يا الدفع يا الحجز

[se_ Elsyed]

مشكلة كبيرة أصبحت تواجه العائدون ( مش من أفغانستان :) ) من مصر للسعودية ... حيث إن خطوط الطيران وخصوصاً السعودية في مصر عامله شغال عالي قوي قوي اليومين ...

إزاي ؟

كثير من الناس بيسافر من هنا ويقول مش هأكد العودة إلا لما شوف أنا هارجع إمتى بالظبط .. وطبعاً ياخدوا الأمور ببساطة وإن الحجوزات دي مرطرطه ومافيش مشكلة ... لإن في موسم الصيف هناك أربع رحلات يوميه من مصر للسعودية والعكس ( ده بالنسبة لمدينة الرياض )

لكن جاء وقت الجد وأصبح الجميع يلفوا حوالين نفسهم وتلاقي مثلاً أول مكان ويتنج ليست بعد شهر مثلاً والحجوزات مقفولة تماماً يمكن لحد أخر سبتمبر ...

وطبعاً فُتحت السوق السوداء على مصراعيها .. ووصل سعر تأكيد الحجز إلى 1000 ج ( يعني ثمن تذكرة تانية ) .. آه والله من فم بعض زملاءنا اللي بيتصلوا بنا يومياً عشان نشوف لهم حجز هنا ولا هنا ...

والموضوع سببه إن هناك بعض المتواطئين في مكاتب الحجز والسفريات وبعض الموظفين في مكاتب الخطوط السعودية بمصر .. فقام هؤلاء الأشخاص بعمل حجوزات وهمية .. وبالتالي يبان بقى إن الحجوزات كومبليت .. ييجي المغترب المسكين يحاول يعمل حجز يقولوا له مافيش يا بيه .. يضطر يروح مكاتب السفر والسياحة .. يروحوا بقى مكشرين على أنيابهم ويساوموه يا الدفع يا الحجز ...

إبتدى بقى ناس يبقوا أثرياء حرب من الموضوع ده ... وتخيلوا تبدأ من الساعي اللي بيقف في مكتب الخطوط السعودية سواء في شارع قصر النيل أو سور نادي مرتضى منصور .. اللي تروح ملاغيه بقرشين لا يقلوا طبعاً عن 250 أو 300 جنيه ..يروح مطلع لك حجز من تحت الأرض ( أول ما عرفت كده إتصلت بأحد زملائي وهو سعودي الجنسية ويعمل مدير عام المبيعات في الخطوط السعودية الذي إهتم بالموضوع ووعد إنه سيُثيره في أول إجتماع بإدارة الخطوط السعودية )

والناس مضطرة تدفع لإن الدراسة بدأت في السعودية النهاردة ومدارس الإنترناشونال بدأت الإسبوع الماضي .. وفي ناس مُقيدين بمدة صلاحية للتأشيرة وللتذاكر كمان ..

فالأفضل لجميع المغتربين إنهم يكونوا مأكدين موعد العودة وما يسيبهاش للظروف خصوصاً خلال ما يُمسى بالبيك سيزون أو مواسم الذروة زي الصيف والأعياد والحج ورمضان ( ده أنا بيتيهيألي كده بقت السنة بيك سيزون )