إستقالة الوزارة يوم 27/9

[se_ Elsyed]

زي النهاردة كده بس هايبقى الثُلاثاء بعد القادم .. سيادة الرئيس القائد ( القيادة والعبور للمستقبل ... مش عارف ليه كل ما أقرأ الجملة دي في أي إعلان أتخيل واحد بينط حواجز .. أو فلاح مشمر جلابيته وبيعدي قناية ) ما علينا في اليوم ده الريس هايلحف اليمين إيذاناً ببدء 6 سنوات أشغال شاقة للشعب المصري المسجون بقى له 24 سنة ... يعنيى هاندخل في الثلاثين بالصلاتو عالحبيب .. وإذا كان المجرم عتيد الإجرام بيتحكم عليه بـ 25 سنة ( تأبيده لا مؤخذه ) يعني بعمر السجن اللي السنة بتبقى فيه 9 شهور يعني كنا زماننا خرجنا 19 سنة .. وحيث إننا شعب مشاغب ولبط فهو حكم علينا بحتة من أم 24 ... والراجل أكد لي كذا مره إنه كان ناوي يمشي .. لكن لما لقى فيه عؤ وكلام مالوش لازمه عن الديمقراطية وحموم الإنسان وكفايه وأتخنقنا والكلام ده .. قرر يعاقبنا ويفقعنا 6 سنين تاني .. على أساس إن رئاسة الجمهورية إصلاح وتهذيب وتأديب ..

ما علينا ( إحنا كنا بنقول إيه )

آه .... يوم 27 الريس هايحلف اليمين قبل الضهر في مجلس الشيعب .. وبعد الضهر أبا الحاج أحمد أبو نظيف هايجري جري على قصر العروبة ويقدم كفنه بإيده .. قصدي إستقالته يعني ... وبكده كل وزير هايقعد في بيته جنب التليفون ويا إما يكون من المحظوظين ويقولوا له تعالى يابني إنت هاتكمل معانا ... يا إما هاياخد صابونة لوكس ويحصل على لقب وزير سابق .. وبكده تبقى دي من أقصر الوزارات عمراً في عهد مبارك الميمون .. فيا كبد أمهم الوزرا اللي هايركبوا الطفطف مش هايبقوا كملوا سنة ونص .. يعني مش هايبقى لحق يكون نفسه ويشتري الشالية اللي في مارينا أو جمصه حتى ، لإن السوق نايم والعينين كانت مفتحه اليومين اللي فاتوا عشان إنتخابات الرئاسة اللي ما كانش في صوت يعلو فوق صوتها ...

ما علينا برضوا ..

تفتكروا مين في رأيكم هايركب الطفطف ومين هايفضل في أرابيزنا ؟

نبدأ بالأخ س س والميكرفون معاه ويقولنا رأيه الشخصي البحت في تشكيلة الفريق اللي هانخوض بها المرحلة اللي جايه ( اللي هارنكب فيها بطاس الريح ونعبر للمستقبل )

حارس المرمى : أتوقع إن أحمد نظيف هايفضل وده لإنه على هوى جمال بيه .. وكمان هو شخص طويل وله هيبه .. وكمان موفر على الحكومة كتير من ناحية إنه بيحمل إسم وصفه في نفس الوقت ( نظيف ) وكمان عشان يدوا له فرصة يكمل موضوع بطاقة التومين الذكية ( أموت وأشوفها هاتبقى عامله إزاي .. مش عارف ليه متخيلها هاتبقى زي الميموري كارد بتاع الكمبيوتر .. بحيث تحطها كده في جهاز عند عم عبدو البقال بتاع التومين تقوم كل المعلومات بتعاتك تظهر بشكل تلقائي .. يعني لك كام شكارة رز .. وكام علبة زيت شلجم وكده يعني )

خط الضهر من اليمين للشمال

أنس الفقي : حاسس إنه هايركب الطفطف فوزارة الإعلام لم يعد لها أي لزوم في ظل إنتشار القنوات الخاصة والصحف المستقلة .. وكمان مبارك ما بقاش محتاج تطبيل وتزمير بعد ما أترستأ 6 سنين جايين .

ممدوح البلتاجي : ده واحد كان ماشي في ميدان التحرير فقاموا زقينه جوا وزارة الإعلام .. لقوه بيغرق راحوا مطلعينه ومنشفينه ورميينه في الشباب والرياضة والراجل غرق ومات وشبع موت ... يعني طفطف برضوا

فاروق حسني : طفطف .... كفاية بقى ده إيه ده ...

محمود أبو الليل وزير العدل : طفطف وزارة لا معنى ولا طعم لها ...

محمود محي الدين ( إستثمار ) : هايقعد في أرابيزنا .. الراجل بذل مجهود غير عادي في زفة المبايعة ولازم نكافأه وكمان ده قريب قوي من جمال بك وتقريباً من نفس سنه ..

محمد إبراهيم سليمان : طفطف .. ريحته فاحت قوي في الإسكان والتخريب .

حبيب العادلي وحسين طنطاوي : دول ماحدش له دعوة بهم .. تبع الراجل الكبير

أحمد شفيق ( طيران ) : طفطف .. مشاكله كترت وبقى كرت محروق وطوب الأرض بيكرهه في مصر للطيران

أحمد الليثي ( زراعة ) : طفطف .. شخص أول ما تشوفه تحس إنه ناظر عزبة أو مقاول أنفار من بتوع الدودة .

- ماجد جورج ( البيئة ) : لا لون ولا طعم .. ممكن يبقى في النص يعني لا يشيله ولا يخليه يبقى في الأوفسايد يعني :D

- عصام شرف ( مواصلات ) : هايخليه عشان المرحلة المهمة بتاعت مترو الأنفاق اللي بدأو فيها وهاتعمل ثورة حقيقية في المواصلات لما تتم .

- أحمد المغربي ( سياحة ) طفطف .. بعد أحداث شرم الشيخ بقت الأمور صعبة ومحتاجين أفكار جديدة وجريئة .

- سامح فهمي ( بترول ) : هايفضل .. راجل نشيط وعامل شغل حلو في نادي إنبي ( ده هايتوقف على نتيجية ماتش الأهلي وإنبي يوم الخميس الجاي ) :blink:

- طارق كامل ( الاتصالات ) : لو نظيف فضل يبقى ده هايفضل هو كمان

- محمد عبد الرحيم شحاتة ( تنمية محلية ) و أحمد عثمان ( تنمية ادارية ) : أي كلام في البطيخ ووزارات سبوبه بياكلوا من وراها عيش .

- أحمد أبو الغيط ( خارجية ) : أهو عامل حركة شويه عن الرجل البطريق اللي كان موجود قبل كده .. خلوه أهو ينفع .

- عمرو عزت سلامة ( تعليم عالي وبحث علمي ) : يالله هي الأسامي بفلوس ... تعليم عالي إيه وواطي إيه ؟ ليه ما يخلوهاو مع التعليم العادي ويريحونا ويخفضوا التكاليف اللي بالهبل دي ... أما عن البحث العلمي فسلم لي على المترو ...

- أحمد جمال الدين موسى ( تربية وتعليم ) : خلوه عشان الدراسة بدأت خلاص ومش عايزين قلق .

- محمد عوض تاج الدين ( صحة وسكان ) : هايخليه شويه .. الراجل يا حبة عيني ما كانش بيتحرك من جنب السرير اللي كان راقد عليه مبارك في ألمانيا أيام الوعكه إياها وكان فاطر نفسه من العياط ..

- فايزة أبو النجا ( تعاون دولي ) : الست دي عامله شغل عالي ... وبتشحت علينا زي الكتاب ما بيقول .. وشكلها أساساً بيخلينا نصعب على الناس فبيدونا اللي فيه النصيب ..

- حسن أحمد يونس ( كهرباء وطاقة ) : خلوه ... ده بيعذب الناس صح الصح وقاطم وسطهم في فواتير الكهرباء .

- سيد مشعل ( إنتاج حربي ) : ده بقى بالذات هايفضل لحشد جموع الشعب العامله في قطاع المصانع الحربية عشان إنتخابات مجلس الشيعب في نوفمبر الجاي.

- أمينة الجندي ( تأمينات إجتماعية ) : الست أمينة جمايلها مغرقانا ومداينانا بفلوس التأمينات .. وبعدين سرنا معاها .. خلوها يا ولاد .

- محمود أبو زيد ( موارد مائية وري ) : أخويا شغال في وزارة الري وبيقول عليه راجل محترم ... خلوه عشان خاطر أخويا :blink:

- محمود زقزوق ( اوقاف ) : من نفس عينة شيخ الأزهر .. مطبلاتي ومزمراتي كبير ... خلوه أهو ينفع .

- أحمد أحمد العماوي ( قوى عاملة وهجرة ) : كان في الزفة برضوا وبيتكلم نيابة عن ملايين العمال ومبارك مبسوط منه .. خلوه

- يوسف بطرس غالى ( مالية ) : خلوه عشان التوازن وعشان المسحيين ما يزعلوش من مبارك

- حسن علي خضر ( تموين وتجارة داخلية ) : خلوه عشان رمضان داخل ومحتاجين ياميش .

- كمال الشاذلى ( شؤون مجلس الشعب ) : كيمو حبيب قلبي .. آموووووووووه إوعى حد يقرب له أحسن أعوره .

[emmyyy]

س س

نسيت رشيد محمد رشيد بتاع الصناعه باين مش كده برده

[shawshank]

حارس المرمى : أتوقع إن أحمد نظيف هايفضل وده لإنه على هوى جمال بيه .. وكمان هو شخص طويل وله هيبه .. وكمان موفر على الحكومة كتير من ناحية إنه بيحمل إسم وصفه في نفس الوقت ( نظيف ) وكمان عشان يدوا له فرصة يكمل موضوع بطاقة التومين الذكية

<{POST_SNAPBACK}>

و عشان كان سبب في رضا أمريكا على مبارك.

فاروق حسني : طفطف .... كفاية بقى ده إيه ده ...

<{POST_SNAPBACK}>

مفتكرش ... عشان التوازن برضه :D

حبيب العادلي وحسين طنطاوي : دول ماحدش له دعوة بهم .. تبع الراجل الكبير

<{POST_SNAPBACK}>

لو فضل حبيب العادلي يبقى عشان سيناء ... و لو مشي يبقى برضه عشان سيناء.

- سيد مشعل ( إنتاج حربي ) : ده بقى بالذات هايفضل لحشد جموع الشعب العامله في قطاع المصانع الحربية عشان إنتخابات مجلس الشيعب في نوفمبر الجاي.

<{POST_SNAPBACK}>

الجيش لا ينتخب ... مش كده و اللا ايه؟

[Sherief AbdelWahab]

شائعات وتوقعات :

أيام زقزوق في الوزارة معدودة ، وأسهم عبد المعطي بيومي آخذة في الصعود لعلاقته الممتازة بلجنة السياسات والطرق الصوفية الحليف الجديد للنظام ..

حسام بدراوي قادم بسرعة الصاروخ لوزارة الشباب ، البلتاجي لن يستمر طويلاً بعد الانتقادات العنيفة جداً لتعامله مع ملف كأس الأمم الأفريقية وفضيحة بطولة العالم للجودو..

صحف رشحت فاروق حسني لتولي وزارة الإعلام ، بينما يتولى الفقي حقيبة الثقافة!..

خلص الكلام

[أسد]

في تقديري سيكون الوضع كالتالي .. وسأستخدم تعبير "الطفطف" والذي اختاره سي السيد وعجبني

أحمد نظيف ... لسه قاعد شوية

رشيد محمد رشيد .. لسه قاعد

أنس الفقي .. لو فيه وزارة إعلام سيبقى .. لو ألغيت .. يبقى طفطف .. أو نشوف له حاجة تانية

ممدوح البلتاجي .. طفطف أكيد

فاروق حسني : طفطف ..

محمود أبو الليل وزير العدل : طفطف ...

محمود محي الدين ( إستثمار ) : قاعد .. لسه بدري قوي ..

محمد إبراهيم سليمان : المفروض ... طفطف

حبيب العادلي ... طفطف ..

حسين طنطاوي : مش طفطف .. مساعد رئيس الجمهورية

أحمد شفيق ( طيران ) : مش طفطف ..

أحمد الليثي ( زراعة ) : قاعد شوية كمان.

- ماجد جورج ( البيئة ) : مش طفطف

- عصام شرف ( مواصلات ) : ياريت يكون طفطف.

- أحمد المغربي ( سياحة ) طفطف .. فاشل . خليه في البيزنس بتاعه كفاية.

- سامح فهمي ( بترول ) : مش طفطف

- طارق كامل ( الاتصالات ) : مش طفطف

- محمد عبد الرحيم شحاتة ( تنمية محلية ) : باقي ويمكن يكون في وزارة تانية

أحمد عثمان ( تنمية ادارية ) : مش طفطف.

- أحمد أبو الغيط ( خارجية ) : طفطف .. أكيد .

- عمرو عزت سلامة ( تعليم عالي وبحث علمي ) : مش طفطف...

- أحمد جمال الدين موسى ( تربية وتعليم ) : مش طفطف .

- محمد عوض تاج الدين ( صحة وسكان ) : طفطف..

- فايزة أبو النجا ( تعاون دولي ) : قاعده..

- حسن أحمد يونس ( كهرباء وطاقة ) : باقي.

- سيد مشعل ( إنتاج حربي ) : باقي.

- أمينة الجندي ( تأمينات إجتماعية ) : طفطف .

- محمود أبو زيد ( موارد مائية وري ) : باقي

- محمود زقزوق ( اوقاف ) : طفطف .

- أحمد أحمد العماوي ( قوى عاملة وهجرة ) : طفطف

- يوسف بطرس غالى ( مالية ) : باقي .. آل مبارك واصحابهم وحبايبهم مبسوطين منه قوي

- حسن علي خضر ( تموين وتجارة داخلية ) : طفطف .

- كمال الشاذلى ( شؤون مجلس الشعب ) : طفطف

[se_ Elsyed]

سيد مشعل ( إنتاج حربي ) : ده بقى بالذات هايفضل لحشد جموع الشعب العامله في قطاع المصانع الحربية عشان إنتخابات مجلس الشيعب في نوفمبر الجاي.

الجيش لا ينتخب ... مش كده و اللا ايه؟

لا يا عم شاو شاو

دول مدنيين وشغالين في المصانع الحربية ..

بس إوعى تفتكر والعياذ بالله إنهم بيصنعوا دبابات ومدافع وحاجات من دي .. حاشا وكلا ...

دول فضلة خيرك بيعملوا مراوح وبوتجازات . وعليهم شوية سخانات بتشتغل بالغاز إنما إيه .. تقولي ياباني .. أقولك لأ مش هو ... :D

[se_ Elsyed]

كده يا أسد ؟!!!

ما كنش العشم .. بقى عايز تركب كيمو الطفطف ... كيمو اللي لحم أكتاف البلد من خيره ... كيمو اللي بالع البلد ومضلل عليها بكرشه ... كيمو اللي بقى حتة من مصر ومصر بقت حتة منه ... بقى دي أخرتها يا بلد ... صحيح أخرة خدمة الغُز .. غزة في جنبه ؟

حسين طنطاوي : مش طفطف .. مساعد رئيس الجمهورية

بلاش كلمة مساعد دي أحسن معناها طفطف برضوا في قاموس مبارك المحيط :D ... فاكر لما حب يفسح أبو غزاله عمل فيه إيه ؟

إنت قصدك يبقى نائب رئيس جمهورية ؟

تصدق بالله .. مبارك معودنا على مفاجأت مرعبه .. ولا أستبعد على الإطلاق إنه يعملها .. عشان تبقى ساعتها كملت وخربت وبقت خل مُركز .

محمود أبو زيد ( موارد مائية وري ) : باقي

شكراً يا اسد .. ونعمه الرجوله ونعمه الجدعنه .. أما ألحق أبلغ أخويا وأبشره

[عبدوس الوزير]

أنس الفقي مستحيل يركب الطفطف ولا الترسكل. الشائعات تقول إنه من البطانة الداخلية لشلة جمال مبارك ونفوذه يقوى يوم بعد يوم، بدليل عدم تأثره بفضائح وزارة الشباب والرياصة وتوليه وزارة الإعلام التي لا يمكن أن تهمش في ظل حكمنا الشمولي.

بل إن هناك من يقول إنه احتمال يمسك الوزارة المقبلة.

والسلام.

[أسد]

بلاش كلمة مساعد دي أحسن معناها طفطف برضوا في قاموس مبارك المحيط  ... فاكر لما حب يفسح أبو غزاله عمل فيه إيه ؟

إنت قصدك يبقى نائب رئيس جمهورية ؟

تصدق بالله .. مبارك معودنا على مفاجأت مرعبه .. ولا أستبعد على الإطلاق إنه يعملها .. عشان تبقى ساعتها كملت وخربت وبقت خل مُركز .

ماهو أنا قصدي كده برضه ....

قصدي طفطف

[se_ Elsyed]

س س

نسيت رشيد محمد رشيد بتاع الصناعه باين مش كده برده

<{POST_SNAPBACK}>

لامؤخذه يا إيمي يا بنتي العتب على النظر

أصل بيني وبينك أنا مش شايف صناعة في مصر غير السيراميك وإبر بوابير الجاز ..

[kotoz9]

متهيألى ان عدد الوزراء فى مصر اكتر من كدة....

يعنى فيه وزارة الكهرباء مش فاكر الوزير كان اسمه ايه؟؟؟؟

وفيه وزارة تانية اسمها التخطيط مش عارف مين برضه الوزير بتاعها

وكمان فيه وزير لشئون مجلس الشورى اسمه.......كان على طرف لسانى دلوقتى معلش حالة من النسيان متمكنة منى دلوقتى :D

س س

نسيت رشيد محمد رشيد بتاع الصناعه باين مش كده برده

تصحيح بس.......انا اظن ان رشيد ده هو وزير التجارة الخارجية مش الصناعة.

ووزير الصناعة اسمه على الصعيدى.

على العموم مش فارقة صناعة ولا تجارة كلها اسماء تطلق على الوزارات من غير ان يكون لها اى مردود على الواقع.

يعنى احنا كنا شوفنا صناعة ولا تجارة خارجية....يالا اهو كله همبكة وضحك على الدقون.

[se_ Elsyed]

يعنى فيه وزارة الكهرباء مش فاكر الوزير كان اسمه ايه؟؟؟؟

ماهو موجود .. إسمه حسن يونس يا باشا وإسمه فوق أهناك أهو

انا اظن ان رشيد ده هو وزير التجارة الخارجية مش الصناعة

الأتنين وحياتك .. إسمها وزارة الصناعة والتجارة الخارجية .

وكمان فيه وزير لشئون مجلس الشورى اسمه.......كان على طرف لسانى دلوقتى معلش حالة من النسيان متمكنة منى دلوقتى

مفيد شهاب سعادتك يا قطز باشا

[أسد]

مفيد شهاب ..

طفطف

أحمد فتحي سرور .. طفطف

[shawshank]

أحمد فتحي سرور .. طفطف

<{POST_SNAPBACK}>

هوه سرور بيتعين؟

[kotoz9]

يعنى فيه وزارة الكهرباء مش فاكر الوزير كان اسمه ايه؟؟؟؟

ماهو موجود .. إسمه حسن يونس يا باشا وإسمه فوق أهناك أهو

انا اظن ان رشيد ده هو وزير التجارة الخارجية مش الصناعة

الأتنين وحياتك .. إسمها وزارة الصناعة والتجارة الخارجية .

وكمان فيه وزير لشئون مجلس الشورى اسمه.......كان على طرف لسانى دلوقتى معلش حالة من النسيان متمكنة منى دلوقتى

مفيد شهاب سعادتك يا قطز باشا

<{POST_SNAPBACK}>

شكرا على التوضيح سعادة الباشا......

[سقراط المصري]

بما ان مبارك لايتعلم من أخطائه ، وبما ان مبارك يهوي نظام خالف تعرف ، وبما ان مبارك لايغير استراتيجية تفكيره.

فأتوقع ان معظم الوجوه الدميمه ستظل في التشكيل القادم مع لعبه الكراسي الموسيقيه.

سقراط

[أبو حميد]

سمعن أن فاروق حسني تقدم بإستقالته

أول طفطف وعقبال الباقي