مدى إلتزام المصريين بالقواعد والقوانين

[se_ Elsyed]

لفت نظري اليوم خبر في شريط الأخبار الذي يظهر أسفل شاشة القناة الفضائية المصرية يقول إن " هيئة مترو الأنفاق قررت تخصيص أبواب بالمترو للصعود يوضع عليها أسهم خضراء وأخرى للهبوط ذات أسهم حمراء "

وقولت في عقل بالي والله لما يدهنوا الباب كله بالأخضر أو الأحمر ما فيش حد هايستجيب وفعلاً التجربة أثبتت إنه إن ماكنتش فيه هناك قوة جبرية تلزم الناس على تنفيذ تلك التعليمات يبقى هاتفضل الفوضى هي هي وعدم الإلتزام والهرجلة هو السائد ..

طب ما هم من أول ما أتعمل المترو ومكتوب فوق الأبواب إنها مخصصة للصعود أو الهبوط .. إنما مين بينفذ ؟ كذلك المقاعد المخصصة لكبار السن أو المعوقين ... هل في حد بيلتزم بها ؟

اللهم إلا العربات المخصصة للسيدات واللي عملوا فيها غرامات للرجل اللي يخالف ويستهبل ويركب تلك العربات حتى لو بالخطأ ...

واللي مخلي المترو ماسك نفسه لحد دلوقت ومستوى النظافة فيه معقول .. إن الشرطة أعطت وش للمخالفين من الأول وهرتهم غرامات فأصبح كل واحد بيحترم نفسه ولا يلقي بالقمامة على الأرض ...

ولكن نيجي بقى لموضوع التزويغ .. اللي أصبح مصيبة في المترو .. فمن خلال ركوبي للمترو بضعة مرات هذه الأجازة شوفت عجب العجاب ، ناس المفروض إنها محترمة والواحد طويل عريض زي الحيطة وتشوفه عمل حركة بهلوانية وهووووووب راح ناطط من فوق ماكينة التذاكر ( بتتكرر كثير جداً جداً ) وأخرون بيخرجوا من ماكينات الدخول ( إصرار على موقف الشريك المخالف ) وناس تانية تبص عليه ممكن تفتكر إنه بيتحرش جنسياً باللي أمامه فتلاقيه هجم على أحد ماكينات الخروج التي لا تسمح إلا بخروج شخص واحد ومع ذلك تلاقيه مصصم يخرج وراء شخص أخر ( والله حاجة تضحك )

وده كله في غياب أي رقابة من إدارة المترو التي إشتكت الحكومة وقالت إنهم بيخسروا مليارات سنوياً نتيجة إرتفاع تكاليف التشغيل ...

طب لما تعرفوا تديروها صح إبقوا تعالوا إتكلموا ..

وأنا هنا بأسأل .. ليه كده ؟ وليه هانفضل نعاني من مشاكل الصيانة والإلتزام من جانب الشعب والمحافظة على الممتلكات العامة التي نعاملها بمبدأ الإستحلال والأستهتار وإن ده مال عام سايب يابا وأهبر منه زي ما أنت عايز .. أو إن المواطن يتعامل معاه بمبدأ إن السرقة فيهم حلال ...

على فكرة قابلت ناس كثير جداً بيتكلموا عن موضوع سرقة التيار الكهربائي بشكل عادي جداً وكأنها أصبحت حلال مصفي أو إن هناك فتوى شريعة فذ هذا الموضوع خصوصاً بعد ما أرتفعت فواتير الكهرباء الشهرية وأيضاً لجؤ كثير من الناس حتى الطبقة المتوسطة وما تحتها في تركيب مُكيفات إتقاءً لحر الصيف .. فأصبح بيوصل التكييف بطريقة معينة من علبة التوزيع المخصصة للشقة وبالتالي لا يؤثر على فاتورة الكهرباء ..

وكإنها أصبحت غابة ده بيسرق من ده .. وده بيستحل مال ده ... وهيصه .

[ENG. BEHAIRY]

الأخ الفاضــــل / سى الســـــيد

خلق الله سبحانه الخلق جميعًا سواسية فى الشرق والغرب ، وفى الشمال

والجنوب هذه هى القاعدة الأســاســـية.. إذا عرفنا هذا نأتى إلى الحاجـــة

لشـــــمولية أى نظام أو قانون للمحـــاور الرئيســـــية التالية :

الأول : صياغة الأنظمة والقوانين المدروسة والمراجعة من ذوى الإختصاص والخبرة التى تتعامل مع الإنسان بلباقة واحترام وحزم ، ومراجعتها دوريًا وتعديلها وفق مقتضيات وظروف العمل .

الثانى : عملية التوعية والتثقيف ، والتعريف والتوجيه بكافة القنوات المتاحة للإرتقاء بالمستوى الفكرى والثقافى ودرجة الإلتزام بوسائل الإعلام المختلفة ، ومن خلال برامج الدعاية الهادفة والمتنوعة حتى على صعيد الأطفال وطلبة المدارس.

الثالث :وجود نظام حازم ومحترم ورادع يفرق بين العطف والضعف ، وبين الإلتزام والإختراق ، وفق منهجية وأساليب مدروسة ومقننة تكفل كفاءة العمل والإلتزام بضوابطه ، ولا تكون محل اجتهاد للغادى والرائح.

الرابع : نظام رقابة ومتابعة لضمان سهولة الإجراءت وضبط الأعمال ورضا المستخدم أو العميل ( الزبون).

عندها ستجد صورة تخالف تمامًا صور الجهل والغباء والتخلف والتخبط

الذى نعيشــــه ســــواء على مســـتوى الإجراءات أو مســتوى الإلتزام ..

تم تعديل 3 سبتمبر 2005 بواسطة ENG. BEHAIRY