مبارك يحصد اصوات الموتى!

[Alshiekh]

حصل السيد الرئيس محمد حسنى مبارك على غالبية الاصوات ، اللى صوتوا وقالوا الحقونا واللى ماصوتوش

وقد تفضل السيد الرئيس بتوجيه الشكر لكل من قال نعم ويخص بالشكر كل الناخبين الموجودين بالصورة حيث انه كان لهم الفضل الاول والاخير ، ويتعهد بأن يزرع على قبر كل واحدا منهم نخلة ، ولا بلاش النخل ده علشان بيعمل له حساسية ، حايزرع على قبر كل واحد منهم حباية فول ، وبالطبع بعد الفول مايكبر ويطرح حايضمنوا ان اعضاء الحزب حايروحوا يزورهم علشان يجمعوا الفول وبعدين حايسمحوا للاهالى بالزيارة علشان يلموا الحطب.

كذلك يتوجه السيد الرئيس بالشكر لكل من قالوا لا وهو سيادته عارف انهم كثير قوى قوى واساميهم كلها مكتوبة ، لكن دول مهما كتروا مايهزوش شعره فى راس سيادته لانه سيادته يعرف يكتم على نفسهم ازاى وسيادته بيقول لهم شيلوا المواضيع اللى فى دماغكم دى وكفاية عليكوا العيش والفول وبقايا المطاعم اللى اتكلم عليها محمد حافظ فى واحدة من مداخلاته واحمدوا ربنا على النعمة اللى سيادته موفرها لكم وساب المطاعم تبيع لكم بقايا الاكل بدل مايرموه فى الزبالة ، واللى عاجبه على الكحل يتكحل واللى مش عاجبه ، من البلد يرحل ، وكفايه عليه حبايبه بتوع الحزب والاخوة الاموات اللى وقفوا جنبه وقفة راجل.

هذا ويطالب سيادة الرئيس الاخوة الموجودين بالصورة بالاستعداد لانتخابات نوفمبر القادمة حيث ان الحزب فى امس الحاجة الى أصواتهم ويتمنى الا يتوانوا عن تقديم تلك الخدمة الجليلة كعهده بهم دائما على مدار عدة عقود ويعدكم بأن يقوم بطرد كل ساكنى المقابر الذين يسببون لهم الكثير من الازعاج.

والى ان نتقابل فى نوفمبر يستودعكم الله ويتمنى ان يقابلكم فى القريب العاجل بس انتوا اللى تيجوا تشوفوه علشان هو مابيحبش يروح عندكم علشان المكان ضيق عندكم حبتين.

[bakeer22]

لا لا ماتستعجلش اكيد هانصحا فى يوم نلاقية رحلهم زيارة مفاجأة ماكنتش متوقعة ودة طبعا علشان يكتر التبادل التجارى معاهم لكن للأسف ما حبش يرجع ودة طبعا علشان حس اد اية الشعب دة هادى مابيطلعش صوت ولا بيعمل مظاهرات فقلك هو دة اللى انا عايزة