استعلامات عن اماكن وخدمات

[ابو صلاح]

الصفحة دى يا جماعة خلوها للأستعلامات عن الأماكن والخدمات

انا عايز اعرف عنوان مكتبات عامة واماكن لبيع الكتب

وياريت عنوان المكتبات اللى هتدهانى ( تكون كبيرة وفيها كميات ضخمة من الكتب ) لانى مشترك فى مكتبة كمية الكتب اللى فى المكتبة محدودة جدا ومش فى كل التخصصات ، وتكون فى القاهرة

وبردو تقولولى عن أماكن لشراء الكتب

[bentmasria]

اخى الفاضل

بالنسبة للمكتبات عندك

مكتبة مبارك فى الجيزة شارع النيل

ومكتبة القاهرة فى الزمالك

ودول اكبر اتنين بالنسبة للمكتبات المصرية كمان ممكن تشترك فى مكتبة الجامعة الاميريكية او مكتبة المركز الثقافى البريطانى وده كان متاح من فترة (ماظنش غيروا النظام)

وطبعا الاوسع دار الكتب فيها بلغات متعددة وبتغطى اغلب المجالات ان لم يكن كلها وممكن تصور اى جزء تحبه او تستعير لو عملت عضويه ودى موجودة على الكورنيش وانت متجه لشبرا جنب الهيئة العامة للكتاب ومباشرة جنبهم مكتبة الهيئة العامة للبيع وفيها كميات هائلة من الكتب فى كل مجال

وطبعا فى وسط البلد عندك

مدبولى - التحرير والمهندسين فى شارع البطل احمد عبدالعزيز

دار الشروق الاتنين فى ميدان سليمان باشا

ودار المعرفة فى شارع عبدالخالق ثروت وكمان دار نهضة مصر

وطبعا الانجلو والمكتبة الالمانية ودار الكتب الفرنسية فى شارع شريف وما حوله وفى شارع عدلى دار نشر كبيرة كمان حجيب لك اسمها دول فى منطقة وسط البلد وفى غيرهم طبعا بس انا بتعامل غالبا مع دول

طبعا الفجالة مليانة بس انا موش فاكرة اصلى بكتفى غالبا بوسط البلد وسور الازبكية اللى فى معرض الكتاب السنوى

كمان فيه مكتبات الكترونية على النت تقدر تشترى منها ببطاقات الائتمان الخاصة بده وتنزل النسخ كاملة وكمان بعض المواقع المجانية ربنا ييسر واجمعهالك فى اقرب فرصه

وموش حنسى طبعا لو بدور على حاجة قديمة او نادرة السيدة زينب ومخازن الكتب اللى كنت بروح اغرق فيها واطلع لى بكام حاجة ممتازة

تصدق اشتريت العقد الفريد من هناك

يللى كانت ايام

اتمنى اكون ساعدت بشىء

دمت بخير