسكندراني]

صوت ايناس جوهر فى الشباب والرياضه

جائزة الكوكب الذهبى

ايناس جوهر طول عمرها في الشرق الاوسط!

ما هي جائزة الكوكب الذهبى؟

[اسكندراني]

قد يكون حان الوقت لتغيير عنوان الموضوع الي:

(ذكريات "صغار" العواجيز)

[MuslimaEgyptian]

فرافيرو مين ده ...واوبليكس إيه...وام كلثوم كمان؟؟؟؟؟

فين أتباع الرجل المستحيل أدهم صبرى الذى طالما احببت قراءه اول صفحه عن كيف كان يجيد كل اللغات ويجيد قياده كل شئ...طياره ..غواصه...صاروخ...اللى انت عاوزه

:angry:

وكيف كان مغلب الموساد معاه...دى ثلوج ليبيريا مكانتش بتآخد منه بربشه عين للنجاه منها....مش تقولوليى أستيكه

:angry:  :angry:  

:D

ياه، فين واحد زيه النهارده

...

وأيام الجيلى كولا و فطوطه وسنبل :D

وبدايه إزدهار الدروس الخصوصيه كجزء لا يتجزأ من الدراسه "غصب عنك" ...طب كانوا يقولوا بدل الواحد بدأ يشعر بالفشل فى إستيعاب الدروس والإحباط بعدما كان من الأوائل..وأتارى ان المدرسين كانوا بيتكلموا  فى كل حاجه غير المنهج !!

:sneaky2:  :sneaky2:

ومدحت صالح ورفضك يا زمانى كأول إلتقاء و "تذوق" لعالم الموسيقى

والأتارى :D

ناس بختها "الست"، وأخرون "لولاكى" التى كسرت الدنيا...

متهيألى هذا ما غرز بذور اللمبى وشعبولا...  

مين فرافيرو ده بقى؟؟؟

:turn:

[MuslimaEgyptian]

يييه...سيبيريا = ليبيريا

إيه ده هو انتوا ماكنشي وراكو غير الفرجة على التليفزيون؟؟

الأخت أمينه..عندك حق...وجهه نظر مهمه....أنظروا الى رموز ذكرياتنا...هل يعنى ذلك شيئا؟...

اين فعلا الرموز المنميه للفكر والمسؤوليه والإنتماء لهويتنا الإسلاميه العربيه.......همممم....

ولكن مكنش متوفر امامنا الكثير...

وغير تأثير البيت البيت، مكنشى فيه غير الشيخ الشعراوى كمنفذ للدين ولم يعنى كثيرا لنا ونحن صغار غير انه جزء لا يتجزأ من غذاء يوم الجمعه

:angry:

وللأسف، اعطونا الإيحاء فى المدرسه ان حصه الدين حصه

Free

:( لعب ...

[اسكندراني]

وغير تأثير البيت البيت، مكنشى فيه غير الشيخ الشعراوى كمنفذ للدين ولم يعنى كثيرا لنا ونحن صغار غير انه جزء لا يتجزأ من غذاء يوم الجمعه

حرام عليكم ....

نسيتم نور علي نور يوم الجمعه تقديم احمد فراج .... بعد برنامج عالم الحيوان

بالمناسبه ... افتكرت برنامج عالم البحا(غ) .. تقديم د. حامد جوهـ(غ)

[اسكندراني]

هل مازال هناك باعه امام المدارس لبيع الدوم واللب السوري؟

وهل مازالت هناك محلات لتأجير العجل و"الكرنك"؟

[MuslimaEgyptian]

نسيتم نور علي نور يوم الجمعه تقديم احمد فراج

اسفه، لا أتذكر...لا تنزعج..معلش ..نعوضهولك ببرنامج

العلم والإيمان لمصطفى محمود...

:angry:

والقرآن بعدما منتصف الليل والمسلسلات الدينيه التاريخيه بعد الساعه ثالثه صباحا......

:sneaky:  :sneaky:  :sneaky:

[Byte]

عصافير الجنه

تمام ، طب لما انتم ذاكرتكم قوية ، فاكرين اووأه وبسة؟  :angry:  وفاكرين كانوا بصوت مين؟

وفاكرين ارنوب الغلباوي وسرسوعة النمساوي؟

[mnman]

فكرتونا بزمان وأيام زمان....

وزجاجة السينالكوا نسيتوها ولا إية.... و مسلسل شرارة و سينما الاطفال يوم الجمعة و فوازير عموا فؤاد في رمضان و الاستغماية ومساكة الملك و شد الكبس كهربا وغيرة وغيرة من ألعاب ليالي الصيف مع الصحاب...

وقول للزمان أرجع با زمان....

:angry:  :angry:  :angry:  :D

[اسكندراني]

وفاكرين ارنوب الغلباوي وسرسوعة النمساوي؟

وبطبوط الشقي ..... بصوت أمين الهنيدي (الله يرحمه)

واعلانين لا انساهما ابداً:

شهادات الاستثمار .... فوايدهم علينا كتار

و

انا الميلامين .... جامد ومتين

[DARWEEN]

مافيش حد منكم قرأ قصص المكتبة الخضرا بتاعه كامل كيلاني

على فكرة هي لسه عندي للي عاوز نسخة

[AbouAlhooool]

ومين يفتكر " البلاك كوتس" و " لبتي شاه" في المنتزه-اسكندريه?

وكان فيه كازينو الشلالات, يشغل " انت عمري" بالصوت العالي من المسجل, كانت خالتي ساكنه قصاد جنينة الشلالات, ومن الفرانده كنا نسمع ام كلثوم. وحاجه عجيبه, صوت المسجل من نص الجنينه مكانش بيضايق حد من السكان.

:D

و محمد عبد المطلب -الله يرحمه- رمضان جانا, والشيخ محمد رفعت- الله واكبر علي قرايته- قبل المدفع, والف ليله وليله, الساعه حداشر باليل,

وطبعا نور علي نور, بعد صلاة الجمعه.

وكان ابويا ( الله يرحمه) بيحب يسمع اخبار تمانيه ونص, و دايما كان قبليها المرحوم الشيخ عبدالباسط عبدالصمد, ابويا يسمع الاخبار, وانا استمتع بسماع القرآن.

ولما زرت مصر في 2001, دورت علي شريط محمد الكحلاوي- لاجل النبي, واشتريته وجبته معايا.

وامي -الله يرحمها- كانت تحب تسمع ابله فضيله, الي ربات البيوت, من الراديو الترانزيستور اول ما جبناه من غزه/فلسطين.

هييييه, كانت ايام حلوه

:D :cool:

وحاجااااات تانيه كتيره, بس الواحد مبيفتكرهاش كلها, الظاهر الواحد ذاكرته بدأت تضعف.

   ;)  ;)  ;)

[Arabisc]

الله يحظ أيامكم جميعا . فالمداخلات السابقة كانت زي الفلاش باك لذكريات  و أيام  جميلة  في عمر  كل منا . و الأجمل منه شعور الألفة  و الحميمية بين الأصدقاء و  كأنهم يسترجعون ذكريات و أحداث عاشوها معا في نفس المكان و  الزمان

و كما قال البابا شنودة " مصر هي و طن يعيش فينا قبل أن يكون و طن نعيش فيه " فأغلب المشاركين كانوا بالفعل يعيشون خارج الوطن و لكن الوطن لا يزال يعيش فيهم بكل ذكرياته و مؤثراته

ملاحظة  أخرى طريفة, و هي التقسيم العمري للأعضاء حسب الدفعة :D

فدفعة رجل المستحيل و بوجي و طمطم و الأتاري (منتصف العشرينات) أتت بعد دفعة الشياطين التلاتاشر و عصافير الجنة و البنج بونج - hint hint- (أوائل الثلاثينات) والتي حملت الشعلة من دفعت بابا شارو و فرافيرو و المكتبة الخضراء ( دول عواجيز مالناش دعوة بيهم :D )

لا أظن أن الموضوع موضوع تعلق بالتيلفزيون و 'مسمرة' أمامه بقدر ما هو تأثر بذلك العالم  السحري بالنسبة لابن السابعة في عقود مضت و نافذة الخيال و المعرفة التي يفتحها

سؤال أخير و محير . هل يشترك كل ابناء نفس الجيل في نفس الذكريات الصغيرة ? اذا نظرنا لردود الأعضاء ستكون الإجابة نعم بالقطع . و لكن الموضوع ليس بتلك البساطة لأن الأعضاء هنا لا يمثلوا عينة عشوائية كاملة بل يشتركون في خصائص كثيرة جدا " زي مستوى التعليم , الإغتراب, اتقان لغات, انفتاح على تقنيات جديدة " زي الانترنت مثلا" و هكذا "

هل التشابه في الذكريات سبب أم نتيجة لوجودنا  هنا ? سؤال صعب

سلام عليكم

[Arabisc]

أيه اللي حصل ? أنا قفلت عليكو ولا  أيـه ?

وبعدين أنا لسة ماعرفتش أعمار كل المشار كين   ...   ياللا  عاوز  أكمل ملفاتكم

:alien:   :alien:  :alien:  :devil:

[Farida]

انا شايفه ان احنا جيل مظلوم (من 30 الى 38 ) تقريبا لاحظت اننا تقريبا ثقافتنا من التليفزيون و اننا جيل ما عندناش مثقف او مفكر كان بيؤثر فينا احنا اتولدنا ايام النكسه و كنا صغيرين جدا ايام نصر اكتوبر و لما كبرنا شويه عشنا قصص الإنفتاح و الفراخ الفاسده و الضماير المعدومه و ايامنا كانت امهاتنا بتقف فى الطوابير علشان السكر و الزيت  و الفراخ المجمده ايامنا المدارس خربت و التعليم باظ  و الطبقه المتوسطه انهارت واصبح اللى ابوه حرفى هو اللى بيلبس كويس و هو اللى عنده عربيه و اتحملنا اخطاء اللى حكموا قبل السادات و اتحملنا اخطاء السادات و اللى احنا فيه دلوقتى جيلنا مظلوم لأن لحد دلوقتى الى وصل فينا للخمس و تلاتين ما يقدرش يمسك منصب قيادى او يفكر حتى فى تغيير خطط عمله او المكان اللى بيشتغل فيه لسه اللى ماسكين البلد من اللى عدوا الستين و بيتمد لهم لإنهم خبرات ودتنا ورا ......احنا جيل ما تعملش حسابه لإن اللى كان بيخطط كان بيبص تحت رجليه و بيدور على الزعامه بأى طريقه و مش مهم اللى جاى الخوف على اولادنا ياترى بنخطط لهم يبقوا ايه ....... معلهش الموضوع  قلب غم بس ده الواقع للأسف مظلـــــــــــــــــــــم

[إبن مصر]

اعتذر ولكن الجيل الذى تتكلمين عنه ليس مظلوما بالعكس ..

فقد عاصر وقطف زهرة من كل شىء حتى اطلقت عليه انه الجيل الى لحق اخر التربيه ..

فقد عاصر الحرب وذكرياتها والنصر وذكرياته .. وكل هذه الذكريات الجميله التى تحدث هنها شاركها حتى مع الجيل الجديد .. فكمكا قرانا الشيطين ال 13 قرأنا رجل المستحيل ... هذا الجيل لديه على الاقل ما يقارن به من ذكريات  جميله ...

وفعلا لقد ذكرتونا باحلى الايام ..

وهى حاله نفسيه هى حاله التذكر التى جائتنا جميعا ولابد من وجود قاسم مشترك بين كل ذلك.

[Arabisc]

سلام عليكم

----------

عند نقل المحاروات إلى البرمجيات الحالية. اختفى هذا الاستبيان و نتائجه. ما رأيكم إن ان اعدنا الكرة ? خصوصا في وجود الزملاء الجدد

سلام عليكم

[Arabisc]

تعبت رفع و شيل في الموضوع ده ...

ما تعترفوا بقى بعمركم و تخلصونا ... قلنا عاوزين نكمل الملفات

:twisted: :cool: :twisted: :cool:

[Lancelot]

ما تزعلش أوي كده يا عم أرابيسك .... فيه ناس برضه قالت عندها كام سنة .... هو صحيح الأغلبية غيرت الموضوع و "غلوشت" علي السؤال لكن معلهش ... ليس كل ما يتمناه المرء يدركه ... أنا عن نفسي هأقول ... عندي 20 سنة .. من دور عمرو 2003 يعني ....

أنا لحقت حاجات كتير من اللي ناس أكبر مني قالت عليها ... الشياطين ال 13 ... أحمد و عثمان و إلهام و بوعمير و قيس و خالد و مش فاكر الباقيين بصراحة ... و طبعا زعيمهم رقم صفر الذي لا يعرفه أحد ... و طبعا لحقت رجل المستحيل و ملف المستقبل .... بيني و بينكم لسه بأقرأ رجل المستحيل لحد دلوقتي ... يعني حاجة تسري عن الواحد شوية .... طبعا سينما الأطفال يوم الجمعة الصبح و كانت بتقدمه واحدة إسمها عفاف ... مش فاكر باقي الإسم ... و لما إتحجبت شالوها .... طبعا ممكن تؤذي الملائكة الصغار بحجابها ...

و يوم الجمعة بالليل ... فكر ثواني تكسب دقايق ... بتاع نجوي إبراهيم ... أنا فاكر لحد دلوقتي حلقة واد صغير جاوب السؤال صح و لما سألته تحب تشوف إيه ... و كانت الجايزة إنه يشوف فقرة علي مزاجه ... لكن الواد طلب يشوف أحمد شوبير و فعلا راح قابل أحمد شوبير ....

و علي سيرة شوبير .. طبعا ما حدش يقدر ينسي ماتش مصر و هولندا في كاس العالم 90 و الجون بتاع مصر ... و أنا قاعد في بيتنا سامع الناس كلها بتقول ... ههههههههههههههههههههههههها ... و محمود بكر : و نزلت عدالة السماء علي استاد باليرمو ...

و طبعا خرجنا من كاس العالم من مجموعة الشاي زي ما كانوا بيسموها .... لان كل الفرق فيها اتعدلت مع بعض .... و الحمد لله ما رحناش كاس العالم تاني..... بلاش فضايح....

بالمناسبة يا أرابيسك ... إنت عندك كام سنة....

[Elham]

انا عندى 28 سنه و من الجيل بتاع رجل المستحيل و ملف المستقبل و كوكتيل و كمان ساعات كنت اقرا الشياطينال13