أكيييد .. أكييييد في مصر!

[Sherief AbdelWahab]

فكرت في وضع هذه المأساة في موضوع كوميديا الانتخابات .. لكني وجدت أن دلالاتها تستحق المناقشة في موضوع مستقل:

تسببت مشاهد الحملة الانتخابية التي يقابل فيها مرشح الوطني للانتخابات الرئاسية المقبلة حسني مبارك فلاحين ويجلس معهم في "الخص" في ضياع مستقبل أحد الفلاحين البسطاء، فالرجل الذي صدق هذه المشاهد الساذجة، ذهب إلي مقر رئاسة الجمهورية طمعا في مقابلة رئيس الجمهورية كأمثاله من الفلاحين الذين تكرم عليهم الرئيس بمقابلات سابقه!!

المواطن يدعي فتحي محروس وهو مقيم بأسيوط وحضر إلي القاهرة خصيصاً لهذا الغرض لكنه الآن موجود في القسم شرطة مصر الجديدة حيث أكد المحضر الرسمي أن الرجل كان يهذي بكلمات غير مفهومة، وجاري التنسيق مع مباحث أمن دولة لعمل ملف أمن دولة للفلاح المسكين!!

http://www.almesryoon.com/ShowDetails.asp?...&Page=13&show=0

خلص الكلام

[se_ Elsyed]

هذا وقد ذكرت مطالع مصدره .. قصدي مصادر مُطلعه بإن الحوار التالي دار بين الفلاح الفصيح والسيد الرئيس القائد - حفظه الله ورعاه -

الفلاح : إفتحوا لي الدوار يا ناس .. بدي أجابل أبا الريس ..

الحرس : إمشي يا راجل بعيد من هنا بدل ما نضربك بالنار .. إنت فاكره دوار العمده بروح أهلك ؟

الفلاح : طب وماله دوار العمده .. طب ما هو إذا كان العمده هو ريس الكفر بتاعنا .. فالريس مبارك هو عمدتنا كلنا .

الحرس : يالا يا راجل يا خرفان بدل ما نوديك ورا الشمس .

الفلاح : طب عليه الطلاج من بهانه مراتي ماني متعتع من هنا إلا لما أجبل أبا الحاج مبارك .. بس هييييييي

وهنا كان السيد الرئيس يقوم ببعض التمرينات الرياضية للمحافظة على لياقته البدنية ومن حديقة القصر الغناء تنامى إلى مسامعه الحديث الذي يدور بين الفلاح وبين الحرس ..

الريس : يا عبد السلام .. سيبوا يدخل يا بني ... تعال يا حاج .. إزيك ...

الفلاح : تسلم من كل رضي يابا الريس ..

الريس : بلاش أبا الريس دي بتحسسني إني شيخ غفر .. قولي يا حسني أو يا سونسن .. قصدي قولي يا ريس على طول ..

الفلاح : يا سلام على التواضع .. يا سلام عالحنيه .. أومال فين الشاي يا ريس ؟

الريس : شاي إيه يابا إنت داخل قهوة كتكوت وبتطلب بمشاريب ؟ ناقص تقولي عايز سحلب وطاولة

الفلاح : لأ أني جصدي الشاي اللي بتشربه كل ما تروح تجابل أي نفر منينا ..

الريس : أيوه أيوه .. يا راجل ما تاخدش في بالك .... ده لزوم التصوير .. المهم خش في الموضوع .. إنت عايز يا حاج .

الفلاح : أني جاي أشتكي لك يا ريس من الحالة الضنك اللي إحنا عايشين فيها ومش أني بس .. دول أهل الكفر كلهم زي حالاتي كيدي.. بنك التسليف الزراعي هايحجز على الجيراطين اللي حدايه .. وده علشان ما جدرتش أسدد التلتميت جنية الجسط المستحج عليه .. عشان الدودة كلت القطن السنة دي يا ريس .. وحتى البطختين اللي كنت زارعهم .. طلعوا عليهم إشاعات بإن فيهم سومييات وأضطرت أكلهم أني وعيالي وقولنا " وجعك يا بطني ولا رمي البطيخ "

الريس : يعني عايزني أعملك إيه ؟ أبعت أمن مركزي يحارب الدودة .. ولا أبعت أجيبلك شمامتين بدل البطختين اللي أكتلوهم ... والله غريبة دي ؟

الفلاح : لأ العفو يا ريس .. بس أني بدي تكلم لنا البيه اللي في البنك يصبر علينا شويه لحد ما ربنا يفرجها ..

الريس : بص يا حاج .. ناس كثير قالوا زيك كده وهربوا بفلوس البلد بره ومش عارفين نجيبهم .. الله يخرب بيوتكوا مليتوا البلد ... متين مليار لحد دلوقت لهفوهم ولاد الـ .... ، وبعدين أنا لو سبت لده تلتمية وده خمسين .. البلد هاتفلس ... وترجع المعارضة تاكل وشنا ... فاهم حاجة ؟

الفلاح : إن شالله أعدم نواضري ماني فاهم .

الريس : الحمد لله يبقى أنا كده أديت رسالتي .. يالا قوم أتوكل على الله عشان تلحق القطر .. بس أستنى لما تاخد كام صورة معايا لزوم الدعاية الإنتخابية ...

.. وخرج الفلاح مذهولاً مكسور الجناح من القصر الرئاسي وهو بيقول لنفسه " منه له .. جاي رايح .. منه له .. إنت القوي على كل قوي يارب " والحمد لله تدارك رجال الحرس الجمهوري البواسل الوضع وألقوا القبض عليه وأودعوه مستشفى العباسية للأمراض المستخبية ليتلقى العلاج اللازم وكمان عشان ما يأذيش نفسه ...

وعاش مبارك نصير الفلاح