ما هي صناديق الوافدين ؟؟!!!!!!!!!

[se_ Elsyed]

حزنت جداً جداً بالأمس من خبر مؤكد سمعته في قناة أوربت من السيدة / غاده الشهبندر مؤسسة حركة " شايفنكو " المعنية بمراقبة الإنتخابات ... وأقسم بالله لم أتمالك نفسي ووجدتني أبكى بشكل عفوي وقفلت التليفزيون ونمت .. لإن حتى الـ 1 % أمل اللي كان عندي إنطفئت شمعته ..

الخبر بيقول بإن اللي معاه بطاقة إنتخابية ممكن يروح ينتخب في أي لجنة غير اللجنة اللي المفروض يكون مُقيد فيها .... لحد هنا والخبر مش جديد وعادي

اللي مش جديد ومش عادي إن هايبقى في صناديق مخصصه في كل لجنة إسمها " صناديق الوافدين " ودي مخصصة لحملة البطاقات الإنتخابية اللي مش هايصوتوا في اللجنة التابعين لها ... يعني بتاع سوهاج ممكن يروح يصوت في القاهرة طالما معاه بطاقة إنتخاب

هنا بقى اللعب والفن والحرفنة كلها

ولإننا لسه بنشتغل يدوي وما فيش زي داتا سنتر يقدر القضاة يتأكدوا من خلالها هل الناس دول فعلاً مُقيدين في كشوف الإنتخاب .. وهل لهم حق الإنتخاب يعني ما علهمش أحكام أو مدانين في قضايا ... إلخ ... وهل البطاقات دي حقيقية أم مزورة ( هي حقيقية بس الحزب الوطني هو اللي مزورها ) وبالتالي الإعتماد الكُلي هايكون على التحقق من البطاقة فقط ... لحد هنا برضوا وما فيش مشكلة كبيرة

المشكلة بقى إن الحزب الوطني إستغل كده وإبتدى يحشد القوات ويصدر لهم بطاقات زي دي ويجبر أصحابها على التصويت لصالحه ...

طب ما ممكن الواحد يدخل اللجنة ومن ورا الستارة يقول لأ ومليون لأ لمبارك ؟

نقوله ...... كان غيرك أشطر يا نونو

السيدة الفاضلة غادة الشهبندر قدمت دليل قاطع وحالة قائمة لجبروت وظلم الحزب الفاشي .. وهي إن أحد المقاولين تقدم لحركة شايفنكو بأدلة وشكوى من إن الحزب الوطني ممثلاً في المحليات إمتنع عن صرف باقي مستحقات المقاول إلأ .... إلا لما ياخد 100 بطاقة إنتخاب على بياض ويعبيها بأسماء الناس اللي شغالين معاه ويخليهم يروحوا ينتخبوا في صناديق الوافدين ..

طيب ما الراجل ممكن يقول في نفسه .. طب ما أنا ممكن أعند وأخليهم يصوتوا ضد مبارك ..

قالوا له إن إحنا عارفين إنت بتقول إيه جواك يا لئيم ... وةما فيش مليم هايتصرف لك إلا لما نفرز صناديق الوافدين ونشوف إديتوا صوتكوا لمين ....... وعلى فكرة الست قالت له طب إبعت لي بطاقتين ولا حاجة من دول .. راح باعت لها 7 بطاقات فاضية وعلى ميه بيضا وعرضتهم في البرنامج ...

ولا حول ولا قوة إلا بالله ... وحسبنا الله ونعم الوكيل ... واللهم إجعل كيدهم في نحورهم ...

تعرفوا ده ممكن يؤدي إلى إيه يا جماعة ؟

مش إن مبارك يفوز بإكتساح أو إنه يقعد على قلبنا لطالون .. ده مش مهم لإن المنتقم الجبار موجود وممكن في لحظة كل اللي بيخطط له مبارك ينقلب ضده ... ... لكن في نتيجة أكبر وأخطر فكرت فيها بعد ما أتغميت وسمعت الموضوع ده

وهي إن المقاولين اللي زي دول ومنهم الآلاف اللي الحكومة بتتعامل معاهم ونتيجة للي بيحصل فيهم من ذل وأستعباد وممارسات للقهر عشان مجرد إنهم يحصلوا على حقوقهم .. ممكن ييجي على مساكن بيبنيها لحساب الدولة أو إنشاءات لمرافق وينتقم منهم من خلالها في غش للمواد المستخدمة أو تلصقه الشغل أو أو أو ... ومن سيدفع الثمن في النهاية هو المواطن الغلبان اللي بيلاقي العمارة وقعت وهي لسه ما كملتش 5 سنين ، أو الطريق إتملى مطبات وإنخفاضات وهو لسه معمول بقى له شهور .... إلخ ولا عزاء للمصريين

[amohsen]

حسبنا الله ونعم الوكيل

[وليــد صفـــوت]

أنت زعلان من حاجات بسيطة زى دى يا ابيه س س ,...

خد عندك الكونبلة دى ,.....

إمبارح و انا بقلب شنطة بابا كعادتى كل يوم بعد ما يرجع من الشغل ( بلقط رزقى .... :) ... ) فوجئت بمجموعة من الأوراق التى تشبة الشيكات فى حجمها ,...

و عليها شعار الحزن الوطنى ( طبعاً انا الدم غلى عندى و كنت هعمل خناقة فى البيت ...:) ) و قولت يبقى والدى طلع عميل سرى للحزب ... :D .... كما وجدت عليها أسماء بعض الموظفين , و أرقام بطائقهم الإنتخابية ,...

و بمواجهة المتهم بالأدلة ( اللى هو بابا :D ) , قاللى ان جهة معينة ( من غير ذكر تفاصيل ) هى اللى اعطته الأوراق دى لتسليمها للموظفين للتصويت بها يوم الإنتخابات ,...

و إن الموظف اللى هيعطى صوته للرئيس القائد الزعيم الأب و الأم و الخالة و العمة و الجدة و إنتى بابا إنتى ماما ....... الخ الخ ,.... ليه علاوة !!!!!!!!!!!!!!! :P

بس خلاص ,.. عن قذنكم , معاد دوا الإنهيار العصبى ,... :D

[se_ Elsyed]

و إن الموظف اللى هيعطى صوته للرئيس القائد الزعيم الأب و الأم و الخالة و العمة و الجدة و إنتى بابا إنتى ماما ....... الخ الخ ,.... ليه علاوة !!!!!!!!!!!!!!!  :)

<{POST_SNAPBACK}>

طب والقائد الزعيم هايعرف إزاي إنهم صوتوا عليه .. قصدي صوتوا له ؟

ما هما ممكن ياخدوا العلاوه ويضربوه بومبه

قولت يبقى والدى طلع عميل سرى للحزب

أنا عندي برضوا عميل مزدوج في البيت .. أخويا الكبير عضو في الحزب الوطني .. ولما سألته إنت ليه يابني بهدلت نفسك كده .. قالي لي بمنتهى البساطة إن الإشتراك كله على بعضه بخمسة جنية .. بس لك إمتيازات كتير بقى في الرحلات والسكر والزيت والتومين .. وأنا قولت أشترك يمكن أخد صابونه :) ...

اول ما صحيت الصبح النهاردة بعثت له رسالة وقولت له لو أعطيت صوتك لمبارك لا أنت أخويا ولا أعرفك ..