...الإنتخــــ كوميديا ــــبات

[محمد حافظ]

في الأيام القادمة .. ستظهر كمية كبيرة من كوميديا الإنتخابات . فكما نعلم أن الشعب المصري يترجم يئسه إلي نكت .. تعالوا نجمع هنا أهم ملامح تلك الكوميديا

[محمد حافظ]

نشيد الإنتخابات المصرية

(( نعم .. يا مبارك .. نعم ..))

(( أنا بين شفيفك نغم ))

(( أيامنا قبلك ندم ))

(( وأيامنا بعدك عدم ))

((...... نعم ..يا مبارك.. نعم ... ))

[Sherief AbdelWahab]

بعنا قسط وبعنا كاش

قلنا مبارك يا بلاش

انسى .. انسى .. يا مبارك لن ننسى

ح انتخبك يا ريس .. عشان انت كويس

نعم لمبارك .. لا "للإرهاب"

(لافتات انتخابية في مدينة المنصورة)

خلص الكلام

[se_ Elsyed]

" 70 مليون مصري يقولون نعم لمبارك "

وعنهم نبيل لوقا بباوي

الراجل ده شكله مالي إيده وجمع توقيعات من الشعب المصري عشان يوكلوه يتكلم بالنيابة عنهم .. أنا كنت عامل توكيل خاص لأخويا من 8 سنوات عشان يقدم لي على تليفون في شقتي .. تفتكروا ممكن يكون إستغل التوكيل وباعني لنبيل ؟

[Sherief AbdelWahab]

صبح صبح يا عم الحاج!.. مع الاعتذار لبوحة :

أحمد الصباحي لـ"المصريون" : سياسة مبارك منعت العدوان الثلاثي على مصر عام 1956

كتب - محمد رشيد : بتاريخ 9 - 9 - 2005

أكد أحمد الصباحي رئيس حزب الأمة في تصريحات خاصة لـ " المصريون" أن وجود الرئيس حسني مبارك في الحكم حمى مصر من اعتداءات إسرائيل وأمريكا والبلاد الأخرى!

وأشار في تصريحات خاصة للمصريون أنه لولا سياسة الرئيس مبارك الحكيمة لضربت كلً من إسرائيل وبريطانيا وفرنسا مصر في العدوان الثلاثي في عام 1956 وأكد أن انتخابات الرئاسة التي جرت أول أمس سليمة 100 % ولا يشوبها أي مخالفات وتجاوزات من جانب الحزب الوطني أو الحكومة وأن الشعب المصري كان في أشد الحاجة إلي مثل هذه الانتخابات لاستكمال مسيرة الديمقراطية التي بدأها الرئيس مبارك، وأضاف رئيس حزب الأمة قائلاً إن مبارك رجل مستقيم وكويس قوى ومؤدب وعفيف اللسان وأن كل كلامه حكم وأضاف أنه لا يطالب الرئيس مبارك بأي مطلب في المرحلة القادمة لأن الرئيس من نفسه يتخذ الإجراءات السياسية التي من شأنها تعميق وإثراء الحياة السياسية والديمقراطية في مصر مؤكدا أنه أدلي بصوته للرئيس مبارك لأنه هو الأقدر علي قيادة سفينة الوطن.

الطريف أن الصباحي قد منح صوته لمرشح الوطني وأمر أبنه وأنصاره بتكرار نفس السيناريو وتأييد مبارك.

http://www.almesryoon.com/ShowDetails.asp?NewID=4358&Page=6

:) :) :P

خلص الكلام

[se_ Elsyed]

وما الغرابة في ذلك يا عم شريف ؟

مش عايزين تريقه على الناس في الفاضية والمليانة

الصباحي يا جماعة عنده 92 سنة .. وأخر حاجة يوعى عليها كانت العدوان الثلاثي اللي مبارك حب يمنعه ووقف بصدره قدام جيوش الأعادي ولكن المحظور وقع .. فالصباحي حصلت له صدمة .. ومن ساعتها وهو بيهطرش ويقول

طفوووووووووووووووووووا النوووووووووووووووور

إقلعوا الطرابيييييييييييييييييش

[se_ Elsyed]

من النهاردة لحد حلف اليمين يوم الأربعاء اللي جاي .. التليفزيون المصري هاينفخنا أغاني رومانسية عن مبارك وجمال مبارك وإنجازات مبارك لحد ما هايخلوا الناس يطلعوا من هدومهم .. حبيت أقلب شويه في التليفزيون .. روحت واخد لي جرعه على الماشي .. بعد كده روحت مكهرب القنوات دي عشان لو قربت ناحيتها بعد كده أستاهل اللي يجرى لي ..

[ثورة الوادي]

خدوا دي بئي من جرنال الميسا و السيما :

احمد الصباحي - مرشح حزب الامة - :

الحمد لله .. الحمد لله ..والله اكبر ..

فاز الاحق .. نصره الله واستجاب لدعائي ولدعاء الملايين .. حماك الله يا مبارك لصالح مصر .

انت قائد كبير .. وفقك الله لخير مصر والامة العربية

مش لائي الارشيف بتاع الميسا عالنت بس معايا الجرنال

العدد 17664

عموما حسني بعد ماخد 88 حيدخل تجارة

[se_ Elsyed]

عموما  حسني بعد ماخد 88 حيدخل تجارة

<{POST_SNAPBACK}>

وممكن آداب ..

[شاعرالرومانسية]

المشكلة الناس دى كدبوا وصدقوا كدبتهم والا اية ...

طب طبخوها عشان تطلع 88.6% ماشى ... بس مش لازم يأكلوهنا بقى.........

والله امبارح وانا بتفرج على التلفزيون المصرى بعد اعلان النتيجة كنت ..سورى يعنى جالى حالة غثيان وكن عاوز ............. أأوع

بس الحمد لله مسكت نفسى عشان فرمانات المدام بعدم بهدلة الانترية او السجاد

المشكلة انهم بيلعبوا على وتر الوطنية وحب مصر ....

زانا بصراحة بضعف قدام الاغانى الوطنية.... يعنى الاعلان بتاع فرد علم مصر على كوبرى قصر النيل دة بيخلى القلب يرفرف معاه..

وكمان الاغانى الجديدة بتاعة الفترة اللى فاتت واستخدام ناس بينهم وبين الناس كميا خاصة .. زى شريين ومحمد رفاعى وهيثم شاكر... الخ

وكمان البنت الصغيرة الامورة اللى ملامحها بتنطح مصرية ... دى اللى كانت فى اعلان شريف صبرى بتاع الفتيات والتعليم واللى ظهرت فى اغنية هيثم شاكر الاخيرة .. بنت امورة وكلها مصر ( وشبه بنتى كمان على فكرة ...)

بصراحة حاجات تخلى الواحد احاسيسة تعلا و يحلم بمصر اللى فى خيالة

بس للأسف .. بعد الاعلان او الاغنية من دول ...

تصحى على خبر او اعلان او برنامج او صورة وتهنئة ...

يفكرك بالوكسة اللى احنا فيها ....

وتلاقى نفسك بتقول ..........

" خير اللهم اجعلة خير "