كوميديا هرتله الشياطين ال 13

[KANE]

مع الأوضاع الحالية وجدت هذه الهرتله على احد المواقع فأضحكني في هذا اليوم التاريخي العبوس القمطرير

:D

لو ما ضحكتش مش ذنبي واعتذر :D مقدماًُ إن كان الموضوع هايف حبتين ولكن بدل ما ننفجر :D

و الان سيداتى انساتى سادتى..روايات التخلف العقلى للشباب تفخر بان تقدم لكم رائعتها الجديدة:

الحلقة رقم755843 من الشياطين التلاتاشر -شوف النحس-

الشياطين التلاتاشر و لغز عربية الكبدة ...اناناناةةةةةةةةةةةةةة

فى يوم حالك السواد مكفهر الاجواء ملبد السماء بادى القتامة واضح الكآبة كان الشياطين التلاتاشر يجلسون فى مقرهم السرى اسفل احدى مقالب القمامة بقلعة الكبش

حينما تردد فى المكان عبر مكبرات الصوت : على جميع الشياطين التوجه لقاعة الاجتماعات فورا..شكرا..أأ و على فكرة فيه النهاردة سندوتشات فلافل ممتازة فى الكانتين و يا ريت كل اللى عليه حساب متأخر يجيبه عشان بنقفل الشهر

تقابل الشياطين فى قاعة الاجتماعات السرية الاسطورية الخرافية و....لحظة واحدة نسيت اعرفكم بالشياطين

محمد عطية من مصر- تشابه اسماء مع خنفس شهير -

عثمان من السودان - ماعندهمش اسامى غيرها هناك-

توتة من لبنان - يا دلع يا دلع -

حمد من الخليج - مش محتاج اشتغل يا كلاب انا جاى منظرة -

سلام من ليبيا - محدش يقوله على حاجة ليفضحنا -

الخ..الخ..الخ

و فى هذه اللحظة اضاءت الشاشة ليظهر من ورائها رقم صفر اللى بقالنا مية سنة منعرفوش - شوف النفخ- و اللى ممكن يطلع بواب عمارتكو فخد بالك

بدأ رقم صفر الاجتماع: بص بأه يا شيطان منك له شغل الصياعة و الهبل ده ميمشيش معايا بقالكو ست اشهر قاعدين فى المقر السرى واكلين شاربين مبرطعين و دلوقتى جه وقت الشغل و بالمناسبة محمد عطية حمادة بطل جرى ورا البنات يا كتكت لحسن انت عارف انا جبتك منين

المهمة ياولاد المرادى خطيرة و هيتحدد عليها مصير العالم -يعنى قال المرة دى بس- فيه مخطط لتدمير مصر يا ولاد مصر - موسيقى السلام الوطنى علطول- الاعداء زارعين اخطر جواسيسهم على الاطلاق هانز مكمنلخن فيتزجيرالد فى موقع من اخطر المواقع الحيوية على شاطئ النيل بيبيع كبدة...سليمة فاهمين يعنى ايه سليمة يعنى الناس ممكن تتعود عليها و تبطل تاكل الكبدة المضروبة اللى بتتباع فى كل حتة و تحصل قلاقل و اضطرابات احنا فى غنى عنها عشان كده انا اخترت للمهمة دى:

محمد عطية - لازم طبعا مندوب مصر فى كل مهمة عشان الروايات بتطلع من عندنا-

توتة - عشان لازم الرواية يبقى فيها بنات -

سليم - مين سليم ده -

عثمان - هتاخدوه معاكم فى طريقكم عشان هوا نازل المهندسين-

و....اى حد يروح معاهم عشان فاضل نفر فى الميكروباص

و اجتمع الشياطين ليتجهوا الى الغواصة السرية التى تسير بالطاقة الكهرونوويطيسية و المزودة باسلحة سرية فتاكة و بلاى ستيشن و تراك سبق خيل لتسلية الشياطين فى رحلتهم

و على الفور انطلقت الغواصة فى اعماق النيل عن طريق النفق السرى - ماهو كل حاجة فى الروايات دى سرية - حتى وصلت الى شاطئ النيل حيث يقف الهدف عربية الكبدة و تسلل عثمان الى الشاطئ ليجد رجلا يسير و فى يده سندوتشين كبدة دوبل فاخرج على الفور باخراج كرته الشيطانية السرية و قذفها على الرجل فافقده الوعى ثم قفز فى الهواء لينقذ سندوتشى الكبدة و يلتهمهما قبل ان يعود للشياطين قائلا: تم تحليل العينة و يجب مهاجمة الهدف باقصى سرعة

قفز الشياطين من الغواصة ليحيطوا بعربية الكبدة و العميل اسمه ايه - اقروه فوق مش هاعرف اكتبه تانى - و الذى اخرج من عباءته - اه بياع كبده بعباية ماهو هبل بقى - السلاح السرى الفتاك و صوبه نحو محمد عطية الذى قفز فى الهواء ليؤدى الحركة السرية الساحقة و التى دفعت الجاسوس ليلقى السلاح السرى الفتاك و يستلقى على الارض ضاحكا حتى فقد الوعى

و بعدها اخذ محمد يجرى و يجرى ليستطيع الخروج من عربية الكبدة بعد ان زرع القنبلة داخلها - اه بيجرى جوا عربية الكبدة مانتوا سكتوا على ميت الف اشتغاله جت على دى ولا اقولكوا كان بيجرى فى النفق السرى اللى جوه العربية - ثم قفز فى اخر لحظة قبل انفجار العربية - شفتوها فى ميت فيلم اكشن مقاولات - و تناثرت الكبدة فى الفضاء

و من طائرته السرية كان رقم صفر يتابع الموقف و ارتسمت على وجهه السرية ابتسامة سرية سعيدة

تمت

تم تعديل 7 سبتمبر 2005 بواسطة KANE